KASAULOGAN SA PULONG

IKAUPAT NGA DOMINGGO SA ORDINARYONG PANAHON

a. BASAHON I

Sofonias 2:3;3:12-13

Kinutlo gikan sa basahon ni Sofonias.

Pangitaa ninyo ang Ginoo, kamong tanan nga mga maaghop sa yuta, nga nagtuman sa iyang mga sugo; pangitaa ang kamatarong, pangitaa ang kamaaghop; basin pa panalipdan kamo sa adlaw sa kasuko sa Ginoo.

Apan ibilin ko sa imong kinataliwad-an ang usa ka lungsod nga mapaubsanon ug ubos, nga modangup sa ngalan sa Ginoo: ang salin sa Israel. Dili sila magbuhat og kasal- anan, ni mosulti og mga bakak; ni hikaplagan ang malimbongon nga dila diha sa ilang baba: pakan-on sila ug mohigda, ug walay bisan kinsa nga magsamok kanila.

Ang Pulong sa Ginoo.

b. SALMO RESPONSORYO

Salmo 146.6-7.8, 9, 9-10

Tubag (R)- Bulahan ang kabus diha sa espiritu kay ila ang gingharian sa langit.

Ang Ginoo kasaligan hangtod sa kahangturan nagaamping sa katarong alang sa dinaugdaug, nagahatag og pagkaon sa gigutom sa mga bihag ang Ginoo nagapalingkawas. (R)

Sa mga buta ang Ginoo naghatag og igtatan-aw niadtong nahilukapa ang Ginoo nagpabangon sa matarong, ang Ginoo nahagugma sa mga langyaw ang Ginoo nanalipod. (R)

Sa mga ilo ug sa balo, ang Ginoo nagatabang. Apan ang dalan sa dautan, iyang gisalikway. Ang Ginoo mohari hangtod sa kahangturan, ang imong Dios, O Sion, latas sa tanang kaliwatan. Aleluya. (R)

c. BASAHON II

1 Corinto 1:26-31

Kinutlo gikan sa unang sulat ni San Pablo ngadto sa taga Corinto.

Mga igsoon, hunahunaa kon kinsa kamo kaniadto sa pagtawag sa Dios kaninyo. Pipila ra kaninyo ang maalamon ug gamhanan o tinamod sa katilingban sumala sa tawhanong pag-isip. Gituyo pagpili sa Dios ang giisip sa mga tawo nga walay kapuslanan aron pagpakaulaw sa mga maalamon, ug gipili Niya kadtong giisip nga mahuyang aron pagpakaulaw sa mga tawong gamhanan. Gipili Niya ang mga sinalikway ug tinamay ug gipakawalay bili sa mga tawo aron pagpaila nga walay bili ang giisip nga hinungdanon sa mga tawo, aron wala gayoy makapagarbo sa atubangan sa Dios. Apan gihiusa kamo sa Dios kang Kristo Jesus, ug gihimo niya si Kristo nga atong kaalam. Pinaagi Kaniya nahimo kitang matarong atubangan sa Dios ug kita naiyang katawhan ug gihatagan kitag kagawasan. Busa sumala sa giingon sa Kasulatan: "Ang buot magpagarbo, kinahanglan magpagarbo sa mga butang nga nahimo sa Ginoo."

Ang Pulong sa Ginoo.

d. EBANGHELYO

Mateo 5: 1-12

Ang Santos nga Ebanghelyo sumala ni San Mateo.

Sa pagkakita ni Jesus sa katawhan, mitungas Siya sa bungtod ug milingkod didto. Unya ang Iyang mga tinun-an mialirong Kaniya, ug misugod Siya pagtudlo kanila niining mosunod:

"Bulahan ang mga kabus diha sa espiritu kay ila ang Gingharian sa langit!". "Bulahan kadtong nagsubo, kay ang Dios magalipay kanila! "Bulahan kadtong masinugtanon sa kabubut-on sa Dios, kay makadawat sila sa gisaad Niya! "Bulahan kadtong nagtinguha gayod sa pagtuman sa gisugo sa Dios, kay ang Dios magatagbaw kanila! "Bulahan kadtong magmaloloy-on, kay ang Dios malooy kanila! "Bulahan kadtong mga maputli og kasingkasing, kay makakita sila sa Dios! "Bulahan kadtong naningkamot sa panagdait sa katawhan, kay ang Dios magaila kanila nga Iyang mga anak! "Bulahan kadtong gilutos gumikan sa ilang pagtuman sa gisugo sa Dios, kay ila ang Gingharian sa langit! "Bulahan kamo kon bugalbugalan ug daugdaogon kamo sa mga tawo, ug butangbutangan sa tanang matang sa kadautan tungod kay kamo akong mga sumusunod. Paglipay ug pagmaya kamo, kay dako ang ganti nga gitagana alang kaninyo didto sa langit."

Ang Ebanghelyo sa Ginoo.

e. KOMENTARYO

Tema: Ang Pagkabulahan.

Matag usa kanato nangandoy nga magmalipayon kita sa atong pagpuyo. Dili kita buot nga adunay mga kasakitan, mga pag- antus nga modangat sa atong kinabuhi. Gusto kita makatagamtam og lunlon kalipay lamang. Apan nasayod kita sa kamatuoran nga dili gayod mahitabo nga puro kalipay lang ang atong masinati. Matod pa, kon adunay kalipay, aduna usab kasakit. Kon duna kitay panahon sa paghilak, duna usab kitay panahon sa pagkatawa. Apan unsa man gayod ang atong sukdanan sa kalipay nga atong gipangandoy?

Mga kaigsoonan, niining ika-upat nga Dominggo Ordinaryong panahon, kita sa gipahinumduman kon unsaon nato pagpuyo aron mahimo kitang bulahan. Atong nadungog sa Ebanghelyo karon ang pagwali ni Jesus didto sa bungtod mahitungod sa pagka-bulahan. Ang atong unang pagbasa nga gikan ni Propeta Sofonias nag-awhag kanato pagpangita sa sa Ginoo alang sa atong kabulahanan. Kini tungod kay kasagaran kanato mosangpit lang kita sa Ginoo kung kita anaa sa kasakit. Apan kadaghanan kanato nakalimot na sa pagsangpit Kaniya sa panahon nga kita malipayon. Apan ang pangutana, hingpit ba ang atong kalipay kon wala ang Ginoo sa atong kinabuhi? Ang atong ikaduhang pagbasa gikan sa unang sulat ni San Pablo ngadto sa Taga-Corinto, nagpahinumdom usab kanato nga dili kita ang unang nangita sa Ginoo, kondili ang Ginoo maoy unang nangita kanato. Sama ra nga dili kita maoy unang nahigugma sa Ginoo apan ang Ginoo mao gayod ang unang nahigugma kanato, ang atong gibuhat mao lamang ang pagtubag sa iyang pagtawag kanato. Wala magsapayan ang Ginoo kon unsa ang atong kahimtang sa kinabuhi kon kita andam sa pagtubag sa iyang pagtawag kanato. Apan dili usab nato hikalimtan nga sa atong pagtubag sa imbistasyon sa pag-uban kaniya, wala kini magkahulugan og lunlon kalipay. Makatagamtam gayod kita og mga nagkadaiyang pagpanglutos, mga pagsulay sa kinabuhi, kasakitan ug mga pag-antus. Apan kon makalahutay lamang kita dako ang ganti nga gitagana kanato sa Ginoo sama sa iyang giingon: "Bulahan kamo kon bugalbugalan ug daugdaugon sa mga tawo, ug butangbutangan sa tanang matang sa kadautan tungod kanako. Paglipay ug pagmaya kamo, kay dako ang ganti nga gitagana kaninyo didto sa langit" (Mt. 5:11-12).

Mao kini ang sukdanan sa hingpit nga kalipay. Kalipay nga dili mahulipan sa mga kalibutanong butang. Kalipay nga walay makasakwat niini gikan kanato. Ang kalipay nga hingpit diha sa kahiusahan sa Ginoo human sa atong mga pag-antus sa atong paglawig sa panaw sa kinabuhi. Ang giwali ni Jesus didto sa bungtod mahitungod sa pagka-bulahan dili lamang alang sa dakong panon sa katawhan nga nagsunod-sunod kang Jesus, apan alang usab kini kanatong tanan. Gipahinumduman na usab kita sa Ginoo nga maningkamot kita sa pagkab- ot sa mga butang espirituhanon kay mao man kini ang magdala kanato ngadto sa kabulahanan. Hinaut pa unta.

Giya alang sa paalandong:

1. Giunsamannakopagpuyoangakong kinabuhi dinhi sa kalibutan?

2. Ako bang gipaningkamutan pagpuyo ang mga mensahe sa Ebanghelyo?

3. Nagtinguha ba ako sa pagpangita sa Ginoo sa inadlaw-adlaw nakong pagkinabuhi? Sa unsa nga paagi?

f. PANGALIYA

Pangulo: Ang Dios sa kanunay nagpahinumdom kanato sa pagsalig lamang Kaniya og dili sa mga butang nga lumalabay. Kay ang matuod nga kabulahan nagagikan gayod sa Ginoo. Busa sa tumang pagsalig moingon kita: GINOO, IKAW ANG AMONG PAGSALIG UG PAGLAUM.

1. Alang sa pangulo sa atong Simbahan, Santo Papa, mga obispo, og mga kaparian nga magmasaligon unta sila sa Dios diha sa ilang pagbuhat sa ilang mga kaakuhan og mamahimo silang giya sa tanang magtotoo. Mag-ampo kita.

2. Alang niadtong adunay katungdanan sa atong nasud ug katilingban, motuo ug mosalig unta sila sa Dios nga ang tanang mga panghitabo ug kaguliyang sa atong panggamhanan masulbad pinasubay sa kabubut-on sa Dios ug dili sa tawhanong gahom. Mag-ampo kita.

3. Alang niadtong naghupot og mga bahandi ug kabtangan nga unta andam sila mopaambit niini alang sa mga nanginahanglan natong kaigsoonan ilabi na kabus sa atong katilingban. Mag-ampo kita. sa mga

4. Alang kanatong tanan mga Kristiyanos nga mosalig kita sa Dios ug dili sa atong tawhanong katakos og sa atong mga nahuptan nga bahandi atong ipaambit sa uban aron ato kining ikahalad pagbalik sa Dios nga moay tag-iya sa tanan tang naankon. Mag-ampo kita.

5. Alang sa ... (idugang ang panginahanglan sa katilingban). Mag-ampo kita.

6. Alang sa atong mga kutuyoan atong i-ampo sa hilom.

Pangulo: Amahan namo nga Langitnon, tuburan sa gugma og kalooy, nangaliyupo kami nga Imo kaming giyahan sa dalan paingon sa tinuod nga kabulahanan. Kini among gipangayo pinaagi ni Kristo among Ginoo. Amen.