DOMINGO SA PENTEKOSTES

Domingo sa Pentekostes

ABC

PASIUNA 

Mayo 28, 2023

Maayong buntag/hapon mga igsuon ko diha ni Cristo.

Ang tibuok Simbahan nagsaulog karong adlawa sa Domingo sa Pentekostes. Mao kini ang Ikalim-an nga adlaw sukad sa atong pagsaulog sa Pasko sa Pagkabanhaw sa atong Ginoo.

Diha sa Unang Pagbasa nga gikuha gikan sa Basahon sa Buhat sa mga Apostoles atong madungog nga ang mga magtutuo napuno sa Espiritu Santo.

Diha sa Ikaduhang Pagbasa nga gikuha gikan sa Unang Sulat ni San Pablo ngadto sa taga-Corinto. Si San Pablo nagpahinumdum kanila nga sila "binunyagan diha sa usa lamang ka lawas, pinaagi sa mao ra gihapon nga Espiritu..."

Diha sa Ebanghelyo sumala ni San Juan atong madungog nga si Jesus mipakita sa iyang mga apostoles ug "mihuyop siya ug miingon kanila, "Dawata ninyo ang Espiritu Santo.."

Palihug manindog alang sa pagsugod sa Santos nga Eyukaristiya.

BASAHON I

Acts 2:1-11

KINUTLO GIKAN SA MGA BUHAT SA MGA APOSTOLES

Sa pag-abot na sa adlaw sa Pentekostes, ang tanang magtutuo nagtigom sa usa ka dapit. Ug sa kalit may dahunog gikan sa langit, sama sa kusog nga huros sa hangin, ug milukop kini sa tibuok balay nga ilang gitigoman. Unya nakakita silag daw mga dila nga kalayo nga nanugdon diha sa matag usa kanila. Silang tanan napuno sa Espiritu Santo ug misulti sa nagkalainlaing pinulongan sumala sa gipasulti kanila sa Espiritu.

Sa Jerusalem may mga Judio nga relihiyoso kaayo nga gikan sa nagkalain- laing nasod sa kalibutan. Sa pagkadungog sa mga tawo sa kabanha, nanugok sila ug labihan nilang katingala kay ang tagsatagsa ka magtutuo nagsulti man sa tagsatagsa ka pinulongan sa mga namati. Busa sa dakong kahibulong, miingon sila, "Dili ba taga-Galilea man kining mga tawhana? Nganong nakasulti man sila sa atong tagsatagsa ka pinulongan? Dinhi kanato may mga taga-Partia, Media, Elam, Mesopotamia, Judea, Capadocia, Ponto, Asia, Frigia, Panfilia, Ehipto, ug sa mga dapit sa Libya duol sa Cirene; ang uban kanato taga-Roma, nga mga Judio ug mga dili Judio nga nakabig sa tinuohan sa mga Judio; ug may pipila pa kanato nga taga-Creta ug Arabia-apan bisan pa niini, kitang tanan nakadungog kanila nga nagsulti sa atong tagsatagsa ka pinulongan mahitungod sa katinga- lahang mga butang nga gibuhat sa Dios."

ANG PULONG SA GINOO.

SALMO RESPONSORYO

Ps. 104:1, 24, 29-30, 31, 34

R. Ginoo, ipadala ang imong Espiritu, ug bag-oha ang nawong sa yuta.

Dayga ang Ginoo, kalag ko!

O Ginoo, akong Dios, dako gayod ikaw! Pagkadaghan sa imong mga buhat, O Ginoo!

Puno ang yuta sa imong mga binuhat;

R. Ginoo, ipadala ang imong Espiritu, ug bag-oha ang nawong sa yuta.

Kon imong kuhaon ang ilang ginhawa, mangamatay sila ug mobalik ngadto sa abog.

Sa imong pagpadala sa imong espiritu, magama sila, ug mabag-o nimo ang nawong sa yuta.

R. Ginoo, ipadala ang imong Espiritu, ug bag-oha ang nawong sa yuta.

Molungtad unta sa gihapon ang himaya sa Ginoo; ug malipay ang Ginoo diha sa iyang mga buhat!

Makapahimuot unta kaniya ang akong isugilon; maglipay ako diha sa Ginoo.

R. Ginoo, ipadala ang imong Espiritu, ug bag-oha ang nawong sa yuta.

BASAHON II

1 Cor. 12:3-7, 12-13

KINUTLO GIKAN SA UNANG SULAT NI SAN PABLO NGADTO SA TAGA-CORINTO

Busa kinahanglan hibaloan ninyo nga ang nga gimandoan sa Espiritu sa Dios dili makatunglo kang Jesus, ug walay makasugid nga si Jesus mao ang Ginoo, gawas kon mandoan siya sa Espiritu Santo.

May nagkalainlaing mga hiyas nga espirituhanon, apan mao rang Espirituha ang naghatag niini. May nagkalainlaing paagi sa pag-alagad, apan mao rang Ginooha ang gialagaran. May nagkalain- laing katakus sa pag-alagad, apan usa ra ka Dios ang naghatag og katakus sa tagsatagsa alang sa tanang pag-alagad. Ang matag usa gihatagan og pipila ka ilhanan sa presensiya sa Espiritu alang sa kaayohan sa tanan.

Kay si Cristo sama sa usa ka lawas nga may daghang bahin apan usa ra ka lawas bisan kon nagkalainlain ang mga bahin niini. Sa samang pagkaagi, kitang tanan, mga Judio ug mga dili Judio, mga ulipon ug mga dili ulipon, gibunyagan diha sa usa ka lawas, pinaagi sa mao gihapong Espiritu, ug gipainom kitang tanan sa usa ka Espiritu.

ANG PULONG SA GINOO.

SEKWENSIYA

Umari ka, O Espiritu Santo, ug ibanwag ang langitnong silaw sa imong kahayag. 

Amahan sa mga kabos, tighatag sa mga gasa,

Sa mga kasingkasing masiga nga kahayag. Ikaw mao ang maglilipayng labing hingpit 

Sa kalag kalan-ong tam-is, binating dinapit,

Pahulayanan ka dinhi sa tanang kabudlay

Sa kainit tigbugnaw, sa kagul-anan tiglipay.

O bulahang kahayag, tubaga ang kasing-kasing 

Sa imong katawhan nga kanimo nagatuo.

Kon ang tawo wala sa imong grasya Kawad-an siyag kaputli, mawala siyay nada.

Hugasi ang mahugaw, ang uga bisbisi Ug unya ang tanang nasamdan tambali, Ang nahisalaag tultoli, ang matig-a humoka Ug ang mabugnawon nga kalag inita. Ihatag sa nagatuo kanimo

Ang imong pito ka gasa nga sagrado. Gantihi sila tungod sa mga buhat nga maayo, Hatagi sila sa kamatayon nga sa kaluwasan magseguro, Igasa nila ang langitnong kabulahanan Nga nagalungtad hangtod gayod sa kahangturan.

Amen.

Aleluya.

ANG EBANGHELYO

Jn. 20:19-23

Kinutlo gikan sa Balaan nga Ebanghelyo sumala ni Juan

Pagkagabii nianang adlawa, ang unang adlaw sa semana, samtang gitrangkahan ang mga pultahan diin nahimutang ang mga tinun-an tungod sa kahadlok sa mga Judio, miabòt si Jesus ug mibarog sa taliwala ug miingon kanila, "Ang kalinaw maanaa kaninyo."

Sa pagkasulti niya niini, gipakita niya ang iyang mga kamot ug kilid ngadto kanila. Busa nagmaya ang mga tinun-an sa pagkakita sa Ginoo.

Miingon si [Jesus] kanila pag-usab, "Ang kalinaw maanaa kaninyo.

Ingon nga ang Amahan nagpadala kanako, akò usab nagpadala kaninyo."

Ug human siya makasulti niini, mihuyop siya ug miingon kanila, "Dawata ninyo ang Espiritu Santo.

Kang bisan kinsang mga salâ nga inyong pasayloon, kini gipasaylo; kang bisan kinsang mga salâ nga dili ninyo pasayloon, kini dili pasayloon."

Ang Ebanghelyo sa Ginoo.

KATILINGBANONG PAG-AMPO

Mayo 28, 2023

Pari: Dili kita mahibalo kon unsay angay natong i- ampo; ang Espiritu Santo nagahangyo sa Dios alang kanato uban sa pag-agulo nga dili malitok. Ato karong ihalad ang atong mga panginahanglan ngadto sa atong Langitnong Amahan. Sa matag pag- ampo motubag kita:

GINOO, IPADALA ANG IMONG ESPIRITU.

1. Alang niining Tuig sa Sinodo, ang tibuok Simbahan ug sa mga pangulo niini, ilabina ang atong Santo Papa, Francisco, mga Obispo, mga pari ug mga Relihiyoso, mapuno unta sila sa mga gasa sa Espiritu Santo alang sa paglambo sa Lawas Mistiko ni Cristo. Mag-ampo kita sa Ginoo.

2. Alang sa mga nangatungdanan sa gobiyerno, masinati unta nila diha sa ilang kasingkasing ang Espiritu Santo ug nga ang ilang kasingkasing maabli unta sa gahum sa Espiritu Santo aron maka subay sila sa balaod sa gugma nga gitisok sa kasingkasing sa tawo, Mag- ampo kita sa Ginoo.

3. Alang sa mga tawo nga anaa sa kalibog ug kahadlok, ang Espiritu Santo maglamdag sa ilang salabutan ug maghatag og igong kalig-on. Mag-ampo kita sa Ginoo.

4. Alang sa mga nagadayeg ug nagapasalamat sa Ginoo ilabina sila makatagamtam unta sila sa lihok ug pagdasig sa Espiritu Santo diha sa ilang kasingkasing. Mag-ampo kita sa Ginoo.

5. Alang sa mga magtutuong nangamatay, ilabina nila nga ang Espiritu Santo nga mibanhaw kang Cristo maghatag unta kanila sa kinabuhing walay katapusan. Mag-ampo kita sa Ginoo.

Pari: Langitnong Amahan, hatagi og katumanan kining among mga pag-ampo. Ipadala kanamo ang imong Balaang Espiritu ug bag-oha ang dag-way sa kalibutan pinaagi ni Cristo nga among Ginoo. Amen.