Solemnidad sa Pagsaka sa Langit sa Ginoo

Solemnidad sa Pagsaka sa Langit sa Ginoo

PASIUNA

Mayo 21, 2023

Maayong buntag/hapon mga igsuon ko diha ni Cristo.

Ania na kita karon sa Ika-pito nga Domingo sa Pagkabanhaw. Karong Domingoha atong gisaulog ang Solemnidad sa Pagkayab sa Ginoo ngadto sa langit. Karong Domingoha usab atong gisaulog  ang Catholic Communication's Sunday.

Ang Unang Pagbasa gikuha gikan sa Mga Buhat sa mga Apostoles. Si San Pablo naghisgot mahitungod sa Pagkayab ni Hesus sa langit ug nagbilin sa Iyang saad ngadto sa mga tinun-an uban sa Espiritu Santo.

Ang Ikaduhang Pagbasa gikuha gikan sa Sulat ni Pablo ngadto sa mga taga-Efeso. Dinhi atong madungog si San Pablo nga naghisgot bahin sa pagbayaw ni Hesus sa tuong kamot sa Amahan.

Ang Ebanghelyo gikuha gikan sa Balaang Ebanghelyo sumala ni San Mateo. Iyang giasoy nga si Jesus misugo sa iyang mga tinun-an sa pag-adto sa bukid sa Galilea aron sa pagsangyaw sa Ebanghelyo ngadto sa tanang kanasuran.

Palihug manindog alang sa pagsugod sa Santos nga Eyukaristiya.

BASAHON I

Acts 1:1-11

KINUTLO GIKAN SA MGA BUHAT SA MGA APOSTOLES

Minahal kong Teofilo:

Sa una kong sulat gihisgotan ko ang tanang butang nga gibuhat ug gitudlo ni Jesus, sukad sa pagsugod niya sa iyang buluhaton hangtod sa adlaw nga gibayaw siya ngadto sa langit. Sa wala pa siya bayawa, gipahimangnoan niya pinaagi sa Espiritu Santo ang mga tawo nga iyang gipili nga mga apostoles. Sulod sa kap- atan ka adlaw human mamatay, nagpakita siya kanila sa makadaghan, sa mga paagi nga nagmatuod nga buhi gayod siya. Nakita siya nila ug nakigsulti kanila mahitungod sa paghari sa Dios. Ug samtang si Jesus uban pa kanila gitugon niya sila, "Ayaw una kamo pagbiya sa Jerusalem; hulata ninyo ang gasa nga gisaad sa akong Amahan, sumala sa gisulti ko kaninyo. Kay si Juan namunyag pinaagi sa tubig, apan pipila na lamang ka adlaw gikan karon bun- yagan kamo pinaagi sa Espiritu Santo."

Sa pagkatigom nila, gipangutana nila si Jesus, "Ginoo, tukoron mo ba pag-usab niining panahona ang gingharian sa Israel?"

Si Jesus mitubag kanila, "Ang mga panahon ug mga adlaw gilatid nang daan sa pagbuot sa akong Amahan; dili kamo angay magpakisayod kon kanus-a kini mahitabo. Apan kon mokunsad na kaninyo ang Espiritu Santo, makadawat kamog gahom ug mahimo kamong akong mga saksi sa Jerusalem, sa tibuok Judea ug Samaria, ug sa tibuok kalibutan." Human niya isulti kini, gibayaw siya ngadto sa langit samtang nagtan-aw sila kaniya, ug siya wala na nila makita kay gisalipdan man siyag panganod.

Samtang nagtutok sila sa langit sa pagkayab ni Jesus, may duha ka tawo nga nagbistig puti nga mitungha pagkalit ug mibarog tupad kanila. Miingon sila, "Mga taga-Galilea, nganong nagbarog man kamo dinhi ug nagsigig hangad sa langit? Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit."

ANG PULONG SA GINOO.

SALMO RESPONSORYO

Ps. 47:2-3, 6-7, 8-9

R. Misaka ang Dios sa iyang trono uban sa mga singgit sa kalipay, usa ka tingog sa mga trompeta alang sa Ginoo.

Kamong tanang mga tawo, pamakpak kamo, singgit kamo ngadto sa Dios sa mga singgit sa kalipay, Kay ang Ginoo, ang Labing Halangdon, ang katahaan, dakong hari sa tibuok nga kalibutan.

R. Misaka ang Dios sa iyang trono uban sa mga singgit sa kalipay, usa ka tingog sa mga trompeta alang sa Ginoo.

Kay hari sa tibuok yuta ang Dios; awiti siyag mga imno sa pagdayeg.

Maghari ang Dios diha sa kanasuran, magalingkod ang Dios diha sa iyang balaang trono.

R. Misaka ang Dios sa iyang trono uban sa mga singgit sa kalipay, usa ka tingog sa mga trompeta alang sa Ginoo.

BASAHON II

Eph. 1:17-23

KINUTLO GIKAN SA SULAT NI SAN PABLO NGADTO SA TAGA-EFESO

Ug naghangyo ako sa Dios sa atong Ginoong Jesucristo, ang gamhanang Amahan, nga hatagan unta kamo sa Espiritu nga maghimo kaninyong ma- alamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabotan aron masayod kamo unsa ang paglaum nga alang niini gitawag kamo. Ug hinaut usab unta nga masayod kamo sa kahupong sa mga panalangin nga gisaad niya sa iyang katawhan. Dugang pa niini, gipanghinaut ko nga masayran ninyo ang kadako sa iyang gahom nga ania kanato nga nagtuo kaniya. Kining gahoma nga ania kanato mao ang gigamit niya pagbanhaw kang Cristo, ug pagpalingkod kaniya sa iyang tuo didto sa langit. Didto naghari si Cristo labaw sa tanang mga hari, ug sa mga anaa sa gahom ug sa mga punoan ingon man sa mga kaginoohan; labaw siya sa tanan bisan unsa pa ang ilang katungdanan niining kalibutana ug sa sunod. Gibutang sa Dios ang tanan ubos sa pagmando ni Cristo, ug alang sa simbahan gihimo siyang pangulo nga labaw sa tanan. Ang simbahan mao ang lawas ni Cristo, ang kahingpitan niya nga mao ang naghingpit sa tanang butang.

ANG PULONG SA GINOO.

EBANGHELYO

Mt. 28:16-20

Kinutlo gikan sa Balaan nga Ebanghelyo sumala ni Mateo

Karon, ang napulog-usà ka mga tinun-an nangadto sa Galilea sa bungtod diin gisugo sila ni Jesus. Ug sa pagkakita nila kaniya, gisimba nila siya; apan adunay ubàn nga nagduhaduha. Ug midúol si Jesus ug misulti kanila sa pag-ingon,

"Gihatag kanako ang tanang gahom sa langit ug sa yuta.

Busa, panglakaw kamo, himoa ninyo nga mga tinun-an ang tanang kanasoran; bunyagi sila sa ngalan sa Amahan, ug sa Anak ug sa Espiritu Santo, tudloi sila sa pagtuman sa tanan nga akong gisugo kaninyo. Ug tan-awa, akò nagauban kaninyo sa tanang mga adlaw hangtod sa kataposan sa panahon."

Ang Ebanghelyo sa Ginoo.

KATILINGBANONG PAG-AMPO

Mayo 21, 2023

Pari: Gitawag kita sa Dios Amahan nga mahiusa ug mahiuban kita kaniya bisan sa dili nato pagka-angayan. Sa matag pag-ampo kita moingon:

GINOO, PAMATI-A ANG AMONG PAG-AMPO.

1. Alang sa mga lideres sa Simbahan ilabina kang Papa Francisco, ang mga Obispo, ang mga Pari, ug ang mga Relihiyoso, malig-on unta ang ilang pagtuo sa pagdala sa kahayag sa Ebanghelyo ngadto sa tanang kanasuran ug kultura pinaagi sa mamugnaong paggamit sa tanang paagi sa sosyal nga komunikasyon. Mag-ampo kita.

2. Alang sa tanang nag-dumala sa panggamhanan, nga sa kanunay ilang masinati ang ilang pagka-instrumento sa Dios aron sa pagsaksi sa matuod nga kalinaw ug gugma. Mag-ampo kita.

3. Alang sa atong mga kaigsuonan nga nabilanggo tungod sa pasangil sa sala nga wala nila mabuhat nga tabangan sila sa Dios pinaagi sa ilang pagtuo nga adunay Dios nga labaw'ng nakasaksi sa ilang binuhatan. Mag-ampo kita.

4. Alang sa mga nalambigit sa mga sosyal nga komunikasyon, pinaagi sa panabang ni Arkanghel Gabriel, masinati unta nila ang balaang paggiya ni Jesus samtang sila naningkamot sa pagpalambo sa ilang mga kahanas sa pag-impluwensya sa katawhan. Mag-ampo kita.

5. Alang sa mga napriso tungod sa krimen nga wala nila buhata, makadawat unta sila og hustisya ug kaangayan ug nga mabuhi ang ilang pagtuo ug magkinabuhi nga may dignidad ug pagsalig sa Diyos. Mag-ampo kita.

6. Alang niadtong naghalad ug pagpasalamat ug pagdayeg sa Diyos ilabina maablihan unta ang ilang kasingkasing alang sa pagpangilabot sa Balaang Espiritu ug magpuyo diha kanila hangtod sa kahangturan. Mag-ampo kita.

7. Alang sa atong mga nitaliwan nga mga igsoon diha ni Kristo ilabina makadawat unta sa kinabuhing dayon ug makapuyo uban sa mga Santos sa langit. Mag-ampo kita.

Pari: Amahan, masaligon kami sa imong Diosnon nga pag-ampoma. Patalinghugi ang among mga pag-ampo uban sa dakong kahinangop nga amo nang matagamtaman ang bunga sa among pagpakighiusa ug pagpakig-uban kanimo. Kini among gipangayo pinaagi ni Cristo nga among Ginoo. Amen.