DOMINGO SA PENTEKOSTES

DOMINGO SA PENTEKOSTES

a. BASAHON I

Buhat 2: 1-11

Kinutlo gikan sa basahon sa Buhat sa mga Apostoles.

     Sa pag-abot na sa adlaw sa Pentekostes, ang tanang magtotoo nagtigom sa usa ka dapit. Ug sa kalit dihay midahunog gikan sa langit, sama sa makusog nga huros sa hangin ug kini milukop sa tibuok balay nga ilang gitigoman. Unya nakakita silag daw mga dila nga kalayo nga nanugdon diha sa matag usa kanila. Silang tanan napuno sa Espiritu Santo ug misugod sila pagsulti sa nagkalainglaing pinulongan sumala sa gipasulti kanila sa Espiritu Santo.

Sa Jerusalem didtoy mga Judio nga relihiyoso kaayo nga gikan sa nagkalainlaing nasud sa kalibutan. Sa pagkadungog sa mga tawo sa kabanha, nanugok sila ug labihan nilang katingala kay ang tagsatagsa ka magtotoo nagsulti man sa tagsatagsa ka pinulongan sa mga namati. Busa sa dakung kahibulong miingon sila: "Dili ba taga Galilea man kining mga tawhana? Nganong nakasulti man sila sa atong tagsatagsa ka pinulongan? Dinhi kanato may mga taga Partia, Media, Elam, Mesopotamia, Judea, Capadocia, Ponto, Asia, Fregia, Panfilia, Ehipto ug sa mga dapit sa Libya duol sa Cirene; ang uban kanato taga Roma, nga mga Judio ug mga Hentil nga nakabig sa tinuohan sa mga Judio; ug may pipila pa kanato nga taga Creta ug Arabia apan pa niini, kitang tanan nakadungog kanila nga nagsulti sa atong tagsatagsa ka pinulongan mahitungod sa katingalahang mga butang nga gibuhat sa Dios."

Ang Pulong sa Ginoo.

b. SALMO RESPONSORYO

Salmo104:1,24,29-30,31-34

Tubag (R) Ginoo, ipadala ang Imong Espiritu ug bag-oha ang nawong sa yuta.

Dayega ang Ginoo, kalag ko! O Ginoo, akong Dios, daku gayud Ikaw! Pagkadaghan sa Imong mga buhat, O Ginoo! Puno ang yuta sa Imong mga binuhat. (R)

Kon Imong kuhaon ang ilang ginhawa, mangamatay sila ug mobalik ngadto sa abog. Sa Imong pagpadala sa Imong Espiritu, magama sila ug mabag-o Nimo ang nawong sa yuta. (R)

Molungtad unta sa gihapon ang himaya sa Ginoo; ug malipay ang Ginoo diha sa Iyang mga buhat! Makapahimuot unta Kaniya ang akong sugilon; maglipay ako diha sa Ginoo. (R)

c. BASAHON II

1 Cor. 12:3-7,12-13

Kinutlo gikan sa unang sulat ni San Pablo ngadto sa taga Corinto.

     Walay makasugid nga si Jesus mao ang Ginoo, gawas kon manduan Siya sa Espiritu Santo.

May nagkalainlaing mga hiyas nga espirituhanon, apan mao rang Espiritu ang naghatag niini. May nagkalainlaing paagi sa pag-alagad, apan mao rang Ginooha ang gialagaran. May nagkalainlaing katakus sa pag-alagad, apan usa ra ka Dios ang naghatag og katakus sa tagsatagsa alang sa tanang pag-alagad. Ang matag usa gihatagan og pipila ka ilhanan sa presensiya sa Espiritu alang sa kaayohan sa tanan.

Kay si Kristo sama sa usa ka lawas nga may daghang bahin apan usa ra ka lawas bisan kon nagkalainlaing mga bahin niini.

Sa samang pagkaagi, kitang tanan, mga Judio ug mga dili Judio, mga ulipon ug mga dili ulipon, gibunyagan diha sa usa ka lawas, pinaagi sa mao gihapong Espiritu ug gipainom kitang tanan sa usa ka Espiritu.

Ang Pulong sa Ginoo.

d. EBANGHELYO

Jn. 20: 19-23

Ang Santos nga Ebanghelyo sumala ni San Juan.

     Sa pagkagabii na niadtong Dominggoha, ang mga tinun-an nagtigom sulod sa lawak ug gitrangkahan nila ang pultahan kay nahadlok sila sa mga Judio. Unya mitungha si Jesus, mibarog sa taliwala nila ug miingon, "Ang kalinaw magauban kaninyo." Human Siya makasulti niini, Iyang gipakita kanila ang Iyang mga kamot ug ang Iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, "Ang kalinaw magauban kaninyo. Ingon nga gipadala Ako sa Amahan, Ako usab nagapadala kaninyo." Gisulti Niya kini ug unya sila Iyang ug giingnan, "Dawata ninyo ang Espiritu Santo. Kon ang mga sala sa mga tawo inyong pasayloon, kini mapasaylo; kon ang ilang mga sala dili ninyo pasayloon, kini usab dili mapasaylo."

Ang Ebanghelyo sa Ginoo.

e. KOMENTARYO

Tema: Dawata Ninyo ang Espiritu Santo.🕊️

Sa atong paglawig sa atong kinabuhi dinhi sa kalibutan adunay mga panahon nga mawad- na kita sa paglaum ug nga dili na kita makahunahuna og unsay maayong solusyon kung unsaon nato kini. Labi na kung aduna kitay mga problema, pag-antos, kasakit, kalisod, kahingawa, krisis sa kinabuhi ug uban pang mga butang nga nakapalisod kanato. Apan, ang pangutana: Ngano sa mga panahon nga makasinati kita niining mga butanga, ug inigkahuman na nato pagsagubang niini, dako man ang atong kalipay? Ug labaw sa tanan wala ba kita makasinati sa gugma ni Kristo ug sa iyang Espiritu Santo nga gibilin niya kanato?

Karong adlawa atong gisaulog ang Dominggo o Adlaw sa Pentekostes. Mao kini ang adlaw diin namugna ang atong Simbahan. Diin gipadala ni Kristo ang Espiritu Santo sa iyang mga tinun- an ug ato kining madungog sa atong Ebanghelyo ug diha usab sa atong mga pagbasa. Ang unang pagbasa gikan sa mga Buhat sa mga Apostoles naghisgot kung giunsa pagpadala sa Ginoo ang Espiritu Santo sa mga tinun-an diin nakakita sila og mga dila nga kalayo nga nagtungtong diha sa matag usa kanila. Ug nakasulti sila sa nagkalainlaing mga pinulongan ug nagsangyaw sila sa pinulongan sa mga namati didtong dapita mahitungod sa mga katingalahang buhat sa Dios. Sa ikaduhang pagbasa gikan ni San Pablo ngadto sa mga taga Corinto, gihatagan og halawum nga katin-awan ang pagpadala sa Espiritu Santo. Sama kini sa usa ka lawas nga may daghang bahin. Bisan kon nagkalain-lain ang bahin niini, apan usa ra gihapon kini ka lawas. Kitang tanan gibunyagan diha sa usa ka lawas pinaagi sa mao gihapong Espiritu ug kitang tanan nakig- ambit pag-inom sa usa ka Espiritu. Mas klaro ug nasabtan pa gayod nato nga ang Espiritu anaa gayod sa matag usa kanato.

Ug gihatagan kini og halawum nga punting diha sa Ebanghelyo ni San Juan: Pinaagi sa paghuyop ni Kristo ug giingnan niya ang mga tinun-an. "Dawata ninyo ang Espiritu Santo". Ug dugang pa niini iyang gibilin ang iyang kalinaw. Dako kaayo kini nga kabilin sa Dios alang kanato ug sa iyang Simbahan. Kay anaa ang kasegurohan nga sa tanang panahon kon siya mobalik na sa Amahan ang Epiritu Santo maoy mo-alima ug mag-uban kanato. Ato gayod nga masinati ang dakong gugma sa Dios kanato kay wala kita niya iya pa gayod nga gibilin ang Espirtu Santo nga maoy atong tabang sa atong pagpanaw ug paglawig sa iyang Simbahan.

Sa katapusan, adunay tulo ka puntos nga angay natong pamalandongan sa atong pagsaulog sa Pentekostes karong adlawa. Una, ang GUGMA SA DIOS. Pinaagi sa iyang pagpadala sa iyang Anak dinhi sa kalibutan tungod sa iyang dakong gugma kanato kita naluwas ug nakasinati sa iyang Espiritu Santo nga iyang gibilin kanato. Ikaduha, ang KAAYO SA DIOS. Kay, tungod sa iyang walay puas nga pagbubo sa iyang grasya nganhi kanato. Ug sa iyang Espiritu Santo nga mas nakapadugang kanato sa pagsinati sa iyang Kaayo. Ug ikatulo, ang KALINAW SA DIOS. Nga maoy una niyang gibilin sa iyang mga tinun-an ug dayon dinhi kanatong tanan nga nagmatuohon kaniya ug diha sa iyang Simbahan. Kini usab nga kalinaw dili lang kay sa panggawas nga bahin, kondili kalinaw sa atong matag usa ka kasingkasing pinaagi sa iyang Espiritu Santo. Hinaut nga mas masaligon pa kita sa Dios pinaagi sa pagbilin niya kanato sa Espiritu Santo, nga ato unta kanunay nga mahinumdoman ang G-GUGMA, K-KAAYO ug K-KALINAW nga atong klaro ug hingpit nga masinati diha sa Gagmayng Kristohanong Katilingban. Labi na sa atong pag- apil sa mga kalihukan sa maong katilingban ug pag-inambitay sa gugma, kaayo ug kalinaw ni Kristo sa atong adlaw-adlaw nga pagpuyo niining kalibutana.

Giya alang sa pamalandong:

1. Nabati ba nako ang giya ug lamdag sa Espiritu Santo diha sa akong kinabuhi?

2. Ang lamdag ba sa Espiritu Santo maoy nahimo nakong kahayag sa panahon nga anaa ako sa mga kalisdanan sa kinabuhi?

f. PANGALIYA

Pangulo: Mga igsoon, mag-ampo kita ngadto sa Dios Amahan nga nagpadala sa Balaang Espiritu sa tibuok kalibutan nga maoy magdanag sa tanang katawhan. Puno sa kadasig ug kahiusahan moingon kita: GINOO, BAG-OHA KAMI DIHA SA IMONG BALAANG ESPIRITU. 

1. Alang sa tanang nagdumala sa Simbahan magmakugihon unta silang mopalambo sa gasa sa kaalam ug katakus sa pagdumala sa katawhan nga gisalig kanila sa Amahan nga ilang agakon ug amomahon. Mag-ampo kita.

2. Alang sa tanang nagdumala sa atong nasod ilabi na sa atong Presidente ug membro sa gabinete malamdagan unta sila sa Balaang Espiritu nga hinayhinay nilang mabag-o ang sistema sa atong panggoberno giniyahan kanunay sa Espiritu Santo. Mag-ampo kita.

3. Alang sa tanang mga masakiton, nawad-an ug paglaum mga sinalikway, walay trabaho, mabag-o unta nila ang panglantaw sa ilang kinabuhi og molaum nga buboan sila sa gasa sa Espiritu Santo subay sa ilang pangina- hanglan. Mag-ampo kita.

4. Alang sa atong lokal nga panggamhanan, lamdagan unta sila sa Espiritu, ilabi na sa ilang pagmugna'g mga proyekto alang sa kauswagan sa atong katilingban aron sa ingon mahatagan og pagtagad ang mga kabos ug mahilayo sa pagpanlimbong ug pagpanlupig. Mag-ampo kita.

5. Alang kanatong tanan, mabag-o unta nato ang dagway sa kalibutan pinaagi sa atong pagbansay, pagpaambit sa mga gasa nga gipadayag sa Balaang Espiritu kanato ug ato kining mapuy-an sa tibuok natong kinabuhi. Mag- ampo kita.

6. Alang sa... (idugang ang panginahanglan sa katilingban). Mag-ampo kita.

7. Alang sa atong katuyoan atong i-ampo sa hilom.

Pangulo: Makagagahom nga Dios Imong nadungog ang among mga pag-ampo bag-oha ang dagway sa kalibutan pinaagi sa among pagsaksi sa mga gasa nga gipadayag sa Balaan Nimong Espi- ritu. Kini among gilauman nga madawat pina- agi ni Kristo among Ginoo. Amen.