IKADUHANG DOMINGGO SA PAGKABANHAW

IKADUHANG DOMINGGO SA PAGKABANHAW

a. BASAHON I

Buhat 2:42-47

Kinutlo gikan sa basahon sa Buhat sa mga Apostoles.

Gigamit sa kaigsoonan ang ilang panahon sa pagpamati sa mga pagtudlo sa mga apostoles, sa inigsoon nga pagpakig-uban kanila, ug sa pagpakig-ambitay sa pagpangaon ug sa mga pag-ampo.

Daghang mga milagro ug mga buhat nga katingalahan nahimo pinaagi sa mga apostoles ug tungod niini ang tanan giabot og katingala ug kahadlok. Ang tanang mga magtotoo nagpadayon sa Inigsoon nga panag-uban ug ang kabtangan sa matag usa kanila gipanag-iya nilang tanan. Ug gipamaligya nila ang ilang mga katigayonan ug ang halin ilang giapod-apod ngadto sa tanan sumala sa gikinahanglan sa usag-usa. Nagpadayon sila pagtigom kada adlaw didto sa Templo, ug naghiusa sila pagpangaon uban sa masaya ug mapaubsanong kasingkasing didto sa ilang mga puloy-anan. Ginadayeg nila ang Dios ug gikahimut-an sila sa katawhan. Ug sa matag adlaw gidugangan sa Ginoo ang ilang pundok og mga tawo nga ginaluwas. 

Ang Pulong sa Ginoo.

b. SALMO RESPONSORYO

Salmo 118:2-4,13-15,22-24

Tubag (R)- Pasalamati ang Ginoo kay Siya maayo, ang Iyang gugma way katapusan.

Pasultiha ang balay ni Israel, "Ang iyang kalooy nagalungtad sa kahangturan." Pasultiha ang balay ni Aaron, "Ang iyang kalooy nagalungtad sa kahangturan." Pasultiha sila nga mahadlokon sa Ginoo, "Ang iyang kalooy nagalungtad sa kahangturan. (R)

Nagkalisod-lisod ako ug nasukamod, apan gitabangan ako sa Ginoo. Ang akong kusog ug akong kaisog mao ang Ginoo, ug siya kanhi ang akong manluluwas. Ang malipayong singgit sa kadaugan diha sa mga tolda sa matarung. (R)

Ang bato nga gisalikway sa mga magtutukod nahimong bato sa kanto. Sa Ginoo gihimo kini; kahibulongan kini atubangan sa atong mga mata. Mao kini ang adlaw nga gihimo sa Ginoo; maglipay kita ug magsadya dinhi niini. (R)

c. BASAHON II

1 Pedro 1: 3-9

Kinutlo gikan sa unang sulat ni San Pedro.

Magpasalamat kita sa Dios ug Amahan sa atong Ginoong Jesukristo. Tungod sa Iyang dakung kalooy gihatagan kita Niya og bag-ong kinabuhi pinaagi sa pagbanhaw kang Jesukristo. Ang Iyang pagkabanhaw maoy naghatag kanatog dili matarog nga paglaum, ug sa panulondon nga dili madunot ni mahugaw ni mahanaw. Kini Iyang gitagana didto sa langit alang kaninyo, nga pinaagi sa pagtoo gipanalipdan sa gahum sa Dios, samtang kamo nagpaabot sa kaluwasan nga andam nang ipadayag sa katapusan sa panahon.

Tungod niini paglipay kamo bisan tuod sa pagkakaron kinahanglan magsubo kamo sa mubong panahon tungod sa daghan ninyong mga alantuson. Ang tuyo niini mao ang pagsulay kon tinuod ba ang inyong pagtoo kay bisan gani ang bulawan nga lumalabay lamang pagasulayon man pinaagi sa kalayo. Ang inyo usab nga pagtoo nga bililhon pa kaysa bulawan, labi pang sulayon aron malig-on. Unya kamo makadawat og mga pagdayeg, himaya ug dungog sa Adlaw nga ipadayag na si Jesukristo. Gihigugma ninyo Siya bisan wala kamo makakita Kaniya, ug nagatoo kamo Kaniya bisan wala kamo makakita kaniya hangtud karon. Busa nalipay kamo pag-ayo sa kalipay nga dili malitok sa pulong tungod kay nakadawat kamo sa bunga sa inyong pagtoo nga mao ang inyong kaluwasan.

Ang Pulong sa Ginoo.

d. EBANGHELYO

Jn. 20: 19-31

Ang Santos nga Ebanghelyo sumala ni San Juan.

Sa pagkagabii na niadtong Dominggoha, ang mga tinun-an nagtigom sulod sa lawak ug gitrangkahan nila ang pultahan kay nahadlok sila sa mga Judio. Unya mitungha si Jesus, mibarog sa taliwala nila ug miingon, "Ang kalinaw magauban kaninyo." Human Siya makasulti niini, Iyang gipakita kanila ang Iyang mga kamot ug ang Iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, "Ang kalinaw magauban kaninyo. Ingon nga gipadala Ako sa Amahan, Ako usab nagapadala kaninyo." Gisulti Niya kini ug unya sila Iyang gihuypan ug giingnan, "Dawata ninyo ang Espiritu Santo. Kon ang mga sala sa mga tawo inyong pasayloon, kini mapasaylo; kon ang ilang mga sala dili ninyo pasayloon, kini usab dili mapasaylo."

Si Tomas (nga ginganlag Kaluha), usa sa mga tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an sa pag-ingon, "Nakita namo ang Ginoo!" Si Tomas miingon kanila, "Gawas kon makita ko ug ikatapion ang akong tudlo sa inagian sa mga lansang diha sa Iyang mga kamot ug mahikap ang samad sa Iyang kilid, dili ako motuo."

Human molabay ang usa ka semana ang mga tinun-an nagtigom na usab sulod sa lawak ug si Tomas nahiuban na kanila. Ang mga pultahan gitrangkahan, apan si Jesus mitungha ug mibarog sa taliwala nila ug miingon, "Ang kalinaw magauban kaninyo." Unya miingon Siya kang Tomas, "Itapion ang imong tudlo diri ug tan-awa ang Akong mga kamot; hikapa usab ang samad sa Akong kilid. Tuo ug ayaw na pagduhaduha!" Si Tomas miingon Kaniya, "Ginoo ko ug Dios ko! Unya si Jesus miingon kaniya, "Mituo ba ikaw tungod kay nakakita ka Kanako? Bulahan kadtong motuo bisan wala makakita Kanako!"

Ug daghan pang mga milagro nga gibuhat ni Jesus atubangan sa Iyang mga tinun-an nga wala mahisulat niining basahona. Apan kini gisulat aron kamo motuo nga si Jesus mao ang Mesiyas, ang Anak sa Dios, ug pinaagi sa maong pagtoo kamo makabaton og kinabuhi diha sa Iyang ngalan.

Ang Ebanghelyo sa Ginoo.

e. KOMENTARYO

Tema: Tuo ug Ayaw Pagduha-duha.

Adunay panultihon nga nagkanayon, "to see is to believe". Buot ipasabot nga unya na kita motuo kung makakita na kita. Husto ba? Apan si kinsa man kanato karon dinhi ang nakakita sa atong utok? Buot ba ipasabot nga kay wala kita nakakita sa atong utok dili usab kita motuo nga aduna kitay utok? Ang atong Ebanghelyo karon naghatag og katin-awan niini.

Atong nasayran nga human sa pagkabanhaw ni Jesus, mipakita siya sa iyang mga tinun-an apan niadtong tungura wala si Tomas. Ngano? Kini tungod kay niadtong tungura ang tanang nga sumusunod ni Jesus nangahadlok pag- ayo nga basin sila na pud unya ang pamatyon sa mga Hudeyo. Mao nga ang nahitabo, nanago sila. Kini ang posibleng hinungdan ngano nga sa pagpakita ni Jesus, wala si Tomas. Apan usa sa mga sumusunod kang Jesus misulti kang Tomas, nga si Jesus nabanhaw ug mipakita kanila, apan si Tomas wala mituo. Si Tomas miingon, "gawas kon ako mismo ang makakita kang Jesus ug makahikap ako sa iyang samad diha pa ako motuo". Nagmatinud-anon kaayo si Tomas sa iyang gibati kay lisod usab nga motuo siya nga wala makakita. Gusto ni Tomas nga siya mismo ang makakita sa kamatuoran nga Kristo nabanhaw. Mao nga siya gitawag og Tomas nga maduha-duhaon. Sa dihang mipakita pag-usab si Jesus kanila si Tomas anaa na taliwala sa iyang mga kauban ug iyang nakita nga si Jesus gayud nabanhaw human siya namatay. Sa walay duha-duha siya mituo ug miingon, "Ginoo ko ug Dios ko". Mikumpisal dayon siya nga si Jesus matuod gayud. Gipamatuod gayud ni Jesus nga siya nabanhaw human siya namatay. Ug giingnan ni Jesus si Tomas, "Mituo ka ba kay nakakita ka kanako? Bulahan ang mituo bisan wala makakita."

Kon ato kining ibutang sa atong kaugalingon isip mga sumusunod ni Kristo adunay panahon usab nga kita nahimong sama kang Tomas. Adunay mga panahon nga kita maduha-duhaon sa atong pagtoo. Mangutana dayon kita sa atong kaugalingon, husto ba kaha ako sa akong gituohan? Mao kini ang kasagaran natong mga pangutana. Kini tungod kay kadaghanan kanato moingon man, "to see is to believe".

Mga igsoon ko diha kang Kristo, niining ikaduhang Dominggo sa Pagkabanhaw, kita gipahinumduman sa pagtoo ug dili na magduha-duha. Atong hinumduman nga si Kristo mismo ang miingon, "Bulahan ang mituo bisan wala makakita." 

Giya alang sa pamalandong:

1. Aduna ba akoy dakung pagtoo nga si Jesus nabanhaw?

2. Aduna ba akoy dakung pagduha-duha nga siJesus nabanhaw?

3. Andam ba ako sa pagtoo ug sa dili na pagduha-duha bisan sa mga butang nga dili ko makita diha sa pagtoong katoliko?

f. PANGALIYA

Pangulo: Mag-ampo kita ngadto sa Amahan nga lig- onon ang atong pagtoo ug mapatunhay ang kalinaw nga gitugyan sa Iyang Anak nganhi kanato. Sa matag pangamuyo moingon kita: 

DIOS SA KALINAW, DUNGGA KAMI.

1. Sa tanang pangulo sa Simbahan ilabi na sa Sto. Papa, obispo, mga pari puno sa lig-ong pagtoo madasigon unta nilang ipaambit ang malinawon ug mahigugmaong pagtulon-an sa nabanhaw'ng Jesus. Mag-ampo kita.

2. Sa mga nagdumala sa nasod mga naglihok sa atong gobyerno, nga unta ang kalinaw ug kaangayan mapatunhay, ilabi na dinhi sa atong nasod. Mag-ampo kita.

3. Sa tanang mga nagmasakiton mga biktima sa kagubot, nga unta malig-on ang ilang pagtoo ug ang kalinaw nga gitugyan sa nabanhaw'ng Jesus maoy ilang masinati diha sa mga tawo nga nag-atiman kanila. Mag-ampo kita.

4. Sa atong lokal nga panggamhanan, ang ila untang pag- mugna og mga proyekto ilabi na dinhi sa atong lugar mahaum sa panginahanglan sa katawhan ug maka- dala'g kalinaw ug kauswagan. Mag-ampo kita.

5. Sa atong mga igsoon nga nagduhaduha sa ilang pagtoo sa nabanhaw'ng Jesus, hikapon unta sa Balaang Espiritu ang ilang mga kasingkasing ug modangop sila sa Dios kita. ang tinubdan sa gugma ug kalinaw. Mag-ampo kita. 

6. Sa matag usa kanato nga ania dinhi, nga ang mensahe sa kalinaw maoy maghari sa atong kaugalingon ug mahanaw unta ang atong pagduhaduha ilabi na sa atong pagtoo. Mag-ampo kita.

7. Sa matag... (idugang ang panginahanglan sa katilingban). Mag-ampo kita.

8. Sa atong matag kaugalingon nga katuyuan, i-ampo nato sa hilom.

Pangulo: Makagagahun nga Dios, dungga ang among pangamuyo nga sa dakong pagtoo among gisalig sa Imong nabanhaw'ng Anak si Jesu- kristo among Ginoo ug Manluluwas. Amen.