Corpus Christi

LAWAS UG DUGO NI KRISTO (CORPUS CHRISTI) 

(Dominggo human sa Santissima Trinidad)

a. BASAHON I

Dt. 8: 2-3,14-16

Kinutlo gikan sa basahon sa Deuteronomio.

Si Moises miingon sa katawhan: "Hinumdomi ninyo giunsa nga sa kap-atan na ka tuig karon ang Ginoong inyong Dios nagtultol kaninyo sa tanan ninyong pagpanaw didto sa kamingawan, aron pagsulay kaninyo pinaagi sa kasakit ug pagkita kon mao ba o dili ang inyong tuyo ang pagbantay sa Iyang mga kasugoan. Busa gitugot Niya nga sakiton kamo sa gutom, ug unya gipakaon kamo sa mana, usa ka pagkaon nga wala hiilhi ninyo ni sa inyong mga katigulangan, aron pagpakita kaninyo nga dili sa pan lamang mabuhi ang tawo, kondili sa tanang pulong nga nagagikan sa baba sa Ginoo."

"Hinumdomi ang Ginoo nga inyong Dios, nga nagdala ninyo pagpagula gikan sa yuta sa Ehipto, kadtong dapit sa kaulipnan; nga naggiya kaninyo latas sa halapad ug makalilisang nga kamingawan diin didto ang mga bitin ug mga tanga, ang iyang yuta nga uhaw ug walay tubig; nga nagpagula og tubig alang kaninyo gikan sa magahi nga bato ug nagpakaon. kaninyo didto sa kamingawan og mana, usa ka kalan-on nga wala hiilhi sa inyong mga katigulangan."

Ang Pulong sa Ginoo.

b. SALMO RESPONSORYO

Salmo 147:12-13,14-15,19-20

Tubag (R) Dayega ang Ginoo, Jerusalem.

Dayega ang Ginoo, O Jerusalem; Dayega ang imong Dios, O Sion. Kay Iyang gilig-on ang mga trangka sa imong mga ganghaan; Iyang gipanalanginan ang imong mga anak sulod kanimo. (R)

Gitugot Niya ang kalinaw sulod sa imong mga utlanan; gibuhong ikaw Niya sa labing maayong trigo. Gipadala Niya ang Iyang sugo ngadto sa yuta; makusog ang pagdagan sa Iyang pulong. (R)

Iyang gisangyaw ang Iyang pulong ngadto kang Jacob, ang mga balaod ug mga gimbut-an ngadto kang Israel. Wala Siya maghimo sa ingon sa laing nasud; wala Niya ipahibalo ang Iyang mga kasugoan ngadto kanila. Aleluya. (R)

c. BASAHON II

1 Cor. 10:16-17

Kinutlo gikan sa unang sulat ni San Pablo ngadto sa taga Corinto.

Ang sa panalangin nga tungod niini gipasalamatan nato ang Dios dili ba pakig-ambit nato sa dugo ni Kristo inig-inom nato gikan niining kupa? Ug dili ba pakig-ambit nato sa lawas ni Kristo inigkaon nato niining pan nga atong gipikaspikas? Sanglit may usa ka kitang tanan bisan daghan; usa lamang ka lawas kay nakig-ambit man kita sa usa lamang ka pan.

Ang Pulong sa Ginoo.

d. EBANGHELYO

Jn. 6: 51-58

Ang Santos nga Ebanghelyo sumala ni San Juan.

Si Jesus misulti sa pundok sa mga Judio: "Ako ang pan nga naghatag sa kinabuhi. Ang mokaon niining pan dili gayud mamatay. Ug ang pan nga Akong ihatag mao ang Akong unod aron mabuhi ang kalibutan."

Nakahaling kini og mainit nga paglalisay sa mga Judio. "Unsaon man niining tawhana paghatag kanato sa Iyang unod aron atong kan-on?" nangutana sila. Si Jesus miingon kanila: "Sultihan Ko kamo: kon dili kamo mokaon sa unod sa Anak sa Tawo ug dili moinom sa Iyang dugo, dili kamo makabaton og kinabuhi. Ang mokaon sa Akong unod ug moinom sa Akong dugo may kinabuhing walay katapusan ug banhawon Ko siya sa katapusang adlaw. Kay ang Akong unod mao ang matuod nga kalan-on, ug ang Akong dugo mao ang matuod nga ilimnon. Ang mokaon sa Akong unod ug moinom sa Akong dugo magpuyo dinhi Kanako ug Ako diha kaniya. Ang buhing Amahan maoy nagpadala Kanako ug tungod Kaniya nabuhi usab Ako. Sa samang pagkaagi ang mokaon Kanako mabuhi tungod Kanako.

Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon."

Ang Ebanghelyo sa Ginoo.

e. KOMENTARYO

Tema: Lawas ug Dugo ni Kristo: Kinabuhi sa matag Kristiyano.

Karong Dominggoha atong gisaulog ang Solemnidad sa Lawas ug Dugo ni Kristo. Kining maong Solemnidad angay nga atong masabtan kon unsa ang lintunganay niini isip mga Kristiyanos, ang Lawas ug Dugo ni Kristo dinhi sa atong kinabuhi.

Sumala ni Santo Tomas de Aquino, si Kristo nagpakatawo ug iyang gihalad ang iyang Lawas diha sa altar isip usa ka sakripisyo, aron kita mahiuli diha sa atong Amahan. Nibuhagay ang iyang Dugo aron kita maluwas ug aron kita mahinluan diha sa atong mahugaw nga mga sala. Kining maong gasa, ang Yukaristiya, nga gikan sa langit ug magdala kanato sa kahingpitan ug pagkabalaan, pinaagi sa pan nga iyang Lawas nga atong gikaon ug bino nga iyang Dugo nga atong gi-inom. Kini nagpasabot sa dakong Gugma ni Kristo nganhi kanato, nga atong gihandom sa matag karon ug unya panahon sa Santos nga Misa.

Ang atong Ebanghelyo karon (Jn. 6:51-58), nagsaysay sa pagpakaon ni Kristo sa lima ka libo ka mga tawo pinaagi sa iyang pagpadaghan sa lima ka pan nga sebada ug duha ka mga isda nga gikan sa bata. Diha usab sa atong unang pagbasa karon, kini nagpahinumdom kanato sa dakung Gugma sa Amahan sa iyang pinili nga katawhan, ang mga Israelita, pinaagi sa Iyang pagpakaon kanila sa mana, pagkaon nga wala pa gayod nila natilawan sukad masukad. Nahitabo kining tanan samtang didto pa sila sa disyerto, niadtong nakalingkawas sila sa kaulipnan Ehipto. Si Jesus miingon kanila, nga ang ilang mga katigulangan mikaon og mana apan nangamatay lang gihapon sila. Tungod niini si Jesus miingon sa atong Ebanghelyo karon, siya mihatag sa Iyang Lawas aron atong kan-on ug dugo aron atong imnon aron kita makabaton og kinabuhing dayon, "Busa mao kini ang pan nga mianhi gikan sa langit. Dili kini sama sa pan nga sa ilang mga katigulangan ug nangamatay lang gihapon. Ang mokaon niining maong pan mabuhi sa dayon" (Jn 6:58).

Pagkanindot tagamtamon niining dakong gasa nga gikan sa Dios. Apan makaingon kita diha sa atong kaugalingon, kumusta man ang atong pagpangandam diha panahon nga kita modawat sa Lawas ug Dugo ni Kristo sa Santos nga Misa? Usahay diha makanunayon sa natong pag-apil sa Santos nga Misa makalimot kita nga si Jesus atong gidawat panahon sa pagpangalawat. Mao nga nagkinahanglan kini og pagpangandam sa kaugalingon, lawas ug kalag. Hingpit nga pagpangandam ug anaa sa husto nga disposasyon.

Sa atong pagdawat sa Lawas ug Dugo ni Kristo diha sa atong kinabuhi, ato bang gipaambit ang Iyang presensya diha sa uban, diha sa atong isigkatawo, diha sa atong tagsa-tagsa ka mga pamilya, katilingban ug asa pang dapit nga atong paga-adtoan? Ang presensya ba ni Kristo dinhi sa atong kinabuhi masinati ba sa uban? Mahinungdanon kaayo natong pamalandungan kini tungod kay sa matag dawat nato sa Lawas ug Dugo ni Kristo, kita nahiusa ug nakabaton og kinabuhi diha sa katilingban ni Kristo. Tungod kay kita nakaambit sa Lawas ni Kristo diha nga kita gibunyagan. Sama sa giingon ni San Pablo sa Corinto, "Kay may usa lamang ka pan ug bisan daghan kita usa lamang kita ka Lawas kay nakig-ambit man kita sa usa lamang ka pan" (1 Cor. 10:17).

Tungod niini, sa atong pagsaulog sa kapistahan sa Lawas ug Dugo ni Kristo, kita nga mga binunyagan nakaambit kang Kristo diha sa atong kinabuhi, ug kita nahimong kabahin sa iyang katilingban, nahiusa sa iyang dakong Gugma diha sa Yukaristiya, aron kita makabaton og kinabuhing dayon. Nga sa matag saulog nato sa Santos nga Misa kita naghandum sa misteryo sa pagpasakit, pagkamatay ug pagkabanhaw sa atong Ginoong Jesukristo, busa angay gayod nga kita moambit niining gasa nga gikan sa langit, ang Lawas ug Dugo ni Kristo.

Giya alang sa pamalandong:

1. Ginusa man nako pagdawat si Kristo diha sa matag apil nako sa Santos nga Misa?

2. Aduna ba kini dakung kalambigitan sa akong kinabuhi?

3. Giunsa man nako kini paghatag og dakung bili luyo sa mga haylo sa mga kalibutanong mga butang?

f. PANGALIYA

Pangulo: Mga igsoon, niining pagsaulog nato sa Solemnidad sa Lawas ug Dugo ni Kristo kita gidasig sa pagpakighiusa kaniya diha sa atong matag adlaw nga pagkinabuhi kay Siya man ang tinubdan ug tubag sa tanan natong mga panginahanglan. Sa matag pag-ampo kita motubag: DIOS SA GUGMA DUNGGA KAMI.

1. Amahan sa gugma Imong gitugyan ang Imong anak alang sa kabulahanan sa Imong Simbahan. Hatagi og igong kusog ug kadasig ang mga nag-alagad niini ang Santo Papa, mga Obispo ug mga kaparian. Mag-ampo kita.

2. Amahan nga maloloy-on, itugot nga ang among mga pangulo sa nasud makabaton og mga maayong desisyon nga haum sa Imong kabubut-on alang sa kalamboan sa tanan. Mag-ampo kita.

3. Amahan nga tinubdan sa kinabuhi, lig-ona ug hatagig kadasig ang among mga igsoon nga ang-antus sa kapit-os sa kinabuhi nga dili sila kawad-an og paglaum sa pagpadayon sa pagpakabuhi kay ang Dios sa kanunay nag-atiman kanila pinaagi sa mga instrumento nga Iyang gipadala. Mag-ampo kita.

4. Amahan nga tinubdan sa grasya, himoa kaming angayan sa matag dawat namo sa Lawas ug Dugo ni Kristo nga bisan pa sa among pagkamasalaypon sa gihapon gihatagan Mo kami og higayon nga mahiduol Kanimo kanunay. Mag-ampo kita.

5. Amahan nga malumo og kasingkasing, makaamgo unta ang tanang katawhan sa kabililhon sa Lawas ug Dugo ni Kristo diha sa kinasingkasing nga pagdawat niini pinaagi sa makanunayong pag-apil sa Santos nga Yukaristiya. Mag-ampo kita.

6. Amahan diha sa kahilum among ihalad ang among kaugalingong katuyuan.

Pangulo: Amahan nga walay kinutuban, dungga ang pangamuyo sa Imong katawhan nga nangandoy nga mahiusa kanunay sa Imong bililhong Anak nga namatay alang sa among kaluwasan. Kini among gipangayo pinaagi ni Kristo among Ginoo ug Manunubos. Amen.