Dec. 24 Misa sa tungang gabii

PASIUNA

Pasko sa Pagkatawo 

The Nativity of the Lord (CHRISTMAS)-Midnight Mass

Malipayong Pasko mga igsoon ko diha ni Cristo!

Pari: Karon mao ang bulahang gabii sa dakong kasaulogan, ang Solemnidad sa Pagkatawo sa atong Ginoo, ang "Emmanuel" nga sa ato pa, ang Dios nga suod sa iyang katawhan kay siya nakig- uban man kanato.

Diha sa unang pagbasa nga gikuha gikan sa Basahon ni Propeta Isaias, atong madungog nga gitagna niya nga matawo ang usa ka bata nga lalaki ug "nganlan siya'g "Maalamong Magtatambag," "Dios nga Gamhanan," "Walay katapusang Amahan," ug "Prinsipe sa Pakigdait"..."

Diha sa ikaduhang pagbasa nga gikuha gikan sa Sulat ni San Pablo ngadto kang Tito, atong madungog nga ang Dios nagpadayag sa iyang grasya sa kaluwasan sa tanang mga tawo.

Ug diha sa ebanghelyo nga gikuha gikan sa Ebanghelyo sumala ni San Lucas, si Jesus gipakatawo ni Maria sa pasungan ug mitungha ang mga anghel ug dakong panon sa mga langitnong kagahoman nga nagdayeg sa Dios.

Uban sa kasadya, manindog kita ug simbahon ta ang Dios nga nagpakatawo taliwala kanato!

KATILINGBANONG PAG-AMPO 

Pasko sa Pagkatawo 

The Nativity of the Lord (CHRISTMAS)-Midnight Mass

Pari: Mag-ampo kita sa Dios Amahan nga sa iyang dakong ugma, nagpadala sa iyang bugtong Anak aron pagluwas sa kalibutan. Sa matag pangamuyo, kita moingon: DIOS NGA NAGPAKATAWO, LUWASA KAMI.

1. Alang sa Simbahan ilabina ang atong Santo Papa, Francisco, mga kaobispohan, kaparian ug mga relihiyoso, nga mamahimo unta silang instrumento sa pakigdait sa tanang mga tawo. Mag-ampo kita sa Ginoo.

2. Alang sa mga punoan sa panggamhanan, mamahimo unta silang instrumento sa katumanan sa plano sa Dios. Mag-ampo kita sa Ginoo.

3. Alang sa tanang kabataan, ilabina sa mga gisabak ug bago-ong himogso sa kalibutan, nga makasinati unta sila sa tumang pagpangga ug paghigugma sa Dios pinaagi sa ilang mga ginikanan ug mga higala. Mag-ampo kita sa Ginoo.

4. Alang sa mga kabus, hinikawan, masulub-on ug masakiton, masinati unta nila ang presensiya sa Dios nga nagpakatawo pinaagi sa atong pagtabang ug pakig-unong kanila. Mag-ampo kita sa Ginoo,

5. Alang sa mga nagadayeg ug nagapasalamat sa Dios, ilabina nila magmalipayon unta sila diha sa ilang pagpaambit sa grasya sa Dios ngadto sa uban. Mag-ampo kita sa Ginoo.

6. Alang sa mga nangamatay, ilabina sila makaangkon unta sila og kaluwasan nga gidala ni Cristo sa kalibutan. Mag-ampo kita sa Ginoo.

Pari: Dios Amahan, makabig unta ang tibuok kalibutan tungod sa walay sukod nga gugma nga imong gipakita kanamo pinaagi ni Cristo nga among Ginoo. Amen.