IKANAPULO'G UPAT NGA DOMINGGO

IKANAPULO'G UPAT NGA DOMINGGO

a. BASAHON I

Zac. 9:9-10

Kinutlo gikan sa basahon ni Propeta Zacarias.

Pagmaya sa kinasingkasing, O anak nga babaye sa Sion; singgit sa kalipay, O anak nga babaye sa Jerusalem. Ania, ang imong hari moabot kanimo; matarung Siya nga manluluwas. Mapaubsanon, ug nagakabayo sa usa ka asno, bisan sa usa ka nati sa asno.

Wad-on niya ang karwahe sa gubat nga gikan sa Efraim, ug pamatyon niya ang kabayo gikan sa Jerusalem; ug bunggoon niya ang pana nga iggugubat: ug isangyaw niya ang kalinaw ngadto sa mga nasud. Ang iyang pagmando mokaylap gikan sa dagat ngadto sa dagat, ug gikan sa Suba hangtud sa kinatumyan sa kayutaan.

Ang Pulong sa Ginoo.

b. SALMO RESPONSORYO

Salmo 145:1-2,8-9,10-11,13-14

Tubag (R) Dayegon ko ang Imong ngalan sa kahangturan, akong hari ug akong Dios.

Ibayaw ko Ikaw, O Dios ug hari ko, ug dayegon ko ang Imong ngalan hangtud sa kahangturan. Matag adlaw dayegon ko Ikaw, ug himayaon ko ang Imong ngalan hangtud sa kahangturan. (R)

Ang Ginoo maayo ug maloloy-on, dugay nga masuko ug daku sa kalooy. Ang Ginoo maayo alang sa tanan ug maloloy-on sa tanan Niyang mga binuhat. (R)

Papasalamata Kanimo, O Ginoo, ang tanan mong mga buhat ug padayega Kanimo ang Imong buotang mga alagad. Pahisgota sila bahin sa himaya sa Imong Gingharian ug pasultia sila mahitungod sa Imong gahum. (R)

Ang Ginoo matinumanon diha sa tanan Niyang mga pulong ug balaan diha sa tanan Niyang mga buhat. Ang Ginoo nagpabangon sa tanan nga napukan ug nagapatindog sa tanan nga nangapilay. (R)

c. BASAHON II

Roma 8: 9, 11-13

Kinutlo gikan sa sulat ni San Pablo ngadto sa taga Roma.

Wala na kamo magkinabuhi nga minandoan sa tawhanong kinaiya kondili sa Espiritu, kon tinuod man ugaling nga ang Espiritu sa Dios anaa na sa inyong kasingkasing. Kadtong walay Espiritu ni Kristo, dili iya ni Kristo. Kon nagpuyo sa inyong kasingkasing ang Espiritu sa Dios nga nagbanhaw kang Jesus, Siya nga nagbanhaw kang Kristo mohatag usab og kinabuhi sa inyong mga lawas pinaagi sa Iyang Espiritu nga anaa kaninyo.

Busa, mga igsoon, duna kita'y katungdanan apan dili sa pagkinabuhi sumala sa tawhanong kinaiya. Kon magkinabuhi kamo minandoan sa tawhanong kinaiya, mamatay gayud kamo: apan kon pinaagi sa Espiritu patyon ninyo ang tawhanong binuhatan, mabuhi gayud kamo.

Ang Pulong sa Ginoo.

d. EBANGHELYO

Mt. 11: 25-30

Ang Santos nga Ebanghelyo sumala ni San Mateo.

Unya si Jesus miingon: "O Amahan, Ginoo sa langit ug sa yuta! Nagpasalamat Ako Kanimo kay gipakita Mo man ngadto sa mga walay kahibalo ang Imong gililong sa mga maalamon ug sa mga makinaadmanon. Oo, Amahan, nahimo kini kay mao may Imong gusto ug pagbuot.

Ang Akong Amahan naghatag Kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa Anak, ug kadtong mga tawo nga buot sa Anak nga makaila sa Amahan.

"Umari kamo Kanako, kamong tanan nga gikapuyan pagdala sa inyong mabug-at nga palas-onon, ug papahulayon Ko kamo.

Isangon ang Akong yugo diha kaninyo ug sunda ninyo Ako, kay malumo Ako ug mapaubsanon sa espiritu, ug makapahulay kamo. Sayon ang yugo nga Akong ihatag kaninyo, ug gaan ang ipapas- an ko kaninyo."

Ang Ebanghelyo sa Ginoo.

e. KOMENTARYO

Tema: Si Kristo ang atong Paglaum ug Kalinaw.

Sa atong kapanahunan karon dili na kaayo kita makakita og mga tawo nga nagpas-an og bug-at kaayo nga butang o kargador tungod kay anaa na kita karon sa panahon nga moderno na kaayo ang teknolohiya. Daghan na kaayo ang mga sakyanan nga bisan unsa ka duol ang atong adtoan mosakay gayod kita. Mao kini ang gihatagan og pagpahinumdum kanato niining ikanapulo og upat nga Dominggo sa Ordinaryong Panahon.

Diha sa unang pagbasa, gisaysay ni Propeta Zacarias nga dili na kita mawad-an og paglaum kay moabot na ang Hari nga magluwas kanato gikan sa mga dautan ug maghatag siya og kalinaw sa tibuok nasod. Si Propeta Zacarias miingon "Paglipay kamong mga anak sa Jerusalem kay moabot na ang atong gisaligan sa atong kaluwasan." Ug diha usab sa ikaduhang pagbasa sa sulat ni San Pablo ngadto sa taga Roma nagpahinumdum kanato nga wala kita mabuhi sa lawas lamang apan sa Balaang Espiritu nga mipuyo uban kanato. Klaro kaayo niining duha ka mga pagbasa nga dili kita angay nga maguol kay anaa ang Ginoo nga atong gisaligan sa atong taliwala.

Sa atong Ebanghelyo karon, dako ang paglaum ang gihatag ni Jesukristo kanatong tanan. Nasayod na kitang daan kon unsang matang sa kalibutan ang atong nahimutangan karon. Adunay panahon nga mawad-an kita og paglaum tungod sa mga kagul-anan, problema, ug mga kasakitan sa atong kinabuhi. Daghan kaayo kita og mahunahunaan nga buhaton aron kahatagan og kasulbaran ang mga problema sa atongkinabuhi. Apanusahaymapakyas kita. Dinhi lang ba kutob ang atong mga panghunahuna? Mawad-an ba dayon kita og paglaum? Nahikalimot kita pagsangpit sa panabang ug pagduol sa atong Langitnong Amahan. Mao kini ang kasagaran nga atong makalimtan, kay misalig ra kita sa atong kaugalingong katakus. Nagtuo kita nga aduna kitay gahum sa pagsulbad niini. Si Kristo miingon, "Umari kamo kanako, kamong tanan nga gikapuyan ug gibug-atan sa inyong gipas- an, ug papahulayon ko kamo. Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. Sayon ang yugo nga akong ihatag kaninyo, ug gaan ang ipapas-an ko kaninyo" (Mt. 11:28-30). Nagpasabot nga ang Ginoo ug nga Siya lamang gayod ang kalinaw ug paglaum sa atong kinabuhi, walay lain nga makahatag og katagbawan sa atong gipangita.

Mga igsoon ko diha kang Kristo, niining ikanapulo og upat nga Dominggo sa Ordinaryong Panahon, nagpahinumdum nga si Kristo mao ang atong bugtong paglaum sa atong mga pag- antus sa kinabuhi ug siya ang naghatag kalinaw nga dugay na natong gipangita. Gihagit kitang tanan sa pagdangop Kaniya, kay Siya ang atong paglaum ug kalinaw.

Giya alang sa pamalandong:

1. Sa akong mga kagul-anan ug kasakit, kinsa ang akong giduolan?

2. Midangop ba ako kang Kristo nga mao ang paglaum ug kalinaw sa akong kinabuhi?

f. PANGALIYA

Pangulo: Mag-ampo kita sa Amahan nga makabaton kita sa hiyas nga matoohon aron mahingpit ang atong pagsalig sa Iyang panabang. Sa matag pangamuyo kita moingon: GINOO, PATALINGHUGI KAMI.

1. Nga ang nagdumala sa Simbahan ilabina sa atong Santo Papa, mga Obispo ug mga kaparian nga magmakanunayon unta nilang isangyaw ug puy-an ang Pulong sa  Dios agi og sumbanan sa tanang katawhan. Mag-ampo kita.

2. Nga ang mga lideres sa tanang kanasuran, mogamit sa ilang kaalam ug kahibalo sa husto nga paagi aron makahatag sila og kalamboan sa tanang katawhan nga puno sa kaangayan ug gugma. Mag-ampo kita.

3. Nga ang atong mga kaigsoonan nga nag- antus sa nagkalainlaing mga pagsulay sa kinabuhi mapaubsanon unta nilang ihalad ngadto sa Dios nga maoy bugtong makahupay ug makahatag sa ganti nga dili matupngan. Mag-ampo kita.

4. Nga ang tanang sakop sa atong GKK (Gagmay'ng Kristohanong Katilingban) ilabina ang mga lideres, mapaubsanon untang mopadayag sa kahibalo nga nahuptan alang sa kalamboan sa atong katilingban. Mag-ampo kita.

5. Nga ang atong mga mahal sa kinabuhi nga mihalin na ning kalibutana, makadangat na unta sa gingharian nga gitagana kanila sa Amahan. Mag-ampo kita.

6. Nga ang atong kaugalingon nga katuyuan atong i-ampo sa hilum.

(Kini nga bahin wala nahisulat sa katilingbanong pag ampo 3rd edition busa nagkuha nalang ko sa LITURHIYA) ↘️

Pangulo: Dios Amahan, gikahimut- an mo ang pagpadayag sa mga misteryo ngadto sa mga walay alamag. Mag- pabilin unta kaming matinud-anon sa mga pagtulon-an ni Cristo nga among Ginoo. Amen.