Ika-upat nga domingo

Ikaupat nga Domingo Sulod sa Tuig

PASIUNA

January 29, 2023

Maayong buntag/hapon mga igsuon ko diha ni Cristo. Ania na kita sa Ika-upat nga Domingo sa Ordinaryong Panahon. Karong Dominggoha usab, ang Simbahan nagsaulog sa National Bible Sunday ug Pro-Life Sunday.

Diha sa unang pagbasa nga gikuha gikan sa Basahon ni Propeta Sofonias, siya miingon, "Pangitaa ninyo ang Ginoo, kamong tanang mapaubsanon ug nagmasinugtanon sa iyang mga sugo."

Diha sa ikaduhang pagbasa nga gikuha gikan sa Unang Sulat ni San Pablo ngadto sa taga-Corinto, siya nagpahinumdum kanila sa pagtawag sa Dios kanila kaniadto sa pag-ingon, "Apan kamo gihiusa sa Dios kang Cristo Jesus..." "Ang buot magpasigarbo kinahanglan magpasigarbo sa mga butang nga nahimo sa Ginoo."

Diha sa Santos nga Ebanghelyo sumala ni San Mateo, atong madungog nga Si Jesus nga nagtudlo mahitungod sa mga Kabulahanan.

Palihug manindog alang sa pagsugod sa Santos nga Eyukaristiya.

BASAHON I

Zep. 2:3; 3:12-13

KINUTLO GIKAN SA BASAHON NI PROPETA SOFONIAS

Pangitaa ninyo ang GINOO, kamong tanang mapaubsanon ug nagmasinugtanon sa iyang mga sugo.

Buhata ang matarong ug pagmapaubsanon basin pag mahilikay kamo inig-abot sa adlaw sa kasuko sa GINOO.

Ibilin ko didto ang usa ka katawhan nga mapaubsanon.

Modangop sila kanako sa pagpakitabang.

Kadtong nahibilin sa Israel dili na magbuhat ug dautan ni mamakak pa. Pasibsibon nila ang ilang kahayopan ug mamahulay sila nga wala nay angay kahadlokan."

ANG PULONG SA GINOO.

SALMO RESPONSORYO

Ps. 146:6-7, 8, 9, 9-10

R. Bulahan ang kabus diha sa espiritu; kay ila ang gingharian sa langit.

Ang Ginoo kasaligan hangtod sa kahangturan, nagaamping sa katarong alang sa dinaugdaug, nagahatag og pagkaon sa gigutom.

Sa mga bihag ang Ginoo nagapalingkawas.

R. Bulahan ang kabus diha sa espiritu; kay ila ang gingharian sa langit.

Sa mga buta ang Ginoo naghatag og igtatan-aw; niadtong nahilukapa ang Ginoo nagpabangon.

Sa matarong, ang Ginoo nahagugma; sa mga langyaw ang Ginoo nanalipod.

R. Bulahan ang kabus diha sa espiritu; kay ila ang gingharian sa langit.

Sa mga ilo ug sa balo, ang Ginoo nagatabang, apan ang dalan sa dautan, iyang gisalikway.

Ang Ginoo mohari hangtod sa kahangturan; ang imong Dios, O Sion, latas sa tanang kaliwatan. Aleluya.

R. Bulahan ang kabus diha sa espiritu; kay ila ang gingharian sa langit.

BASAHON II

1 Cor. 1:26-31

KINUTLO GIKAN SA UNANG SULAT

NI SAN PABLO NGADTO SA TAGA-CORINTO

Mga igsuon, hunahunaa kon kinsa kamo kaniadto sa pagtawag sa Dios kaninyo. Pipila ra kaninyo ang maalamon ug gamhanan o tinamod sa katilingban sumala sa tawhanong pangisip. Gituyo pagpili sa Dios ang giisip sa mga tawo nga walay kapuslanan aron pagpakaulaw sa mga maalamon, ug gipili niya kadtong giisip nga huyang aron pagpakaulaw sa mga tawong gamhanan. Gipili niya ang mga sinalikway ug tinamay ug gipaka- walay bili sa mga tawo aron pagpaila nga walay bili ang giisip nga hinungdanon sa mga tawo, aron wala gayoy makapagarbo sa atubangan sa Dios. Apan kamo gihiusa sa Dios kang Cristo Jesus, ug gihimo niya si Cristo nga atong kaalam. Pinaagi kaniya nahimo kitang matarong atuba- ngan sa Dios, ug kita nahimong balaang katawhan niya ug gihatagan kitag kagawasan. Busa sumala sa giingon sa Kasulatan, "Ang buot magpagarbo kinahanglan magpagarbo sa mga butang nga nahimo sa Ginoo."

ANG PULONG SA GINOO.

EBANGHELYO

Mt. 5:1-12

Kinutlo gikan sa Balaan nga Ebanghelyo sumala ni Mateo

Sa pagkakita ni Jesus sa mga panon sa katawhan, mitungas siya sa bungtod; ug sa nakalingkod na siya, gidúol siya sa iyang mga tinun-an.

Unya gibuka niya ang iyang bâbâ ug misugod siya sa pagpanudlo kanila sa pag-ingon:

"Bulahan ang mga kabos sa espiritu, kay ila ang gingharian sa langit.

"Bulahan ang mga nagsubo, kay sila pagahupayon.

"Bulahan ang mga maaghop, kay sila makadawat sa yuta isip kabilin.

"Bulahan ang mga gigutom ug giuhaw alang sa pagkamatarong, kay sila pagatagbawon.

"Bulahan ang mga maluluy-on, kay sila pagakaluy-an.

"Bulahan ang mga putli og kasingkasing, kay sila makakita sa Dios.

"Bulahan ang mga tigpatunhay sa kalinaw, kay sila pagatawgon nga mga anak sa Dios.

"Bulahan ang mga gilutos tungod sa katarong, kay ila ang gingharian sa langit.

“Bulahan kamo kon bugalbogalan kamo, ug lutoson, ug butangbutangan kamo sa tanang matang sa kadaotan tungòd kanako.

Paglipay ug pagsadya kamo, kay dako ang iganti kaninyo didto sa langit; kay sa ingon niini gipanglutos nila ang mga propeta nga nahiuna kaninyo."

Ang Ebanghelyo sa Ginoo.

Katilingbanong Pag-ampo

Jan 29, 2023

Pari: Mga igsuon, mag-ampo kita ngadto atong sa Langitnong Amahan aron mahisakop kita sa pundok sa mga kabus ug mapaubsanon kinsa naga paabot sa tanang grasya nga gikan sa Dios, ug maingon kita:

GINOO, HIMOA KAMING MAPAUBSANON.

1. Alang sa Simbahan, uban sa mga pangulo niini, Santo Papa Francisco, mga Obispo ug mga Pari, nga ang Dios magbendisyon kanila diha sa ilang pagsangyaw sa Maayong Balita alang sa kabulahanan sa mga kabus ug sa mga mapaubsanon. Mag-ampo kita sa Ginoo.

2. Alang sa mga pangulo sa panggamhanan, makatagamtam unta sila sa presensya sa Dios diha sa mga kabus nga ilang gialagaran. Mag- ampo kita sa Ginoo.

3. Alang sa matag pamilya nga anaa sa panagbingkil, makabaton unta sila og kasingkasing nga mapaubsanon ug maanaa unta kanila ang kalinaw ni Cristo. Mag-ampo kita sa Ginoo.

4. Alang sa mga masakiton, mga binilanggo, mga tawo nga nag-antos sa nagkalainlaing kasakitan sa kinabuhi, nga pinaagi sa grasya sa Dios atong mapakita ang gugma Dios alang kanila. Mag-ampo kita as Ginoo.

5. Alang sa mga nagadayeg ug nagapasalamat sa Dios, ilabina nila makasinati unta sila sa kaayo sa Dios diha sa ilang paningkamot. Mag-ampo kita sa Ginoo.

6. Alang sa mga minahal natong nangamatay ilabina ang mga kalag nila nga makabaton na unta sila sa hingat ng kabulabanan didto sa Langit. Mag-ampo kita sa Ginoo

Pari: Amahan, pinaagi imong Anak, gipakita mo kanamo ang dalan paingon sa matuod nga kalipay. kanamo Pakig-aban kanunay hiusaha kami diha imong gugma Kini among gipangayo pinaagi ni Cristo among Ginoo ug Manluluwas. Amen.