ikawalo

IKAWALO NGA ADLAW

I. RITO SA PAGSUGOD

Mga igsoon ko diha ni Kristo maayong gabii kaninyong tanan

ako diay si Brod Allan Napitan pangulo sa liturhiya sa katilingban ni San Jose Esposo ni Maria sa Uraya gipadala ug gitahasan sa pagdumala niining ika-walo nga novena pahinungod sa atong mahal nga Patron San Isidro Labrador... ug agig pagsugod gidapit ko kamo sa pagtindog alang sa pasiunang awit.

1. Pagbasa sa Kasaysayan sa Kinabuhi sa Patron (Kung dunay kopya ang katilingban apan kun wala mopadayon sa pasiunang awit)

2. Pasiunang Awit

3. Pag-abiabi

Pangulo: Sa ngalan sa Amahan, sa Anak ug sa Espiritu Santo.

Tanan: Amen.

Pangulo: Mga igsoon, sa pagbalik sa Prinsipe sa tanang mga ministro ug pastor sa Simbahan, ang tanang nag-alagad Kaniya makadawat sa korona sa himaya nga walay paglubad. Sa atong pagsaulog sa pangilin sa atong Patron, si San Isidro Labrador. mag-ampo kita sa grasya sa pagka maalagaron ngadto sa tanan.

Mohilom kita sa makadiyot ug atong pamalandungan ang mga nabuhat natong kasaypanan o sa panahon nga kita wala magpakabana sa atong misyon isip mga sakop sa simbahan.

4. Pagpangayo'g Pasaylo

Pangulo : Sa tumang pagpaubos sa kaugalingon. atong pangayoon Kaniya ang kapasayloan diha sa pag-awit sa Ginoo, kaloy-i kami.

Tanan: Ginoo, kaloy-i kami.

(awiton)

5. Pasiunang Pag-ampo

O Ginoong Dios, ang tibuok kalibutan imoha, ug gitawag mo kami sa pag-alagad kanimo pinaagi sa pag-atiman sa mga hatag nga naglibot kanamo.

Itugot, nga ang panig-ingnan ni San Isidro Labrador among Patron magdasig kanamo sa pagpakig-ambit sa among makaon uban sa mga gigutom ug pagbudlay alang sa kaluwasan sa katawhan.

Kini among gipangayo pinaagi sa among Ginoong Jesukristo Imong Anak nga buhi ug hari uban Kanimo ug sa Espiritu Santo, Dios hangtud sa kahangturan.

II. KASAULOGAN SA PULONG SA DIOS

(Sa dili pa ang pagbasa, dapiton sa pangulo ang katauhan sa pag-ingon:)

Pangulo: Mga kaigsoonan, paminawon nato karon ang Pulong sa Dios nga nagpadayag sa gugma sa Amahan nganhi kanato. Sa atong pagpaminaw, atong sination kining maong gugma nga maoy nagpalawom sa atong paglaum ug pagtoo sa Ginoo.

Palihug manglingkod.

1. Pagbasa

1 Corinto 1:1-9

Kinutlo gikan sa unang sulat ni San Pablo ngadto sa taga-Corinto.

Gikan ni Pablo nga sa pagbuot sa Dios gitawag aron mahimong apostol ni Kristo Jesus, ug gikan usab sa atong igsoon nga si Sostenes.

Alang sa iglesia sa Dios sa Corinto, ug sa tanan nga gitawag aron mahimong balaang katawhan sa Dios, nga naiya diha sa ilang pagkahiusa kang Kristo Jesus, uban sa tanang tawo sa tanang dapit nga nagsangpit sa ngalan sa atong Ginoong Jesukristo nga ila ug ato usab nga Ginoo.

Ang Dios nga atong Amahan ug ang Ginoong Jesukristo maghatag unta kaninyog grasya ug kalinaw.

Sa kanunay nagpasalamat ako sa Dios alang kaninyo tungod sa grasya nga Iyang gihatag kaninyo pinaagi kang Kristo Jesus. Kay diha sa pagkahiusa ninyo kang Kristo, nadatu kamo sa tanang butang lakip sa tanang ug sa tanang kahibalo. Ang mensahe mahitungod kang Kristo nakagamot na kaninyo, ug tungod niini nakadawat kamo sa pagpadayag sa atong Ginoong Jesukristo. Lig-onon usab kamo Niya hangtud sa katapusan aron wala unyay ikasaway kaninyo sa adlaw sa pagbalik sa atong Ginoong Jesukristo. Kasaligan ang Dios nga nagtawag kaninyo aron mahiusa sa Iyang Anak nga si Jesukristo nga atong Ginoo.

Ang Pulong sa Ginoo.

2. Salmo Responsoryo

Salmo 145: 2-3,4-5,6-7

Tubag (T): Dayegon ko sa kahangturan ang Imong ngalan, Ginoo.

Himayaon ko Ikaw adlaw-adlaw, ug dayegon ko ang Imong ngalan hangtud sa kahangturan. Daku ang Ginoo ug angay gayud nga dayegon ang Iyang kadaku nga dili matukib. (T)

Ang tanang kaliwatan nagadayeg sa Imong mga buhat ug nagasangyaw sa Imong gahum. Nagasulti sila sa kasanag sa Imong mahimayaong kahalangdon ug nagasaysay sa Imong katingalahang mga buhat. (T)

Nagabatbat sila sa gahum sa Imong makalilisang nga mga buhat ug nagamantala sa Imong kadaku. Nagasibya sila sa kabantog sa Imong naghingapin nga kaayo ug nagaawit nga malipayon sa Imong katarung. (T)

3. Pagpasidungog sa Ebanghelyo

(awiton)

4. Ebanghelyo

Mateo 24: 42-51

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Pagbantay kamo, kay wala kamo masayud kon unsang adlawa moanhi ang Ginoo. Hinumdumi kini: kon ang agalon sa panimalay nasayud pa sa takna nga iabot sa kawatan, magatukaw gayud siya ug dili motugot nga ang kawatan molungkab sa balay. Busa kamo usab kinahanglan mag-andam kanunay, kay moabot ang Anak sa Tawo sa takna nga kamo wala magpaabot Kaniya."

"Busa, kinsa man ang buotan ug maalamon nga sulugoon? Kadtong gipiyalan sa iyang agalon sa pagdumala sa ubang mga sulugoon, ug sa paghatag kanilag pagkaon sa hustong panahon. Pagkabulahan niadtong sulugoon nga makaplagan sa iyang agalon nga nagtuman niini, sa paghiuli niya! Sultihan ko kamo nga ang maong sulugoon himoon sa agalon nga piniyalan sa tanan niyang katigayonan. Apan kon siya dautang sulugoon, moingon siya sa iyang kaugalingon, 'Dugay pang mouli ang akong agalon,' ug mosugod siya pagpamunal sa iyang mga kaubang sulugoon, ug magpalabig kaon ug inom uban sa mga palahubog.' Unya ang agalon niadtong maong sulugoon mahibalik usa niana ka adlaw nga wala niya paabota ug sa takna nga wala niya hibaloi; ug tagodtagoron siya sa agalon ug pahiagumon siya sa gidangatan sa mga tigpakaaron-ingnon. Didto maghilak siya ug magkagot sa iyang ngipon."

Ang Ebanghelyo sa Ginoo.

5. Komentaryo

Gikan sa sermon o wali ni San Fulgentius sa Ruspe, Obispo (Liturhiya sa mga Takna, volume IV, pahina 1757-1759).

Tema: ANG MASALIGON UG MAKINA-ADMANON NGA PINIYALAN.

Ang atong Ginoo sa Iyang tinguha nga mapasabot sa espesyal nga katungdanan kansang sulugoon Iyang gitahasan sa Iyang katawhan, miingon: Sa inyong hunahuna, kinsa man ang masaligon ug makinaadmanon nga piniyalan kang kansang agalon nagtugyan sa iyang panimalay sa paghatag kanilag bahin sa pagkaon sa hustong panahon? Bulahan ang maong sulugoon kon makit-an siya nga nagbuhat niini sa dihang ang iyang agalon moabot.

Ug kinsa kining maong agalon? Walay lain kundili si Kristo, nga miingon ngadto sa Iyang mga disipulo: Gitawag ninyo Ako nga magtutudlo ug agalon, ug husto kamo, kay Ako man. Ug kinsa ang agalon sa panimalay? Sa walay duhaduha, ang Simbahan nga giluwas sa Ginoo gikan sa gahum sa kaaway ug gitubos sa Iyang kaugalingon, ug sa ingon niana mamahimong Iyang agalon. Ang billhong dugo sa Ginoo nagluwas niining panimalay kon ang santos nga Katolikong Simbahan kansang kalipay nagapadayon nga mabungahon lukop sa kalibutan. Ingon nga ang Ginoo miingon sa Iyang kaugalingon: Ang Anak sa Tawo mianhi dili aron alagaran apan moalagad ug motugyan sa Iyang kinabuhi agig tubos alang sa kadaghanan. Dugang pa, Siya ang Maayong Magbalantay nga mitugyan sa Iyang kinabuhi alang sa Iyang karnero, ang Maayong Magbalantay sa Iyang panon mao ang panimalay sa Manluluwas.

Apan kinsa man kining piniyalan nga matinoohon ug makinaadmanon? Si apostol Pablo miingon kanato sa dihang mipunting siya sa iyang kaugalingon ug sa iyang mga kaubanan: Kinahanglan mao unta kini ang panglantaw sa katawhan kanato ingon nga mga sulugoon ni Kristo ug mga piniyalaan sa mga misteryo sa Dios. Labot pa, gikinahanglan sa mga piniyalaan nga masuta sila nga matinud-anon.

Apan wala kini nagpasabot nga ang mga apostoles lamang ang gitudlo isip piniyalan. Ni usa kanato mobiya sa atong katungdanan sa espirituhanong pakigbugno sa dautan o ingon nga magtinapolan nga sulugoon; ni magpasagad sa panahon ug sa ingon ni mapakyas sa pagkama- tinoohon ug makinaadmanon. Kay ang balaang apostol miingon kanato nga ang mga Obispo usab mga piniyalan. Ang usa ka Obispo, miingon siya, kinahanglan dili salawayon tungod kay siya piniyalan man sa Dios.

Nan, ang mga Obispo sulugoon sa tag-iya sa balay, sama nga ang piniyalan ngadto sa Agalon, ug nadawat namo isip mga Obispo ang bahin sa pag- ambit kaninyo. Kon maghunahuna kamo kun unsa kining nga pagkaon? Ang balaang apostol nagasulti: Sumala sa matag usa, ang sukod sa pagtoo gihatag kaniya sa Ginoo. Busa, ang gitawag ni Kristo nga bahin sa pagkaon mao ang gitawag ni Pablo nga sukod sa pagtoo. Mga pagkaon mao ang Yukaristiya ug mga sakramento sa Kristohanong pagtoo. Gihatag namo kini nga gasa sa grasya ug gitudlo namo kaninyo sumala sa balaod sa tinuod nga pagtoo. Isip balos, inyong madawat sa matag adlaw ang bahin sa pagkaon diha sa mga kamot sa piniyalan sa Ginoo sa matag paminaw ninyo sa pulong sa kamatuoran nga gikan sa mga sulugoon sa Dios.

6. Nobena pahinungod sa Patron (Isal-ot dinhi ang nobena pangamuyo subay sa matag adlaw)

7. Pangaliya Alang sa Tanan

Pangulo: Atong pangayoon karon gikan sa atong Mahigugmaong Amahan ang atong mga panginahanglan diha sa atong pag-ingon: Ginoo, kaloy-i kami.

a.) Alang sa atong Santo Papa, Juan Pablo, mga Obispo, mga pari ug mga relihiyoso, nga sa kanunay giyahan sila sa gahum sa Espiritu Santo aron molahutay sila sa ilang pag-alagad sa katawhan. Mag-ampo kita sa Ginoo.

b.) Alang sa mga namunoan sa atong nasud, nga ang mga pagtulun-an ni Kristo maoy mopatigbabaw sa ilang galamhan aron magmaalagaron sila sa tanang katawhan inubanan sa diwa sa paghinigugmaay ug pakigdait. Mag-ampo kita sa Ginoo.

c.) Alang sa tanang Kristiyanos nga midawat sa kaakuhan ngadto sa pagkamagsasangyaw sa Imong Pulong nga sa kanunay sila madasig bisan pa sa mga pagsulay nga ilang mahiaguman. Mag- ampo kita sa Ginoo.

d.) Alang sa mga kabatan-onan nga unta madasig sila nga motahan sa ilang kaugalingon ngadto sa bokasyon sa pagkapari o pagkarelihiyoso aron sa pagtubag sa mga panginahanglan sa katawhan kinsa giuhaw sa pagpamati sa Imong Pulong. Mag- ampo kita sa Ginoo.

e.) Alang sa mga ginikanan, nga unta sila maoy maghatag og kadasig ngadto sa ilang mga anak nga moalagad sa Ginoo pinaagi sa pagserbisyo sa tanang simbahan. Mag-ampo kita sa Ginoo.

f.) Alang sa...(idugang dinhi ang mga panginahanglan sa katilingban.)

g.) Alang sa atong mga igsoon nga nangamatay na, unta ila nang madawat ang ganti nga gitagana alang kanila sa Dios. Mag-ampo kita sa Ginoo.

h.) Mag-ampo kita sa hilom alang sa atong kaugalingong katuyoan.

Pangulo: Ginoo, masaligon ug malaumon kami nga Imong dunggon ang among mga pangaliya nga among gihalad nganha Kanimo pinaagi sa Imong Bugtong Anak nga si Jesukristo nga among Ginoo. Amen.

8. Awit sa Paghalad sa mga Gasa

Pangulo: palihug manglingkod ug atong andamon ang mga gasa.

9. Amahan Namo

Pangulo Mag-ampo kita nga moabot unta ang Gingharian sa Dios sumala sa gitudlo kanato ni Kristo.

Awiton: Amahan namo...

10. Panagdait

Pangulo: Tungod kay mga anak man kita Dios, ipakita ta karon ang kalinaw nga gibilin ni Kristo kanato. Peace be with you...

III. RITO SA PAGTAPOS

1. Katapusang Pag-ampo

Pangulo: Ginoo, nadungog namo ang mga balaanon Mong Pulong sa Kasulatan ug among naamgohan ang mga panig-ingnan sa mahal nga Patron, nga si San Isidro Labrador ug nagahangyo Kanimo nga mahuptan unta namo dinhi sa yuta ang kinabuhing walay katapusan. Kini among gipangayo pinaagi ni Kristo among Ginoo.

Tanan: Amen.

2. Panalangin

Pangulo:

Si Kristo nagpahinumdum kanato: "Mohatag Ako kaninyo og mga magbalantay nga sumala sa Akong kasingkasing, nga magmatoto kaninyo sa kinaadman ug maayong pagtulun-an", nag-ingon ang Ginoo.

Manglakat kita uban sa pagtoo sa Dios nga matinud-anon sa Iyang Simbahan. Sa ngalan sa Amahan, sa Anak ug sa Espiritu Santo.

Tanan: Amen.

3. Pahibalo

(Palingkoron ang pangulo sa katawhan alang sa pahibalo.)

4. Katapusang Awit

(Gozos)