KATISISMO SA PAGPANGALAWAT

KATISISMO ALANG SA UNANG PAGPANGALAWAT

IMMACULATE CONCEPTION PARISH

MINTAL DAVAO CITY

DUHA KA BAHIN

1. UNANG BAHIN: ANG SAKRAMENTO SA PENITENSYA O PAKIG-ULI O PAGKUMPISAL

2. IKADUHANG BAHIN: ANG SAKRAMENTO SA EYUKARISTIYA

UNSAY KAHULOGAN O IPASABOT SA PULONG SAKRAMENTO?

>Gikan kini sa duha ka pulong: una-SACRA- ang pasabot BALAAN o SAGRADO. Ikaduha-MENTO- ang kahulogan o pasabot TIMAAN.

Ang pulong SAKRAMENTO nagpasabot kini nga BALAAN NGA TIMAAN.

•ANG NAKADAWAT O MAKADAWAT NIINING SAKRAMENTO NAHIMONG BALAAN O MAHIMONG BALAAN.

• Mga bata gusto ba mo nga mahimong balaan? Sa tinuod lang mga bata nahimo na kamong mga balaan kay nabunyagan naman mo, di ba?

• Ang bunyag mao ang unang sakramento nga atong nadawat.

• Diha sa sakramento sa buyag nahimo kitang balaan kay pinaagi sa bunyag nahimo kitang mga anak sa Dios.

• Busa mga balaan na kita kay mga anak naman kita sa Ginoo.

• Karon mga bata maghisgot kita sa mga sakramento nga dugang makapabalaan kanato isip mga anak sa Dios.

• Kini mao ang sakramento sa PAGKUMPISAL ug ang sakramento sa EYUKARISTIYA.

ANG SAKRAMENTO SA PENITENSYA O PAKIG-ULI O PAGKUMPISAL

UNSAY MGA TAWAG O NGALAN NIINING MAONG SAKRAMENTO?

1. SAKRAMENTO SA PAGBAG-O

2. SAKRAMENTO SA PENITENSYA

3. SAKRAMENTO SA PAGSUGID

4. SAKRAMENTO SA PAGPASAYLO

5. SAKRAMENTO SA PAKIGHIULI

1. SAKRAMENTO SA PAGBAG-O:

Kini nagpasabot nga sa matag kumpisal nato mabag-o kita. Nganu man nga mabag-o kita? Tungod kay mapapas o ma-erase ang atong mga sala. Mapasaylo kita sa Ginoo. Mahinlo kita sa atong mga sala.

•Mabag-o gayod kita kay kining maong sakramento timailhan nga kita mibalik sa Ginoo. Kining maong sakramento magdala kanato paduol sa Ginoo, kay tungod sa sala nahilayo man kita sa Ginoo.

Sa atong pagsaulog niining maong sakramento mahibalik kita sa Ginoo.

2. SAKRAMENTO SA PENITENSIYA.

Ang penitensiya mao kini ang ipabuhat sa pari paghuman og kumpisal. Moingon pari, "alang sa imong penitensiya" o moingon lang, "karon mag-ampo ka og usa ka Amahan Namo" o "one Our Father" o bisan unsang pag-ampo nga ipa- ampo sa pari kaninyo. Sa ato pa, ang penitensiya mao ang pag-ampo.

• Kung kita mag-ampo, asa man kita makig- estorya? Makig-estorya kita sa Ginoo kay adto man kita mag-ampo sa Ginoo.

Sa ato pa, kun kita maghimo sa penitensiya nakig-estorya diay kita sa Ginoo. Pasabot nga nagpaduol kita sa Ginoo. Kun duol kita sa Ginoo, matakdan gayod kita sa lyang kabalaan, kay ang Ginoo balaan man kaayo.

3. SAKRAMENTO SA PAGKUMPISAL

Kini gitawag og sakramento sa pagkumpisal tungod kay atong mang isulti ang atong mga sala ngadto sa Ginoo pinaagi sa pari. Sa atong pagsaysay/sulti sa atong mga sala atong giila og gidayeg ang kabalaan ug ang kalooy sa Ginoo.

•Kini nagkahuloagan nga kita mitoo ug misalig sa Ginoo. Kana bitaw'ng maka sala kita balay, dili man ta mosulti sa atong mama o papa, nganu man, kay mahadlok man ta bunalan og kasab-an. Apan sa atong pagkumpisal dili masuko ang Ginoo, dili kita kasuk-an sa Ginoo. Kundili, malipay ang Ginoo kay mibalik man kita kaniya, nagpaduol man kita kaniya. Dili kita kasuk-an, dili kita silutan sa Ginoo, kundili lya kitang PASAYLOON, Iya kitang BENDISYONAN.

"Wow", pagkanindot diay kung kita mangumpisal.

4. SAKRAMENTO SA PAGPASAYLO

Ang ugat pulong- "root word" sa pulong PAGPASAYLO mao ang pulong "SAYLO". Unsay kahulogan niini, SAYLO- pasabot ipalabay lang dili magpundo. Sa atong pagkumpisal sa atong mga sala, ang atong mga sala mosaylo lang. Ang atong mga sala mapapas, ma-erase. Ang mahitabo nga kita mabag-o, mahinlo, mabalaan.

5. SAKRAMENTO SA PAKIG-ULI

Ang ugat pulong- "root word" sa pulong pakig-uli mao ang pulong "ULI." kung kita molakaw sa eskwelahan, mall, coastal road o bisan asa man ugaling, dili man kita mupoyo didto sa atong gisuroyan. Mouli gayod kita. Asa man kita mouli? Mouli kita sa atong balay.

Sa atong pagpakasala milakaw kita palayo sa Ginoo. Apan kun kita mokumpisal kita mibalik o mipauli balik sa Ginoo. Kita diay nag-"home coming" sa Ginoo. Dili kalimtan nga diha bunyag kita nahimong mga anak sa Dios. Siya ang atong Amahan, mao nga sa atong pagkumpisal uli diay kita sa balay sa Ginoo.

NGANUNG KINAHANGLAN MAN KITANG MANGUPISAL?

TUNGOD KAY KITA NAKA SALA!!!

DUHA KA MATANG/KLASE SA SALA:

1. SALA NGA PANULONDON-:ORIGINAL SIN KINING MAONG SALA ATONG NAPANUNOD O NAAMBITAN GIKAN SA ATONG UNANG MGA GINIKANAN NGA MAO SILA ADAN UG EVA.

@STORY OF THE FALL OF MAN! (GEN. 3.

•KINING MAONG SALA MAPAPAS O MAHINLOAN PINAAGI SA ATONG BUNYAG. MAO MAN GANI NGA KINAHANGLAN GAYOD NGA MABUNYAGAN ANG USA TAWO ARON MAHINLOAN SA SALANG PANULONDON.

2. SALA NGA NABUHAT SA TAWO- "PERSONAL SIN"

SALA NGA KITA NA GAYOD NAGHIMO!

KINI ADUNAY DUHA KA KLASE: Ang Mortal Sin-SALANG MORTAL ug Ang Venial Sin- Sala nga dili daku o dili grabe nga sala.

•KINING MAONG KLASE SA SALA MAPAPAS O MAPASAYLO PINAAGI SA PAGKUMPISAL.

SUMMARY

1. Unsay mga tawag sa Sakramento?

2. Nganung kinahanglan man kitang mangumpisal?

3. Unsa ang duha ka klase sa Sala? 4. Kang kinsa nato isulti/isugid ang atong mga sala?

TUDLOAN ANG MGA BATA UNSAON PAGPANGUMPISAL SA PARI

1. Moduol unya molingkod o moluhod

2. Manguros Dungan sa pag-ingon: Sa nagalan sa Amahan ug sa Anak ug sa Espiritu Santo.

3. Moingon ang bata: "Bendisyoni o panalangin ako padre kay ako nakasala, mao kini ang akong mga sala", (isulti o isaysay sa bata ang iyang mga sala).

4. Paghuman og sulti sa mga sala ang bata moingon: "mao kadto ang akong mga sala padre".

5. Maghulat ug maminaw ang bata sa maymay sa pari. (ipahinumdom sa bata nga dili motindog ug molakaw paghuman og kumpisal).

6. Paminawun sa bata kon unsa ang penitenisya nga ihatag sa pari.

7. Hulaton ang absolution o pagpasaylo sa sala.

8. Magbantay sa pagpanalangin sa pari ug manguros inig sulti sa pari: "sa ngalan sa Amahan ug sa Anak ug sa Espiritu Santo.

9. Human motindog ug moadto sa dapit nga gigahin alang sa pag-ampo ug didto ampoon o buhaton ang penitensiya.

"Ang katekista sama sa usa ka parola nga mag-iwag sa kangitngitan"