KASAULOGAN SA PULONG

IKADUHANG DOMINGGO SA KWARESMA

a. BASAHON I

Gen. 12: 1-4

Kinutlo gikan sa basahon sa Genesis

Ang Ginoo miingon kang Abram, "Biyai ang imong nasud ug ang imong mga paryenti ug ang balay sa imong amahan ug lakaw ngadto sa usa ka nasud nga ipakita Ko kanimo. Hatagan Ko ikaw og daghang kaliwat ug sila mahimong dakung nasud. Panalanginan Ko ikaw ug himoon Kong bantugan ang imong ngalan aron gamiton kini sa pagpanalangin. Panalanginan Ko kadtong magapanalangin kanimo apan tunglohon Ko kadtong magtunglo kanimo. Ang tanang nasud sa kalibutan maghangyo Kanako nga panalanginan sila ingon sa pagpanalangin ko kanimo."

Sa nagpanuigon nag kapituan og lima si Abram, mibiya siya Haran sumala sa gisugo kaniya sa Ginoo, ug mikuyog kaniya si Lot.

Ang Pulong sa Ginoo.

b. SALMO RESPONSORYO

Salmo 33: 4-5,18-19,20,22

Tubag (R) O Ginoo, kaloy-i kami, sanglit nagasalig kami Kanimo.

Matarung ang pulong sa Ginoo, ug ang tanan Niyang mga buhat kasaligan. Nahigugma Siya sa husto ug matarung; puno ang yuta sa kalooy sa Ginoo. (R)

Tan-awa nga ang mga mata sa Ginoo anaa kanila nga mahadlokon Kaniya kanila nga nagalaum sa Iyang kaayo. Aron pagluwas kanila gikan sa kamatayon ug pag-amping kanila sa panahon sa gutom. (R)

Ang among kalag nagapaabot sa Ginoo, nga mao ang among hinabang ug among taming. Maania unta kanamo, O Ginoo, ang Imong kalooy kami nga nagalaum Kanimo. (R)

c. BASAHON II

2 Tim. 1: 8-10

Kinutlo gikan sa ikaduhang sulat ni San Pablo ngadto kang Timoteo.

Pakig-ambit sa mga pag-antus tungod sa Maayong Balita, sumala sa kusog nga ihatag sa Dios kanimo. Giluwas kita Niya ug gipili aron maiyang katawhan, dili tungod sa atong nabuhat kondili tungod sa Iyang kaugalingong tuyo ug grasya. Gihatag Niya kanato kining grasya diha kang Kristo Jesus sa wala pa magsugod ang panahon, apan karon gipakita na kanato pinaagi sa pagpadayag sa atong Manluluwas nga si Kristo Jesus. Kay gibuntog ni Kristo ang gahum sa kamatayon, ug pinaagi sa Maayong Balita gipadayag Niya ang kinabuhing walay katapusan.

Ang Pulong sa Ginoo.

d. EBANGHELYO

Mt. 17: 1-9

Ang Santos nga Ebanghelyo sumala ni San Mateo.

Unya, tapos sa unom ka adlaw, gidala ni Jesus si Pedro ug ang mga magsoon nga si Santiago ug si Juan ngadto sa usa ka taas nga bukid, nga sila ra. Ug samtang nagtan-aw sila Kaniya, nausab ang Iyang panagway; ang Iyang nawong misanag sama sa adlaw, ug ang Iyang bisti naputi sama sa kahayag. Unya nakita sa tulo ka tinun-an si Moises ug si Elias nga nakigsulti kang Jesus. Busa si Pedro miingon kang Jesus, "Ginoo, maayo nga ania kita dinhi; kon gusto Ka, magbuhat ako dinhi og tulo ka payag, usa alang Kanimo, usa alang kang Moises, ug usa alang kang Elias." Samtang siya nagsulti niini, usa ka masanag nga panganod mipatungod kanila, ug usa ka tingog gikan sa panganod miingon: "Kini mao ang pinangga Kong Anak nga Akong gikahimut-an. Pamati kamo Kaniya!" Sa pagkadungog sa mga tinun-an sa tingog, sila nangahadlok pag-ayo ug tungod niini, nanghapa sila. Si Jesus miduol ug mihikap kanila. "Tindog kamo, ug ayaw kamo kahadlok," Siya miingon. Sa paghangad nila, wala na silay laing nakita gawas kang Jesus.

Samtang sila naglugsong sa bukid, gipinahan sila ni Jesus, nga nag-ingon: "Ayaw ninyo isugilon kang bisan kinsa kining panan-awon nga inyong nakita hangtud nga ang Anak sa Tawo mabanhaw."

Ang Ebanghelyo sa Ginoo.

e. KOMENTARYO

Tema: Ang Kalipay Human sa Kasakit.

Adunay usa ka seminarista nga naghimo og usa ka pagpakig-uban sa mga katawhan sa usa ka katilingban, o sa laing pagkasulti "Exposure" sa usa ka parokya. Siya gipakuyog sa kura paroko sa pag-adto sa usa ka kapilya nga nahimutang sa bukid kaayo ug dili maagian og sakyanan tungod sa kalisod sa dalan. Diha sa pagbaktas, gibati sa seminarista ang kakapoy ug pagmahay sa pag-uban. Apan sa pipila ka oras nila nga pagbaktas, naabot ra gayud sila. Daku ang kalipay sa seminarista tungod sa kaanindot sa lugar, presko ang hangin ug tungod sa mga tawo nga malipayon kaayong misugat kanila. Pagkahuman sa Santos nga Misa, nakaingon ang seminarista sa iyang kaugalingon, "Pagkanindot nga magpabilin nalang dinhi ug dili na mobalik sa parokya."

Kini nga kasinatian naghulagway sa atong Ebanghelyo karon diin si Pedro, si Juan ug ang iyang igsoon nga si Santiago gikuyog ni Jesus ngadto sa hataas nga bungtod sa Tabor. Human masinati ni Pedro ang kalipay nga walay sama sa dihang ilang nakit-an si Moses ug si Elias uban sa pagkabag-o sa nawong ni Jesus, sa tumang kalipay, nakaingon si Pedro kang Jesus, "Kon gusto ka, magbuhat ako dinhi ug tulo ka tolda, usa alang Kanimo, usa alang kang Moses, ug usa alang kang Elias." Si Padre Gil A. Alingasan, SSP naghulagway sa kasinatian ni Pedro nga usa kini ka "Brief Shining Moments" sa iyang kinabuhi nga kung sa ato pa, "Langit nga kasinatian pero hamubo lang". Kini tungod kay nasinati ni Pedro ang matuod gayud ang kamatuoran sa pagkatawo ni Jesus. Matud pa sa komentaryo ni St. Jerome, ang unod nga punto sa pagka-usab sa panagway ni Jesus mao ang kamatuoran nga si Jesus nahimong kahayag sa katawhan. Ug matud pa ni Padre Gil, kini nagpamatuod nga si Jesus gayud ang Anak sa Amahan.

Ang tanang katawhan nga nadan-agan sa grasya sa kahayag ni Kristo nakasinati gayud og langitnong kalipay. Apan kining maong kalipay dili gayud matagamtaman kung wala makasinati og mga kasakitan sa iyang pagkinabuhi. Ang kasinatian sa seminarista naghatag kaniya og usa ka dakung hagit sa iyang bokasyon sa kinabuhi nga mahimong usa ka alagad sa Ginoo o pari sa umaabot. Base sa maong kasinatian makamapalandong usab kita nga luyo sa mga pag-antus ug kalisod makasinati gayod kita og kalipay ug kahimayaan. Usa ka kalipay nga hingpit natong matagamtaman kon kita molahutay sa mga kalisdanan ug kasakitan nga atong masinati sa atong paglawig sa panaw sa kinabuhi.

Mga igsoon ko diha kang Kristo, niining Ikaduhang Dominggo sa Kwaresma, kita gipahinumduman nga human sa kasakit, aduna gayoy kalipay nga nagpaluyo niini. Unta dili kita mawad-an og paglaum ug magmadasigon kanunay sa atong inadlaw-adlaw nga pagkinabuhi niining kalibutana kay anaa gayud ang kalipay human sa kasakit.

Giya alang sa pamalandong:

1. Malaumon ba ako nga human sa kasakit aduna gayod ang kalipay?

2. Nasinati ko ba ang kahayag ni Kristo nga naghatag og kalipay kanako?

3. Unsa man ang akong mga kasakit nga gibati karon, ako ba kining gihalad kang Kristo?

f. PANGALIYA

Pangulo : Mag-ampo kita sa atong Ginoong Jesukristo nga ang Iyang kahayag modan-ag sa tanang katawhan ug sa tibuok kalibutan.

Sa matag pag-ampo kita moingon: GINOO, IPADAN-AG KANAMO ANG IMONG KAHAYAG.

1. Ginoo, lamdagi ang Imong Simbahan uban sa Imong masidlakong kahayag puno sa gugma ug panaghiusa. Nagaampo kami kanimo.

2. Ginoo, dasiga uban sa Imong masidlakong kahayag ang mga lideres sa among nasud, ang mga ekonomista ug ang tanang anaa sa politika nga sila magdala og kaa- ngayan, hustisya ug kalinaw sa tanang katawhan. Nagaampo kami kanimo.

3. Ginoo, ipadan-ag ang Imong masidlakong nawong ngadto sa mga makasasala, sa mga nag-antus nga mahatagan sila sa paglaum ug kaisog aron sa pagbag-O sa ilang kinabuhi. Nagaampo kami kanimo.

4. Ginoo, hayagi kami sa Imong presensiya nga kining katilingban nga ania sa Imong atubangan magkahiusa sa kanunay ug motubo dinhi kanamo ang Imong kinabuhi ug gugma ug sa ingon among mapaambit ngadto sa tanan namong mahimamat matag adlaw. Nagaampo kami kanimo.

5. Ginoo pakitaa sa kahayag sa Imong nawong ang tanan namong igsoon nga nangamatay na ug dawata sila diha sa Imong puloy-anan aron ilang matagamtaman ang kalipay'ng walay katapusan. Nagaampo kami kanimo.

6. Ginoo ... (idugang ang panginahanglan sa katilingban). Nagaampo kami kanimo.

7. Ginoo, diha sa kahilum among ipadayag Kanimo ang kaugalingon namo nga mga katuyuan.

Pangulo: Ginoong Jesus, bulahan kaayo kami nga Ikaw ania uban kanamo sa kanunay, pabilin dinhi kanamo karon ug hangtud sa mga katuigan nga tanan. Amen.