BIHILYA SA HAMTONG

C. BIHILYA ALANG SA MINATAY

(Vigil for the Deceased, OCD #2.3)

I. RITO SA PAGSUGOD

1. Pagtimbaya o Pag-abiabi

Pangulo: Sa ngalan sa Amahan, ug sa Anak ug sa Espiritu Santo.

Tanan: Amen.

Pangulo: Hinaut unta nga ang Dios sa paglaum maghatag kaninyo sa kahingpitan sa kalinaw, ug ang Ginoo sa kinabuhi maanaa kanunay kanatong tanan.

Tanan: Maanaa usab kanimo.

2. Pasiunang Awit

(Usa ka haum nga awit mahimong awiton alang sa maong kasaulogan o okasyon.)

3. Pagdapit sa Pag-ampo

Pangulo: Mga igsoon, nagatoo kita nga ang bugkos sa panaghigalaay ug pagbinatiay nga naghiusa kanato dili matapos diha sa kamatayon. Uban sa pagsalig ngadto sa Dios nga sa kanunay nahinumdum sa atong mga maayong buhat ug nagapasaylo sa atong mga sala, mag-ampo kita karon alang sa atong igsoon si Nga si __________________

(Hilom sa makadiyot)

4. Pasiunang Pag-ampo

(Ang pangulo mobungat og usa sa mga mosunod nga mga pag- ampo.)

Pangulo: Ginoo nga among Dios, ang kamatayon sa among igsoon, si N.________ nagpadayag sa kamatuoran kun unsa kamubo ang among kinabuhi ning kalibutan. Apan alang niadtong nagtoo sa Imong gugma, ang kamatayon dili matapos ni maoy hinungdan sa panagbulag sa pakighiusa Mo kanamo. Ania kami nahiusa sa pagtoo ug paglaum isip mga sumusunod sa Imong Anak. Ipadangat kanamo ang kahayag sa pagkabanhaw ni Kristo niining panahon sa pagsulay ug pagbangotan samtang nagaampo kami alang sa among igsoon si N.________ ug sa tanan nahigugma kaniya.

Kini among gipangayo Kanimo pinaagi sa among nabanhaw nga Ginoo, hangtud sa kahangturan.

-O-

O Dios, himaya Ikaw sa tanang magtotoo ug kinabuhi sa mga makiangayon. Pinaagi sa kamatayon ug pagkabanhaw sa Imong Anak kami Imong naluwas. Busa puno sa paglaum, kami nagaampo nga kaloy-an Mo ang Imong alagad nga si N. siyang angayan nga moambit sa mga kalipay ug himoa diha sa paraiso tungod kay siya mitoo sa pagkabanhaw sa mga minatay. Kini among gipangayo pinaagi ni Kristo among Ginoo.

Tanan: Amen.

B. KASAULOGAN SA PULONG SA DIOS

1. Basahon

2 Corinto 5:1,6-10

Kinutlo gikan sa ikaduhang sulat ni San Pablo ngadto sa taga Corinto.

Kay nasayod kita nga inigkatun-as na niining atong yutan-ong puloy-anan nga mao ang atong lawas, hatagan kita sa Dios og puloy-anan didto sa langit - usa ka puloy-anan nga walay katapusan ug siya gayud ang nagbuhat.

Busa kanunay kitang masaligon kaayo. Nasayud kita nga samtang ania kita niining lawasa, layo kita sa puloy-anan sa Ginoo. Kay nagkinabuhi man kita pinaagi sa pagtoo ug dili pinaagi sa atong makita. Masaligon kita kaayo ug palabihon nato nga mamiya kita sa atong puloy-anan niining lawasa ug mamuyo uban sa Ginoo. Apan labaw sa tanan, buot kitang magpahimuot kaniya bisan dinhi sa atong puloy-anan o didto. Kay kinahanglan moatubang kitang tanan kang Kristo aron iyang hukman, aron ang tagsatagsa makadawat sa angay kaniya sumala sa iyang nabuhat, maayo o dautan, dinhi sa kalibutan.

Ang Pulong sa Ginoo.

2. Salmo Responsoryo

Salmo 27

Tubag (R)- Ang Dios akong kahayag ug akong panabang.

-0-

Tubag (R)- Nakita ko ang kaayo sa Dios sa dapit sa mga buhi.

Ang Ginoo mao ang akong kahayag ug akong kaluwasan; Kinsa may akong kahadlokan? Ang Ginoo mao ang dalangpanan sa akong kinabuhi; Kinsa pa may akong kalisangan? (R)

Usa ka butang akong gipangayo sa Ginoo; kini ang akong gipangita; Nga magpuyo unta ako sa balay sa Ginoo sa tanang mga adlaw sa akong kinabuhi, nga magsud-ong unta ako sa kahiligugmaon sa Ginoo ug magpalandong sa iyang templo. (R)

Nagatoo ako nga makakita ako sa kaayo sa Ginoo didto sa yuta sa mga buhi. Paabota nga maisogon ang Ginoo; paglig-on sa kasingkasing ug paabota ang Ginoo. (R)

3. Pagpasidungog Sa Ebanghelyo

4. Ebanghelyo

Lukas 12: 35-40

Ang Santos nga Ebanghelyo sumala ni San Lukas.

"Pag-andam kamo sa bisan unsay modangat, baksig hugot ang inyong mga bisti diha sa hawak ug dagkoti ang inyong mga suga, samag mga sulugoon nga naghulat sa pagbalik sa ilang agalon gikan sa kombira sa kasal. Inig-abot niya ug inig tuktok, ablihan dayon nila ang pultahan. Bulahan kadtong mga sulugoon nga nakaplagan sa ilang agalon nga nagtukaw ug nangandam! Sultihan ko kamo nga magbakos siya, palingkuron sila sa kan-anan ug silbihan niya. Ug bulahan sila kon hikaplagan niya nga andam, bisan kon moabot siya sa tungang gabii o kaadlawon na! Ug timan-i kini: kon nahibalo pa ang tagbalay kanus-a moabot ang kawatan, dili gayud siya motugot nga lungkabon sa kawatan ang iyang balay. Busa kamo usab kinahanglan mangandam kay ang Anak sa Tawo moabot sa oras nga wala ninyo paabota".

Ang Maayong Balita sa atong Ginoo.

4. Hamubong kahilom aron mamalandong

PAGPANGANDAM ALANG SA KINABUHING DAYON

(Lukas 12:35-40)

Sa atong Ebanghelyo kita gitawag ni Kristo sa "pagpangandam" kanunay. Sama usab kini sa pagpangandam nato sa atong kaugalingon kay wala kita makahibalo kung kanus-a moabot kanato kining gitawag nato nga kamatayon. Ang kamatayon dili angay'ng kahadlokan. Tinuod, kadaghanan kanato mahadlok kung hapit na kini mahitabo kanato. Ang kamatayon kabahin sa atong tawhanong kinabuhi. Kitang mga tawo mamatay. Mao nga ang kamatayon dili nato kahadlokan; ato kining atubangon. Kay diha sa kamatayon, makita nato ang kamahinungdanon sa kinabuhi sa tawo. Ug kita mismo wala masayud kung kanus-a kini moabot kanato. Mao nga kita gitawag sa pagpangandam kanunay. Ang importante nga puy-an nato ang atong kinabuhi inubanan sa gugma sa Dios, ug nga ang atong pagkinabuhi dinhi sa yuta nga nahisubay diha sa kinabuhi ni Kristo.

Ang kinabuhing Kristohanon makita diha sa atong pagpuyo sa atong katilingban, sa atong pagpakiglambigit sa atong isigkaingon. Maayo nga pangutan-on nato ang atong kaugalingon kung giunsa nato pagpuyo ang atong kinabuhi uban sa atong isigkatawo diha sa katilingban: gibuhat ba nato ang angay nga buhaton isip tawo, nagkinabuhi ba kita nga may dignidad ug girespeto ba nato ang katungod ug dignidad sa uban? Makasulti ba kita nga andam na kitang moatubang sa kamatayon? Kung dili pa, duna pa kitay panahon sa pagpangandam alang niini. Kay kitang tanan padulong man sa kamatayon. Mao nga magpuyo kita nga may respeto sa dignidad ug katungod sa atong isigkatawo ug may paghigugma sa atong Dios. Kini usa lamang ka paagi sa pagpangandam alang sa atong kamatayon. Hinaut pa unta.

5. Litaniya

Pangulo: Masaligon ug matoohon sa kamatayon ug pagkabanhaw ni Jesukristo, mag-ampo kita ngadto Kaniya sa pag-ingon: GINOO, KALOY-I KAMI.

Nabanhaw nga Ginoo, Ikaw ang sumbanan sa among kinabuhi. Ginoo, kaloy-i kami. (T)

Ikaw ang saad ug hulagway sa among pagadangatan. Ginoo, kaloy-i kami. (T)

Anak sa Dios nga mianhi aron pagbuntog sa sala ug kamatayon. Ginoo, kaloy-i kami. (T)

Pulong sa Dios nga nagapalingkawas kanamo gikan sa kahadlok sa kamatayon. Ginoo, kaloy-i kami. (T)

Gilansang nga Ginoo, gipasagdan sa kamatayon, gibanhaw sa himaya. Ginoo, kaloy-i kami. (T)

Ginoong Jesus, malumong magbalantay ug tuburan sa pahulay sa among kalag. Ihatag ang kalinaw nga walay katapusan alang sa among igsoon si N.________, Ginoo, kaloy-i kami. (T) 

Ginoong Jesus, gipanalanginan Mo ang tanang nanagsubo ug mga gisakit. Bendisyoni ang pamilya ni N.__________ lakip na ang iyang mga paryenti ug higala nga nagkatigom karon. Ginoo, kaloy-i kami. (T)

Ginoong Jesus, (ipadayag dinhi ang uban pang mga panginahanglan.) Ginoo, kaloy-i kami. (T)

6. Amahan Namo

Pangulo: Mga igsoon, ang matuod natong puloy-anan atua sa langit. Busa mag-ampo kita sa Amahan sumala sa gitudlo ni Jesus kanato.

Tanan: Amahan Namo...

(Awiton)

7. Katapusang Pag-ampo

(Ang pangulo mobungat og usa sa mga mosunod nga pag-ampo.)

Pangulo: Ginoong Jesus, among Manunubos, gimbut- an Mo ang paghalad sa Imong kaugalingon ngadto sa kamatayon aron ang tanan maluwas ug makalabang gikan sa kamatayon ngadto sa kinabuhi. Nangaliyupo kami Kanimo, hupaya ang mga nanagsubo karon ug sapwanga diha sa Imong mga mahigugmaong bukton ang among igsoon si N. _________.

Kay Ikaw lamang ang santos ug Ikaw mismo ang kalooy. Pinaagi sa Imong kamatayon gibuksan Mo alang kanamo ang ganghaan sa kinabuhi. Ginoo, pasayloa si N. iyang mga kasal-anan ug ihatag kaniya ang kalipay, kahayag ug kalinaw diha sa Imong mahimayaong gingharian hangtud sa kahangturan. sa

-O-

Ginoong Dios, patalinghogi ang mga All pangaliyupo niadtong mga nagatoo Kanimo. Himoa nga masinati namo uban kang Jesukristo ang kalipay taliwala sa among kasub-anan; ang kasigurohan taliwala sa among pagduhaduha ug ang kaisog aron kami makalabang ning takna sa pagsulay. Lig-ona ang among pagtoo pinaagi ni Kristo among Ginoo.

Tanan: Amen.

III. RITO SA PAGTAPOS

1. Panalangin

Pangulo: Bulahan kadtong nangamatay diha sa Ginoo; papahulayon unta sila gikan sa ilang kahago ug mag-uban kanila ang ilang mga maayong binuhatan.

(Usa ka lihok sama sa pagtimaan sa krus sa agtang sa minatay mahimong buhaton dinuyogan niining mosunod nga mga pulong.)

Pangulo: Pahulay nga dayon ihatag kang N._______, 0 Ginoo.

Tanan: Ug ang kahayag nga walay pagkapalong padan-aga kaniya.

Pangulo: Mopahulay unta siya nga malinawon.

Tanan: Amen.

Pangulo: Hinaut nga ang iyang kalag ug ang kalag sa

tanang mga nangamatay pinasikad sa kalooy sa Dios, mopahulay nga malinawon hangtud sa kahangturan.

Tanan: Amen.

Pangulo: Hinaut unta nga ang gugma sa Dios ug ang kalinaw sa atong Ginoong Jesukristo manalangin ug maghupay kanato ug sa dakung kaaghup mopahid sa matag luha sa atong mga mata: Sa ngalan sa Amahan, (manguros) ug sa Anak ug sa Espiritu Santo.

Tanan: Amen.

2. Katapusang Awit