KASAULOGAN

IKAPITONG DOMINGGO SA ORDINARYONG PANAHON

Pasiunang Pag-ampo:

Makagagahum nga Dios, ablihi ang among mga mata sa imong mga buhat ug ang among mga dalunggan sa tingog sa imong tawag aron sa matag buhat namo madugangan ang pagpaambit sa kinabuhi nga imong gihalad kanamo ug ang pagtoo sa imong Pulong maoy paagi sa among pagkamaalamon ug pagkamapamalandungon sa kinabuhi.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. BASAHON I

Lebitiko 19:1-2.17-18

Kinutlo gikan sa basahon sa Lebitiko.

Misulti ang Ginoo kang Moises, nagaingon: "Sultihi ang tibuok nga katilingban sa mga anak sa Israel, ug pamulongi sila: Pagsantos kamo; kay Ako, ang Ginoo nga inyong Dios, santos man.

Dili kamo magdumot sa inyong igsoon diha sa inyong kasingkasing. Bisan magbadlong kamo sa inyong isigkatawo, dili kamo magpakasala tungod kaniya. Dili kamo manimalos, ni magbaton og pagdumot batok sa inyong mga katagilungsod: kondili hinoon higugmaon ninyo ang inyong isigkatawo ingon sa inyong kaugalingon. Ako mao ang Ginoo.

Ang Pulong sa Ginoo.

b. SALMO RESPONSORYO

Salmo 103:2.3-4.8.10.12-13

Tubag (R) - Ang Ginoo maayo ug maloloy-on.

Dayega ang Ginoo, kalag ko ug ang tibuok kong kaugalingon. Dayega ang Iyang balaang ngalan. Dayega ang Ginoo, kalag ko ug ayaw hikalimti ang tanang mga kaayohan Niya. (R)

Gipasaylo Niya ang tanan mong mga kadautan, gibulong Niya ang tanan mong kasakitan giluwas Niya ang imong kinabuhi sa kalaglagan, Gilibutan ka Niya sa kaayo ug kalooy. (R)

Maloloy-on ug mahigugmaon ang Ginoo, Dugayng masuko ug hupong sa kaayo. Iya kitang gidumala dili sumala sa atong kasal- anan, ni mibalos Siya kanato sumala sa atong mga kalapasan. (R)

Maingon nga ang silangan halayo sa kasadpan sa ingon Iyang gipahilayo kanato ang atong mga kalapasan. Maingon nga ang amahan malooy sa iyang mga anak, sa ingon nalooy ang Ginoo kanila nga mahadlokon Kaniya. (R)

c. BASAHON II

1 Corinto 3:16-23

Kinutlo gikan sa unang sulat ni San Pablo ngadto sa taga Corinto.

Sa walay duhaduha nasayod kamo nga kamo templo sa Dios, ug nagpuyo diha kaninyo ang Espiritu sa Dios. Busa ang moguba sa templo sa Dios, laglagon sa Dios. Kay balaan ang templo sa Dios, ug kamo mao ang templo Niya.

Wala untay maglimbong sa iyang kaugalingon. Kon maghunahuna ang usa kaninyo nga maalamon siya sumala sa sukdanan sa kalibutan, kinahanglan nga magpakabuang siya aron mahimo gayod siyang maalamon. Kay ang giisip niining kalibutana nga kaalam, binuang alang sa Dios. Kay sumala sa giingon sa Kasulatan, "Libogon sa Dios ang mga maalamon pinaagi ra usab sa ilang kaalam." Ug laing bahin sa Kasulatan nag-ingon, "Nasayod ang Ginoo nga walay kapuslanan ang hunahuna sa mga maalamon." Busa dili angay nga ipasigarbo ang mga butang nga mahimo sa tawo. Sa pagkatinuod, kamo ang ta-iya sa tanang butang. Si Pablo, si Apolo, ug si Pedro, ingon man kining kalibotana, ug ang kinabuhi ug ang kamatayon, ang karon ug ang umaabot, inyo kining tanan, ug kamo Iya ni Kristo ug si Kristo Iya sa Dios.

Ang Pulong sa Ginoo.

d. EBANGHELYO

Mateo 5:38-48

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Nakadungog kamo sa giingon kaniadto: "Mata bayran og mata, ug ngipon bayran og ngipon." Apan karon sultihan ko kamo: ayaw panimalos sa nagabuhat og dautan batok kaninyo. Kon usa ka tawo mosagpa sa imong tuong aping, ipasagpa usab niya ang imong aping nga wala. Kon may mokiha kanimo aron mailog niya ang imong kamisin, ihatag usab kaniya ang imong kamisadentro. Kon may sundalo nga mopugos kanimo sa pagdala sa iyang kasangkapan sa gilay-on nga usa ka kilometro, pas-ana kini og usa ka laing kilometro. Kon may mohangyo kanimo og usa ka butang, ihatag kini kaniya; ug ayaw balibari ang buot mohulam kanimo."

Ang Ebanghelyo sa Ginoo.

e. KOMENTARYO

Tema: Ang Hagit sa Kristohanong Kinabuhi.

Niining ikapito nga Dominggo sa Ordinaryong Panahon, kita gipahinumduman sa dakung hagit sa atong kristohanong kinabuhi.

Sa atong mga pagbasa ug ilabi na sa atong Ebanghelyo naghisgot mahitungod sa dakung hagit sa atong kinabuhi isip mga kristiyano. Atong nadungog nga si Jesus naghatag og mga pagtulun-an mahitungod sa atong angay nga kinaiya ug sa atong relasyon sa atong mga kaigsoonan ilabi na sa mga tawo nga atong gitan- aw nga mga kaaway. Si Jesus miingon, "Mata bayrag mata, ug ngipon bayrag ngipon. Apan sultihan ko kamo: ayaw pagbalosi ang nagbuhat kaninyo'g dautan. Kung sagpaon ang imong tuong aping, ipasagpa usab ang wala" (Mateo 5:38-39). Kini nga mga pagtulun-an dili bag-o sa panahon ni Jesus. Sa atong unang pagbasa ang Ginoo nagmando sa mga Israelita nga higugmaon nila si Yahweh sa tibook nilang kinabuhi. Ug kini usab ilang ipaambit pinaagi sa paghigugma sa ilang isigkatawo. Apan kon atong sundan ang tibook kasaysayan sa kinabuhi sa mga Israelita sila nahimong tig-a ang ilang mga kasingkasing ug gahi ang ilang ulo diha sa ilang relasyon kang Yahweh. Bunga sa ilang mga nagkadaiyang mga pagsabot sa ilang namugna nga unom ka gatos (600) kapin ka nga mga balaod gikan sa napulo ka sugo nga gitugyan ni Yahweh kang Moises sa bungtod sa Sinai. Mao nga sa matag detalye niining maong balaod nga atong nadungog sa Ebanghelyo ni San Mateo gigamit usab sa mga Israelita isip ilang balaod.

Apan ang pangutana, sama ba usab niini ang gipasabot ni Jesus sa atong Ebanghelyo karon? Kon atong pamalandungan ang mensahe sa Ebanghelyo kini nagpadayag sa pagtuman ni Jesus sa balaod. Si Jesus mingon, "Ayaw ninyo hunahunaa nga mianhi ako aron pagsalikway sa Balaod ni Moises ug sa mga pagtulun-an sa mga propeta. Wala ako moanhi aron pagsalikway niini kondili aron pagtuman hinuon sa hustong kahulugan" (Mt.5:17). Ang balaod nga gipasabot dinhi mao ang balaod ni Moises. Kay si Jesus man ang gipasabot sa mga propeta sukad pa sa daang testamento.

Sama pananglit sa giingon sa Balaang Kasulatan nga nagkanayon: "Higugmaa ang imong kaaway", kini usa ka dakong hagit alang kanato isip mga Kristiyano. Usa kini sa mga lisod nga mga pagtulun-an nga gipadayag kanato nga naghagit kanato sa pagtuman ug pagpuyo niini sa atong tagsatagsa ka kinabuhi. Apan, nagpasabot ba nga dili nato kini mahimo? Tinuod lisod kini kon tan-awon nato ang atong pagkatawhanon, apan kon mosalig kita sa panabang sa grasya sa Dios ato gayod kining mahimo.

Mga kaigsoonan, lisod gayod kini kon atong tan-awon sa tawhanong paglantaw. Apan atong hinumduman kanunay nga ang Dios nagpadayag og dakung gugma sa matag usa kanato. Ang "Dios gugma". Ug nga tungod sa Iyang dakung gugma kanatong tanan wala siya magmakuli sa pagdawat sa mga kasakitan ug kamatayon aron kitang tanan maluwas sa atong pagkamakasasala. Atong hinumduman nga bisan sila nakahimo og kasal-anan kanato ug giisip ug nga mga kaaway, apan kita usab makasasala man. Kitang tanan managsama makasasala managsama nga gitubos ni Kristo sa Iyang dugo. Ug si Jesus kanunay nga nagpahinumdom nga ato silang higugmaon isip atong mga igsoon. Kini mao ang dakung hagit sa matag usa kanato isip mga sumusunod ni Kristo.

Ang atong ikaduhang pagbasa naghatag kanato og giya kung unsaon nato pagtuman niini. Diha sa unang sulat ni San Pablo sa taga Corinto, nagpahinumdom sa unang mga Kristiyanos gikan sa ilang pagkatibulaag ug pagkabahinbahin isip mga Kristiyano. Ug kini nagbunga og nagkalainglaing mga epekto sa ilang kinabuhi ug walay pagsinabtanay. Apan si San Pablo nagpahinumdom kanila ug kanatong tanan karon, nga ang atong lawas mao ang templo sa Espiritu sa atong Ginoo. Ug kay templo man sa Ginoo, kini balaan gayod. Nan, kon ingon niini ang atong pagtan-aw sa atong lawas ug ilabi na sa atong mga kaigsoonan, dayag nga anaa ang paghigugma sa usag usa. Gugma nga maoy maghatag kanato og kabulahanan ugma damlag.

Mga igsoon, mao kini ang buot ipasabot ni Jesus sa iyang mga mensahe nga atong nadungog karon. Gugma ang mamahimong sumbanan ug sentro sa atong pagpakiglambigit sa atong mga kaigsoonan. Ang mga balaod nga gipaluyohan sa gugma kay ang Dios gugma man. Ug ang tahas nga mao ang pagtuman niining mga balaod ni Jesus nga puno sa gugma uban sa grasya sa Dios aron ato kining mabuhat ngadto sa atong isigkatawo. Kay ang Dios mao ang maghukom sa tagsa tagsa kanato sumala sa atong mga binuhatan. Kini mao ang dakung hagit alang kanatong tanan isip mga Kristiyano, nga sumusunod ni Kristo.

Giya alang sa pamalandong:

1. Ako ba nga nadungog ang dakung hagit sa akong pagka-kristiyano?

2. Human nako kini nadunggan, unsa man ang akong gibuhat mahitungod niini?

3. Andam ba ako sa pag-atubang sa dakung hagit sa akong pagka-kristiyano bisan nagkinahanglan kini sa paghikalimot sa akong kaugalingon?

f. PANGALIYA

Pangulo: Tungod sa dakong gugma sa atong Amahan Iyang gipadala ang Iyang bugtong Anak aron paghingpit sa Iyang kasugoan nga mao ang paghigugma sa tanan. Mag-ampo kita nga unta maangkon ta ang kinabuhi subay sa lagda ni Kristo, ang lagda sa gugma. Sa atong pangamuyo moingon kita: 

GINOO, PADILAABA ANG IMONG GUGMA KANAMO. 

1. Alang sa mga pangulo sa atong Simbahan, makapa- dayon unta silang mosangyaw sa ilang misyon nga mao ang paghatag og gugma sa tanan ilabina niadtong gihikawan niini. Mag-ampo kita.

2. Alang sa mga pangulo sa tibuok kalibutan ilabina na ang atong nasod Pilipinas ila untang mapakaylap ang tinuod nga pagserbisyo nga puno sa gugma ug kahadlok sa Dios aron sila mahimong epektibo diha sa pagpa- ngalagad. Mag-ampo kita.

3. Alang sa atong mga kaigsoonan nga nagmasakiton, mga naapektuhan sa kagubot, ug kapit-os sa kinabuhi, sa mga nawad-an og mga panimalay, nga makabaton unta sila og paglaum nga ugma damlag sila hupayon sa Dios sa ilang mga kalisdanan. Mag-ampo kita.

4. Alang sa atong katilingban, ilabi na ang atong mga pangulo sa GKK nga maka-angkon sila sa kalumo sa kasingkasing diha sa ilang pagpangalagad alang sa atong tagsa-tagsa ka sakop ilabi na niadtong nahisalaag gikan sa panon ni Kristo. Mag-ampo kita.

5. Alang sa atong kaigsoonan nga mipanaw na sa laing kalibutan, nga unta makasulod sila sa Gingharian sa Dios ug maangkon na nila ang kapasayloan sa ilang mga kasal-anan. Mag-ampo kita.

6. Alang sa ... (idugang ang panginahanglan sa katilingban). Mag-ampo kita.

7. Alang sa atong kaugalingong katuyoan atong i-ampo sa hilom.

Pangulo: Langitnon namong Amahan, Ikaw sa kanunay ang among dalangpanan. Itugot nga sa kanunay maminaw kami sa Imong pagtulun-an og magasunod sa Imong mga sugo sa paghigugma. Kini among giampo pinaagi ni Kristo among Ginoo. Amen.