IKAKAWHAA'G DUHA NGA DOMINGGO

IKAKAWHAA'G DUHA NGA DOMINGGO

a. BASAHON I

Jer. 20: 2-9

Kinutlo gikan sa basahon ni Propeta Jeremias.

Ginoo, gilimbongan Mo ako mas gamhanan Ka kay kanako, busa wala akoy dag-anan. Ang tanan nagbiaybiay kanako, ug gikataw-an ako nila sa tibuok adlaw. Inigsulti ko, ug mosinggit ako sa pag-ingon, "Kamatay! Kalaglagan!" Ginoo, gibiaybiay ug giyam-iran ako nila kanunay kay gisangyaw ko man ang Imong mensahe. Apan kon moingon gani ako nga kalimtan ko ang Ginoo ug dili na ako magsangyaw sa Iyang ngalan, bation ko nga daw kalayo nga nagdilaab ang Imong mensahe sulod sa akong kasingkasing ug kabukogan. Naluya akog pinugong niini, ug dili ko na gayud kini kapugngan.

Ang Pulong sa Ginoo.

b. SALMO RESPONSORYO

Salmo 63:2,3-4,5-6,8-9

Tubag (R)- Ang akong kalag giuhaw Kanimo, O Ginoo, akong Dios.

O Dios, Ikaw ang akong Dios nga akong gipangita; Kanimo nangandoy ang akong unod ug giuhaw ang akong kalag sama sa yuta nga uhaw, walay kinabuhi ug walay tubig. (R)

Sa ingon nagsud-ong Kanimo diha sa santuwaryo aron pagtan- aw sa Imong gahum ug sa Imong himaya. Kay ang Imong kalooy mas maayo kay sa kinabuhi; ang akong mga ngabil maghimaya Kanimo. (R)

Sa ingon niini dayegon ko Ikaw samtang buhi pa ako, sa pagbayaw ko sa akong mga kamot, sangpiton ko ang Imong ngalan. Ingon sa kabuhong sa usa ka bangkite mabusog ang akong kalag. ug sa masadya nga mga ngabil magdayeg Kanimo ang akong baba. (R)

Ikaw ang akong hinabang, ug diha sa landong sa Imong mga pako nagasinggit ako sa kalipay. Ang akong kalag nagadangop pag-ayo Kanimo; ang Imong tuong kamot nagasapnay kanako. (R)

c. BASAHON II

Rom. 12: 1-2

Kinutlo gikan sa sulat ni San Pablo ngadto sa taga Roma.

Mga igsoon, tungod sa dakong kalooy nga gipakita sa Dios kanato, hangyoon ko kamo sa pagtugyan sa inyong kaugalingon ngadto sa Dios, ingon nga buhing halad, balaan ug makapahimuot Kaniya. Mao kini ang matuod nga pagsimba nga angay ninyong ihalad. Ayaw kamo pagpahiuyon niining kalibutana, kondili ipabag- o sa Dios ang inyong panghunahuna aron masayran ninyo ang kabubut-on sa Dios unsay maayo, hingpit ug makapahimuot Kaniya.

Ang Pulong sa Ginoo.

d. EBANGHELYO

Mt. 16: 21-27

Ang Santos nga Ebanghelyo sumala ni San Mateo.

Sukad niadtong higayona, giingnan ni Jesus ang Iyang mga tinun-an sa tin-aw gayud nga pagkasulti: "Kinahanglan nga moadto Ako sa Jerusalem ug paantuson Ako pag-ayo sa mga punoan sa mga Judio ug sa mga pangulong pari, ingon man sa mga magtutudlo sa Balaod. Patyon Ako nila, apan sa ikatulo ka adlaw banhawon Ako." Tungod niini, gidala siya ni Pedro pahilayo sa uban ug gibadlong, "Dili unta kini mahitabo, Ginoo!" Miliso si Jesus miingon kang Pedro: "Pahawa, Satanas! Nakababag ka Kanako, kay ang imong hunahuna, hunahuna sa tawo ug dili sa Dios!"

Unya miingon si Jesus sa Iyang mga tinun-an: "Ang buot mahimong Akong tinun-an, kinahanglan nga hikalimtan niya ang iyang kaugalingon, pas-anon niya ang iyang krus, ug mosunod siya Kanako. Kay ang buot magluwas sa iyang kaugalingong kinabuhi, mawad-an hinoon niini; apan ang mawad-an sa iyang kinabuhi tungod Kanako, makabaton niini. May makuha ba ang tawo kon maangkon niya ang tibuok kalibutan apan kawad-an siya sa iyang kinabuhi? Wala gayud! Ang tawo walay bisan unsa nga ikahatag aron mabawi niya ang iyang kinabuhi. Kay ang Anak sa Tawo hapit na moabot uban sa himaya sa Iyang Amahan, kinuyogan sa Iyang mga anghel, ug unya balosan Niya ang tagsatagsa sumala sa Iyang nabuhat.

Ang Ebanghelyo sa Ginoo.

e. KOMENTARYO

Tema: Kalimti ang Imong Kaugalingon ug Sunod Kanako.

Usa sa mga panghitabo sa atong kinabuhi nga dili gayod nato malikayan mao ang realidad o kamatuoran sa kamatayon. Kitang tanan makasinati gayod niining maong kamatuoran nga walay gipili bisan og si kinsa ug unsa pa kita ka adunahan ug inila sa katilingban nga moabot gayod sa atong kinabuhi nga wala nato damha.

Kitang tanan gusto makalingkawas niining maong kamatuoran apan kitang tanan usab gusto gayod maluwas ug makaangkon sa kinabuhing tunhay uban ang atong Amahan. Apan unsaon man nato pag-angkon sa kinabuhing tunhay kon dili kita mamatay?

Adunay usa ka estorya gikan sa usa ka libro ni Fuerbach, bahin sa magtiayon nga gigasahan sa Ginoo og usa ka buok anak. Tungod kay gipangga pag-ayo ang ilang anak, ang tanan gayod nga panginahanglan ilang gihatag ilang anak. Usa ka higayon niana, ang maong magtiayon nagpatawag og mga "insurance company representative" aron ikapadayag ang ilang nagkalainlaing seguridad nga gitanyag sa ilahang nagkalainlaing kompanya. Ang una nagtanyag og kasegurohan nga gikan sa "basket hangtod sa casket". Ang ikaduha nagpasalig og gikan sa "delivery hangtod cemetery". Apan, kung dili pa gayod kontento niining maong tanyag, anaa silay usa ka tawo nga makahatag gayod ug tinuod nga seguridad sa ilang anak ug siya mao si Jesus. Siya nagtanyag og kasegurohan o seguridad gikan sa "pagbunyag hangtod sa pagkabanhaw".

Diha sa atong atong Ebanghelyo, si Jesus nagpasidaan sa iyahang pag-antus ug kamatayon sa iyang mga tinun-an. Si Jesus nagkanayon, "Ang buot mahimong akong tinun-an kinahanglan nga hikalimtan niya ang iyang kaugalingon, pas-anon niya ang iyang krus, ug mosunod siya kanako.

Kay ang buot magluwas sa iyang kinabuhi tungod kanako makabaton niini. May makuha ba ang tawo kon maangkon niya ang tibuok kalibutan

apan kawad-an siya sa iyang kinabuhi?"

Tinuod gayod, adunay mga higayon sa atong kinabuhi nga diin atong gipalabi ang mga kalibutanong bahandi ug mga kahilayan. Dili dautan ang pag-angkon sa mga butang nga kalibutanon ilabi na kung kini bunga sa atong mga pagpaningkamot. Ang tanan maayo ug grasya sa Ginoo. Apan, ang dili maayo kung kining maong mga butang mao nay nahimong sentro diha sa atong kasingkasing ug hunahuna ug nalimtan na nato ang Ginoo nga maoy tinubdan niining tanan. Ug angay natong hinumduman nga ang tanang butang nga atong nahuptan lumalabay lamang ug dili gayod makahatag og matuod nga kasegurohan. Si Kristo nag-antus ug namatay sa krus, pinaagi sa Iyang dugo kita nahatagan og langitnong seguridad nga dili gayod ikahatag sa kalibutan. Apan kita nagpadayon sa pagpaulipon sa mga materyal nga butang nga atong giila nga maghatag kanato og kasegurohan nga kasagaran maoy atong giila nga ginoo sama sa kwarta, gahum ug uban pa. Hinaut unta nga atong hinumduman kanunay ug puy- an diha sa atong adlaw-adlaw nga pagkinabuhi ang mga pulong ni Kristo nga nagkanayon, "Ang mawad-an sa iyahang kinabuhi tungod kanako makabaton niini". Hinaut pa unta.

Giya alang sa pamalandong:

1. Unsa man ang gihatagan nako og bili sa akong kinabuhi karon?

2. Para kang kinsa ug asa man ang akong mga paningkamot?

3. Makahatag ba kini og kaluwasan alang sa akong kinabuhi?

f. PANGALIYA

Pangulo: Mag-ampo kita sa atong Langitnon nga Amahan nga sa kanunay mosalig kita sa Iyang panabang ug kalooy. Sa matag pag-ampo kita motubag: 

GINOO, DUNGGA ANG AMONG PAG- AMPO.

1. Sa hiniusang pagtoo, among ihalad ang among mga pagdayeg Kanimo nga ang mga nagdumala sa Simbahan ang Santo Papa, mga Obispo ug kaparian, magmakanunayon ug matinud-anon sila sa ilang misyon isip puli ni Kristo dinhi sa kalibutan. Mag-ampo kita.

2. Sa hiniusang gugma, bag-oha ug lamdagi kanunay ang gitugyanan sa pagdumala sa tanang nasud aron magmatinud-anon sila sa ilang pagserbisyo sa Imong katawhan. Mag-ampo kita.

3. Sa tumang pagsalig nga sa kanunay magauban kanamo ang Imong presensya, farhatagi og kalig-on ug kadasig ang nag- antus namong mga igsoon nga dili sila mawad-an sa paglaum nga makadawat sila sa Imong grasya pinaagi sa mga tawo nga migahin og panahon ug bahandi aron sa pagtubag sa ilang panginahanglan. Mag-ampo kita.

4. Sa among hugot nga paglaum sa Imong mahigugmaong gahum amo untang masinati ang matuod nga kalinaw, gugma ug kaangayan diha sa among paglawig isip Simbahan. Mag-ampo kita.

5. Sa Imong dakung kalooy O Ginoo, among ihalad ang among mga kaigsoonan nga mipanaw na sa laing kalibutan nga makadangat na sila sa Imong langitnong pinuy-anan. Mag-ampo kita.

6. Sa kahilum among ihalad karon ang among kaugalingong katuyuan.

Pangulo: Dios sa gugma dungga ang among mga pag-ampo ug tabangi kami sa pagsunod sa Imong dalan ug pagpuyo sa Imong kahayag ug kamatuoran, si Jesukristo Imong anak ug among Ginoo. Amen.