STO. NIÑO

PANGILIN SA STO. NIÑO 

a. BASAHON I

Isaias 9: 1-6

Kinutlo gikan sa basahon ni Propeta Isaias.

Ang katawhan nga kaniadto naglakaw sa kangitngit nakakita'g dakung kahayag; ang nagpuyo sa mangi-ob nga dapit gisidlakan na sa kahayag. Gipadaghan Mo ang mga molupyo sa nasud, Ginoo, nagmaya sila diha sa Imong atubangan; sama sa pagmaya sa mga tawo inigkating-ani na ug ingon nga maglipay ang tawo inigbahinbahin nila sa ilang inilog. Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaug kaniya. Kay sunugon daw sugnod ang tanang sapatos sa mga sundalo nga nagpaingon sa gubat, ingon man ang tanang sapot nga natumog sa dugo. Kay natawo alang kanato ang usa ka bata, gihatag kanato ang usa ka anak lalaki ug Siya ang magmando sa tanan ug hinganlan Siya'g "Maalamong Magtatambag", "Dios nga Gamhanan." "Walay Katapusang Amahan," "Prinsipe sa Pakigdait." Walay katapusan ang pag-uswag sa Iyang pagmando ug molungtad usab ang kalinaw, diha sa trono ni David ug sa gingharian niini, ug lig-onon Niya kini ug palungtaron uban sa hustisya ug sa katarong sukad karon hangtud sa kahangturan. Himoon gayud kini sa Ginoo nga Labing Gamhanan.

Ang Pulong sa Ginoo.

b. SALMO RESPONSORYO

Salmo 98:1,2-3,3-4,5-6

Tubag (R) Ang tanang katawhan sa tibuok kalibutan, nakakita sa kadaugan sa atong Dios.

Awiti'g bag-ong awit ang Ginoo; kay nagbuhat Siya'g katingalahang mga butang! Pinaagi sa Iyang gahum ug balaang kusog, nakab-ot Niya ang kadaugan. (R)

Gipahayag sa Ginoo ang Iyang pagdaug, gipaila Niya sa kanasuran ang Iyang makaluwas nga gahum. Gituman Niya ang Iyang saad sa katawhan sa Israel, uban sa walay paglubad nga gugma ug pagkamaunongon. (R)

Nakakita sa kadaugan sa atong Dios ang tanang katawhan sa kalibutan! Pag-awit kamo nga malipayon ngadto sa Ginoo, kamong tanang katawhan; dayga Siya pinaagi sa mga awit ug mga singgit sa kalipay. (R)

Dayga ang Ginoo dinuyogan sa mga alpa; pagtugtog og huni diha sa mga alpa! Bulhota ang mga trumpeta ug mga budyong ug singgit sa kalipay atubangan sa Ginoo, ang atong hari! (R)

c. BASAHON II

Ef. 1: 3-6,15-18

Kinutlo gikan sa sulat ni San Pablo ngadto sa mga taga Efeso.

Magpasalamat kita sa Dios ug Amahan sa atong Ginoong Jesukristo nga nagpanalangin kanato sa tanang Espirituhanong gasa sa langit diha sa atong pagkahiusa kang Kristo. Sa wala pa buhata ang kalibutan gipili na kita sa Dios aron maiya diha ni Kristo, aron mabalaan kita ug mawalay sala sa Iyang atubangan. Tungod sa Iyang gugma, daan nang gibut-an sa Dios nga sagupon kita Niya nga mga anak pinaagi ni Jesukristo, mao kini ang Iyang gikahimut-an og tuyo. Daygon nato ang Dios tungod sa Iyang labihang pagtagad kanato pinaagi sa Iyang hinigugmang Anak.

Tungod niini, sukad sa pagkadungog ko nga mituo kamo sa Ginoong Jesus ug nahigugma sa tanang katawhan sa Dios, wala akoy hunong sa pagpasalamat sa Dios tungod kaninyo. Gihinumduman ko kamo sa akong mga pag-ampo ug naghangyo ako sa Dios sa atong Ginoong Jesukristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo Kaniya. Naghangyo usab ako nga malamdagan unta ang inyong mga salabutan aron masayud kamo unsa ang paglaum nga alang niini gitawag kamo. Ug hinaut usab unta nga masayud kamo sa kahupong sa mga panalangin nga gisaad Niya sa Iyang katawhan.

Ang Pulong sa Ginoo.

d. EBANGHELYO

Mt. 18:1-5, 10

Ang Santos nga Ebanghelyo sumala ni San Mateo.

Niadtong higayona, ang mga tinun-an nangadto kang Jesus ug nangutan9a, "Kinsa man ang labing daku sa Gingharian sa Langit?"

Si Jesus mitawag og usa ka bata ug gipatindog Niya sa atubangan nila, ug miingon Siya, "Hinumdumi kini: gawas kon mausab kamo ug mahimong sama sa mga bata, dili gayud kamo makasulod sa Gingharian sa Langit. Ang labing daku sa Gingharian sa Langit mao ang magpaubos sa iyang kaugalingon ug magpakasama niining bataa. Ug ang magadawat og usa ka bata nga sama niini sa Akong ngalan, magdawat Kanako."

"Matngoni ninyo nga dili kamo magtamay bisa'g usa niining mga gagmay'ng bata. Kay sultihan Ko kamo nga ang ilang mga anghel atua kanunay sa atubangan sa Akong Amahan didto sa langit."

Ang Ebanghelyo sa Ginoo.

e. KOMENTARYO

Tema: Ang Pagtoo Magdala Gingharian Sa Dios. Kanato

"Hinumdomi kini: gawas kon mausab kamo ug mahimong sama sa mga bata, dili gayod kamo makasulod sa Gingharian sa Langit." Mao kini ang pulong ni Jesus nga naghatag kanato og dakung hagit atol niining pagsaulog nato sa Kapistahan sa Sto. Niño. Unsa man diay ang kinaiya sa usa ka bata nga angay natong huptan aron makasulod kita sa gingharian sa langit?

Mga kaigsoonan, sayod kita nga ang usa ka bata anaa kaniya ang hiyas sa pagkamasaligon, matoohon ug pagkamapaubsanon. Mao kini ang mga kinaiya nga angay natong batunan. Sama nga ang makagagahom nga Dios nagpakatawo dinhi sa kalibutan tungod sa iyang dakong gugma kanato. Mipuyo Siya uban kanato, nagpakabata, sama siya kanato sa tanang butang gawas sa sala aron atong masinati nga siya haduol kanato motabang sa atong mga panginahanglan, mohatag sa atong mga gipangayo, nagsangyaw sa Maayong Balita ug nagpalansang sa krus alang sa atong kaluwasan. Iyang gipaubos ang iyang kaugalingon bisan usa siya ka Dios aron atong masinati ang iyang dakung gugma ngari kanato. Gugma nga dili masukod ug walay katapusan.

Ang maong dakong gugma sa Dios kanato, gawas sa nakahatag kini og kaluwasan kanato, naghatag usab kini og kahayag, paglaum ug kahupayan sa atong kinabuhi. Kini mahatagan og katumanan kung aduna kitay dakong pagtoo Kaniya. Ang hingpit nga pagtoo nga siya nahigugma kanato ug kanunay nga nagauban kanato sa atong inadlaw-adlaw nga pagpaningkamot sa atong pagpakabuhi niining kalibutan nga atong gipuy-an sa kasamtangan.

Apan dili unta magpabilin nga sama sa bata ang atong pagtoo. Motubo unta kini ug molambo nga mahimo kining hingkod diha sa atong mga kaakuhan isip mga Kristiyanos. Usa ka pagtoo nga maoy magdala kanato sa pagkamatinumanon sa mga kasuguan sa Dios nga maoy lig-on nga gabayan sa pagdumuli nato sa paghimo og mga kasal-anan. Nga mawala na kanato ang kasina, kahakog, kasuko, garbo ug uban pang kahimtang sa pagpakasala. Kay kining mga butanga mao kini ang maghatag kanunay og kangitngitan sa atong kinabuhi. Kung aduna kitay pagtoo sa Dios inubanan sa pagkamatinumanon sa iyang mga sugo dili gayod kita makahimo sa pagsupak sa kabubut-on sa Dios.  

Ang kamatuoran nga sa matag adlaw sa atong kinabuhi anaa ang atong pagpaningkamot nga kita mabuhi nga dungganan apan dili usab ikalimod nga sa matag karon ug unya gihulga kita kanunay sa pagpakasala.

Apan kon wala kanato ang mga hiyas nga nahuptan ni Kristo dali ra kitang mapukan. Mao nga ang hagit sa matag usa kanato nga ato gayod nga batunan ang maayong panig- ingnan ni Kristo aron dili kita madala ngadto sa kangitngitan. Ang atong pagtoo sa Dios nga siya kanunay'ng nagauban ug nagtabang kanato, makahatag gayod og paglaum ug kahupayan sa atong mga pag-antos. Dili gayod magduha- duha sa pagtabang kanato ang Dios. Kay siya mahigugmaon ug matinabangon man.

Ang atong pagtoo kaniya makita unta kini diha sa atong mga buhat ug kinabuhi. Si Jesus mihatag og panig-ingnan sa usa ka bata. Ang kinaiya sa usa ka bata, siya dili magbaton og pagdumot sa mga nakasala kaniya. Anaa kaniya ang pagkamapaubsanon ug dili garboso. Makahatag og kalipay ngadto sa uban pinaagi sa pagpasaylo, pagtabang ug pagtagad kanila. Manggihatagon ug mapaambiton sa mga gasa nga anaa kaniya. Ug sa katapusan gusto niya nga aduna kanunay kitay pagtoo ug pagsalig kaniya nga gitiman-an sa usa ka bata. Anaa ba kanato kining maong mga kinaiya nga gipadayag ni Kristo kanato? Hinaut pa unta.

Giya alang sa pamalandong:

1. Unsa man man ang mga pagtulun-an nga nakapatandog kanako niining pagsaulog nako sa Kapistahan sa Sto. Niño?

2. Unsa man ang mga hiyas nga akong nahuptan nga nahiusa sa mga hiyas ni Kristo?

3. Aduna ba akoy mga gibuhat nga makapahimuot sa Dios?

f. PANGALIYA

Pangulo : Si Jesus atong Ginoo ug Hari, naghatag kanato og panag-ingan sa pagpaubos. Kini nag- padayag nga nanginahanglan kita sa panabang sa atong Ginoo. Sa dakong, pagpaubos, mosampit kita Kaniya ug sa matag pag-ampo moingon kita: PAMATI-A KAMI, O GINOO.

1. Alang sa mga Pangulo sa atong Simbahan nga unta magdumala sila susama kang Kristo Jesus ang mapaubsanon ug maayong magbalantay. Mag-ampo kita. sa Ginoo.

2. Alang sa nagdumala sa atong nasod nga ang pagkama- tinud-anon, pagkamapaubsanon ni Kristo maoy ilang sumbanan diha sa ilang pag-alagad ug pagmugna og mga balaod. Mag- ampo kita.

3. Alang sa tanang mga ginikanan nga unta ipadayag nila ang pagkamapaubsanon diha sa ilang pagtuman sa ilang kaakuhan sa paghigugma ug pag-agak sa ilang mga anak subay sa Diosnong pagtulon-an. Mag-ampo kita.

4. Alang sa mga nag-antus, mga masakiton sa nagka- daiyang balay tambalanan nga unta masinati nila ang gugma sa Dios pinaagi sa mga tawo nga nag-amoma kanila. Mag-ampo kita.

5. Alang sa mga anak nga unta mamahimo silang mapa- ubsanon ug masunuron pinaagi sa pagpaminaw ug pagtahod sa ilang mga ginikanan. Mag-ampo kita.

6. Alang sa tanang makasasala nga unta makaamgo sila ug makadawat nga sila makasasala aron sa ingon maaghat sila sa pagbalik ngadto sa atong Ginoo. Mag-ampo kita.

7. Alang sa atong GKK nga unta ang maayong pagtinagdanay maghari kanato ingon sa pagpadayag sa Gingharian sa Dios dinhi sa atong katilingban. Mag- ampo kita.

Pangulo: Langitnong Amahan, tudloi kami sa pagpa- ubos aron kami dili magsalig sa among kaugalingong buhat kon dili magmasaligon kanunay sa Imong grasya ug gahom. Kini among gipangayo pinaagi ni Kristo nga among Ginoo. Amen.