Ikanapulo'g Pito nga Domingo sa Tuig

Ikanapulo'g Pito nga Domingo sa Tuig

PASIUNA

Hulyo 30, 2023

Maayong buntag/hapon mga igsuon diha ni Cristo. Ania na kita sa ikanapulo'g pito nga Domingo sa Ordinaryong Panahon. Karong Domingoha usab mao gipasidunggan ang atong mga igsuon nga Filipino nga nag-misyon sa laing nasud, o kon Fil-Mission Sunday.

Ang Unang Pagbasa gikuha gikan sa Unang Basahon sa mga Hari. Dinhi atong madungog nga mipakita ang Ginoo kang Solomon ug mihatag kaniya og kaalam.

Ang Ikaduhang Pagbasa gikuha gikan sa Sulat ni San Pablo ngadto sa taga-Roma. Si San Pablo mipahinumdom sa mga taga Roma nga "sa tanang butang nagbuhat ang Dios alang sa kaayohan niadtong nahigugma Kaniya ug sa iyang mga tinawag sumala sa iyang tuyo."

Ang Ebanghelyo gikuha gikan sa Balaan nga Ebanghelyo sumala ni San Mateo. Dinhi atong madungog ang pagsaysay ni Jesus ang kahulogan sa sambingay mahitungod sa Gitagoang Bahandi, Perlas, ug Baling.

Palihug manindog alang sa pagsugod sa Santos nga Eyukaristiya.

BASAHON I

1 Kgs. 3:5, 7-12

KINUTLO GIKAN SA UNANG BASAHON SA MGA HARI

Usa ka gabii niana, samtang didto si Salomon sa Gabaon, mipakita kaniya ang GINOO pinaagi sa usa ka damgo ug miingon kaniya, "Pangayo kanako bisag unsa."

Ug si Salomon miingon: O GINOO nga akong Dios, gihimo mong hari ang imong alagad ilis sa akong amahan nga si David, bisan tuod batan-on pa ako kaayo, ug walay hibangkaagan sa pag- pangulo. Ug ang imong alagad ania sa taliwala sa katawhan nga imong gipili, usa ka dako nga katawhan nga dili maihap tungod sa kadaghan. Busa hatagi ang imong alagad og kaalam aron mahibalo siya pagdumala sa imong katawhan, uban ang katarong; kay kinsa may makamando niining daghang katawhan?"

Nahimuot ang GINOO nga kini ang gipangayo ni Salomon. Ug giingnan siya sa Dios, "Tungod kay kini man ang imong gipangayo, ug wala ka mangayo og taas nga kinabuhi o bahandi o sa kinabuhi sa imong mga kaaway, hatagan ko ikaw sa imong gipangayo. Hatagan ko ikawg kaalam nga wala pa maangkon ni bisan kinsa kaniadto ni sa umaabot nga panahon.

ANG PULONG SA GINOO.

SALMO RESPONSORYO Ps. 119:57, 72, 76-77, 127, 129-130

R. Ginoo, gihigugma ko ang imong mga sugo.

Nagaingon ako, O Ginoo, nga ang akong bahin mao ang pag-amping sa imong mga pulong. Ang balaod sa imong ba-ba mas bililhon alang kanako kay sa linibo nga salapi nga bulawan ug plata.

R. Ginoo, gihigugma ko ang imong mga sugo.

Maghupay unta kanako ang imong kaluoy sumala sa imong saad ngadto sa imong mga sulugoon. Padangata kanako ang imong kaluoy aron mabuhi ako kay ang imong balaod maoy akong kalipay.

R. Ginoo, gihigugma ko ang imong mga sugo.

Kay gihigugma ko ang imong sugo labaw sa bulawan bisan unsa katahum.

Kay diha sa tanan mong mga kasugoan nagapadayon ako paglakaw; kaaway ko ang tanang dautan nga agianan.

R. Ginoo, gihigugma ko ang imong mga sugo.

Katingalahan ang imong mga gimbut-an; busa ako silang gituman. Ang pagpadayag sa imong mga pulong nagahatag og kahayag, nagahatag og salabutan sa tawo nga yano.

R. Ginoo, gihigugma ko ang imong mga sugo.

BASAHON II

Rom. 8:28-30

KINUTLO GIKAN SA SULAT NI SAN PABLO NGADTO SA TAGA-ROMA

Nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya ug sa iyang mga tinawag sumala sa iyang tuyo. Kadtong gipili nang daan sa Dios, gilain niya aron mahisama sa iyang Anak, aron ang iyang Anak mahimong kama- gulangan sa daghang mga magsuon. Busa gitawag sa Dios kadtong iya nang gilain; wala lamang niya tawga sila kondili gihimo usab niyang matarong ug gipa- ambit sa iyang himaya.

ANG PULONG SA GINOO.

TINAAS

Mt. 13:44-52

Kinutlo gikan sa Balaan nga Ebanghelyo sumala ni Mateo

Miingon si Jesus sa iyang tinun-an: "Ang gingharian sa langit sama sa usa ka bahandi nga nalubong didto sa uma nga human makaplagi sa usa ka tawo, iyang gitabonan. Ug gumikan sa iyang kalipay milakaw siya ug gibaligya ang tanan niyang kabtangan ug gipalit kadtong maong uma.

"Ang gingharian sa langit sama usab sa usa ka magpapatigayon nga nangitag matahom nga mga perlas. Sa dihang hikaplagan niya ang usa ka mutya nga mahalon kaayo, milakaw siya ug gibaligya ang tanan niyang kabtangan, ug iya kining gipalit.

"Sama usab ang gingharian sa langit sa usa ka baling nga gitaktak ngadto sa lanaw. Nakakuha kini og tanang mátang sa isda nga inigkapuno, guyoron sa mga tawo ngadto sa baybayon ug manglingkod sila aron paghagpat sa isda; Ingon usab niini ang mahitabo sa kataposan sa kalibotan. Mogawas ang mga angel ug ilang lainon ang mga daotang tawo ang mga maayong isda ilang gisulòd sa bukag, apan ang mga walay pulos ilang gisalibay.

Ug itambog sila ngadto sa hudno sa kalayo.

Didto aduna unyay pagdangoyngoy ug pagkagot sa mga ngipon.

"Nakasabòt ba kamo niining tanan?" Mitubag sila kaniya, "Oo." 

Ug miingon siya kanila, "Tungòd niini, ang matag Batid sa Balaod nga natudloan sa gingharian sa langit sama sa usa ka agalon sa panimalay nga nagpagawas gikan sa iyang bahandi og mga bag-o ug karaang butang."

Ang Ebanghelyo sa Ginoo.

MINUBO

Mt. 13:44-46

Kinutlo gikan sa Balaan nga Ebanghelyo sumala ni Mateo

Miingon si Jesus sa mga tinun-an: Mäng gingharian sa langit sama sa usa ka bahandi nga nalubong didto sa uma nga human makaplagi sa usa ka tawo, iyang gitabonan. Ug gumikan sa iyang kalipay milakaw siya ug gibaligya ang tanan niyang kabtangan ug gipalit kadtong maong uma.

"Ang gingharian sa langit sama usab sa usa ka magpapatigayon nga nangitag matahom nga mga perlas.

Sa dihang hikaplagan niya ang usa ka mutya nga mahalon kaayo, milakaw siya ug gibaligya ang tanan niyang kabtangan, ug iya kining gipalit."

Ang Ebanghelyo sa Ginoo.

PANGALIYA SA KATILINGBAN

Hulyo 29, 2023

Pari: Mag-ampo kita sa atong langitnong Amahan, uban sa hingpit nga pagsalig nga iya kitang dunggon sa atong mga panginahanglan. Busa sa matag pangaliya kita moingon:

GINOO, PATALINGHUGI KAMI.

1. Alang sa Simbahan ilabina ang atong Santo Papa, Obispo, Kaparian, Diyakono ug mga Relihiyoso, makabaton unta sa bahandi ug hiyas ni Jesucristo diha sa iyang makanunayong pagsangyaw sa Maayong Balita, Mag-ampo kita.

2. Alang sa mga lideres sa atong nasud nga modan-ag unta kanila ang pagka-matinud- anon nga pagpangalagad subay sa Kristohanong diwa ngadto sa tanang katawhan. Mag-ampo kita.

3. Alang sa mga biktima sa mga nagkalain-laing kalamidad nga mamahimong maisugon ug magmalaumon unta sila sa pagbarog, alang sa bag-ong sinugdanan sa ilang kinabuhi uban sa Ginoo. Mag-ampo kita.

4. Alang sa mga Misyonerong Pilipino, madawat unta nila ang grasya nga ilang gikinahanglan diha sa pagpakaylap sa Maayong Balita sa katawhan. Mag-ampo kita.

5. Alang sa mga masakiton ug mga tigulang. makasinati unta sila sa kabaskog ug kahupayan sa ilang kasamtangang giantus. Mag-ampo kita.

6. Alang sa mga nagadayeg ug nagpasalamat sa Ginoo ilabina nila makadawat unta sila og gasa sa kaalam aron mapaambit ngadto sa uban. Mag-ampo kita.

7. Alang sa mga nangamatay ilabina sila... maka-ambit na unta sila sa

bahandi sa pagkabanhaw uban sa atong Ginoo. Mag-ampo kita.

Pari: Ginoo among Dios, hugot ang among pagtuo ug pagsalig nga imong patalinghugan ang mga pag-ampo nga among gipa-dangat kanimo pinaagi ni Cristo nga among Ginoo. Amen.