IKANAPULO'G TULO NGA DOMINGGO

IKANAPULO'G TULO NGA DOMINGGO

a. BASAHON I

2 Hari 4:8-11,14-16

Kinutlo gikan sa ikaduhang basahon sa mga Hari.

Usa ka adlaw niana, si Eliseo miagi sa Sunem, diin may usa ka tinamod nga babaye nga nag-aghat kaniya sa pagpakigpangaon. Ug mao kadto, nga sa matag labay niya didto mohapit siya aron sa pagpangaon.

Ug miingon siya sa iyang bana: "Nasabot ko nga kini siya usa ka balaan nga tawo sa Dios. Sanglit kanunay siya nga moduaw kanato, himoan ta siya og usa ka diyotay'ng lawak didto sa dapit sa atop ug butangan ta siya didto og usa ka higdaanan, lamesa, lingkoranan,ug suga, kon moanhi siya kanato, adto siya didto moestar."

Ug nahitabo nga miabot si Eliseo, ug miadto siya sa lawak nianang pagkagabii.

Unya miingon si Eliseo: "Unsa may atong mahimo alang kaniya?" Ug si Giesi mitubag: "Ania, siya walay anak, ug ang iyang bana tigulang na."

Si Eliseo miingon, "Tawga siya" Ug sa gitawag na siya, ug mibarog sa ganghaan, si Eliseo misaad, "Niining panahona sa sunod tuig magakugos ka og usa ka anak nga lalake."

Ang Pulong sa Ginoo.

b. SALMO RESPONSORYO

Salmo 89:2-3,16-17,18-19

Tubag (R) - Mag-awit ako sa kaayo sa Ginoo hangtud sa kahangturan.

Ang mga kaayohan sa Ginoo akong awitan hangtud sa kahangturan; latas sa tanang kaliwatan magsangyaw ang akong baba sa Imong kamatinumanon. Kay miingon Ikaw, "Ang akong kalooy hangtud sa kahangturan"; diha sa langit Imong gilig-on ang Imong kamatinumanon. (R)

Bulahan ang lungsod nga nasinati sa masadya nga singgit; diha sa kahayag sa Imong nawong, O Ginoo, nagalakat sila. Sa Imong ngalan nagasadya sila sa tibuok adlaw, ug pinaagi sa Imong katarung gibayaw sila. (R)

Kay Ikaw ang kasanag sa ilang kusog, ug tungod sa Imong kalooy gibayaw ang among gahum. Kay ang Ginoo mao ang among taming, ug Iyaha sa Balaan sa Israel, ang among hari. (R)

c. BASAHON II

Roma 6:3-4,8-11

Kinutlo gikan sa sulat ni San Pablo ngadto sa taga Roma.

Nasayud kamo nga sa pagbunyag kanato nahiusa kita kang Kristo Jesus, ug busa nahiusa kita sa Iyang kamatayon. Tungod niini sa pagbunyag kanato gilubong kita uban Kaniya ug miambit sa Iyang kamatayon, aron ingon nga si Kristo gibanhaw sa mahimayaong gahum sa Amahan, kita usab magpuyo diha sa bag- ong kinabuhi.

Kong namatay kita uban kang Kristo, gituohan nato nga mabuhi usab kita uban Kaniya. Kay nasayud kita nga si Kristo gibanhaw ug dili na gayud Siya mamatay pag-usab, ug ang kamatayon wala nay gahum Kaniya. Ang kamatayon Niya mao ang kamatayon sa pagpakasala, sa makausa lamang sa tanan; ug nagkinabuhi Siya karon alang lamang sa Dios. Busa isipa ang inyong kaugalingon nga patay na sa pagpakasala apan buhi alang sa Dios, hiniusa kang Kristo Jesus.

Ang sa Ginoo.

d. EBANGHELYO

Mt. 10:37-42

Ang Santos nga Ebanghelyo sumala ni San Mateo.

Si Jesus miingon sa Iyang mga apostoles: "Ang nagmahal sa iyang amahan o sa iyang inahan labaw Kanako, dili angay Kanako; ug kadtong nagmahal sa iyang anak labaw Kanako, dili angay Kanako. Ang dili mopas-an sa iyang krus ug mosunod Kanako, dili angay Kanako. Ug kadtong mag-amping sa iyang kinabuhi, kawad-an hinoon niini; apan ang kawad-an sa iyang kinabuhi tungod Kanako, makabaton niini."

"Ang modawat kaninyo, modawat usab Kanako; ug ang modawat Kanako, modawat usab Kaniya nga nagsugo Kanako. Ang modawat sa sinugo sa Dios tungod sa Iyang pagkasinugo sa Dios, gantihan usab sa ganti nga madawat sa sinugo; ug ang modawat sa tinuod nga maayong tawo, tungod sa iyang pagkamaayong tawo, gantihan usab sa ganti nga madawat sa maayong tawo. Ug hinumdomi kini; kadtong magpainom bisan na lag bugnaw'ng tubig sa labing ubos sa Akong mga sumusunod tungod kay siya Akong sumusunod, gantihan gayud."

Ang Ebanghelyo sa Ginoo.

e. KOMENTARYO

Tema: Pagsunod kang Kristo diha sa Pagpas- an sa Krus.

Daghan kanato ang gusto mosunod kang Kristo, tama ba? Kini tungod sa Iyang gibuhat dinhi sa kalibutan. Apan dili kita gusto mopas- an sa atong krus. Niining ikanapulo og tulo nga Dominggo sa Ordinaryong Panahon, kita gipahinumduman sa pagsunod kang Kristo diha sa pagpas-an sa krus.

Diha atong Ebanghelyo, si Jesus sa miingon, "Ang dili mopas-an sa iyang krus ug mosunod kanako, dili takos nga mamahimong tinun-an nako. "Tataw kaayo mga igsoon nga kon buot kita nga mosunod kang Kristo, kinahanglan nga andam kita sa pagpas-an sa atong krus. Apan wala kini nagpasabot nga sama sa krus nga gipas-an ni Kristo. Nagpasabot kini sa mga palas-onon nato diha sa atong pagpakabuhi niining kalibutana. Ang atong mga problema sa kinabuhi. Adunay nagkalainlaing krus sa matag sa usa kanato. Diha sa atong pamilya, katilingban ug uban pang katawhan nga nahilambigit atong kinabuhi. Bisan ang atong kaugalingon nahimo usab nga krus sa uban luyo sa atong kasayuran.

Kabahin sa pagpas-an sa atong krus mao ang paghikalimot sa atong kaugalingon. Tataw kaayo kini diha sa atong pagbasa karon. Wala mahimong babag ang pagka-adunahan o pagka-kabus sa pag-alagad sa uban nga nagkinahanglan. Ang panghitabo sa atong unang pagbasa nagpahinumdom kanato kung andam ba gayod kita sa paghalad sa atong kaugalingon ngadto sa uban. Andam ba gayud kita sa pagsakripisyo bisan pa man kini bililhon kaayo alang kanako. Sa atong panahon karon, dako ang hagit nga gisangon kanato sa Dios. Daghan kaayo ang mga krus nga atong palas- onon tungod kay kusog ug mikuyanap na sa atong palibot ang haylo sa materyalismo. Nag-anam na og kawala ang paghatag og bili sa espirituhanong bahin sa atong kinabuhi. Kongkreto nga ehemplo niini mao nga kasagaran sa mga pamilya wala nay panahon sa pag-ampo diha sa tagsa tagsa ka panimalay tungod kay kusog kaayo ang kompetensya sa telebisyon nga naghatag og kalingawan sa matag miyembro niini. Anaa ang makanunayong pagsunod sa mga programa sa telebisyon makalingaw man. Ang makasubo pa gayod nga kamatuoran nga bisan anaa kita sulod sa Simbahan nag-anam na og kawala ang kasagrado sa kasaulogan kay mas palabihon pa man ang paggamit sa mga "cellphone" kay sa pagpaminaw sa Santos nga Misa. Sa laktod nga pagkasulti mao kini ang dakong hagit kanato sa pagpadayag sa kamatuoran nga kining mga kalibutanong butang mawala ug kita lumalabay lamang niining kalibutana. Busa hatagan nato og dakung gimbug-aton ang pagpangandam sa mga butang nga maoy magdala kanato sa kahingpitan sa gugma sa Dios.

Ang atong ikaduhang pagbasa nagsaysay kon unsa kadako sa paghigugma sa Ginoo kanato. Gipadala niya ang Iyang Bugtong Anak aron sa pagluwas kanato. Sayud kita nga gihimo kini sa Ginoo tungod sa iyang dakong gugma alang kanato. Apan andam ba kita sa pagbalos dakung gugma sa Ginoo kanato? Andam ba kita sa pagsakrispisyo sa atong kaugalingon ug sa pagpaningkamot nga dili lang ang atong kaugalingon maoy makig-atubang sa Dios kon dili lakip na ang atong mga kaigsoonan. Kon unsaon nato paghimo niini ang Dios nga labaw'ng Makagagahum ra ang nasayod. Ang atoa mao ra gayod ang pagpaningkamot sa pagpas-an sa atong kaugalingong krus nga gisangon kanato sa Dios. Mao kini karon ang dakong hagit kanato luyo sa kasamtangan nga puno sa mga kalibutanong tinguha.

Giya alang sa pamalandong:

1. Andam ba ako sa pagpas-an sa akong kaugalingon nga krus?

2. Giunsa man nako pagpas-an ang akong krus?

f. PANGALIYA

Pangulo: Mag-ampo kita ngadto sa atong Makagagahum nga Amahan nga hatagan kita Niya og grasya sa hingpit nga pagsalig ug pagtoo Kaniya. Busa atong ihalad karon ang atong mga pag-ampo ug panginahanglan diha sa atong pag-ingon: GINOO, PATALINGHUGI ANG IMONG KATAWHAN.

1. Amahan, Imong pangandoy nga kami mamahimong sama ni Kristo. Ihatag sa Imong Simbahan ang kadasig sa pagsangyaw sa Imong ngalan sa tanang katawhan. Mag-ampo kita.

2. Amahan, itugyan namo sa Imong mga kamot ang kaugmaon sa among nasud. Ibubu ang Imong panalangin sa mga lideres sa panggamhanan aron sila makapadayon sa pagserbisyo sa among nasud nga puno sa gugma ug pagtahud sa dignidad sa usag usa. Mag-ampo kita.

3. Amahan, Imo kaming gihiusa pinaagi ni Kristo, panalangini ang among katilingban aron kami mamahimong matuod nga magsasangyaw sa panaghiusa ug

paghigugma. Mag-ampo kita.

4. Amahan, Imo kaming gitawag sa pag- ambit sa Imong panihapon. Himoa kaming angayan nga modawat niini ug motubo unta kami sa tiunay ug hingpit nga gugma. Mag-ampo kita.

5. Amahan, gipangayo namo ang Imong pasaylo. Tuguti nga ang tanang nangamatay makakita sa kahayag sa Imong panagway. Mag-ampo kita.

6. Amahan, among ihalad karon ang among personal nga katuyuan diha sa kahilum.

Pangulo: Makagagahum nga Dios, dungga ang mga pag-ampo sa Imong katawhan. Ikaw gayud ang labaw nga makagagahum. Ipadala kanamo ang Imong Balaang Espiritu aron magiyahan kami sa hingpit nga pagtoo diha Kanimo pinaagi sa Imong Bugtong Anak nga si Kristo among Ginoo. Amen.