KASAULOGAN SA PULONG

IKALIMANG DOMINGGO SA ORDINARYONG PANAHON

a. BASAHON I

Isaias 58:7-10

Kinutlo gikan sa basahon ni Propeta Isaias.

Mao kini ang giingon sa Ginoo: Bahini sa imong pan ang gigutom, ug dad-a ang kabus nga sinalikway ngadto sa imong balay; kon makakita ka og hubo, bistihi siya ug ayaw talikdi ang imong kaugalingong igsoon.

Unya ang imong kahayag mosidlak ingon sa kabuntagon, ug ang imong samad madali rang maayo; ug ang imong pagkamatarong mag-una kanimo ug ang himaya sa Ginoo manalipod sa imong likod.

Unya motawag ka ug ang Ginoo motubag: mosangpit kag panabang ug moingon siya: "Ania ako." Kon kuhaon mo gikan sa imong taliwala ang pagdaugdaog, ang pagbutangbutang, ug ang pagsulti sa dautan; ug kon pakan-on mo ang gigutom, ug busgon mo ang gisakit; unya ang imong kahayag mosubang sa kangitngitan, ug ang imong kadulom mahimong ingon og udtong totok.

Ang Pulong sa Ginoo,

b. SALMO RESPONSORYO

Salmo 112:4-5.6-7.8-9

Tubag (R) - Ang matarong kahayag diha sa kangitngit alang sa buotan.

Ang Ginoo nagabanagbanag latas sa kangitngitan, usa ka kahayag alang sa buotan; mahigugmaon Siya ug maloloy-on, ug matarong. Maayo Siya alang sa tawo nga maloloy-on ug manggihatagon. Sa tawo nga nagadumala sa Iyang patigayon uban sa katarong.(R)

Dili gayod siya mabalhin; Ang matarong, mahinumduman kanunay hangtod sa kahangturan dili siya mahadlok sa dautang mga taho. Malig-on ang iyang kasingkasing kay nagasalig siya sa Ginoo.(R)

Ang iyang kasingkasing makanunayon dili gayod siya mahadlok kusog siyang mohatag sa mga kabus, ang iyang kaliwat molungtad hangtod sa kahangturan; ang iyang gahom ibayaw diha sa himaya. (R)

c. BASAHON II

1Corinto 2: 1-5

Kinutlo gikan sa unang sulat ni San Pablo ngadto sa taga Corinto.

Mga igsoon, sa akong pag-anha aron pagwali sa tinago nga kamatuoran gikan sa Dios, wala ako maggamit og lawom nga mga pulong ug dakong kinaadman. Kay sa diha pa ako uban kaninyo gikalimtan ko ang tanang butang gawas kang Jesukristo, labi na gayod ang Iyang kamatayon sa krus. Busa pag-anha ko kaninyo, huyang ako ug nagkurog sa kahadlok, ug ang akong pakigpulong ug pagwali wala ko himoa sa hinashasang mga pulong sa tawhanong kaalam, kondili pinaagi sa dili malalis nga gahom sa Espiritu sa Dios, busa ang inyong pagtuo wala magbarog  sa kaalam sa tawo, kondili sa gahom sa Dios.

Ang Pulong sa Ginoo.

d. EBANGHELYO

Mt. 5:13-16

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Kamo sama sa asin alang sa katawhan. Apan kon ang asin kawad-an sa iyang kaparat, unsaon pa man pagpabalik sa lami niini? Kini wala nay kapuslanan ug angay na lamang isalibay ug tunobtunoban sa mga tawo.

"Kamo sama sa kahayag alang sa katawhan. Ang siyudad nga nahimutang sa bungtod dili gayod matago. Walay magdagkot og suga aron lamang tagoan, kondili ibutang sa dayag aron makadan-ag sa tanan nga anaa sa balay. Busa ipadan-ag gayod ang inyong kahayag atubangan sa mga tawo, aron makakita sila sa inyong mga maayong buhat ug magadayeg sa inyong Amahan nga atua sa langit.

Ang Ebanghelyo sa Ginoo.

e. KOMENTARYO

Tema: Ang Kaakuhan diha sa Katilingban.

Mga igsoon ko diha ni Kristo, ania na kita karon sa ikalimang Dominggo sa Ordinaryong Panahon. Ang atong mga pagbasa karon nagpahinumdum sa atong kaakuhan diha sa katilingban. Apan, unsa man ang atong kaakuhan isip mga sumusunod ni Kristo?

Tataw kaayo kini sa atong mga pagbasa karon ilabi na sa atong Ebanghelyo. Matud ni San Mateo nga kita mao ang asin ug ang kahayag sa kalibutan. Apan ang pangutana, nganong asin man ang gigamit nga hulagway sa Ginoo aron sa pagpasabot sa iyang mga disipulo sa ilang kaakuhan? Kini tungod kay sa unang panahon usa sa mga importanteng galamiton o kinahanglanon sa usa ka panimalay mao ang asin. Bisan karon, dili nato ikalimod ang kamahinungdanon niini. Sa atong pagluto pananglitan, diba walay lami ang atong mga niluto kon walay asin. Ngano man? Kini tungod kay ang asin naghatag og kalami o "flavor" sa atong giluto. Mao nga gitandi kini sa atong tagsa tagsa ka gimbuhaton. Kini nagpadayag nga ang atong pagpangalagad o atong mga kaakuhan maghatag og kalami sa mga katawhan nga atong giserbisyohan. Wala lamang kini nagkahulogan sa pulong apan labaw sa tanan sa atong mga maayong binuhatan nga maoy mahimong sumbanan diha sa atong katilingban. Mao kini ang paghatag ug ang pagtahan sa atong kaugalingon sa pagserbisyo sa uban, nga ang matag usa kanato makita ang presensya ni Kristo isip mga asin sa katilingban nga naghatag og kahulugan sa kinabuhi sa uban. Isip nga katawhan sa Dios, kita mamahimong instrumento ni Kristo sa pagpaambit sa iyang kahayag ug dili unta kita mamahimong babag sa kalamboan ilabina sa espirituhanong diwa sa atong isigkatawo. Ato untang mapaambit ug mapakita sa uban ang atong mga maayong buhat aron sila usab matabangan sa pagpuyo sa kamatuoran nga mao ang pagsunod sa sugo sa atong makagagahum nga Amahan.

Sa atong unang pagbasa karon nagpahinumdum ug naghagit kanato nga isip mga katawhan sa Dios aduna kitay dakong kaakuhan ug kalambigitan sa kinabuhi sa uban. Pananglitan sa atong katilingban kon makabati kita nga aduna kitay mga kaigsoonan nga nanginahanglan og tabang ilabi na ang mga nag- antos sa kawad-on, unta dili kita magmakuli sa pagtabang materyal man o esprituwal nga panginahanglan uban sa grasya sa Amahan nga maoy tinubdan sa tanan. Kay matud pa ni San Pablo sa atong ikaduhang pagbasa nga ang atong pagtoo wala magbarog diha sa kaalam sa tawo, kondili sa gahum sa Dios. Busa mga igsoon, kini nagpadayag nga ang Dios maoy atong pundasyon sa adlaw-adlaw natong mga buluhaton. Bisan pa man sa atong mga kahuyang ang Ginoo kanunay gayud naga-uban kanato. Pananglitan diha sa atong pagpakiglambigit uban, ato untang hinumduman nga taliwala sa atong mga kahuyang mamahimo unta kitang andam modawat sa tumang pagpaubos, nga kining atong nahuptan nga kaalam wala gayud kini magagikan sa kaalam sa tawo kon dili gikan kini sa gahum sa Espiritu sa Dios aron kita makahimo sa atong kaakuhan isip mga sumusunod ni Kristo.

Mga igsoon, mamahimo unta kitang mga asin ug kahayag sa uban. Kini mao ang atong kaakuhan isip mga sumusunod ni Kristo. Unta sa atong inadlaw-adlaw nga buluhaton, atong paningkamutan nga mapuy-an ang atong mga kaakuhan sa kinabuhi ilabi na diha sa atong pamilya ug diha sa atong isigkatawo kay ako kita adunay kaakuhan sa katilingban.

Giya alang sa pamalandong:

1. Nahibalo ba ako sa akong kaakuhan diha sa katilingban?

2. Nahimo ba akong asin ug kahayag sa akong pamilya ug sa among katilingban?

3. Giunsa man nako pagpakita sa akong kaakuhan isip asin ug kahayag sa katilingban? 

f. PANGALIYA

Pangulo: Mga igsoon, si Kristo mianhi sa kalibutan aron paghatag kanato og kinabuhi. Modangop kita Kaniya kay Siya ang atong mahimong giya paingon ngadto sa Dios Amahan. Mag-ampo kita diha sa pag-ingon: GINOO, PATALINGHUGI KAMI.

1. Nga ang mga nagdumala sa atong Simbahan, Santo Papa, kaobispohan og mga kaparian, magmatinud- anon unta sila sa ilang pag-agak sa tanang katawhan nga mahiduol ngadto sa Dios. Mag-ampo kita.

2. Nga ang atong pangulo sa nasud magkinabuhing matinud-anon ug andam mosaksi sa kamatuoran aron maangkon ang matuod nga kalinaw, panaghiusa sa tanang katawhan. Mag-ampo kita.

3. Nga ang tanan natong mga igsoon nga nagmasakiton, himalatyon, mga tigulang, mga dinaugdaog, makabaton unta sila ug dugang pagsalig ug paglaum nga ang Dios maoy mohupay sa tanan nilang mga kasakitan. Mag- ampo kita.

4. Nga kadtong naghupot og katungdanan dinhi sa atong katilingban, nga ila untang puy-an ang mga maayong pagtulon-an ug maisogon unta nilang ipatigbabaw ang kaangayan. Mag-ampo kita.

5. Nga kadtong (idugang ang panginahanglan sa kati- lingban). Mag-ampo kita.

6. Sa atong personal nga katuyoan atong i-ampo sa hilom.

Pangulo: Mahigugmaong Amahan, nakasinati kami sa nagkalainlaing matang sa kangitngit dinhi sa among kinabuhi. Himoa kami nga mga buhing saksi sa kamatuoran, pinaagi sa Imong Anak si Jesukristo hangtod sa kahangturan. Amen.