IKAUNOM NGA DOMINGO SA PAGKABANHAW

IKAUNOM DOMINGGO SA PAGKABANHAW

a. BASAHON I

Buh. 8:5-8,14-17

Kinutlo gikan sa basahon sa Buhat sa mga Apostoles.

Si Felipe miadto sa usa ka siyudad sa Samaria ug didto giwalihan niya ang katawhan mahitungod sa Mesiyas. Ang mga tawo naghiusa pagpaminaw sa gisulti ni Felipe sa dihang nakabati sila kaniya ug nakakita sa mga milagro nga iyang gibuhat. Ang mga yawa nanggula gikan sa daghang mga tawo ug naninggit pagkusog, ug daghan usab nga mga paralitiko ug mga bakol nangaayo. Busa nalipay pag-ayo ang tibuok Samaria.

Ang mga apostoles nga didto sa Jerusalem nakadungog nga ang mga taga Samaria midawat sa Pulong sa Dios, busa ilang gipadala si Pedro ug si Juan ngadto kanila. Sa pag-abot nila nag- ampo sila nga ang mga magtotoo makadawat unta sa Espiritu Santo, kay ang Espiritu Santo wala pa man mokunsad bisan sa usa kanila. Nabunyagan lamang sila sa ngalan sa Ginoong Jesus. Unya si Pedro ug si Juan mipandong kanila sa ilang mga kamot ug nakadawat sila sa Espiritu Santo.

Ang Pulong sa Ginoo.

b. SALMO RESPONSORYO

Salmo 66:1-3,4-5,6-7,16,20

Tubag (R) - Pasinggita ang tibuok yuta ngadto sa Dios uban sa kasadya.

Singgit kamo nga malipayon ngadto sa Dios, kamong tanan diha sa yuta, awitig pagdayeg alang sa himaya sa Iyang ngalan; Ingna ang Dios, "Pagkamakataha sa Imong mga buhat!" Isangyaw ang Iyang mahimayaong kadayeganan. (R)

Pasimbaha ang tibuok yuta ug paawita og pagdayeg ngadto Kanimo. Paawita og mga pagdayeg alang sa Imong ngalan." Umari kamo ug tan-awa ang mga buhat sa Dios, ang Iyang makataha nga mga buhat sa taliwala sa mga tawo. (R)

Gihimo Niya ang yuta nga mamala ug ang kadagatan latas sa suba nanglakaw sila; busa magsadya kita diha Kaniya. Nagahari Siya pinaagi sa Iyang gahum hangtud sa kahangturan. (R)

Pamati karon, kamong tanang mahadlokon sa Dios, samtang ipahayag ko unsa ang Iyang gibuhat kanako. Dalayegon ang Dios nga wala magtungina kanako sa akong pangayo o sa Iyang kalooy. (R)

c. BASAHON II

1 Pedro 3:15-18

Kinutlo gikan sa unang sulat ni San Pedro.

Pasidunggi ninyo si Kristo diha sa inyong mga kasingkasing, ug himoa Siya nga inyong Ginoo. Pangandam kamo kanunay pagtubag kang bisan kinsa nga magpakisayod kaninyo mahitungod sa inyong paglaum. Apan buhata kini sa kalumo ug pagtahud. Batoni ang malinis nga konsensiya aron nga kon kamo bugalbugalan, kadtong nagsaway sa inyong maayong pamatasan ingon nga mga sumusunod kang Kristo maulawan sa ilang gipanulti. Kay mas maayo pa ang pag-antus tungod sa pagbuhat sa maayo kon kini kabubut-on man sa Dios, kay sa pagbuhat sa dautan. Kay si Kristo mismo namatay sa makausa lamang tungod sa atong mga sala, ang matarung alang sa mga dili matarung, aron pagdala kanato sa Dios. Ang Iyang lawas gipatay, apan gibanhaw diha sa espiritu.

Ang Pulong sa Ginoo.

d. EBANGHELYO

Jn. 14:15-21

Ang Santos nga Ebanghelyo sumala ni San Juan.

Si Jesus miingon sa Iyang mga tinun-an: "Kon nahigugma kamo Kanako, tumana ninyo ang Akong mga sugo. Mangayo Ako sa Amahan, ug hatagan kamo Niyag laing Manlalaban, ang Espiritu sa kamatuoran, aron makig-uban kaninyo hangtud sa kahangturan. Ang kalibutan dili makadawat Kaniya, kay dili man kini makakita ni makaila Kaniya. Apan kamo nakaila Kaniya, kay nagauban Siya ug nagapuyo diha kaninyo.

Dili Ko kamo pasagdan nga mag-inusara; mobalik Ako kaninyo. Sa dili madugay ang kalibutan dili na makakita Kanako, apan kamo makakita Kanako, ug tungod kay Ako buhi man, kamo usab mabuhi. Inig-abot niadtong adlawa, mahibalo kamo nga Ako anaa sa Amahan ug kamo ania Kanako, ingon nga Ako anaa usab kaninyo.

Ang modawat sa Akong mga sugo ug motuman niini mao ang nahigugma Kanako. Ang Akong Amahan mahigugma kaniya nga nahigugma Kanako; Ako usab mahigugma kaniya ug magpadayag sa Akong kaugalingon ngadto kaniya.

Ang Ebanghelyo sa Ginoo.

e. KOMENTARYO

Tema: Matinud-anong Pagsunod sa Kabubut- on sa Dios.

Diha sa usa ka "survey” nga gipahigayon, mitumaw nga usa sa mga naobserbahan diha sa katilingban mao ang lig-on nga panaghiusa, pagpakiglambigit ug pagsinabtanay sa mga pangulo ug miyembro. Giila kini nga bunga sa gugma ug timailhan sa pagkaanaa sa Dios diha sa katilingban.

Ang Ebanghelyo karong adlawa naghatag kanato og paglaum ug kadasig, kay si Kristo misaad nga dili gayud siya mobiya kanato, hinonoa mag-uban siya kanato kanunay pinaagi sa pagpadala sa Amahan ug manlalaban, ang Espiritu Santo. Ang Espiritu sa Dios ug sa nabanhawng Kristo mao ang mahimo natong kalig-on sa sa pagpadayon sa matinud-anong pagtoo ug pagpakig-uban kaniya, ang maghatag kanato og kaalam ug kadasig sa pagpuyo sa atong kinabuhi sumala sa kabubut-on sa Dios Amahan ug sa pagtulun-an sa atong Ginoong Jesukristo. Ang atong Ginoo nga nahigugma gayud kanato sa tinuoray, wala mohunong sa pagpakita kanato niining maong gugma diha sa iyang kamatayon sa krus. Hinonoa nagpadayon siya pinaagi sa pagpangayo sa Dios Amahan sa Espiritu Santo aron padayon nga mag-uban ug maggiya kanato sa atong panaw niining hamubong kinabuhi. Kita kaha sa atong bahin, makasaad ba ug makahimo sa pagpabilin uban sa atong Ginoo diha sa matinud-anong pagtuman sa kabubut- on sa Amahan?

Ang unang pagbasa nga gikutlo sa basahon sa mga Buhat sa mga Apostoles naghulagway sa malampuson nga pagsangyaw ni Felipe sa Maayong Balita didto sa Samaria. Apan nahimong sayon sa mga taga Samaria ang pagdawat sa iyang mga pagtulun-an tungod sa mga milagro nga iyang nahimo didto. Kita ba usab sa atong kapanahonan karon, mas mahimong dali kita nga motuo kon makakita kita og mga katingalahan ug dili kasagarang hitabo. Ang Santos nga Misa daw ordinaryo na lang kaayo alang kanato ug gipawalay bili mao nga wala na kitay gana nga motambong o moapil niini. Kon motambong man ugaling wala usab nato hatagi og bili kay magsige man kita og gamit sa atong mga "cellphone" ug mag-estoryahanay ba kaha sa atong katapad.

Nagka-anam na og kahanaw ang atong pag-ila kon unsa ka balaan ug kasagrado sa lugar ug kasaulogan nga atong giapilan.

Kinahanglan ba nga mahimong "mystical" ang pagsaulog sa Yukaristiya aron adunay "appeal" alang kanato? Wala ba kita makaamgo sa dakung misteryo sa paghimo sa pan ug bino nga tinuod nga Lawas ug Dugo ni Jesukristo? Kon nagtuo kita nga ang atong gikalawat diha sa Misa pan lamang ug dili ang tinuod nga Lawas sa atong Ginoong Jesukristo, nan, adunay dakung kulang ang atong pagtoo ug pagkasumusunod kaniya. Seguro ang gigamit nato nga sukdanan sa atong pagtoo mao ang atong tawhanong mga "senses" ug dili ang atong mga mata sa pagtoo. Si Kristo na mismo ang nagsulti: "Kini mao ang akong Lawas" (Lukas 14:22). "Kini mao ang akong Dugo" (Lukas 14:24). Kon may pagtoo ug pagtahud kita sa atong Dios, mahimo nato ang pagdawat sa kamatuoran nga siya mismo ang atong gidawat diha sa Santos nga Misa.

Sama sa gibuhat ni Pedro ug Juan, nag- ampo nga ipadala sa Dios ang Balaang Espiritu aron kini maglig-on sa pagtoo ug maggiya sa matinud-anong pagsunod sa mga sugo sa Dios nga mao ang paghigugma kaniya sa tibuok natong hunahuna, kasingkasing, kalag ug kusog. Ug nga kita mahisama unta sa paghigugma nato ngadto sa atong isigkaingon sama sa atong paghigugma sa atong kaugalingon.

Nagpahinumdum usab ang atong ikaduhang pagbasa gikan sa sulat ni San Pedro sa pagpasidungog nato kang Kristo nga atong Ginoo diha sa pagkinabuhi nga mapaubsanon, sa kalumo ug pagtahud. Kay mas maayo pa ang pag-antus tungod sa pagbuhat og maayo, kon kini kabubut-on sa Dios, kay sa pagbuhat sa dautan. Uban sa kadasig sa Espiritu Santo, makahimo unta kitang tanan sa "Pagdayeg sa Dios pinaagi sa usa ka singgit sa kalipay!" (Salmo 66).

Giya alang sa pamalandong:

1. Unsa man ang mga kinaiya nga angay natong bag-ohon aron mahimo kitang matinud-anon nga mga anak sa Dios?

2. Sa unsang paagi nato mapakita ang atong tahas sa pagsangyaw sa Gingharian sa Dios?

f. PANGALIYA

Pangulo: Mga igsoon, ang Dios nagpadala kanato og manlalaban ang Espiritu Santo nga maoy mag- uban kanato sa pagtuman sa Iyang mga kasuguan diha sa paghigugma. Busa atong ipadangat Kaniya ang atong mga pangina- hanglan diha sa pag-ingon: DIOS NGA MAHIGUGMAON, DUNGGA KAMI.

1. Alang sa tanang nagdumala sa Simbahan, Santo Papa, obispo, kaparian ug mga layko. Nga giniyahan sa lamdag sa Espiritu Santo, mapuy-an ug mapakaylap unta nila ang mithing Kristohanon bisan pa sa mga pagpanlutos. Mag-ampo kita.

2. Alang sa tanang nagdumala sa kinatibuk-an ug lokal nga panggamhanan. Nga magmasaligon unta sila sa Espiritu Santo, kinsa mogiya kanila sa tanang mga disisyon nga ilang pagabuhaton nga may kalambigitan sa atong ekonomikanhon nga kahimtang. Mag-ampo kita.

3. Alang sa tanan natong mga igsoon nga nag-antus sa tumang kawad-on, mga masakiton mga himalatyon, nga dinasig sa balaang Espiritu mahupay ang ilang kasakitan tungod usab sa mga tawo nga nagpakabana kanila. Mag-ampo kita.

4. Alang sa tanang pangulo sa nagkalainlaing organi- sasyon sa atong katilingban magmalig-on unta sila taliwala sa tanang mga pagsulay nga ilang pagaagian ilabi na diha sa pagdumala sa GKK. Mag-ampo kita.

5. Alang kanatong tanan nga nagkatigom karon dinhi, dugang unta natong masinati ang gugma sa Dios pinaagi sa Iyang pagpadala sa Espiritu Santo nga maoy atong kalig-on diha sa atong inadlaw-adlaw nga panginabuhi. Mag-ampo kita.

6. Alang sa ... (idugang ang panginahanglan sa katilingban). Mag-ampo kita.

7. Alang sa atong kaugalingong katuyoan. Mag-ampo kita sa hilom.

Pangulo: Dios nga labing gamhanan, tungod sa Imong pagpadala sa Espiritu Santo, malaumon kami nga ang among mga pag-ampo Imo gayud nga hatagan og katumanan kon kini nahasubay man sa Imong kabubut-on. Kini among gipa- ngayo pinaagi ni Kristo among Ginoo. Amen.