DAY 2 DEC. 17, 2022 SATURDAY

IKADUHANG ADLAW SA MISA DE GALLO

PASIUNA

December 17, 2022

Maayong buntag mga igsoon ko diha ni Cristo!

Karon Sabado sa Ikatulong Semana sa Adbiyento ug ania na kita sa Ikaduhang adlaw sa Misa de Gallo sa atong malaumong pagtukaw agi'g pagpangandam sa pag-abot sa atong Manunubos.

Ang unang pagbasa gikuha gikan sa Basahon sa Genesis. Kini naghisgot sa pagtawag ni Jacob sa iyang mga anak sa pag- ingon, "Ngari ug pamati kamo mga anak ni Jacob; pamati-a ninyo ang inyong amahan nga si Jacob..."

Ang ebanghelyo gikuha gikan sa Ebanghelyo sumala ni Mateo. Kini nagpahinumdom kanato nga si Cristo, tawo sama kanato sa tanang butang gawas sa sala.

Manindog kita alang sa pagsugod sa

Santos nga Eyukaristiya.

BASAHON I

Gn. 49:2, 8-10

KINUTLO GIKAN SA BASAHON SA GENESIS

"Ngari ug pamati kamo, mga anak ni Jacob; pamatia ninyo ang inyong amahan nga si Jacob.

"Juda, daygon ka sa imong mga igsuon.

Tuk-on mo ang imong mga kaaway; sa imong atubangan moluhod ang imong mga igsuon.

Si Juda itoy sa liyon; patyon niya ang iyang tukbonon, ug unya mopauli sa iyang tagoanan.

Si Juda sama sa liyon: manghuyatid ug unya mohigda, ug walay makapangahas pagsamok kaniya.

Nagkupot siya sa harianong setro, ug sipitan niya kini sa iyang mga tiil; huptan niya ang iyang gahom hangtod moabot ang tinuod nga tag-iya niini, aron maghari sa tanang katawhan."

ANG PULONG SA GINOO.

SALMO RESPONSORYO

Ps. 72:3-4, 7-8, 17

R. Ang katarong molambo sa iyang panahon, ug ang hingpit nga kalinaw hangtod sa kahangturan.

O Dios, togahi sa imong panghukom ang Hari; ug sa imong katarong, ang anak sa hari.

Magmando siya sa imong katawhan uban sa katarong ug sa imong mga nag-antus nga anak uban sa panghukom.

R. Ang katarong molambo sa iyang panahon, ug ang hingpit nga kalinaw hangtod sa kahangturan.

Ang kabukiran maghatag og kalinaw alang sa lungsod ug ang kabungtoran maghatag sa katarong. Panalipdan niya ang nag-antus diha sa katawhan, luwason niya ang mga anak sa kabus.

R. Ang katarong molambo sa iyang panahon, ug ang hingpit nga kalinaw hangtod sa kahangturan.

Ang katarong mamulak sa iyang mga adlaw, ang halawon nga kalinaw, hangtod wala nay buwan.

Maghari unta siya gikan sa dagat ngadto sa kadagatan, ug gikan sa Suba hangtod sa kinatumyan sa yuta.

R. Ang katarong molambo sa iyang panahon, ug ang hingpit nga kalinaw hangtod sa kahangturan.

Daygon unta ang iyang ngalan hangtod sa kahangturan; molungtad ang iyang ngalan sama sa adlaw.

Diha kaniya mapanalanginan ang tanang mga kaliwat sa yuta; ang tanang mga nasod magsangyaw sa iyang kabulahanan.

R. Ang katarong molambo sa iyang panahon, ug ang hingpit nga kalinaw hangtod sa kahangturan.

EBANGHELYO

Mt. 1: 1-17 

Kinutlo gikan sa Ebang- helyo sumala ni San Mateo

Ang talaan sa kagikan Ani Jesucristo, kaliwat ni David, nga kaliwat ni Abraham.

Si Abraham mao ang amahan ni Isaac; si Isaac amahan ni Jacob; ug si Jacob amahan ni Juda ug sa iyang mga igsuon. Si Juda mao ang amahan ni Fares ug ni Sara diha kang Tamar; ug si Fares ang amahan ni Esrom; ug si Esrom amahan ni Aram. 

Si Aram mao ang amahan ni Aminadab; si Aminadab ang amahan ni Naazon; si Naazon ang amahan ni Salmon; si Salmon mao ang amahan ni Booz kang Rahab; ug si Booz ang amahan ni Obed kang Rut; si Obed amahan ni Isai; ug si Obed ang amahan ni Isai. Si Isai mao ang amahan ni David, ang hari.

Ug si David ang amahan ni Solomon sa asawa Urias. Si Salomon ni mao ang amahan ni Roboam; ug si Roboam ang amahan ni Abias; ug si Abias ang amahan ni Asa. Si Asa mao ang amahan ni Josafat; ug si Josafat ang amahan ni Joram; ug si Joram amahan ni Uzias. Si Uzias mao ang amahan ni Jotam; ug si Jotam ang amahan ni Acaz; ug si Acas ang amahan ni Ezequias. Si Ezequias mao ang amahan ni Manases; ug si Manases ang amahan ni Amon; ug si Amon ang amahan ni Josias. Si Josias mao ang amahan ni Jeconias ug sa iyang mga igsuon sa panahon pagkabihag didto Babilonia.

Ug human sa pagkabihag didto sa Babilonia: si Jeconias mao ang amahan ni Salatiel; ug si Salatiel ang amahan ni Zorobabel. Si Zorobabel mao ang amahan ni Abiud; ug si Abuid ang amahan ni Eliaquim; ug si Eliaquim ang amahan ni Azor. Si Azor mao ang amahan ni Sadoc; ug si Sadoc ang amahan ni Aquim; ug si Aquim ang amahan ni Eliud. Si Eliud mao ang amahan ni Eleazar; ug si Eleazar ang amahan ni Matan; ug si Matan ang amahan ni Jacob. Si Jacob mao ang amahan ni Jose, ang bana ni Maria nga inahan ni Jesus, ang gitawag nga Cristo.

Busa, gikan kang Abraham hangtud kang David adunay napulog-upat ka mga kaliwatan; ug gikan kang David hangtud sa pagkabihag didto sa Babilonia napulog-upat ka adunay mga kaliwatan; ug gikan sa pagkabihag didto sa Babilonia hangtud kang Cristo adunay napulong- upat ka mga kaliwatan.

Ang Ebanghelyo sa Ginoo.

KATILINGBANONG PAG-AMPO

December 17, 2022

Pari: Mga igsuon, modangop kita sa Langitnong Amahan alang sa atong mga panginahanglan ug mga pangaliyupo kay siya man ang tuburan sa grasya ug kaluoy. Sa matag pangamuyo, moingon kita:

GINOO, DUNGGA KAMI.

1. Alang sa Santos nga Simbahan, pinanguluhan sa atong Santo Papa Francisco, mga Obispo ug mga Pari, makaangkon unta sa kadasig sa pagsangyaw sa gugma ug kaluoy ni Cristo diha sa pagproklamar sa kamatuoran ug hustisya. Mag-ampo kita sa Ginoo.

2. Alang sa atong nasud nga Pilipinhon, ilabina sa mga nangulo niini ug gitahasan sa maong panggamhanan, kaloy-an ug bendisyonan sa Dios diha sa ilang mga paningkamot sa pagpatigbabaw sa kaangayan ug mga buhat sa kalambuan sa kinabag-ang pundok sa katawhan. Mag-ampo kita sa Ginoo.

3. Alang sa mga biktima sa inhustisya, kalamidad, ug sa mga tawong adunay nagkalain-laing balatian, makabaton unta sila og paglaum nga modangop ug mosilong sa landong sa kaluoy ug gugma sa Langitnong Amahan. Mag-ampo kita sa Ginoo.

4. Nga ang mga nagadayeg ug nagapasalamat sa Ginoo ilabina sila _____________ molambo unta diha sa pagkamapaubsanon sa grasya sa Ginoo. Mag-ampo kita sa Ginoo.

5. Alang sa atong mga kaigsuonang mihalin na sa laing kinabuhi ilabina nila ________________nga ang labing Mapasayluong Dios modawat unta kanila sa iyang Gingharian nga gisaad kanatong tanan. Mag-ampo kita sa Ginoo.

Pari: Amahan, mao kini ang mga pag-ampo sa imong katawhan nga naningkamot nga makasunod sa pagdapit sa imong Anak, kinsa nagapuyo ug nagahari hangtod sa kahangturan. Amen.