IKANAPULOG USA NGA DOMINGO SA ORDINARYONG PANAHON

Ikanapulo'g-usa nga Domingo Sulod sa Tuig

PASIUNA

June 18, 2023

Maayong buntag/hapon mga igsuon diha ni Cristo.

Ania na kita sa ika-napulo'g usa nga Dominggo sa Ordinaryong Panahon. Karong adlawa usab atong gipasidunggan ang tanang mga amahan.

Ang unang pagbasa gikuha gikan sa Basahon sa Exodo. Kini naghisgot mahitungod sa pagtawag ug pagmando sa Ginoo ngadto kang Moises.

Diha ikaduhang pagbasa nga gikuha gikan sa Sulat ni San Pablo ngadto sa taga-Roma, atong madungog ang pahinumdom ni San Pablo sa taga Roma mahitungod sa dakong gugma ug kaluoy sa Ginoo sa katawhan.

Diha sa Santos nga Ebanghelyo sumala ni San Mateo atong madungog ang pagtawag ug pagpadala ni Jesus sa iyang dose ka mga apostoles.

Palihug sa manindog alang sa pagsugod sa Santos nga Eyukaristiya.

BASAHON I

Ex. 19:2-6

KINUTLO GIKAN SA BASAHON SA EXODO

Mibiya sa Repidim ug miabot sa disyerto sa Sinai ug nagkampo sila atubangan sa bukid. Si Moises mitungas sa bukid aron makigkita sa Dios.

Gitawag siya sa GINOO didto sa bukid ug giingnan, "Isulti kini sa mga kaliwat ni Jacob, ang mga Israelita, 'Nasaksihan ninyo ang gibuhat ko sa mga Ehiptohanon, ug kon giunsa ko kamo pagdala nganhi kanako, ingon sa pagdala sa agila sa iyang piso diha sa iyang mga pako. Kon magmasinugtanon kamo kanako ug magtuman sa akong sugo, mahimo kamo nga pinili kong katawhan. Ako ang tag-iya sa tibuok kalibutan, apan kamo ang pinili kong katawhan. Mahimo kamong usa ka nasod nga mag-alagad kanako ingon nga mga pari, usa ka katawhan nga gigahin alang ra gayod kanako.' Mao kini ang isulti mo sa mga Iraelita."

ANG PULONG SA GINOO.

SALMO RESPONSORYO

Ps. 100:1-2, 3, 5

R. Kita ang iyang lungsod: ang karnero sa iyang panon.

Awiti nga malipayon ang Ginoo,

kamong tanang mga yuta; Alagari nga malipayon ang Ginoo; duol kamo kaniya sa masadya nga awit.

R. Kita ang iyang lungsod: ang karnero sa iyang panon.

Sayri ninyo nga ang Ginoo mao ang Dios; siya ang nagbuhat kanato, kita iyaha gayod; ang iyang lungsod, ang panon nga iyang gidumala.

R. Kita ang iyang lungsod: ang karnero sa iyang panon.

Ang Ginoo maayo gayod; ang iyang kaluoy nagalungtad hangtod sa kahangturan, ug ang iyang kamatinud-anon, hangtod sa tanang kaliwatan.

R. Kita ang iyang lungsod; ang karnero sa iyang panon.

BASAHON II

Rom. 5:6-11

KINUTLO GIKAN SA SULAT NI SAN PABLO NGADTO SA TAGA-ROMA

Kay sa panahon nga wala pa kita mahimo, nagpakamatay si Cristo alang sa mga dautan sa panahon nga gipili sa Dios. Malisod sa tawo ang pagpakamatay alang sa usa ka tawong matarong. Tingalig adunay magpakamatay alang sa usa ka maayong tawo. Apan gipakita sa Dios kanato ang gidak-on sa iyang paghigugma kanato, kay sa makasasala pa kita nagpakamatay si Cristo alang kanato. Pinaagi sa iyang kamatayon, kita karon gihimong matarong sa Dios ug busa labi pa gayong luwason kita niya karon gikan sa kasuko sa Dios. Kaniadto mga kaaway kita sa Dios, apan gihimo kita niya nga iyang mga higala pinaagi sa kamatayon sa iyang Anak. Ug karon nga kita mga higala na sa Dios, labi pang luwason kita niya pinaagi sa kinabuhi ni Cristo! Apan dili lang kita diha sa Dios pinaagi sa atong Ginoong Jesucristo nga nag- pasig-uli kanato ngadto sa Dios.

ANG PULONG SA GINOO.

ANG EBANGHELYO

Mt. 9:36-10:8

Kinutlo gikan sa Balaan nga sumala ni Mateo

Ug sa pagkakita niya sa panon sa katawhan, naluoy si Jesus kanila,   kay nangahasol ug nangaluya man sila sama sa mga karnero nga walay magbalantay. Unya nag-ingon siya sa iyang mga tinun-an, "Daghan ang anihonon, apan diyotay ra ang mga mamumuo. Busa hangyoa ninyo ang tag-iya sa anihon nga magpadala og mga mamumuo didto sa iyang anihon."

Ug sa natawag na niya ang iyang Napulog-duha ka tinun-an, gihatagan niya sila og gahom batok sa mga hugaw nga espiritu aron sa paghingilin kanila, ug sa pag-ayo sa tanang balatian ug sa tanang sakit.

Ang mga ngalan sa Napulog-duha ka Apostoles mao kini, úna, si Simon, ang ginganlan og Pedro ug si Andres nga iyang igsoon; si Santiago, ang anak ni Zebedeo ug si Juan nga iyang igsoon; si Felipe ug si Bartolome; si Tomas ug si Mateo, ang kobrador sa buhis; si Santiago, ang anak ni Alfeo, ug si Tadeo; si Simon, ang taga-Canaan, ug si Judas Iscariote, ang nagbudhi kaniya.

Kining Napulog-duha gipadala ni Jesus, ug gimandoan niya sila sa pag-ingon, "Ngadto sa dalan sa mga Hentil, ayaw kamo pag-adto, ug ngadto sa lungsod sa mga Samaritanhon, ayaw kamo pagsulòd. Adtoa hinoon ninyo ang mga nahisalaag nga karnero sa balay sa Israel.

Ug sa inyong pag-adto, isangyaw ninyo sa pag-ingon, 'Haduol na ang gingharian sa langit.

Ayoha ninyo ang mga masakiton, bangona ang mga minatay, hinloi ang mga sanlahon, hinginli ang mga nakadawat kamo nga walay bayad, panghatag kamo nga walay bayad."

Ang Ebanghelyo sa Ginoo.

Katilingbanong Pag-ampo

June 18, 2023

Pari: Gitawag kita sa Dios nga mamahimong maayong magbalantay alang sa iyang dakong panon. Ato karong ihalad ang tanan natong mga pag-ampo ug panginahanglan diha sa pag-ingon:

GINOO, DUNGGA ANG AMONG PANGAMUYO.

1. Amahan nga Langitnon, himoa nga mamahimong buhi ang imong gugma ug mamahimong dayag ngadto sa mga nag-alagad sa Simbahan ilabina si Santo Papa Francisco, Arsobispo Romulo, Kaparian, mga Relihiyoso ug mga Diyakono. Mag-ampo kita.

2. Amahan nga Langitnon, dasiga ug hatagi sa kabuhong sa imong grasya ang mga namunuan sa panggamhanan. Mag-ampo kita.

3. Amahan nga Langitnon, ibubo ang imong gugma ug kaluoy sa mga magtutuo nga nakasinati og mga sakit sa lawas, mga anaa sa kalisod ug kapit-os, ug mga biktima sa inhustisya. Mag-ampo kita.

4. Langitnong Amahan, hatagi og kusog ug kalig-on, kalipay ug kalinaw ang tanang mga Amahan nga among gipasidunggan karong adlawa ug pinaagi ni Cristo mapaambit nila kini ngadto sa ilang tagsa-tagsa ka pamilya. Mag- ampo kita.

5. Langitnong Amahan, pun-a sa Espiritu sa kaayo, kaluoy ug gugma ang among mga igsuon nga mihalad sa ilang pasalamat ug pagdayeg ngadto sa Dios ilabina nila. Mag-ampo kita.

6. Amahan nga Langitnon, dawata diha sa imong gingharian ang mga magtutuong nangamatay ilabina sila. Mag-ampo kita.

Pari: Ginoong Dios, sa imong mga kamot among itugyan ang among mga pag-ampo ug panginahanglan uban sa among dakong pagsalig ug ni Cristo nga among Ginoo. Amen.