IKATULONG DOMINGO SA PAGKABANHAW

IKATULONG DOMINGGO SA PAGKABANHAW

a. BASAHON I

Buhat 2:14,22-28

Kinutlo gikan sa basahon sa Buhat sa mga Apostoles.

(Sa adlaw sa Pentekostes) si Pedro mitindog uban sa napulog- usa ka apostoles ug sa makusog nga tingog miingon kanila: "Mga igsoon kong Judio, ug kamong tanan nga nagpuyo sa Jerusalem, pamatia ninyo ang akong isulti karon.

Mga taga Israel, pamati kamo! Si Jesus nga Nazaretnon usa ka tawo kansang Diosnong buluhaton sa matin-aw gipadayag nganha kaninyo pinaagi sa mga milagro ug sa mga katingalahang butang, ug mga ilhanan nga gibuhat sa Dios pinaagi Kaniya. Kamo mismo nasayud niini, kay dinhi man kini mahitabo. Ang Dios, sumala sa kaugalingon Niyang laraw ug pagbuot, mitugyan kang Jesus nganha kaninyo; ug Siya inyong gipapatay sa mga makasasala pinaagi sa paglansang Kaniya sa krus. Apan gibanhaw Siya sa Dios ug giluwas gikan sa gahum sa kamatayon, kay dili mahimo nga bilanggoon Siya sa kamatayon. Kay si David miingon mahitungod Kaniya: 'Akong nakita kanunay ang Ginoo sa atubangan ko, kay Siya ania man sa akong tuo aron dili ako matarog. Tungod niini masaya ang akong kasingkasing ug ang akong mga pulong puno sa kalipay; ug ako, bisan tuod mamatay, magmalaumon, kay dili mo biyaan ang akong kalag didto sa kalibutan sa mga patay, dili mo itugot nga ang buotan mong sulugoon madugta. Imong gipakita kanako ang mga agianan paingon sa kinabuhi, ug pinaagi sa imong pagpakig-uban kanako ako mapuno sa kalipay.'

Ang Pulong sa Ginoo.

b. SALMO RESPONSORYO

Salmo 16:1-2,5,7-8,9-10,11

Tubag (R) "Ginoo, tudloan Mo kami sa dalan sa kinabuhi."

Bantayi ako, O Dios, kay nagadangop ako Kanimo; nagaingon ako sa Ginoo, "Ikaw ang akong Ginoo." O Ginoo, Ikaw ang akong bahin ug ang akong kopa, Ikaw mao ang nagalig-on sa akong suwerte. (R)

Dayegon ko ang Ginoo nga nagatambag kanako, bisan sa kagabhion nagapahimangno kanako ang akong kasingkasing. Gibutang ko kanunay ang Ginoo sa akong atubangan; kon anaa Siya sa akong tuong kamot wala akoy kabalak-an. (R)

Busa ang akong kasingkasing nalipay ug ang akong kalag nagsadya, ang ako usab nga lawas nagapabilin diha sa pagsalig; Kay dili Nimo biyaan ang akong kalag didto sa kahiladman, ni itugot Mo nga ang Imong buotang alagad modangat sa pagkadunot. (R)

Tudloan mo ako sa dalan sa kinabuhi, ang bug-os nga kalipay diha sa Imong atubangan, ang mga kalipayan diha sa Imong tuong kamot hangtud sa kahangturan. (R)

c. BASAHON II

1 Pedro 1:17-21

Kinutlo gikan sa unang sulat ni San Pedro.

Sa inyong pag-ampo sa Dios nga maghukom sa tanang mga tawo sa walay pagpinig sumala sa ilang binuhaton, nagtawag kamo Kaniya nga Amahan; busa tahora ninyo Siya sa tibuok ninyong kinabuhi. Kay nasayran ninyo unsa ang gibayad aron pagluwas kaninyo gikan sa dautang pagkinabuhi nga inyong nasunod sa inyong mga katigulangan. Ang gibayad dili butang nga kawad-an og bili sama sa salapi o bulawan, kay giluwas kamo sa bililhon nga dugo ni Kristo kinsa, sama sa nating karnero, walay buling o mansa. Gipili Siya sa Dios sa wala pa buhata ang kalibutan, ug gipadayag siya niining katapusan nga mga adlaw tungod kaninyo. Pinaagi Kaniya nagatoo kamo sa Dios nga maoy nagbanhaw ug nagpasidungog Kaniya aron ang inyong pagtoo ug paglaum adto ninyo ibutang sa Dios.

Ang Pulong sa Ginoo.

d. EBANGHELYO

Lk. 24:13-35

Ang Santos nga Ebanghelyo sumala ni San Lukas.

Duha sa mga tinun-an ni Jesus naglakaw paingon sa usa ka balangay nga ginganlag Emmaus, mga napulog-usa ka kilometro gikan sa Jerusalem ug sila nagsultihanay mahitungod sa tanang mga butang nga nahitabo. Samtang nagsultihanay sila, si Jesus miduol ug mikuyog kanila; nakita nila Siya, apan sila wala lamang gayud makaila Kaniya. Unya si Jesus miingon kanila, "Unsa bay inyong gipanagsultihan samtang kamo nagalakaw?" Sila mihunong nga subo og panagway. Ug ang usa kanila nga ginganlag Cleopas, nangutana Kaniya, "Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?" "Unsang mga hitaboa?" nangutana Siya. "Ang nahitabo kang Jesus nga Nazaretnon" mitubag sila. "Siya usa ka propeta, ug giila sa Dios ug sa tanang mga tawo nga gamhanan sa pulong ug sa buhat. Ang atong mga pangulong pari ug ang mga punoan mitugyan Kaniya aron silotan Siya sa kamatayon, ug ilang gilansang Siya sa krus. Naglaum unta kadto kami nga Siya mao ang moluwas sa Israel. Labot pa niini, ikatulong adlaw na karon sukad kini nahitabo. Ug pipila sa mga babaye nga among mga kauban nakapakurat kanamo: nangadlawon sila pag-adto sa lubnganan, apan wala nila hikaplagi didto ang Iyang lawas. Ug namalik sila ug nanugilon nga nakakita kuno silag panan-awon diin may mga anghel nga misulti kanila nga Siya buhi. Ug pipila sa among mga kauban nangadto sa lubnganan, ug ilang nakaplagan kini sumala gayud sa gisugilon sa mga babaye, apan wala sila makakita Kaniya."

Unya si Jesus miingon kanila" "Pagkabuang gayud ninyo! Pagkadugay ninyong motuo sa tanang gisulti sa mga propeta! Dili ba kinahanglan man nga ang Mesiyas mag-antus niining mga butanga ug unya mosulod sa Iyang himaya?" Ug gipasabot ni Jesus kanila ang gisulti mahitungod Kaniya sa tibuok Kasulatan, sugod sa mga basahon nga gisulat ni Moises hangtud sa mga sinulat sa tanang propeta.

Niadtong tungora duol na sila sa balangay nga ilang adtoan, ug si Jesus nagpasabot nga daw mopadayon lang Siya sa unahan; apan ila Siyang gihawiran ug giingnan: "Anhi lang kita mamahulay, kay hapit na magabii." Busa midayon Siya ug nagpabilin uban nila. Mitambong Siya sa kan-anan uban kanila ug mikuha sa pan ug gipanalanginan Niya kini; unya Iyang gipikaspikas ug gihatag kanila. Dihadiha nabuka ang ilang mga mata ug nakaila sila Kaniya, apan nahanaw Siya. Sila nag-ingnanay: "Dili ba ingon og may kalayo nga nagdilaab sa atong kasingkasing sa dihang misulti Siya ug mipatin-aw kanato sa Kasulatan didto sa dalan?"

Ug nanindog sila dayon ug namalik sa Jerusalem, diin ilang hikaplagan ang napulog-usa ka tinun-an ug ang uban pa nga nagkatigom ug nagaingon, "Tinuod gayud nga nabanhaw ang Ginoo! Si Simon nakakita Kaniya! Unya gisaysay sa duha ka tawo ang nahitabo didto sa dalan, ug nga sila nakaila sa Ginoo sa Iyang pagpikaspikas sa pan.

Ang Ebanghelyo sa Ginoo.

e. KOMENTARYO

Abril 23, 2023

Tema: Ang Ginoo Naga-uban Kanato sa Kanunay.

Niining atong pagsaulog sa ikatulong Dominggo sa Pagkabanhaw, kita gipahinumduman nga si Kristo naga-uban kanato sa kanunay. Tataw kaayo kini sa atong Ebanghelyo karong adlawa.

Gisaysay ni San Lukas ang paglakaw sa mga tinun-an ni Jesus paingon sa Emmaus. Apan nganong wala man nakabantay ang iyang mga tinun-an nga Siya kadto ang mikuyog uban kanila? Matud pa sa usa sa mga batakan sa Bibliya, nga tungod sa kasubo, sa kaguol, sa dili pagdawat sa mahitabo sa ilang gituohan nga manluluwas ug sa paghunahuna lamang sa ilang kaugalingon niadtong tungura mao nga wala sila nakabantay nga si Jesus diay ang ilang nakauban.

Mga igsoon, dili kini layo sa atong mga kasinatian. Sa mga panahon sa atong kasubo ug kaguol, kasagaran kanato dili na kita makahunahuna nga ang Dios naga-uban kanato.

Sa mga panghitabo nga maglisod kita pagdawat niini, magpasulabi gayod ang atong pagkatawhanon ug nga dili na kita makahunahuna nga adunay Ginoo nga andam sa paghupay sa atong mga kasub-anan ug pagtabang sa mga kalisdanan nga atong gisagubang. Atong hinumduman kanunay nga ang Dios dili gayod mobiya kanato ilabina sa takna sa kalisod.

Karon, kitang tanan gipahinumduman nga ang Ginoo nagauban kanato sa kanunay. Bisan sa mga panahon nga kita wala maghunahuna sa iyang makanunayong presensya uban kanato. Gihagit kita karon sa pagsinati sa presensya sa Ginoo sa atong tagsa-tagsa ka kinabuhi. Unta ato kanunay nga maamguhan nga ang Ginoo naga-uban kanato sa kanunay hangtod sa katapusan sa panahon.

Giya alang sa pamalandong:

1. Sa akong kinabuhi, nasinati ba nako nga ang Ginoo nagauban kanako sa kanunay? 

2. Unsa nga mga panghitabo sa akong kinabuhi nga wala ako nakamatngon sa pag-uban sa Ginoo kanako? 

3. Mapasalamaton ba ako sa Ginoo sa iyang makanunayong pag-uban kanako? Napakita ba nako kini pinaagi sa makanunayon nakong pagpakiglambigit kaniya diha sa pag-ampo ug pagsimba? 

f. PANGALIYA

Abril 23, 2023

Pangulo: Mga igsoon, ang Dios nakighiusa kanato sa atong inadlaw-adlaw'ng bulohaton inubanan sa atong matuohong kasingkasing ato karong ipadangat Kaniya ang atong mga pag-ampo, kita moingon: GINOO, TABANGI KAMI NGA MAHIUSA KANIMO.

1. Alang sa atong Sto. Papa, obispo, pari, relihiyoso, mga layko, nga unta dugang nilang maila ug mapuy-an ang kinabuhi ni Kristo diha sa ilang pakighiusa ug matinud-anong pag-alagad sa uban. Mag-ampo kita.

2. Alang sa pangulo sa atong nasod mga membro sa mga magbabalaod nga unta dugang nilang hatagan og bili ang mulo sa mga katawhan ilabi na ang ekonomi-kanhong panginahanglan. Mag-ampo kita.

3. Alang sa mga gigutom walay trabaho, nilupigan, mahiusa ug maila unta nila si Kristo diha sa mga tawo nga naghatag kanila ug suporta moral ug espirituwal. Mag- ampo kita.

4. Alang sa mga nangulo sa nagkadaiyang organisasyon sa atong katilingban dinhi sa atong kapilya nga unta magkahiusa ug magmatuohon sila nga si Kristo andam makig-uban kanila taliwala sa tanang pagsulay. Mag- ampo kita.

5. Alang kanatong tanan, nga sa atong pagpakighiusa sa uban sulod niining kasaulogan atong masinati ang gugma sa nabanhaw'ng Jesus nga sa kanunay nag-uban kanato. Mag-ampo kita.

6. Alang... (idugang ang panginahanglan sa katilingban). Mag-ampo kita.

7. Alang sa atong mga kaugalingong katuyuoan atong ipadangat diha sa kahilom.

Pangulo: Dios nga labing gamhanan, gipadala Mo ang Imong Anak alang sa among kahiusahan ug kaluwasan, malaumon kami nga dili Nimo pakyason ang among gipangayo pinaagi ni Kristo among Ginoo. Amen.