IKAPITO NGA DOMINGO

Ikapitong Domingo Sulod sa Tuig

Litanya sa Pagpasalamat Human sa Pandemya (Covid Pandemic)

Pag-ampo sa tibook adlaw sa semana ug Dominggo nga mga Misa gikan sa Pebrero 11 hangtud sa Pebrero 22, 2023 (Miyerkules sa Abo)

Alang sa gasa nga bag-ong nadiskobrehan nga mga tambal ug mga bakuna aron mabuntog ang kagaw ug ang katingalahan sa natural nga resistensya, magpasalamat kita sa Ginoo.

Tubag: Salamat sa Dios.

Alang sa gasa sa kasiguroan sa presensya, sa dihang kita nabalaka ug naguol, naguol ug nag-inusara ug walay pailob panahon sa pandemya, magpasalamat kita sa Ginoo

Tubag: Salamat sa Dios.

Mag-ampo kita.

Mahigugmaong Amahan, wala kami gihunahuna nga wala nimo mahibaloi. Walay luha nga miagas nga dili importante kanimo. Walay kalipay nga among gisaulog nga lahi kanimo. Misulod ka sa among kalibutan sa sakit, pag-antos ug kamatayon ug nasayod ka sa mga kahadlok nga among gisagubang. Dawata ang among pagpasalamat sa imong kabubot-on nga gugma sa panahon sa pandemya o Covid pandemic. Sa imong paghilak sa pagkamatay ni Lazarus, miginhawa sa gininhawa sa kinabuhing dayon sa tanan nga mga namatay sa corona virus. Imong gihimong kalipay ang among mga kahadlok ug tungod niini kami nagpasalamat ug nagdayeg Kanimo. Kanimo ang himaya karon ug hangtod sa kahangtoran. Amen,

Maria Panabang sa mga Kristohanon, ig-ampo mo kami.

San Miguel, Arkanghel, ig-ampo mo kami.

San Roque, ig-ampo mo kami.

PASIUNA

February 19, 2023

Maayong buntag/hapon mga igsuon ko diha ni Cristo.

Ania na kita sa Ika-pito nga Domingo Sulod sa Tuig. Karong adlawa usab gitawag nga Pontifical Work of St. Peter the Apostle diin atong suportahan ug tabangan ang mga pormasyon sa mga seminarista, kaparian ug relihiyoso sa tibuok kalibutan.

Ang Unang Pagbasa gikuha gikan sa Basahon sa Leviticos. Ang Ginoo miingon kang Moises, "Sultihi ang tibuok Israel, pagbalaan kamo, kay ako, ang Ginoo nga inyong Dios, balaan man."

Ang Ikaduhang Pagbasa gikuha gikan sa Unang Sulat ni San Pablo ngadto sa taga-Corinto, Siya miingon nga "sa walay pagduna-duha nasayod kamo nga kamo templo sa Dios, ug nagpuyo diha kaninyo ang Espiritu sa Dios."

Ang ebanghelyo gikuha gikan sa Santos nga Ebanghelyo sumala ni San Mateo. Si Jesus nagpahinumdom sa iyang mga tinun-an sa paghigugma diha sa pag-ingon, "higugmaa ninyo ang inyong mga kaaway, ug i-ampo ninyo ang mga naglutos kaninyo..."

Palihug manindog alang sa pagsugod sa Santos nga Eyukaristiya.

BASAHON I

Lv. 19: 1-2, 17-18

KINUTLO GIKAN SA BASAHON SA LEVITICOS

Ang Ginoo miingon kang Moises, "Sultihi ang tibuok Israel, pagbalaan kamo, kay ako, ang Ginoo nga inyong Dios, balaan man."

"Kon may kasilo kamo sa inyong isigkatawo, prangkahi siya, aron dili kamo makasala. Ayaw panimalos, ug ayaw usab pagdumot sa inyong kadugo. Higugmaa ang inyong isigkatawo ingon sa inyong paghigugma sa inyong kaugalingon: Ako mao ang GINOO."

ANG PULONG SA GINOO.

SALMO RESPONSORYO

Ps. 103:1-2, 3-4, 8, 10, 12-13

R. Ang Ginoo maayo ug maluluy-on.

Dayga ang Ginoo, kalag ko; ug ang tibuok kong kaugalingon, dayga ang iyang balaang ngalan.

Dayga ang Ginoo, kalag ko, ug ayaw hikalimti ang tanang mga kaayohan niya.

R. Ang Ginoo maayo ug maluluy-on. 

Gipasaylo niya ang tanan mong kadautan, giayo niya ang tanan mong kasakitan.

Giluwas niya ang imong kinabuhi sa kalaglagan; gilibutan ka niya sa kaayo ug kaluoy.

R. Ang Ginoo maayo ug maluluy-on.

Maluluy-on ug mahigugmaon ang Ginoo, dugayng masuko ug hupong sa kaayo.

Iya kitang gidumala dili sumala sa atong kasal-anan, ni mibalos siya kanato sumala sa atong mga kalapasan.

R. Ang Ginoo maayo ug maluluy-on.

Maingon nga ang silangan halayo sa kasadpan, sa ingon iyang gipahilayo kanato ang atong mga kalapasan.

Maingon nga ang amahan maluoy sa iyang mga anak, sa ingon naluoy ang Ginoo kanila nga mahadlokon kaniya.

R. Ang Ginoo maayo ug maluluy-on.

BASAHON II

1 Cor. 3:16-23

KINUTLO GIKAN SA UNANG SULAT NI SAN PABLO NGADTO SA TAGA-CORINTO

Sa walay duhaduha nasayod kamo nga kamo templo sa Dios, ug nagpuyo diha kaninyo ang Espiritu sa Dios. Busa ang moguba sa templo sa Dios, laglagon sa Dios. Kay balaan ang templo sa Dios, ug kamo mao ang templo niya.

Wala untay maglimbong sa iyang kaugalingon. Kon maghunahuna ang usa kaninyo nga maalamon siya sumala sa sukdanan sa kalibutan, kinahanglan nga magpakabuang siya aron mahimo gayod siyang maalamon. Kay ang giisip niining kalibutana nga kaalam, binuang alang sa Dios. Kay sumala sa giingon sa Kasulatan, "Libogon sa Dios ang mga maalamon pinaagi ra usab sa ilang kaalam." Ug laing bahin sa Kasulatan nag-ingon, "Nasayod ang Ginoo nga walay kapuslanan ang hunahuna sa mga maalamon." Busa dili angay nga ipasigarbo ang mga butang nga mahimo sa tawo. Sa pagkatinuod, kamo ang tag-iya sa tanang butang. Si Pablo, si Apolo, ug si Pedro, ingon man kining kalibutana, ug ang kinabuhi ug ang kamatayon, ang karon ug ang umaabot, inyo kining tanan, ug kamo iya ni Cristo ug si Cristo iya sa Dios.

ANG PULONG SA GINOO.

EBANGHELYO

Mt. 5:38-48

Kinutlo gikan sa Balaan nga Ebanghelyo sumala ni Mateo

Miingon si Jesus sa iyang mga tinun-an: "Nadungog ninyo nga giingon, 'Mata sa mata, ug 'ngipon sa ngipon? Apan ako nagaingon kaninyo, ayaw pagsukol sa daotan; hinoon kon adunay mosagpa sa túo [nimong] aping, ipatara usab ang pikas; ug kon adunay buòt mokiha kanimo ug mokuha sa imong kamisin, ihatag usab kaniya ang kupô; ug kon adunay mopugos kanimo paglakaw og usà ka milya, lakaw og duha pa ka milya ubàn kaniya. Siya nga nangayô kanimo, hatagi,   ug siya nga buòt mohulam gikan kanimo ayaw balibari.

"Nadungog ninyo nga giingon, 'Higugmaa ang imong isigkaingon, ug dumti ang imong kaaway?

Apan akò nagaingon kaninyo, 'Higugmaa ninyo ang inyong mga kaaway, ug iampo ninyo ang mga naglutos kaninyo, aron mahimo kamong mga anak sa inyong Amahan nga atoa sa langit, kay ang adlaw iyang gipasubang sa mga daotan ug sa mga maayo, ug ang ulan iyang gipabuhagay sa mga matarong ug sa mga dili matarong.

"Kay kon gihigugma ninyo ang mga nahigugma kaninyo, unsa may ganti nga inyong madawat?

Dili ba nga ang mga kobrador sa buhis nagbuhat usab sa ingon?

Ug kon tagdon ninyo ang inyong mga igsoon lamang, unsa may inyong gibuhat nga labing labaw pa?

Dili ba ang mga Hentil nagbuhat usab sa ingon?

Busa pagmahingpit kamo ingon nga ang inyong Amahan nga langitnon hingpit."

Ang Ebanghelyo sa Ginoo.

PANGALIYA SA KATILINGBAN Pebrero 19, 2023

Pari: Tungod sa dakung gugma sa atong Langitnong Amahan, iyang gipadala ang iyang Bugtong Anak aron mahingpit ang iyang kasugoan nga mao ang paghigugma sa tanan. Ato karong ihalad ang atong mga pag-ampo diha sa atong pag-ingon:

GINOO, TUDLO-I KAMI SA PAGHIGUGMA SAMA SA IMONG PAGHIGUGMA.

1. Alang sa mga pangulo sa Simbahan, ilabina si Papa Francisco, mga Obispo ug mga Pari, makadawat unta sila og dugang kaalam aron sa mapadayonong pagsangyaw sa ilang misyon nga mao ang pagpakaylap sa gugma sa Dios sa tanang katawhan. Mag- ampo kita sa Ginoo.

2. Alang sa pangulo sa tibuok kalibutan, ilabina dinhi sa atong nasud, nga lamdagan unta sila sa Espiritu Santo diha sa pagpakaylap sa matuod nga diwa sa pagpangalagad nga puno sa gugma ug pakigdait alang sa tanang katawhan. Mag-ampo kita sa Ginoo.

3. Alang sa atong mga kaigsuonan nga nag-antus sa kalisod sa kinabuhi, nagmasakiton ug mga biktima sa nagkadaiyang katalagman, makabaton unta sila og hingpit nga pagtuo aron malig-on ang ilang pagsalig sa Dios nga maoy maghatag og kahupayan. Mag-ampo kita sa Ginoo.

4. Alang sa atong tagsa-tagsa ka katilingban ilabina dinhi sa atong GKK nga makaangkon sila sa kalumo sa kasingkasing diha sa ilang pagpangalagad nga bisan pa sa mga pagsulay sila magpabilin nga lig-on sa pagpadayon sa ilang gimbuhaton. Mag-ampo kita sa Ginoo.

5. Alang sa tanang seminarista, ang Dios magbubo unta sa iyang grasya ngadto kanila sa matag adlaw. Mag-ampo kita sa Ginoo.

6. Alang sa mga mapasalamaton sa Ginoo ilabina sila _________ makaangkon unta sila og kabaskog sa lawas ug malinawong panghunahuna diha sa ilang mga desisyon sa kinabuhi. Mag-ampo kita sa Ginoo.

7. Alang sa mga magtutuong nangamatay ilabina nila __________ makakaplag sa kapahulayang dayon. Mag-ampo kita sa Ginoo.

Pari: Langitnong Amahan, pun-a kami sa imong gugma ug papasa ang kangitngit gikan sa among kinabuhi aron kami makalihok diha sa kahayag ni Cristo nga imong Anak. Kini among gipangayo pinaagi ni Cristo among Ginoo. Amen.