IKANAPULO'G USA NGA DOMINGO

IKANAPULO'G USA NGA DOMINGGO

a. BASAHON I

Ex. 19: 2-6

Kinutlo gikan sa basahon sa Exodus.

Mibiya sila sa Repidim ug miabot sa kamingawan sa Sinai ug nagkampo sila atubangan sa bukid. Si Moises mitungas sa bukid aron makigkita sa Dios.

Gitawag siya sa Ginoo didto sa bukid ug giingnan, "Isulti kini sa mga kaliwat ni Jacob, ang mga Israelita. Nasaksihan ninyo ang gibuhat Ko sa mga Ehiptohanon, ug kon giunsa Ko kamo pagdala nganhi Kanako, ingon sa pagdala sa agila sa iyang piso diha sa iyang pako, nganhi Kanako. Kon magmasinugtanon kamo Kanako, magtuman sa Akong kasabutan, kamo ang pinili Kong katawhan. Mahimo kamong usa ka nasud nga mag-alagad Kanako ingon nga mga pari, usa ka katawhan nga gigahin alang ra gayud Kanako." Mao kini ang isulti mo sa mga Israelita.

Ang Pulong sa Ginoo.

b. SALMO RESPONSORYO

Salmo 100: 1-2, 3,5

Tubag (R) Kita ang Iyang lungsod; ang karnero sa Iyang panon.

Awiti nga malipayon ang Ginoo, kamong tanang mga yuta; alagari nga malipayon ang Ginoo; duol kamo Kaniya uban sa masadya nga awit. (R) 

Sayri ninyo nga ang Ginoo mao ang Dios; gibuhat kita Niya, Iyaha gayud kita: kita ang Iyang lungsod, ang panon nga Iyang gidumala. (R)

Ang Ginoo maayo gayud: ang Iyang kalooy nagalungtad hangtud sa kahangturan, ug ang Iyang kamatinumanon hangtud sa tanang kaliwatan. (R)

c. BASAHON II

Roma 5: 6-11

Kinutlo gikan sa sulat ni San Pablo ngadto sa taga Roma.

Sa panahon nga wala pa kitay mahimo, nagpakamatay si Kristo alang sa mga dautan sa panahon nga gipili sa Dios. Malisod sa tawo ang pagpakamatay alang sa usa ka tawong matarung. Tingalig adunay magpakamatay, alang sa usa ka maayong tawo. Apan gipakita sa Dios kanato ang gidak-on sa Iyang paghigugma kanato, kay sa makasasala pa kita nagpakamatay si Kristo alang kanato. Pinaagi sa Iyang kamatayon, kita karon gihimong matarung sa Dios ug busa labi pa gayong luwason kita Niya karon gikan sa kasuko sa Dios. Kaniadto mga kaaway kita sa apan gihimo kita Niya nga Iyang mga higala pinaagi sa kamatayon sa Iyang Anak. Ug karon nga kita mga higala na sa Dios, labi pang luwason kita Niya pinaagi sa kinabuhi ni Kristo! Apan dili lang kay kana ra: nagmalipayon kita diha sa Dios pinaagi sa atong Ginoong Jesukristo nga nagpasig-uli kanato ngadto sa Dios.

Ang Pulong sa Ginoo.

d. EBANGHELYO

Mt. 9:36-10:8

Ang Santos nga Ebanghelyo sumala ni San Mateo.

Sa pagkakita ni Jesus sa daghang mga tawo, ang Iyang kasingkasing natugob sa kalooy alang kanila kay masulob-on ug makalolooy man sila, daw mga karnero nga walay magbalantay. Busa giingnan Niya ang Iyang mga tinun-an, "Daghan ang anihon, apan diyotay ra ang mga mangangani. Busa hangyoa ninyo ang tag-iya sa anihon nga dugangan Niya pagpadalag mga mamumoo aron pag-ani niini."

Gitigom ni Jesus ang Iyang napulog-duha ka tinun-an ug gihatagan silag gahum sa paghingilin sa mga dautang espiritu ug sa pag-ayo sa tanang sakit ug balatian. Ang mga ngalan sa napulog duha ka apostoles mao kini: ang una si Simon (nga ginganlag Pedro) ug ang iyang igsoon nga si Andres, si Santiago ug ang iyang igsoon nga si Juan, mga anak ni Sebedeo; si Felipe ug si Bartolome; si Tomas ug si Mateo ang kobrador sa buhis; si Santiago, ang anak ni Alfeo, ug si Tadeo; si Simon, ang patriyota, ug si Judas Iscariote, ang nagbudhi kang Jesus.

Kining napulog duha gipadala ni Jesus uban niining mga pahimangno: "Ayaw kamo pag-adto sa kayutaan sa mga dili Judio, ni sa bisan unsang lungsod sa Samaria. Adtoa hinoon ninyo ang nangawala nga mga karnero sa nasud sa Israel. Lakaw kamo ug isangyaw nga hapit na maghari ang Dios. Ayoha ninyo ang mga masakiton, banhawa ang mga minatay, hinloi ang mga sanlahon, ug aboga ang mga yawa. Nakadawat kamo nga walay bayad, busa panghatag kamo sa walay pagpangayog bayad.

Ang Ebanghelyo sa Ginoo.

e. KOMENTARYO

Tema: Ang Dakung Gugma sa Dios.

Adunay usa ka inilang awit nga kanunay natong gikanta panahon sa mga kasaulogan. Ug karon magdungan kita sa pagkanta niini: "Gugma ang Dios ug diin ang gugmang tiunay, didto usab ang Ginoong Dios. Dinhi uban ni Kristo kita nanagkatigom. Gitawag kita sa gugmang Diosnon, siya atong tamdon ug higugmaon. Higugmaon usab nato ang atong isigkaingon." Niining ikanapulog-usa nga Dominggo sa Ordinaryong Panahon, kita gipahinumduman sa dakong gugma sa Dios kini tungod kay matud pa sa sulat ni San Pablo nga nagkanayon, “Ang Dios Gugma".

Ang atong unang pagbasa gikan sa Exodo nagsaysay mahitungod sa mga piniling katawhan sa Dios. Apan ang pangutana, nganong gipili man sila sa Dios? Tungod ba kay mga angayan sila nga pilion sa Dios? Mga igsoon, gipili sila Dios tungod sa iyang dakung gugma ug dili tungod kay mga angayan sila. Atong nadunggan diha sa atong Ebanghelyo nga ang atong Ginoong Jesukristo mibati og kalooy sa dihang iyang nakita ang panon sa katawhan tungod kay daw sama sila sa mga karnero nga walay magbalantay. Ang Ginoo mahigugmaon. Dili kita niya biyaan ug talikdan sa panahon sa kasakit ug kalisdanan. Mao nga tungod sa Iyang dakong gugma kanato sa Dios ang Iyang bugtong Anak nga si Jesukristo mipuyo uban kanato, namatay sa krus ug nabanhaw.

Matag usa kanato adunay nagkadaiyang tumong sa atong kinabuhi. Ug kini giplano nang daan sa Dios. Maunsa man kita karon ug sa umaabot kini nakalatid na sumala sa pamaagi ug kabutbut-on sa Dios. Apan kita usahay mosupak sa dalan nga gusto ipasubay kanato sa Dios. Maghimo kita sa atong kaugalingon pamaagi ug Kay dako kaayo ang pagsalig nato sa atong kaugalingong katakus ug nahikalimot kita nga kon wala ang Ginoo wala gayod kitay mahimo.

Mga kaigsoonan, ang mga pagbasa karon nagpadayag sa dakung gugma sa Dios alang kanatong tanan. Nga tungod sa maong gugma wala Niya kita pasagdi sa tanan natong mga panginahanglan. Anaa Siya kanunay nagauban kanato sa tanan natong lihok ug mga gimbuhaton sa atong inadlaw-adlaw nga pagkinabuhi. Ug sa samang paagi kita gitawag niya nga motubag sa dakung gugma nga Iyang gipakita kanato pinaagi sa paghatag ug paggahin sa atong dyutay nga panahon sa pag-alagad sa uban. Aron niining paagiha atong mapakaylap ang walay kinutubang gugma sa Dios nga atong nahuptan ngadto sa atong mga kaigsoonan nga wala pa makabaton niini. Usa kini ka dakung hagit kanato isip mga binunyagan nga motubag sa tawag sa Dios sa pag-alagad sa Iyang katawhan.

Busa, mga igsoon, unsa man ang atong tubag sa gugma sa Dios nga gipadayag nganhi kanato? Seguro ang atong kasagarang tubag mao ang pulong "paghigugma sa Dios" o dili ba kaha "pagpasalamat". Kining mga pulong paghigugma ug pagpasalamat mahimong makahuluganon kon ato kining giubanan sa buhat. Moingon kita nahigugma kita sa Dios apan wala kita motubag sa Iyang tawag pag-alagad Kaniya, mahimong walay kapuslanan ang atong mga paningkamot. Ang pagtubag sa tawag sa Dios usa ka dakung grasya nga angay natong pasalamatan. Gani kon ato kining usa ra kini ka dyutay nga paagi, agi og balus walay sukod nga paghigugma sa Dios kanato. Ug diha sa atong mga pag-ampo ilabina diha sa makanunayon natong pag-apil sa Santos nga Yukaristiya gipahinumduman gayod kita sa Dios sa Iyang dakung gugma alang kanato bisan pa man sa atong pagkadili angayan tungod sa atong pagkamakasasala. Ang Dios sa kanunay nangita'g pamaagi aron nga kita mahiduol Kaniya ug kini pinaagi sa atong pag-alagad ug diha sa makanunayon natong pag-ampo ug pagsimba.

Giya alang sa pamalandong:

1. Unsa ang akong gibalos sa dakung gugma sa Dios kanako?

2. Nagpasalamat ba ako Kaniya pinaagi sa pagtambong sa Santos nga Misa?

3. Unsa man ang akong gibuhat sa dakung gugma sa Dios nga gihatag kanako?

f. PANGALIYA

Pangulo: Gitawag sa Dios nga mamahimong maayong magbalantay alang sa Iyang dakung panon. Ato karong ihalad ang tanan natong mga pag-ampo ug panginahanglan ug sa matag pag-ampo kita moingon: GINOO, DUNGGA ANG AMONG PANGAMUYO.

1. Mag-ampo kita alang sa mga nag-alagad sa Simbahan ug mihalad sa ilang kinabuhi alang sa pagmantala sa kaluwasan sa tanan, ilabina ang Santo Papa, mga Obispo ug kaparian aron makalahutay sila sa ilang misyon nga puno sa gugma ug kamatinud-anon. Tungod niini kita moingon...

2. Mag-ampo kita alang sa mga pangulo sa atong panggamhanan nga mapuno unta sila sa lamdag ug giya sa Espiritu Santo aron ilang magiyahan ang tanang katawhan nga magpuyo sa kalinaw ug kaangayan. Tungod niini kita moingon...

3. Mag-ampo kita alang sa mga kabus ug mga nanginahanglan natong mga kaigsoonan nga bisan sa ilang mga pag- antus, ila untang mailhan si Kristo nga maghuhupay sa ilang mga pag-antus ug kalisdanan. Tungod niini kita moingon...

4. Mag-ampo kita alang kanatong tanan nga sa kanunay hatagan kita sa Dios sa maayong panglawas ug kalig-on sa pagtoo ug pagsalig Kaniya nga ang tanan natong gel naangkon ilabina sa gasa sa kinabuhi gikan Kaniya ug siya lamang ang makahatag sa tanan natong panginahanglan. Tungod niini kita moingon...

5. Mag-ampo kita alang sa mga ginikanan nga giyahan unta nila kanunay ang ilang mga anak sa pagkinabuhi subay sa panig- ingnan ni Kristo aron mamahimo silang ang mga maayong Kristiyanos. Tungod niini kita moingon...

6. Mag-ampo kita sa hilum alang sa kaugalingon natong katuyuan.

Pangulo: Ginoong Dios, sa Imong mga kamot among itugyan ang among mga pag- ampo ug panginahanglan uban sa among dakung pagsalig ug pagtoo pinaagi sa Imong Bugtong Anak nga si Kristo among Ginoo. Amen.