KASAULOGAN SA PULONG

IKATULONG DOMINGGO SA ORDINARYONG PANAHON

a. BASAHON I

Isaias 8:23-9:3

Kinutlo gikan sa basahon ni Propeta Isaias.

Sa sinugdanan iyang gipakaulawan ang yuta sa Sabulon, ug ang yuta sa Neptali; apan sa katapusan iyang gihimaya ang yuta nga padulong sa dalan sa dagat, ang yuta tabok sa Jordan, ang Galilea sa mga Hentil.

Nawala ang kasakit, nawagtang ang kangitngit nakakita og dakong kahayag; kanila nga nagpuyo sa dapit sa landong sa kamatayon misubang ang usa ka dakong kahayag. Gidad-an mo sila og kasadya ug dakong kalipay, ingon sa ilang pagkalipay atubangan kanimo sa ting-ani, Sama sa mga tawo nga nagsadya sa pagbahin sa inagaw.

Kay ang yugo nga nagpahimog-at kanila, ang yayungan diha sa ilang abaga, ug ang bunal sa ilang agalon, imong gidugmok, sama kaniadto sa adlaw ni Midian.

Ang Pulong sa Ginoo

b. SALMO RESPONSORYO

Salmo 17:1.4.13-14

Tubag (R) Ang Ginoo mao ang akong kahayag ug akong kaluwasan

Ang Ginoo mao ang akong kahayag ug akong kaluwasan; kinsa may akong kahadlokan? Ang Ginoo mao ang dalangpanan sa akong kinabuhi; kinsa pa may akong kalisangan? (R)

Usa ka butang akong gipangayo sa Ginoo; kini ang akong gipangita; Ang pagpuyo diha sa balay sa Ginoo. Sa tanang mga adlaw sa akong kinabuhi, aron makasud-ong ako sa kahiligugmaon sa Ginoo ug makapalandong sa Iyang templo. (R)

Nagatuo ako nga makakita ako sa kaayo sa Ginoo diha sa yuta sa mga buhi, Paabuta ang Ginoo uban sa kaisug; Pagmalig-on sa kasingkasing ug paabuta ang Ginoo. (R)

c. BASAHON II

1 Corinto 1; 10-13.17

Kinutlo gikan sa unang sulat ni San Pablo ngadto sa taga Corinto.

Mga igsoon, sa ngalan sa atong Ginoong Jesukristo, naghangyo ako kaninyo nga uyonan ninyong tanan ang inyong gisulti aron walay pagkabahinbahin diha kaninyo. Paghiusa gayod kamo diha sa usa ka hunahuna ug tumong. Kay gibalitaan ako sa pipila -ka sakop sa panimalay ni Cloe nga nagbingkilbingkil kamo. Ang buot kong ipasabot mao nga nagkalainlain ang gisulti sa usag-usa kaninyo. Ang usa moingon, "Dapig ako ni Pablo: ang usa usab moingon, "Dapig ako ni Apolo;" ug may nag-ingon, "Dapig ako ni Pedro:" ug adunay nag-ingon, "Dapig ako ni Kristo." Nabahinbahin ba diay si Kristo? Si Pablo ba diay ang gilansang sa krus tungod kaninyo? Gibunyagan ba kamo sa ngalan ni Pablo?

Si Kristo wala magpadala kanako aron mamunyag ako, kondili aron magsangyaw sa Maayong Balita, dili ginamit ang mga pulong nga lisod sabton, kay kini makawagtang sa gahom sa kamatayon ni Kristo didto sa krus.

Ang Pulong sa Ginoo.

d. EBANGHELYO

Mt 4.12-23

(Tinaas)

Ang Santos nga Ebanghelyo sumala ni San Mateo.

Sa pagkadungog ni Jesus nga gibilanggo si Juan, miadto Siya sa Galilea. Wala Siya mopuyo sa Nazaret kondili miadto ug mipuyo Siya sa Capernaum, usa ka lungsod nga daplin sa Lanaw sa Galilea, sa kayutaan sa Zabulon ug Neptali. Kini gihimo aron matuman ang giingon ni Propeta Isaias: "Yuta sa Zabulon ug yuta sa Neptali agianan padulong sa dagat, sa tabok sa Jordan, Galilea sa mga Hentil! Ang mga tawo nga nagpuyo diha sa kangitngit nakakitag dakong kahayag! Ngadto kanila nga nagpuyo sa mangitngit nga yuta sa kamatayon modan- ag ang kahayag!"

Sukad niadto si Jesus nagwali nga nag-ingon: "Biyai ang inyong mga sala, kay ang Gingharian sa langit duol na! Samtang si Jesus naglakaw daplin sa Lanaw sa Galilea, nakita Niya ang duha ka magsoon nga mananagat, si Simon (nga ginganlag Pedro) ug si Andres nga iyang igsoon nga namukot. Si Jesus miingon kanila, "Kuyog kamo Kanako kay tudloan ko kamo pagpanagat og mga tawo." Dihadiha gibiyaan nila ang ilang mga pukot ug mikuyog kaniya.

Mipadayon Siya paglakaw ug nakita Niya ang laing duha ka magsoon, si Santiago ug si Juan, mga anak ni Zebedeo. Didto sila sa ilang sakayan uban sa ilang amahan, nag-andam sa ilang mga pukot. Si Jesus mitawag kanila ug dihadiha gibiyaan nila ang ilang sakayan ug ang ilang amahan, ug mikuyog sila kang Jesus.

Si Jesus misuroy sa tibuok Galilea ug nagatudlo sulod sa ilang mga sinagoga, nagwali sa Maayong Balita bahin sa Gingharian, ug nag-ayo sa mga masakiton.

Ang Ebanghelyo sa Ginoo.

(Minubo)

EBANGHELYO

Mt 4: 12-17

Ang Santos nga Ebanghelyo sumala ni San Mateo.

Sa pagkadungog ni Jesus nga gibilanggo ppsi Juan, miadto Siya sa Galilea. Wala Siya mopuyo sa Nazaret kondili miadto ug mipuyo Siya sa Capernaum, usa ka lungsod nga daplin sa Lanaw sa Galilea, sa kayutaan sa Zabulon ug Neptali. Kini gihimo aron matuman ang giingon ni Propeta Isaias.

"Yuta sa Zabulon ug yuta sa Neptali, agianan padulong sa dagat, sa tabok sa Jordan, Galilea sa mga Hentil! Ang mga tawo nga nagapuyo diha sa kangitngit nakakitag dakong kahayag! Ngadto kanila nga nagapuyo sa mangitngit nga yuta sa kamatayon modan- ag ang kahayag!" Sukad niadto si Jesus nagwali nga nag-ingon: "Biyai ang inyong mga sala, kay ang Gingharian sa langit duol na!"

Ang Ebanghelyo sa Ginoo.

e. KOMENTARYO

Tema: Diha kang Kristo, adunay Kahiusahan.

"Adunay kahiusahan diha kang Kristo." Mao kini ang mga nindot kaayo nga mga pulong ang angay natong pamalandungan karon.

Sa atong unang pagbasa, gipadayag sa propesiya ni Propheta Isaias nga niadtong unang panahon, ang lugar sa Sabulon ug Neptali, ang yuta padulong sa dagat, ang yuta tabok sa Jordan, nakasinati sa dili maayong kahimtang. Kining maong yuta nakasinati og kahayag sa dihang niadto didto ang manunubos. Mao kini ang unod sa propesiya ni Propheta Isaias. Natuman kining maong propesiya diha sa atong Ebanghelyo karon, sa dihang si Jesus miadto didtong lugara aron pagdala ug pagsangyaw sa kaluwasan ug pag-ayo sa mga masakiton.

Kon atong pamalandungan kining maong mga panghitabo sa atong mga pagbasa karon, makahuna-huna kita nga sa dihang gituman ni Kristo ang iyang misyon, kita usab nahiusa kaniya. Kung tan-awon nato ang sitwasyon sa usa ka katilingban, makita nato nga ang punoan usahay sa mga problema mao ang nagkalainlaing pagtuo o prinsipyo sa kinabuhi. Kon lantawon nato pag-ayo ang yuta sa Sabulon ug sa Neptali sumala sa atong pagbasa, makita nato nga dili maayo ang ilang kahimtang, kay tataw man nga wala sila magkahiusa. Mao usab kini ang nahitabo sa atong ikaduhang pagbasa. Diha sa sulat ni San Pablo ngadto sa taga Corinto, makita nato nga ang tawo naglibog kung kinsa ang ilang tuohan. Kay adunay tawo nga muoyon sa sangyaw sa usa ka Apostol apan dili modapig sa usa ka apostol. Gani, dinhi sa sulat ni San Pablo, gipanghingusgan niya ang paghiusa sa tanang mga gisangyaw sa mga apostol kay usa lamang ang tumong niini nga mao ang paghiusa kanatong tanan diha kang Kristo aron kitang tanan madala ug mahiusa ngadto sa kaluwasan.

Mga kaigsoonan, kon atong itandi kining maong mga panghitabo sa atong panahon karon, makita nato nga dayag kaayo ang pagkapikas- pikas sa pulong sa Ginoo. Gani aduna kitay pagkabahin-bahin sa atong pagtuo. Apan bisan pa man nga mao kini ang mga nanghitabo karon, dili nato hikalimtan nga usa ra ang atong padulngan, ang usa ka Dios nga matuod nga maoy naglalang kanatong tanan. Bisan adunay nagkadaiyang prinsipyo ug pagtuo apan nasayod kita nga kitang tanan gihiusa ni Kristo diha sa iyang kasakitan, kamatayon ug pagkabanhaw. Si Kristo mitahan sa iyang kinabuhi tungod sa walay sukod nga gugma sa Amahan. Ug sa samang paagi aron kita mahiusa kaniya padulong ngadto sa Amahan. Atong hinumduman kanunay nga kining tanan adunay kahiusahan diha kang Kristo.

Giya alang sa pamalandong:

1. Ang ako ba nga pagkinabuhi nahiusa diha kang Kristo?

2. Giunsa man nako pagpakita ang akong pagkahiusa diha kang Kristo?

3. Ang akong mga buhat ba diha sa paminalay ug sa akong katilingban nagpadayag sa kahiusahan diha kang Kristo?

f. PANGALIYA

Pangulo: Mag-ampo kita ngadto sa atong mahigug- maong Amahan nga mamahimo kitang matuod nga kahayag ngadto sa atong isigkatawo ug atong ipadangat Kaniya ang atong mga pangamuyo diha sa pag-ingon: GINOO, HIMOA KAMING IMONG KAHAYAG.

1. Alang sa atong Simbahan, nga unta kanunay siyang magdan-ag sa kalibutan nga napuno sa kangitngitan gumikan sa sala. Mag-ampo kita.

2. Alang sa pangulo sa atong panggamhanan nga makahimo unta sila og kasulbaran sa krisis nga atong nahiagoman ilabi na sa matang sa atong panginabuhi aron sa ingon mohayag ang paglaum sa tanang lumo- lupyo dinhi sa atong nasod. Mag-ampo kita.

3. Alang niadtong mga tawo nga nakasinati sa nagkalin- laing kasakitan sa ilang kinabuhi tungod sa kalisud, problema ug dautang binuhatan sa uban, nga unta maangkon nila ang kahayag ni Kristo diha sa mga tawo nga misuporta kanila moral, espirituwal o "financial" man. Mag-ampo kita.

4. Alang sa tanang mga lideres sa nagkadaiyang organisasyon dinhi sa atong GKK sa nga modan-ag unta ang ilang kahayag ngadto sa uban pinaagi sa ilang matinud-anong pag-alagad sa katawhan. Mag-ampo kita.

5. Alang kanatong tanan nga ang mga pulong o mensahe sa atong Ginoo atong mapuy-an ug mapaambit ngadto sa uban isip kahayag niadtong nahisalaag natong mga kaigsoonan. Mag-ampo kita.

6. Alang sa ... (idugang ang panginahanglan sa katilingban). Mag-ampo kita.

7. Alang sa atong kaugalingong katuyoan atong i-ampo sa hilom.

Pangulo: Amahan nasayod kami nga kon wala Ikaw wala kami mahimo. Lamdagi kami sa kahayag sa Imong Anak si Jesukristo aron kami maga- saksi sa Iyang Maayong Balita ngadto sa uban kay Siya ang among kahayag hangtod sa kahangturan. Amen.