Santissima Trinidad

SANTISSIMA TRINIDAD

 (Dominggo human sa Pentekostes)

a. BASAHON I

Ex. 34:4-6,8-9 

Kinutlo gikan sa basahon sa Exodus.

Nagtabas si Moises og duha ka papan nga bato, sama sa unang duha ka papan, ug sayo pagkasunod buntag mitungas siya sa Bukid sa Sinai, ug gidala niya ang duha ka papan nga bato, sumala sa gisugo sa Ginoo kaniya. Unya mikunsad ang Ginoo nga gilimisan sa panganod ug nagbarog didto uban ni Moises, ug gilitok niya ang iyang ngalan, ang Ginoo.

Miagi ang Ginoo sa atubangan ni Moises ug nag-ingon, “Ang Ginoo, ang Ginoo mao ang Dios nga puno sa puangod ug kalooy, dili daling masuko ug hupong sa gugmang makanunayon ug sa pagkamatinumanon."

Mitikubo dayon sa yuta si Moises ug misimba. Miingon siya, "Kon tinuod gayud nga nahimuot Ka kanako hangyoon ko Ikaw Ginoo sa pag-uban kanamo. Tig-a kaayog kasingkasing kining maong katawhan, apan pasayloa ang among pagkadautan, ug ang among kasal-anan ug dawata kami ingon nga Imo na."

Ang Pulong sa Ginoo.

b. SALMO RESPONSORYO

Daniel 3:52,53,54,55,56

Tubag (R) Himaya ug pagdayeg hangtud sa kahangturan!

Dayegon Ikaw, O Ginoo, Dios sa among mga katigulangan, angay Ikawng dayegon ug bayawon labaw sa tanan sa kahangturan; Ug dayegon ang Imong balaan ug mahimayaong ngalan, angayng dayegon ug bayawon labaw sa tanan sa tanang katuigan. (R)

Dayegon Ikaw diha sa templo sa Imong balaang himaya angay Ikawng dayegon ug bayawon labaw sa tanan sa kahangturan. (R)

Dayegon Ikaw diha sa trono sa Imong gingharian, angay ikawng dayegon ug bayawon labaw sa tanan sa kahangturan. (R)

Dayegon Ikaw nga nagadung-aw ngadto sa mga kahiladman gikan sa Imong trono diha sa mga kerubin, Angay Ikawng dayegon ug bayawon labaw sa tanan sa kahangturan. (R)

Dayegon Ikaw diha sa ali sa kalangitan, angay ikawng dayegon ug bayawon labaw sa tanan sa kahangturan. (R)

c. BASAHON II

2 Cor. 13: 11-13

Kinutlo gikan sa ikaduhang sulat ni San Pablo ngadto sa taga Corinto.

Mga igsoon, paningkamoti ninyo nga mahingpit kamo; pamatia ang akong mga hangyo; paghiusa kamo ug pagmakigdaiton. Mag- uban unta kaninyo ang Dios sa gugma ug kalinaw. Pagpangumostahay kamo uban sa halok nga inigsoon.

Nangumosta kaninyo ang tanang katawhan sa Dios. Mag-uban unta kaninyong tanan ang grasya sa Ginoong Jesukristo, ang gugma sa Dios, ug ang pagpakig-ambit sa Espiritu Santo.

Ang Pulong sa Ginoo.

d. EBANGHELYO

Jn. 3: 16-18

Ang Santos nga Ebanghelyo sumala ni San Juan.

Si Jesus miingon kang Nicodemo: "Kay gihigugma pag-ayo sa Dios ang kalibutan ug tungod niini gihatag Niya ang Iyang Bugtong Anak, aron ang tanan nga motuo Kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang Iyang Anak nganhi sa kalibutan aron pagsilot kondili aron pagluwas niini.

Ang tanan nga motuo sa Anak dili silotan, apan kadtong dili motuo Kaniya gisilotan na, kay wala man Siya motuo sa Bugtong Anak sa Dios."

Ang Ebanghelyo sa Ginoo.

e. KOMENTARYO

Tema: Santissima Trinidad: Sentro sa atong Kinabuhi.

Karong adlawa atong gisaulog ang Solemnidad sa Santissima Trinidad, ang sentro sa Kristohahong pagtoo ug kinabuhi. Mao kini ang misteryo sa Ginoo sa Iyang pagka-Siya ug mao kini ang tuburan sa tanang misteryo sa pagtoong Katoliko. Busa atong gisaulog kini sa dakong kalipay nga bisan pa sa kalawon sa misteryo sa Ginoo, Iyang gipadayag ang Iyang kaugalingon kanatong tanan, usa ka Dios, tulo ka persona; Amahan, Anak ug Espiritu Santo. Ang pagpadayag sa Ginoo sa Iyang kaugalingon nagkahulugan sa atong kaluwasan. Diha sa Daang Tugon, ang Dios nagpadayag sa Iyang kaugalingon isip usa ka Amahan, ang tinubdan sa tanang mga butang, makita ug dili makita. Sa bag-ong tugon nagpadayag Siya isip usa ka Anak, si Jesukristo atong manluluwas. Sa kapanahonan sa atong paglawig isip usa ka Simbahan, ang Dios nagpadayag sa Iyang kaugalingon nga mao ang Espiritu Santo. Dili kini nato matungkad nga kamatuoran apan ang Dios hinay hinay nga nagpamatuod niini diha sa atong adlaw adlaw nga kasinatian.

Atong pamalandongan karon ang tulo ka punto. Una mao ang mga buhat sa Amahan, ikaduha ang mga buhat ni Jesukristo ug ikatulo ang mga buhat sa Espiritu Santo. Ang atong unang pagbasa naglarawan sa pagtawag sa Ginoo kang Moises aron pagluwas sa Iyang piniling katawhan. Sa atong ikaduhang pagbasa, si San Pablo naghisgot sa kamatuoran sa Ginoo isip Amahan, Anak ug Espiritu Santo. Ug ang atong Ebanghelyo, nagpadayag sa dakong gugma sa Ginoo. Iyang gipadala ang Iyang bugtong Anak aron pagluwas kanato ug kita gihagit nga motuo sa Iyang Bugtong Anak.

Isip mga binunyagan, atong naambitan ang kaluwaasan nga gihatag kanato sa Ginoo ug kini angay natong puy-an sa atong kinabuhi. Ang Dios Amahan mao ang nagmugna sa kalibutan, makita ug dili makita. Busa wala kita'y katungod sa pag-guba sa kinaiyahan. Atong masinati karong panahona ang tumang kainit sa palibot tungod kay wala nato panumbalinga ug ampingi ang atong kinaiyahan. Mao kini ang hagit kanato, atong puy-an ang pagkapiniyalan sa kalibutan. Labaw pa niini, ang Amahan naghatag og kinabuhi kanatong tanan. Ato untang babagan ang tanan nga maoy magdaot sa sabakan sa mga inahan ug mopatay sa mga inosenting bata. Ang kinabuhi balaan nga angay palamboon ug wala kitay katungod sa pagpatay niini.

Dios Anak nga si Jesukristo ang atong Manluluwas. Sa atong panahon karon daghan ang nag-ingon nga anaa kanila ang kaluwasan. Apan ang kaluwasan makab-ot lamang nato diha kang Jesukristo kay Siya man ang gipadala sa Amahan kanato. Diha sa simbahan Iyang gihatag ang katungod sa pagpanudlo bahin sa atong kaluwasan. Ug gihatagan og dakung tahas mao ang mga kadagkoan sa atong simbahan, ang atong Santo Papa ug mga Obispo sa pagmantala sa mga pagtulon-an mahitungod sa atong Katoliko. Ang Dios Espiritu nga maoy nagdala sa atong kinabuhi maoy naggiya ug naglamdag sa pagmantala sa mga pagtulon-an nga nahisubay sa hustong mga kalagdaan. Giya kanunay ang Espiritu sa Ginoo alang kanatong tanan. Mao nga isip mga Kristiyano, kita magpuyo nga anaa kanunay sa katarung ug nagsubay sa mga pagtulun-an sa simbahan kay mao man kini ang giya ug gabayan sa atong paglawig niining kalibutan padulong sa iyang gingharian.

Kon atong ibutang ang Dios isip sentro sa atong kinabuhi, ang atong tawag sa pagka- binunyagan mamahimong makahuluganon. Dili kini sayon nga hagit apan wala kita'y angay nga kahadlokan kay ang grasya sa Ginoo kanunay nga nag-uban ug naggabay kanato. Ang Santissima Trinidad dili gayod mobiya kanato sama nga wala Siya mibiya sa kasaysayan sa kalibutan. Mapadayonon unta kanunay ang atong pagtoo ug kini mahimong lig-on uban sa giya ug lamdag sa Santissima Trinidad.

Giya alang sa pamalandong:

1. Alang kanako, unsa man ang dakung hagit sa akong kinabuhi nga akong gisagubang karon?

2. Kinsa man ang akong gisaligan ug gidangpan niini?

3. Mitoo ba ako sa usa ka Dios sa tulo ka Personas?

f. PANGALIYA

2nd Edition

Pangulo: Ang kinabuhi sa usa ka Dios tulo ka perso- nas o Santisima Trinidad, sumbanan sa pag- puyo sa kinabuhi sa kadait, gugma og kahi- usa. Uban sa mapasalamatong kasingkasing atong ipadangat ang atong mga pangina- hanglan. Sa matag pag-ampo kita moingon: GINOO, HIUSAHA KAMI SA GUGMA.

1. Alang sa atong Simbahan nga maoy instrumento sa panaghiusa ug gugma mapadayonon unta kining mopa- ambit sa tibuok kalibutan pinaagi sa mga nagdumala niini, ang Santo Papa, mga obispo, kaparian ug mga layko. Mag-ampo kita.

2 Alang sa mga naghupot og gahum sa atong panggam- hanan maningkamot unta silang magmugna og mga balaod nga makahatag og matuod nga kaangayan, gugma ug kahiusahan. Mag-ampo kita.

3. Alang niadtong mga nagkalisod-lisod, biktima sa pag- panlupig, inhustisya ug walay kaangayan nga dili unta sila mawad-an og paglaum nga moabot ra ang panahon nga maangkon nila ang matuod nga kaharuhay gugma ug kahiusahan diha sa presensiya sa labaw'ng Makagagahum. Mag-ampo kita.

4. Alang kanatong tanan, nga mapuy-an nato ang tuoran nga gipadayag sa Balaang Trinidad og mamahimo kama- kini natong sumbanan sa atong pagpaningkamot sa pag-angkon sa kinabuhing walay katapusan. Mag-ampo kita.

5. (Ang mga panginahanglan sa katilingban o uban pang mga katuyoan mamahimong ilakip sa pag-ampo.)

Pangulo : Dios sa gugma ug kahiusa, kami nakasinati sa nagkadaiyang matang sa kalisod tungod sa among garbo og kaugalingon interes, Hiusaha kami diha sa usa ka tumong sa pag- tuman lamang sa imong kabubut-on pinasubay sa gugma. Kini among gipangayo pinaagi ni Kristo among Ginoo ug manluluwas. Amen.

3rd Edition

Pangulo: Ang Solemnidad sa Santissima Trinidad nagpadayag kanato sa tulo ka persona sa usa ka Dios.    Uban sa dakung pagsalig ug pagtoo ato karong ihalad ang atong mga panginahanglan ug mga pag-ampo. Sa matag pangamuyo kita motubag: GINOO SA GUGMA DUNGGA KAMI.

1. Alang sa atong Simbahan nga maoy instrumento sa panaghiusa ug gugma mapadayonon unta kining mopaambit sa tibuok kalibutan pinaagi sa mga nagdumala niini, ang Santo Papa, mga Obispo ug kaparian. Mag-ampo kita.

2. Alang sa nagdumala sa atong panggamhanan moalagad unta sila sa katawhan subay sa panig-ingnan sa pagpangalagad ni Kristo aron ang tanan  makapahimulos sa grasya nga gitaganas sa Dios sa matag usa. Mag-ampo kita.

3. Alang sa tanang mga nag-antus sa kalisdanan sa kinabuhi nga dili unta sila kawad-an sa paglaum ug pagsalig nga ang Dios kanunay nga nag-atiman kanila. Mag-ampo kita.

4. Alang kanatong tanan an nga mapuy- unta nato ang kamatuoran nga gipadayag sa Balaang Trinidad ug mamahimo kini natong sumbanan sa atong pagpaningkamot sa pag-angkon sa kinabuhing walay katapusan. Mag-ampo kita.

5. Alang sa atong mga mahal sa kinabuhi nga nag-una na kanato ngadto sa laing kalibutan hinaut nga makadayon na sila sa puluy-anan nga gitagana sa mahigugmaong Amahan kanila. Mag- ampo kita.

6. Alang sa atong kaugalingong katuyuan atong i-ampo sa hilum.

Pangulo: Dios sa gugma ug kahiusa, masaligon kami nga Imo nang tubagon ang mga pag-ampo nga among gihalad karon. Sayud kami sa among mga kakulangan diha Kanimo apan sa gihapon mitoo kami nga ang Imong kalooy alang kanamo dili masukod.