LENTEN RECOLLECTION

IKATULONG DOMINGGO SA ADBIYENTO

a. BASAHON I

Is.35:1-6.10

Kinutlo gikan sa basahon ni Propeta Isaias.

Malipay ang kamingawan ug ang mga yuta, ug molukso sa kalipay ang awaaw, ug mamulak daw liryo. Moturok sila ug molabong. Magmalipayon uban sa masadya nga awit; ang himaya sa Libano ihatag kaniya, ang kasanag sa Carmelo ug Saron; makakita sila sa himaya sa Ginoo, ug sa kasanag sa atong Dios.

Panglig-ona ninyo ang mga kamut nga naghuyhuy, tagaig kusog ang mga tuhud nga mahuyang. Ingna ninyo ang mga kolhanon: Paglig-on kamo, ug dili kamo mahadlok; ania ang inyong Dios, moabut Siya dala ang panimalus ug balos. Moanhi gayod ang Dios aron magluwas kaninyo.

Unya mangabuka ang mga mata sa mga buta, ug ang mga dalunggan sa bongol maukab. Unya molukso daw lagsaw ang bakul. Ug maabli ang dila sa mga amang. Ang mga tinubos sa Ginoo mamalik, ug manulod sa Sion nga manag-awit; ug ang kalipay'ng tunhay magpurongpurong sa ilang ulo; makakab-ut sila sa kasadya ug kalipay, ug mokagiw ang kasakit ug ang pagbangotan.

Ang Pulong sa Ginoo.

b. SALMO RESPONSORYO

Salmo 146;6 -7.8-9.9-10

Tubag (R) - Ginoo, dali ug luwasa kami.

Ang Ginoong Dios matinumanon hangtod sa kahangturan, Glampingan Niya ang katarong alang sa mga gidaugdaug, nagahatag Siyag pagkaon sa mga gigutom ang Ginoo naglingkawas sa mga dinakpan. (R)

Ang Ginoo naghatag og kahayag sa mga buta ang Ginoo nagapabangon sa mga nahilukapa. Ang Ginoo nahigugma sa matarong: ang Ginoo nanalipod sa mga langyaw. (R)

Gitabangan Niya ang mga ilo ug balo, apan Iyang gisalikway ang mga dautan; Ang Ginoo magahari hangtod sa kahangturan; ang imong Dios. O Sion, hangtod sa tanang kaliwatan. (R)

c. BASAHON II

Santiago 5:7-10

Kinutlo gikan sa sulat ni Santiago.

Pailob kamo, mga igsoon, hangtod sa pag-abot sa Ginoo. Tan- awa unsa ang pagpailob sa mag-uuma samtang nagpaabot siya sa pag-ani. Mapailubon siyang nagpaabot sa una ug ulahing ting- ulan. Busa kinahanglan nga magpailob usab kamo: Lig-ona ang inyong paglaom kay duol na ang pagbalik sa Ginoo.

Mga igsoon, ayaw kamo pagbagulbolay aron dili kamo silotan sa Dios. Ang Maghuhukom anaa na sa pultahan! Mga igsoon, hinumdomi ninyo ang mga propeta nga nagwali sa ngalan sa Ginoo. Himoa sila nga panig-ingan sa mapailubong pag-antos taliwala sa mga kalisdanan.

Ang Pulong sa Ginoo.

d. EBANGHELYO

Mt. 11:2-11

Ang Santos nga Ebanghelyo sumala ni San Mateo.

Sa pagkadungog ni Juan nga Magbubunyag didto sa prisohan bahin sa mga buhat ni Kristo, gipaadto niya kang Jesus ang pipila sa iyang mga tinun-an. Ug nangutana sila kang Jesus, "Sultihi kami, ikaw ba ang giingon ni Juan nga moanhi, o magpaabot pa ba kamig lain?" Si Jesus mitubag: "Pamauli kamo ug suginli si Juan sa inyong nadungog ug nakita: ang mga buta nakakita, ang mga bakol nakalakaw, ang mga sanlahon naayo, ang mga bungol nakadungog, ang mga minatay nabanhaw, ug ang Maayong Balita gisangyaw ngadto sa mga kabos. Bulahan ang wala magduhaduha kanako!"

Samtang ang mga tinun-an ni Juan namauli, misulti si Jesus ngadto sa mga tawo mahitungod kang Juan: "Sa pag-adto ninyo kang Juan didto sa dapit nga awaaw, unsa may gipaabot ninyo nga makita? Bugang ba nga gipilaypilay sa hangin? Unsay inyong giadto aron tan-awon? Usa ba ka tawo nga luho og pamiste? Ang mga tawo nga nagbiste og sama niini atua magpuyo sa mga palasyo. Sultihi ako, unsa man gayod ang inyong gipaabot nga tan-awon? Propeta ba? Oo, Sultihan ko kamo nakita ninyo ang labaw pa sa usa ka propeta: Kay si Juan mao ang giingon sa Kasulatan: "Ania ang akong sinugo, nagaingon ang Dios, ipadala ko siya una kanimo aron iyang andamon ang Imong pagaagian. Hinumdomi kini! Si Juan nga Magbubunyag labaw kang bisan kinsa nga natawo sukad masukad. Apan siya nga labing ubos sa Gingharian sa langit labaw pa kaniya.

Ang Ebanghelyo sa Ginoo.

e. KOMENTARYO

Tema: Kalipay nga Hilabihan, sa Dios Lamang Hikaplagan!

Ang tawo sakanunay nangandoy nga malipay. Sa atong modernong panahon karon, daghan ang nagkadaiyang imbensyon aron lamang malipay ang mga tawo. Apan ang pangutana, nalipay ba gayud ang tawo? Nahatagan ba og katagbawan ang tinguha sa tawo nga malipay nga gikan pa sa kinahiladman sa iyang kasingkasing?

Niining ikatulong Dominggo sa Adbiyento, atong maklaro kung unsa ang makahatag og katagbawan ug kalipay nga gipangita sa tawo. Tataw kaayo sa atong mga pagbasa karon nga ang kalipay nga hilabihan, sa Dios lamang hikaplagan. Matud pa nga sa pag-abot sa Ginoo kinahanglan nga lig-onon nato ang atong kasingkasing (Santiago 5:8). Kay Siya magwagtang sa atong mga kasubo (Isaias 35:10), sa atong mga balatian pisikal man o espirituwal (Mateo 11:5), ug pulihan kini sa walay katapusang kalipay nga nagagikan ug makaplagan lamang diha sa Dios. Ang kalipay nga atong gipangita, dili makahatag og katagbawan sa atong paglawig dinhi niining kalibutan. Hinonoa, masinati lamang nato ang tinuoray ug hingpit nga kalipay diha sa Ginoo. Si San Agustin miingon, "Ang akong kasingkasing walay kapahulayan hangtod nga kini mopahulay diha sa Ginoo."

Apan ang pangutana, unsa man ang atong angayan nga buhaton aron hikaplagan nato ang kalipay nga hingpit diha sa Dios? Ang pagtuman sa kabubut-on sa Dios maoy angayan natong buhaton sama sa gibuhat ni Kristo. Gihatagan kita niya og panig-ingnan aron atong sundon. Ang pagpuyo sa Pulong sa Dios maoy atong dalan nga pagasundon aron magpuyo kita sa kinabuhing matarong ug magmalipayon dinhi niining kalibutan nga atong gipuy-an. Kini nagkahulugan sa pagsunod sa Iyang mga kasuguan. Una, higugmaon nato ang Dios sa tibuok natong kasingkasing, kalag, hunahuna ug kusog (Markos 12:29-30). Ikaduha, higugmaon nato ang atong isigkatawo sama sa paghigugma nato sa atong kaugalingon (Markos 12:31). Buot ipasabot nga sa kanunay atong sundon ang dalan sa paghigugma nga gitudlo kanato sa atong Ginoong Jesus.

Mga igsoon ko diha kang Kristo, niining atong pagpangandam sa pag-abot sa Dios gihagit kita sa makausa pa sa pagtan-aw sa atong kaugalingon. Nga bisan pa man sa nagkadaiyang haylo ug tanyag nga kalibutanon nga sa atong pagtoo naghatag og kalipay, apan atong hinumduman kanunay nga, ang kalipay nga hilabihan, sa Dios lamang hikaplagan.

Giya alang sa pamalandong:

1. Unsa man ang mga pagpangandam nga akong gibuhat alang sa pag-abot sa Ginoo nga maoy tuburan sa matuod nga kalipay? 

2. Migahin ba ako og panahon sa Ginoo matag adlaw diha sa pag-ampo ug pagsimba matag Dominggo?

3. Ang pagbuot ba sa Ginoo ang akong gituman ang akong kabubut-on maoy akong gipalabi?

f. PANGALIYA

Pangulo: Mga igsoon, ang kaluwasan taliabot na gayud sa atong taliwala. Busa atong ipadangat karon ngadto sa Langitnong Amahan ang atong mga pag-ampo ug panginahanglan, ug panginahanglan sa uban. Sa matag pangaliya, kita moingon: PATALINGHUGI KAMI, O GINOO.

1. Alang sa kinatibuk-ang Simbahan, nga pinaagi sa pag- amping sa Langitnong Amahan, Siya magpabilin nga molahutay sa pagsulay ug sakripisyo nga Iyang mahia- guman diha sa mapadayonong pagsangyaw sa Maayong Balita sa kaluwasan. Mag-ampo kita sa Ginoo.

2. Alang sa mga pangulo sa atong panggamhanan, nga ila untang ilhon ug tahuron ang mga buhat sa Dios Amahan ilabina ang kinaiyahan ug katawhan nga ilang giala- garan. Mag-ampo kita sa Ginoo.

3. Alang niadtong gisakit tungod sa mga katalagman sa kinabuhi, sa mga nag-antus tungod sa mga balatian, nga ang kalumo unta sa gugma sa Dios Amahan mag- dasig kanila sa paglahutay sa pagpanginabuhi dinhi sa kalibutan ug magmaya sila sa pagpaabot sa Manunubos. Mag-ampo kita sa Ginoo.

4. Alang kanatong tanan nga nagkatigom dinhi, nga maam- poon kitang mangandam alang sa kinabuhing dayon pinaagi sa atong paghimo og mga maayong buhat o gawi sa kaugalingon, sa pamilya ug sa katilingban aron ang kahiusa ug kalinaw mopatigbabaw. Mag-ampo kita sa Ginoo.

5. Alang sa... (idugang dinhi ang panginahanglan sa katilingban). Mag-ampo kita.

6. Alang sa tagsatagsa nato ka katuyoan, mag-ampo kita sa hilom.

Pangulo : Patalinghugi ang among mga pag-ampo, Langit- nong Amahan, ug itugot nga kami magpa- dayon sa paghatag og higayon nga makasunod kami sa mga lakang sa Imong Bugtong Anak, si Jesukristo, among Ginoo. Amen.