STO. NIÑO

SANTO NIÑO

The Feast of Sto. Nino of Cebu is celebrated on the Third Sunday of January or Second Sunday of Ordinary Time.

PASIUNA

January 15, 2023

Maayong buntag mga igsoon ko diha ni Cristo ug malipayong piyesta kanatong tanan! Ania na kita sa Ikaduhang Domingo Sulod sa Tuig. Karong adlawa gisaulog sa tibuok Simbahan sa Pilipinas ang Kapistahan ni Señor Santo Niño. Karong adlawa usab gisaulog ang Holy Childhood Day ug Week of Prayer for Christian Unity.

Diha sa unang pagbasa nga gikuha gikan sa Basahon ni Propeta Isaias, atong madungog nga gitagna niya nga matawo ang usa ka bata nga lalaki ug "nganlan siya'g "Maalamong Magtatambag," "Dios nga Gamhanan," "Walay katapusang Amahan," ug "Prinsipe sa Pakigdait"..."

Diha sa ikaduhang pagbasa nga gikuha gikan sa Sulat ni San Pablo ngadto sa taga-Efeso, kini nagsaysay nga gipili kita sa Dios sa wala pa buhata ang kalibutan aron nga mamahimong balaan ug maiya ni Cristo.

Ug diha sa Santos nga Ebanghelyo sumala ni San Mateo, atong madungog si Jesus nga miingon, "Busa bisan kinsa nga magpaubos sa iyang kaugalingon sama niining bata, kini siya maoy labing dako sa gingharian sa langit..."

BASAHON I

Is. 9:1-6

KINUTLO GIKAN SA BASAHON NI PROPETA ISAIAS

Dili na batiog kasubo ang kaniadto nag-antos. Sa miaging panahon gipa- kaulawan niya ang Zabulon ug ang Neftali, apan sa umaabot nga mga adlaw himoon niyang nindot ang agianan latas sa dagat, ang yuta unahan sa Jordan, ang Galilea nga gipuy-an sa mga langyaw. Ang katawhan nga kaniadto naglakaw sa kangitngit nakakitag dakong kahayag; ang nagpuyo sa mangiob nga dapit gisidlakan na sa kahayag. Gipadaghan mo ang molupyo sa nasod, GINOO, nagmaya sila diha sa imong atubangan; sama sa pagmaya sa mga tawo inigkating-ani ug ingon nga maglipay ang mga tawo inigbahinbahin nila sa ilang inilog.

Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaog kaniya. Kay sunugon daw sugnod ang tanang sapatos sa mga sundalo nga nagpaingon sa gubat, ingon man ang tanang saput nga natumog sa dugo.

Kay natawo alang kanato ang usa ka bata, gihatag kanato ang usa ka anak lalaki; ug siya ang magmando sa tanan, ug nganlan siyag "Maalamong

Magtatambag," "Dios nga Gamhanan," "Walay Katapusang Amahan," "Prinsipe sa Pakigdait."

ANG PULONG SA GINOO.

SALMO RESPONSORYO

Ps. 98:1,2-3,3-4,5-6

R. Ang tanang katawhan sa kalibutan nakakita sa kadaugan sa atong Dios.

Awitig bag-ong awit ang Ginoo, kay nagbuhat siyag katingalahang mga butang. Pinaagi sa iyang gahom ug balaang kusog, nakab-ot niya ang kadaugan. 

R. Ang tanang katawhan sa kalibutan nakakita sa kadaugan sa atong Dios.

Gipahayag sa Ginoo ang iyang pagdaug, gipaila niya sa kanasuran ang iyang makaluwas mga gahom. Gituman niya ang iyang mga saad sa katawhan sa Israel, uban sa walay paglubad nga gugma ug pagkamaunongon.

R. Ang tanang katawhan sa kalibutan nakakita sa kadaugan sa atong Dios. 

Dayga ang Ginoo dinuyogan sa mga alpa, pagtugtog og honi diha sa mga alpa.

Bulhota ang mga trumpeta ug mga budyong ug singgit sa kalipay atubangan sa Ginoo, ang atong hari.

R. Ang tanang katawhan sa kalibutan nakakita sa kadaugan sa atong Dios.

BASAHON II

Eph. 1:3-6, 15-18

KINUTLO GIKAN SA SULAT NI SAN PABLO NGADTO SA TAGA-EFESO

Magpasalamat kita sa Dios ug Amahan sa atong Ginoong Jesucristo nga nagpanalangin kanato sa tanang espirituhanong gasa sa langit diha sa atong pagkahiusa kang Cristo. Sa wala pa buhata ang kalibutan gipili na kita sa Dios aron maiya diha ni Cristo, aron mabalaan kita ug mawalay sala sa iyang atubangan. Tungod sa iyang gugma, daan nang gibut-an sa Dios nga sagupon niya kita nga mga anak pinaagi ni Jesucristo-mao kini ang iyang gikahimut-an og tuyo. Daygon nato ang Dios tungod sa iyang labihang pagtagad kanato pinaagi sa iyang hinigugmang Anak!

Tungod niini, sukad sa pagkadungog ko nga mituo kamo sa Ginoong Jesus ug nahigugma sa tanang katawhan sa Dios, wala akoy hunong sa pagpasalamat sa Dios tungod kaninyo. Gihinumdoman ko kamo sa akong mga pag-ampo, ug nag- hangyo ako sa Dios sa atong Ginoong Jesucristo, ang Gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabotan aron masayod kamo unsa ang paglaum nga alang niini gitawag kamo. Ug hinaut usab unta nga masayod kamo sa kahupong sa mga panalangin nga gisaad niya sa iyang katawhan.

ANG PULONG SA GINOO.

EBANGHELYO

Mt 18:1-5, 10

Kinutlo gikan sa Ebanghelyo sumala ni Mateo

Niadtong taknaa, midúol ang mga tinun-an kang Jesus ug miingon, "Kinsa ang labing dako sa gingharian sa mga langit?"

Gitawag niya ang usa ka bata, ug iya siyang gipabarog taliwala nila, ug miingon siya, "Sa pagkatinuod, nagaingon akò kaninyo, kon dili kamo mag-usab ug mahisama sa mga bata dili gayod kamo makasulod sa gingharian sa mga langit.

"Busa bisan kinsa nga magpaubos sa iyang kaugalingon sama niining bata, kini siya maoy labing dako sa gingharian sa mga langit. Ug bisan kinsa nga modawat sa usa ka bata sama niini tungod sa akong ngalan, nagadawat kanako."

"Pagmatngon kamo dili ninyo tamayon ang usà niining mga gagmay.

Kay nagaingon ako kaninyo nga ang ilang mga anghel didto sa mga langit kanunay nagatan-aw sa nawong sa akong Amahan nga atoa sa mga langit."

Ang Ebanghelyo sa Ginoo.

Katilingbanong Pag-ampo 

January 15, 2023

Pari: Mag-ampo kita sa Dios Amahan nga nagtagana sa iyang Gingharian alang sa mga bata ug sa mga sama kanila. Sa matag pangaliyupo, kita motubag:

SEÑOR SANTO NIÑO, TABANGI KAMI.

1. Nga si Santo Papa Francisco, mga Obispo, ug mga Pari, panalanginan unta sila sa Dios og gasa sa kahibalo ug kaalam diha sa ilang pagpakaylap sa Maayong Balita ngadto sa katawhan. Mag-ampo kita.

2. Nga ang mga pangulo sa kanasuran mahisama unta sa mga

bata nga molikay sa kagubot ug mahigugmaon sa kalinaw. Mag -ampo kita.

3. Nga ang grasya sa hinanaling pagkaayo sa mga masakiton, tigulang ug himalatyon, modagayday ngadto kanila. Mag-ampo kita.

4. Nga ang tanang mga kabataan sa tibuok kalibutan ilabina ang mga nakasinati ug inhustisya ug mga pag-abuso, pinaagi sa panabang sa batang Jesus, makasinati unta sila sa gugma ug kaluoy sa Dios pinaagi sa mga tao nga nag-atiman kanila ug ang anaa sa panggamhanan. Mag-ampo kita.

5. Nga ang mga magtutuong mihalad sa ilang pasalamat ug pagdayeg sa Ginoo, ilabina sila makabaton unta sa grasya sa pagkamapasayloon ug pagkamapaubsanon. Mag-ampo kita.

6. Nga ang mga nangamatay, ilabina nila makatagamtam sa kalinaw didto sa langitnong Gingharian. Mag-ampo kita.

Pari: Langitnong Amahan, himo-a kaming mahisama sa mga gagmayng bata nga angayan sa imoing Gingharian pinaagi ni Cristo nga among Ginoo. Amen.