DAY 1 DEC. 16, 2022 FRIDAY

UNANG ADLAW SA MISA DE GALLO

PASIUNA

December 16, 2022

Maayong buntag mga igsoon ko diha ni Cristo!

Karon Biyernes sa Ikatulong Semana sa Adbiyento ug karong adlawa usab mao ang unang adlaw sa sa Misa de Gallo sa atong pagtukaw agi'g pagpangandam sa pag-abot sa atong Manunubos..

Ang unang pagbasa gikuha gikan sa Basahon ni Propeta Isaias. Ang Ginoo nagmando sa iyang katawhan sa pag-ingon "Sunda ang hustisya ug buhata ang matarong kay sa dili madugay luwason ko na kamo."

Ang ebanghelyo gikuha gikan sa Ebanghelyo sumala ni San Juan. Si Jesus nagpahinumdom sa katawhan nga ang iyang misyon naggikan gayod sa Dios Amahan.

Puno sa tumang kalipay, manindog kita alang sa pagsugod sa Santos nga Eyukaristiya.

BASAHON I

Is. 56:1-3, 6-8

KINUTLO GIKAN SA BASAHON NI PROPETA ISAIAS

Nag-ingon ang GINOO sa iyang katawhan, "Sunda ang hustisya ug buhata ang matarong, kay sa dili madugay luwason ko na kamo, ug ipaila ko ang akong katarong.

Bulahan ang tawo nga magbuhat niini sa kanunay, ug magtamod sa Adlawng Igpapahulay ug dili gayod magpasipala niini, ug dili usab magbuhat og dautan."

Ayaw tugoti ang langyaw nga nagsimba sa GINOO sa pag-ingon, "Hinginlan ako sa GINOO gikan sa iyang katawhan"; ug ayaw usab itugot nga moingon ang yunoko, "Sama ako sa patayng kahoy."

"Ang mga langyaw nga miduol sa GINOO aron pag-alagad kaniya ug nagtamod sa Adlawng Igpapahulay ug sa iyang mga sugo panad-on ko sa balaan kong bukid, ug lipayon ko sila didto sa akong Templo.

Ang ilang mga halad-sinunog ug mga halad-inihaw dawaton ko didto sa akong halaran; kay ang akong Templo nganlan mag balay-alampoanan alang sa tanang katawhan." Ang GINOONG DIOS, nga nagtigom sa mga nagkatibulaag nga Israelita miingon, "Aduna pay uban nga akong tigumon, walay labot niadtong natigom na."

ANG PULONG SA GINOO.

SALMO RESPONSORYO

Pr. 67:2-3, 5, 7-8

R. O Dios, magdayeg unta kanimo ang tanang mga nasod.

Kaloy-an unta kita sa Dios ug bendisyonan kita; ipadan-ag unta kanato ang iyang nawong. Mahibaw-an unta ang iyang dalan dinhi sa yuta; ug diha sa tanang mga nasod, ang imong kaluwasan. 

R. O Dios, magdayeg unta kanimo ang tanang mga nasod. 

Maglipay unta ang mga nasod ug magsadya, kay nagamando ka sa kanasuran diha sa katarong; Imong agakon ang mga nasod dinhi sa yuta.

R. O Dios, magdayeg unta kanimo ang tanang mga nasod.

Daygon unta ikaw sa katawhan, O Dios, ang tanang kalungsoran magdayeg unta kanimo.

Bendisyonan unta kita sa Dios ug ang tanang kautlanan sa yuta mahadlok unta kaniya.

R. O Dios, magdayeg unta kanimo tanang mga nasod.

EBANGHELYO

Jn. 5: 33-36

Kinutlo gikan sa Ebang- helyo sumala ni San Juan

Miingon si Jesus sa mga Judio, "Gipa- adtoan ninyo si Juan, ug gisaksihan niya ang kamatuoran. Apan wala ako magkinahanglan og pagsaksi gikan sa tawo, giingon ko lamang kini aron maluwas kamo. Siya ang suga nga nagsiga ug nagdan-ag, sa mubo nga panahon nalipay kamo sa iyang kahayag.

Apan aduna akoy saksi nga labaw pa kang Juan kay ang mga buhat nga gihatag kanako sa Amahan aron akong buhaton, kining mga buhat nga akong gihimo mao ang nagsaksi mahitungod kanako, nga gipadala ako sa Amahan".

Ang Ebanghelyo sa Ginoo.

KATILINGBANONG PAG-AMPO

December 16, 2022

Pari: Sa atong pagpangandam sa Pasko sa Pagkatawo sa atong Manunubos, mag-ampo kita sa Dios nga lig-onon kita niya sa grasya ug nga magpabilin kita diha sa pagsalig sa lyang kamang-gihatagon. Sa matag pag-ampo, ang atong tubag: GINOO, PAMATI-A ANG AMONG PAG-AMPO.

1. Nga ang Simbahan, pinanguluhan sa atong Santo Papa Francisco, mga Obispo ug mga Pari, makabaton unta sa grasya nga ilang gikinahanglan diha sa pag-agak sa tanang magtutuo ngadto sa kahiusahan sa usa ka katilingban nga nagpanaw paingon nianang dakong adlaw sa katubsanan. Mag-ampo kita sa Ginoo.

2. Nga ang mga pangulo sa nasyonal ug lokal nga panggamhanan mamahimong suga nga mobarog alang sa kaangayan ug kalinaw nga maoy diwa sa Gingharian sa Amahan. Mag-ampo kita.

3. Nga ang tanang mga nag-antos, mga tigulang, ug mga sinalikway. hupayon unta sa Ginoo ang ilang mga kasakitan sa kinabuhi. Mag-ampo kita sa Ginoo.

4. Nga kitang tanan nga nagkatigom karon, hatagan unta sa Ginoo sa grasya sa kadaig sa pagdawat sa hagit sa Ebanghelyo. Mag-ampo kita sa Ginoo.

5. Nga ang mga kabatan-onan, bendisyonan unta sa Ginoo diha sa ilang pag-alagad sa ilang isigkatawo ug mamahimong instrument sa pagpakaylap sa Maayong Balita. Mag-ampo kita sa Ginoo. 

6. Nga ang mga nagadayeg ug nagapasalamat sa Ginoo ilabina nila magpabiling masaligon sa grasya sa Ginoo. Mag-ampo kita sa Ginoo.

7. Nga ang mga magtutuong mihalin na, ilabina sila makadawat na sa himaya nga gisaad sa Dios alang kanila nga nagmasinugtanon sa iyang kabubut-on. Mag-ampo kita sa Ginoo.

Pari: Tun-i kami, mahigugmaong Amahan, sa dalan sa pagkamatarong. Ubani kami sa kanunay ug hingpita ang among paghalad sa among kinabuhi alang sa katumanan sa imong Gingharian nganhi kanamo, pinaagi ni Cristo among Ginoo. Amen.