DAY 8 DEC. 23, 2022

IKAWALO NGA ADLAW SA MISA DE GALLO

PASIUNA

December 23, 2022

Maayong buntag mga igsoon ko diha ni Cristo!

Karon Biyernes sa ika-upat nga Semana sa Adbiyento ug ania na usab kita sa ika-walo nga adlaw sa Misa de Gallo.

Ang unang pagbasa gikuha gikan sa Basahon ni Malaquias. Miingon ang Ginoo nga Labing Gamhanan, "Ipadala ko ang akong sinugo pag-andam sa dalan nga akong again..."

Ang ebanghelyo gikuha gikan sa Ebanghelyo sumala ni San Mateo. Kini nagsaysay sa pagpanganak ni Isabel ngadto sa usa ka bata nga lalaki ug ginganlan niya siya og Juan sumala sa giingon sa Ginoo ngadto kang Zacarias.

Puno sa paglaum, manindog alang sa pagsugod sa Santos nga Eyukaristiya.

BASAHON I

Mal. 3:1-4, 23-24

KINUTLO GIKAN SA BASAHON NI MALAQUIAS

Miingon ang GINOO nga Labing Gamhanan, "Ipadala ko ang akong sinugo pag-andam sa dalan nga akong agian. Unya sa kalit moadto sa iyang Templo ang GINOO nga inyong gipaabot. Ang Sinugo nga inyong gipangandoy moanhi ug magsangyaw sa akong kasabutan."

Apan kinsay molahutay sa adlaw sa pag-abot niya? Kinsa may makaharong inigpadayag na niya? Sama siya sa kalayo nga nagputli sa puthaw, ug sama sa isog nga sabon. Moanhi siya sa paghukom sama sa magputli sa plata. Hinloan niya ang mga pari ingon sa pagputli sa plata ug bulawan. Unya maghalad sila sa GINOO sa husto nga matang sa mga halad. Unya ang mga halad nga dad-on sa katawhan sa Juda ug sa Jerusalem ngadto sa GINOO makapahimuot na kaniya sama kaniadto.

Ania ipadala ko kaninyo si Elias, ang propeta. Anus-a pa moabot ang adlaw sa Ginoo, ang dako ug makalilisang nga adlaw, aron pagkabig sa mga kasing- kasing sa mga amahan ngadto sa ilang mga anak, ug sa kasingkasing sa mga anak ngadto sa mga ginikanan. Tingali unya moabot ako ug mohampak og kamatayon sa yuta.

ANG PULONG SA GINOO.

SALMO RESPONSORYO

Ps. 25:4-5, 8-9, 10, 14

R. Ihangad ang inyong mga ulo ug tan-aw; kay ang inyong kaluwasan haduol na.

Ipakita kanako, O Ginoo, ang imong

mga paagi ug tudloi ako sa imong mga agianan. Agaka ako diha sa imong kamatuoran ug tudloi ako, kay ikaw ang Dios nga akong manluluwas.

R. Ihangad ang inyong mga ulo ug tan-aw; kay ang inyong kaluwasan haduol na.

Maayo ug matarong ang Ginoo; sa ingon niini nagapakita siya ngadto sa makasasala sa agianan. Nagatultol siya sa mapaubsanon ngadto sa katarong. nagatudlo siya sa mapaubsanon sa iyang agianan.

R. Ihangad ang inyong mga ulo ug tan-aw; kay ang inyong kaluwasan haduol na.

Ang tanang mga dalan sa Ginoo maayo ug makanunayon, alang kanila nga nagabantay sa iyang kasabutan ug sa iyang kasugoan.

Makighigala ang Ginoo kanila nga mahadlokon kaniya, ug ang iyang kasabutan, aron pagtudlo kanila.

R. Ihangad ang inyong mga ulo ug tan-aw; kay ang inyong kaluwasan haduol na.

EBANGHELYO

Lk. 1: 57-66

Kinutlo gikan sa Ebanghelyo sumala ni San Mateo

Ug miabot ang panahon sa pagpanganak ni Isabel; ug nanganak siya og bata nga lalaki. Nakadungog ang iyang mga silingan ug mga kabanayan nga nagpakita ang Ginoo sa iyang dako nga kaluoy ngadto kaniya, ug miduyog sila sa iyang kalipay.

Ug sa ikawalo ka adlaw miabot sila aron pagtuli sa bata. Ug paganganlan unta nila siya sa ngalan sa iyang amahan nga si Zacarias, apan mitubag ang iyang inahan sa pag- ingon, "Ayaw, hinunoa paganganlan siya og Juan." 

Miingon sila kaniya, "Wala kay kabanay nga gitawag niining ngalana!" Ug gisinyasan nila ang iyang amahan unsay iyang buot nga ingalan kaniya.

Unya nangayo siya og masulatan, ug misulat siya, "Juan ang iyang  ngalan." Ug nahibulong silang tanan. Dihadiha nabuka ang iyang baba ug nakalitok siya pag-usab ug misulti siya nga nagdayeg sa Dios.

Ug nahitabo nga adunay kahadlok diha sa tanan nilang mga silingan, ug sa tibuok kabungtoran sa Judea gihisgothisgotan kining tanan nga mga panghitabo. Kini gikulit sa panumdoman niadtong tanan nga nakadungog, ug sila miingon, "Maunsa man kaha kining bataa?" Kay ang kamot sa Ginoo diha man uban kaniya.

Ang Ebanghelyo sa Ginoo.

KATILINGBANONG PAG-AMPO

December 23, 2022

Pari: Si Zacarias mitawag sa iyang anak, "Juan", nga nangahulugan ang Dios mabination. Masaligon diha sa pagkamabination sa Ginoo, mag-ampo kita sa pag-ingon: GINOO, HIUSAHA KAMI SA IMONG GUGMA.

1. Nga ang mga lideres sa Simbahan ilabina si Santo Papa Francisco, mga Obispo, mga Pari ug mga relihiyoso, hatagan unta sa Dios ug masaligon ug mabinationg kasingkasing diha sa ilang pagpadayag sa pulong sa Ginoo sa tanang katawhan. Mag-ampo kita sa Ginoo.

2. Nga ang panggamhanan, mamahimong mabination sa katawhan nga ilang gialagaran pinaagi sa ilang mahigugmaon ug malahutayon nga pagpangalagad. Mag-ampo kita sa Ginoo.

3. Nga kadtong mga gihikawan og hustisya ug mga dinaog-daog, makabaton unta og kalinaw pinaagi sa paglaum nila sa Ginoo. Mag-ampo kita sa Ginoo.

4. Nga ang mga tigulang, nagmasakiton ug himalatyon, makabaton unta og kaayohan diha sa pagtawag nila sa Ginoo. Mag-ampo kita sa Ginoo.

5. Nga ang mga nagadayeg ug nagapasalamat sa Dios, ilabina nila makadawat unta sila sa grasya nga ilang gipangandoy diha sa ilang pagpaambit sa grasya sa Dios ngadto sa mga nanginahanglan. Mag-ampo kita sa Ginoo.

6. Nga ang tanang nangamatay ilabina sila, mahiusa na unta ngadto sa Ginoo. Mag-ampo kita sa Ginoo.

Pari: Ginoong Dios, hinaut pa unta nga ang kinabuhi ni Juan Magbubunyag modasig kanamo ngadto sa dakong kasantosan. Pun-a kami sa iyang espiritu diha sa imong katawhan. Kini among gipangayo pinaagi ni Cristo among Ginoo. Amen.