IKANAPULO'G LIMA NGA DOMINGGO

IKANAPULO'G LIMA NGA DOMINGGO

a. BASAHON I

Is. 55: 10-11

Kinutlo gikan sa basahon ni Propete Isaias.

"Ingon nga ang ulan ug ang yelo mangahulog gikan sa langit ug dili na mobalik didto, kondili mopatubig hinoon sa yuta aron manurok ang mga tanum niini, ug kahatagag binhi ang magpupugas og pagkaon ang mga tawo, ang akong mga pulong usab dili mobalik kanako nga kawang lamang; hinonoa, tumanon niini ang akong tuyo ug molampos gayud kini.

Ang Pulong sa Ginoo.

b. SALMO RESPONSORYO

Salmo 65:10,11,12-13,14

Tubag (R)- Ang binhi nga nahulog sa maayong yuta mohatag og mabungahong ani.

Giduaw Nimo ang yuta ug Imo kining gibubuan; Imo kining giabunohan pag-ayo. Napuno ang mga katubigan sa Dios ug Imong giandam ang binhi. (R)

Ingon niini ang Imong pag-andam sa yuta; gibubuan Mo ang iyang mga tudling; gidugmok Mo ang iyang mga bugon, gihumok Mo kini sa makusog nga ulan, gipanalanginan Mo ang iyang abot. (R)

Gipurongpurongan Mo ang tuig sa Imong manggihatagong kaayo ug ang Imong mga dalan nagasugwak sa abunda nga ani.

Ang wala matikad nga kaumahan nagasugwak niini, ug ang kalipay nagatugob sa kabungtoran. (R)

Ang kaumahan napuno sa panon sa kahayupan ug ang mga lugot gihabolan sa mga tanum, nagasinggit sila ug nag-awit sa kalipay. (R)

c. BASAHON II

Roma 8: 18-23

Kinutlo gikan sa sulat ni San Pablo ngadto sa taga Roma.

Giisip ko nga ang atong mga pag-antus niining panahona dili gayud ikatandi sa himaya nga ipadayag unya kanato. Ang tanang binuhat mahinangpon nga nagpaabot nga ipadayag sa Dios ang Iyang mga anak. Kay gihukmang walay kapuslanan ang tanang binuhat, dili tungod sa kaugalingong pagbuot niini, kondili tungod sa pagbuot sa Dios. Apan bisan pa niini, nagpabilin ang paglaum nga moabot gayud ang panahon nga luwason ang tanang binuhat gikan sa kaulipnan sa pagkamadunoton, ug makaambit kini sa mahimayaong kagawasan sa mga anak sa Dios. Nasayud kita nga hangtud karon ang tanang binuhat nag-agulo tungod sa kasakit ingon sa babaye nga nagbati. Apan dili kay ang mga butang ray nag-agulo, kondili lakip kita nga nagbaton na sa Espiritu ingon nga unang gasa sa Dios, samtang nagpaabot kita kon kanus-a sagupa nga mga anak sa Dios ug kanus-a luwasa sa hingpit.

Ang Pulong sa Ginoo.

d. EBANGHELYO

Mt. 13: 1-13 o 13: 1-9

Ang Santos nga Ebanghelyo sumala ni San Mateo.

(Tinaas)

Nianang adlawa mibiya si Jesus sa balay ug miadto sa daplin sa lanaw, ug milingkod Siya didto aron pagtudlo. Daghan kaayo ang mga tawo nga mialirong Kaniya, ug tungod niini misakay Siya sa usa ka sakayan ug milingkod samtang ang mga tawo didto magbarog sa lapyahan. Migamit Siyag mga sambingay aron pagtudlo kanilag daghang mga butang.

Miingon Siya, "May usa ka tawo nga miadto sa uma aron pagpugas. Sa pagsabod niya sa binhi, pipila niini didto mahulog sa agianan, ug miabot ang mga langgam ug nanuka niini. Ang uban nahulog sa yuta nga batoon ug nanurok dayon kay dili man lawom ang yuta niini. Apan pagsubang na sa adlaw, nalawos ang mga linghod nga tanum, ug kay wala man makagamot pag-ayo, nangalaya dayon kini. Ang ubang mga binhi didto mahulog sa dapit sa mga sampinit; nanubo ang mga sampinit ug milumos sa mga tanum. Apan ang uban nahulog sa maayong yuta ug nanguhay: may nanguhay og taggatos, ang uban tagkan-uman, ug ang uban tagkatloan." Ug miingon si Jesus, "Busa pamati kamo kon kamo dunay dalunggan!"

Unya ang mga tinun-an miduol kang Jesus ug nangutana Kaniya, "Nganong maggamit ka mag sambingay inigsulti Mo kanila?" Si Jesus mitubag: "Ang mga tinago sa Gingharian sa langit gipadayag na kaninyo, apan wala ipadayag kanila. Kay ang adunay iya, dugangan pa aron maiya ang labaw sa iyang gikinahanglan; apan ang tawo nga walay nahot, kuhaan pa gayud bisan gani ang diyotay nga iyaha. Kini ang katarungan nga naggamit Ako og mga sambingay kon magsulti kanila; kay nagtan-aw sila, apan dili makakita, ug namati apan dili makadungog ni makasabot. Busa natuman ang panagna ni Isaias: 'Bisag unsaon ninyo pagpamati, dili kamo makasabot; bisag unsaon ninyo pagtan-aw, dili kamo makakita. Kay kining mga tawhana gahig ulo; gisampongan nila ang ilang mga dalunggan, ug gipiyong ang ilang mga mata. Kay dili sila buot makakita, ug dili buot makadungog, kay tingali unyag makasabot sila ug mobalik Kanako, ug sila Akong ayohon, nag-ingon ang Dios.'

Apan kamo, pagkabulahan ninyo! Kay makakita ang inyong mga mata ug makadungog ang inyong mga dalunggan. Hinumdomi kini: daghang mga propeta ug daghang mga tawo sa Dios nga buot gayud unta motan-aw sa inyong nakita, apan wala sila makakita; ug mamati unta sa inyong nadungog, apan wala sila makabati."

"Busa pamati kamo, ug sabta ninyo ang kahulugan sa sambingay mahitungod sa magpugas. Kadtong nakadungog sa mensahe mahitungod sa Gingharian apan wala makasabot niini, mao ang binhi nga nahulog didto sa agianan. Miabot ang Yawa ug gisakmit ang gipugas didto kanila. Ang binhi nga nahulog sa yutang batoon mao ang mga tawo nga malipayong midawat sa mensahe sa pagkadungog nila niini. Apan dili kini makagamot diha kanila, ug busa dili sila mulahutay. Sa pag-abot sa mga kalisdanan o paglutos tungod sa mensahe, moundang dayon sila. Ug ang binhi nga nahulog sa dapit sa mga sampinit mao ang mga tawo nga nakadungog sa mensahe, apan ang mga kabalaka bahin niining kinabuhia ug ang gugma alang sa mga bahandi molumos sa mensahe, ug dili sila makabunga. Ug ang binhi nga napugas didto sa maayong yuta mao ang mga tawo nga nakadungog ug nakasabot sa mensahe; mamunga sila: may mamungag taggatos, ang uban tagkan-uman, ug ang uban tagkatloan."

Ang Ebanghelyo sa Ginoo.

(Minubo)

Nianang adlawa mibiya si Jesus sa balay ug miadto sa daplin sa lanaw, ug milingkod Siya didto aron pagtudlo. Daghan kaayo ang mga tawo nga mialirong Kaniya, ug tungod niini misakay Siya sa usa ka sakayan ug milingkod samtang ang mga tawo didto magbarog sa lapyahan. Migamit Siyag mga sambingay aron pagtudlo kanilag daghang mga butang.

Miingon Siya, "May usa ka tawo nga miadto sa uma aron pagpugas. Sa pagsabod niya sa binhi, pipila niini didto mahulog sa agianan, ug miabot ang mga langgam ug nanuka niini. Ang uban nahulog sa yuta nga batoon ug nanurok dayon kay dili man lawom ang yuta niini. Apan pagsubang na sa adlaw, nalawos ang mga linghod nga tanum, ug kay wala man makagamot pag-ayo, nangalaya dayon kini. Ang ubang mga binhi didto mahulog sa dapit sa mga sampinit; nanubo ang mga sampinit ug milumos sa mga tanum. Apan ang uban nahulog sa maayong yuta ug nanguhay: may nanguhay og taggatos, ang uban tagkan-uman, ug ang uban tagkatloan." Ug miingon si Jesus, "Busa pamati kamo kon kamo dunay dalunggan!"

Ang Ebanghelyo sa Ginoo.

e. KOMENTARYO

Tema: Ginoo, Magpupugas sa Bahandi sa Gingharian sa Langit.

Kung maghisgot kita sa pagpananum, adunay tulo ka butang nga kinahanglan natong hinumduman. Una, ang tawo nga maoy magtanum. Ikaduha, mao ang binhi nga itanum. Ikatulo, mao ang yuta nga tanuman. Mao usab kini ang atong pamalandungan sa sambingay sa atong Ebanghelyo karon. Una, mao ang magpupugas nga mao ang Ginoo; ikaduha ang binhi nga mao ang Pulong sa Ginoo ug ang ikatulo mao ang yuta nga mao ang katawhan.

Ang Ginoo mao ang magpupugas sa binhi nga mao ang Pulong sa Dios. Apan ang pangutana, unsa man kita nga klase sa yuta o tamnanan? Diha sa atong Ebanghelyo, adunay upat ka klase sa mga tawo ang gipadayag sa atong Ginoo.

Una, ang binhi nga nahagbong sa dalan. Mao kini ang klase sa mga tawo nga nakadungog sa mensahe mahitungod sa gingharian apan wala kini hatagi og bili niini, miabot ang mga pagsulay sa kinabuhi dali ra kaayong nadani sa mga haylo ug tentasyon. Anaa na kanato ang pagtoo apan wala kini modulot o makatuhop sa atong tagsatagsa ka kasingkasing mao nga kon moabot na gani ang kalisdanan sa atong kinabuhi dali ra kita madala ngadto sa pagbuhat nga sukwahi sa kabubut-on sa Dios.

Ikaduha, mao ang binhi nga nahagbong sa batoon nga naay gamay nga yuta pag-abot sa ting-init namatay tungod sa kamabaw sa yuta ug wala kini makagamot pag-ayo. Kita kadtong klase sa mga tawo nga nakadungog sa Pulong sa Ginoo apan pag-abot sa mga problema sa atong kinabuhi, gipasanginlan pa nato ang Ginoo sa mga nanghitabo sa atong kinabuhi. Dili kita makalahutay sa pagsagubang sa atong mga kasakitan tungod kay ang mensahe sa Ginoo wala mogamot sa atong galamhan. Kutob ra kita sa pagpaminaw sa Pulong sa Dios apan wala nato buhata ang angayan.

Ikatulo, mao ang binhi nga mitubo duol sa mga sampinit. Kita kadtong mga klase sa tawo nga nakadungog sa mensahe sa Dios apan ang kabalaka bahin niining kinabuhia mao ang nagpasulabi sa pangandoy nga makabaton og mga bahandi. Usahay atong gipalabi ang paghatag og dakung bili sa mga kalibutanong mga butang ug atong gipalabi ang mga butang nga makapahalipay sa atong kaugalingon. Hinay- hinay na kitang mibulag sa Ginoo kay wala na man kita manginahanglan sa Iyang panabang.

Ikaupat, mao ang binhi nga mitubo sa maayong yuta, mitubo og maayo ug namunga og daghan. Kita ang klase sa mga tawo nga nakadungog sa mensahe, nakasabot ug atong gipuy-an. Nakadungog kita sa Pulong sa Dios ug ato kining gipuy-an sa atong inadlaw-adlaw nga pagkinabuhi ug ato kining gisangyaw ngadto sa atong mga kaigsoonan diha sa makanunayon ug kinasingkasing nga pagpangalagad. Dili lamang igo nga kita nakadawat sa mga mensahe kita nahimo usab nga mensahe sa kaluwasan ug kapasayloan sa mga sala sa atong mga kaigsoonan. Kita nahimong saksi sa mga mensahe ug wala kita magmakuli sa pagpadayag sa uban ilabina kadtong wala pa nakadungog ug ang wala pa makakita sa gahum sa atong Ginoo.

Sa laing bahin diha sa unang pagbasa, si Propeta Isaias nagpadayag sa kamatuoran sa Pulong sa Dios. Kon ato kining pamalandungan og maayo mao kini ang papel sa atong Ginoong Jesukristo nga gipadala sa Amahan aron luwason kita sa atong mga sala. Ang iyang misyon dinhi sa kalibutan natuman gayod. Nagwali siya aron kita mag-usab sa atong mga binuhatan. Gilansang Siya sa krus ug namatay, ug sa iyang pagkamatay naghatag siya og hingpit nga sumbanan nga si kinsa kadtong nagmatinumanon sa kabubut-on sa Dios ug nagpuyo sa Iyang mga mensahe ug nagsangyaw niini makabaton sa kahingpitan sa kinabuhi kon kita makalahutay bisan pa man sa mga pagsulay. Sa iyang kamatayon sa krus mao ang kagawasan sa atong mga sala.

Mao nga diha sa ikaduhang pagbasa gipamatud-an ni San Pablo nga ang atong mga pag-antus niining kalibutana dili gayud ikatandi sa kalipay nga atong matagamtaman kon kita molahutay ug magmatinud-anon sa atong mga gimbuhaton isip mga Kristiyanos. Ang sumbanan nga gipakita ni Kristo nagtimaan nga bisan usab kita mag-antus tungod sa pagtuman sa atong gimbuhaton, kita makabaton sa kabanhawan. Human sa kasakitan adunay kahimayaan. Mao kini ang makapadasig kanato kay kon wala pa mabanhaw si Kristo, walay untay kapuslanan ang atong paghago dinhi sa kalibutan.

Kini mao ang dakung hagit alang kanato nga motuhop unta sa matag usa kanato ang Pulong sa Dios ug ato kining palamboon sa atong tagsatagsa ka kinabuhi ug labaw sa tanan ato unta kining puy-an aron mahimo kitang mga maayong sumbanan sa atong tagsatagsa ka katilingban ilabina diha sa atong tagsatagsa ka pamilya. Dili unta makawang ang mga mensahe nga gitisok sa Dios sa matag usa kanato. Anaa ra kanato ang pagpalambo niini aron makapamunga kinig daghan.

Giya alang sa pamalandong:

1. Unsa ba akong klase sa yuta nga maoy gigamit sa Ginoo nga matisok ang Iyang binhi nga mao ang Iyang Pulong?

2. Gihatagan ba nako og dakung bili ang mga mensahe nga gitisok sa Dios kanako?

f. PANGALIYA

Pangulo: Mga igsoon, ang Dios maoy unang nahigugma kanato, kay Iyang gipadala ang Iyang Bugtong Anak aron kita maluwas. Agi og balus sa Iyang dakung gugma atong ihalad Kaniya ang atong hingpit nga pagsalig nga Siya gayud ang naghatag sa tanang butang sa atong kinabuhi. Busa sa matag pag-ampo kita moingon: GINOO, DUNGGA KAMI.

1. Alang sa nagdumala sa Simbahan nga mabatunan unta nila ang hiyas nga angay sa ilang mga kaakuhan aron magmabungahon ang ilang pagpangalagad. Mag-ampo kita.

2. Alang sa tanang nag-alagad sa panggamhanan, mahiusa unta ang ilang mga plano sa kabubut-on sa Dios alang sa kauswagan ug kabulahanan sa tanang nasud. Mag-ampo kita.

3. Alang sa tanang mga trabahador nga pinaagi sa panabang sa Dios, magmadasigon silang mopalambo sa mithing Kristohanon diha sa pagbuhat ug pagpakita sa maayong panig-ingnan ngadto sa uban. Mag-ampo kita.

4. Alang kanatong tanan nga nagkatigom karon dinhi, mamahimo unta kitang mga maayong binhi nga miturok sa maayong yuta aron motubo ug magmabungahon ang atong pagtoo inubanan sa atong mga maayong binuhatan. Mag-ampo kita.

5. Alang sa atong mga kaigsoonan nga nagmasakiton, hatagan unta sila sa Dios og kahupayan sa ilang balatian aron Aromakapadayon sila sa pagpangalagad ug pagmugna sa Iyang gingharian dinhi sa kalibutan. Mag-ampo kita.

6. Alang sa atong kaugalingong katuyuan, atong kining i-ampo sa hilum.

Pangulo: Amahan sa gugma ug kalooy. Ikaw ang among giya ug sumbanan. Patalinghugi ang among mga pag- ampo nga among gihalad karon pinaagi ni Kristo Imong Bugtong Anak ug among Ginoo. Amen.