DAY 5 DEC. 20 TUESDAY

IKALIMA NGA ADLAW SA MISA DE GALLO

PASIUNA

December 20, 2022

Maayong buntag mga igsoon ko diha ni Cristo!

Karon Martes sa ika-upat nga Semana sa Adbiyento ug ika- lima nga adlaw sa Misa de Gallo.

Ang unang pagbasa gikuha gikan sa Basahon ni Propeta Isaias. Dinhi atong madungog ang pagpahinumdom ni Propeta Isaias ngadto kang Acas nga ang Dios maghatag og timaan sa atong kaluwasan.

Ang ebanghelyo gikuha gikan sa Ebanghelyo sumala ni Lucas. Dinhi atong madungog ang pagpakita ni Maria og mapaubsanong kinaiya ngadto sa Dios pinaagi sa pag-ingon, "Ania ang ulipon sa Ginoo, matuman unta dinhi kanako sumala sa imong pulong."

Puno sa pagtuo, manindog kita alang sa pagsugod sa Santos nga Eyukaristiya.

BASAHON I

Is. 7:10-14

KINUTLO GIKAN SA BASAHON NI PROPETA ISAIAS

Misulti pag-usab ang GINOO kang Acas, "Pangayog milagro sa imong GINOONG Dios, bisag kini adto sa kinahiladman sa Seol, o sa kinatumyan sa langit."

Apan miingon si Acas, "Dili ako ma- ngayo, ug dili ko sulayan ang GINOO."

Ug miingon si Isaias, "Busa pamati, O banay ni David! Dili pa ba igo ang imong pagsamok sa mga tawo, nga imo na man usab nga samukon ang Dios? Busa ang GINOO gayod mohatag ka- nimog timaan, ug kini mao nga usa ka batan-ong dalaga manamkon ug moanak og usa ka lalaki, ug nganlan niya siyag Emmanuel.

ANG PULONG SA GINOO.

SALMO RESPONSORYO

Ps. 24:1-2, 3-4, 5-6

R. Pasudla ang Ginoo, kay siya ang hari sa himaya.

Iya sa Ginoo ang yuta ug ang kapuno niini; ang kalibutan ug sila nga nagpuyo niini. 

Kay iya kining gitukod ibabaw sa kadagatan ug gilig-on kini ibabaw sa kasapaan. 

R. Pasudla ang Ginoo, kay siya ang hari sa himaya.

Kinsay makatungas sa bukid sa Ginoo? O kinsay makabarog sa iyang

balaan nga dapit? Siya kansang mga kamut walay mga sala kansang kasingkasing malinis, siya nga wala magtinguha sa walay hinungdan.

R. Pasudla ang Ginoo, kay siya ang hari sa himaya.

Makadawat siya og panalangin gikan sa Ginoo; usa ka ganti gikan sa Dios nga iyang manunubos.

Sama niini ang kaliwat nga nangita kaniya, nga nangita sa nawong sa Dios ni Jacob.

R. Pasudla ang Ginoo, kay siya ang hari sa himaya.

EBANGHELYO

Lk. 1: 26-38

Kinutlo gikan sa Ebanghelyo sumala ni San Mateo 

Sa a ikaunom ka bulan, gipadala si Anghel Gabriel gikan sa Dios ngadto sa usa ka lungsod sa Galilea nga ginganlan og Nazaret ngadto sa usa ka ulay nga sinayoran sa usa lalaki nga ginganlan og Jose, gikan sa balay ni David; ug ang ngalan sa ulay, Maria.

Ug sa iyang pag-adto kaniya miingon siya, "Pagmaya puno ka sa grasya. Ang Ginoo anaa kanimo." Apan, tungod niining pulonga, nabalaka siya pag-ayo ug gihunahuna niya kon unsang matanga kini sa pangumusta.

Ug miingon ang anghel kaniya, "Ayaw na kahadlok Maria kay gikahimut-an ka sa Dios. Ug tan-awa, manamkon ka sa imong sabakan ug matawo kanimo ang anak nga lalaki ug paganganlan mo siya og Jesus.

Kini siya mamahimo nga bantogan ug pagatawgon nga anak sa Labing Halangdon ug ihatag kaniya sa Ginoong Dios ang trono ni David nga iyang amahan. Ug magahari siya sa balay ni Jacob hangtod sa kahangturan ug ang iyang gingharian walay katapusan."

Ug miingon si Maria ngadto sa anghel, "Unsaon man pagkahibalo niini nga wala pa gani ako makig-ipon sa akong sinayoran?" 

Mitubag ang anghel ug miingon kaniya, "Ang Espiritu Santo mokunsad diha kanimo ug ang gahom sa Kahitas-an molandong kanimo. Ug tungod niini, ang balaan nga bata nga matawo pagatawgon nga Anak sa Dios. Ug tan-awa ra god, si Isabel nga imong ig-agaw siya usab nanamkon og batang lalaki diha sa iyang pagkatigulang; ug kini unom na ka bulan diha kaniya nga gitawag nga landay. Kay walay butang nga dili mahimo sa Dios."

Ug miingon si Maria, "Ania ang ulipon sa Ginoo, matuman unta dinhi kanako sumala sa imong pulong." Ug mibiya kaniya ang anghel.

Ang Ebanghelyo sa Ginoo.

KATILINGBANONG PAG-AMPO

December 20, 2022

Pari: Mga igsuon, mag-ampo kita karon sa Amahan nga naghatag kang Birhen Maria og malipayon nga kasingkasing ug mapaubsanong midawat sa iyang misyon nga mamahimong Inahan sa Dios. Sa matag pag-ampo, kita moingon:

GINOO, PAMATI-A ANG IMONG KATAWHAN.

1. Alang sa Simbahan ilabina ang atong Santo Papa Francisco, mga Obispo ug mga Pari, nga niining panahon sa Adbiyento, hatagan unta sila sa Dios og mapadayonon ug madasigon nga kasingkasing sa pagsangyaw sa mensahe sa kaluwasan nga ang Ginoo nagpakatawo alang kanatong mga makasasala. Mag-ampo kita sa Ginoo.

2. Alang sa atong mga opisyales sa panggamhanan nga unta giniyahan sa Espiritu Santo, mopanday sila og mga balaod nga nahasubay sa hustisya ug kaayohan sa tanan. Mag-ampo kita.

3. Alang sa mga tigulang, masakiton ug himalatyon, niining panahon sa Adbiyento, makadawat unta sila og kahupayan, kalipay ug gugma sa Dios pinaagi sa mga nag-amoma kanila. Mag-ampo kita sa Ginoo.

4. Alang sa atong mga igsuon nga anaa karon sa tumang kalisud ug kadtong walay makaon, makaangkon unta sila og grasya ug makakita sa kamot sa Ginoo pinaagi sa mga tawo nga mangghitagon kanila

5. Alang sa mga nagadayeg ug nagapasalamat sa Ginoo ilabina sila ______ panalanginan unta sila sa Dios og malipayon ug madasigong kasingkasing sa pagtubag sa tawag nga mao ang pagtabang sa mga nanginahanglan. Mag-ampo kita sa Ginoo.

6. Alang sa mga igsuon nato nga mihalin na sa laing kalibutan, ilabina nila ________ pasayloon na unta ang ilang mga sala ug makaangkon na unta sila og kinabuhing walay katapusan uban sa atong Ginoo. Mag- ampo kita sa Ginoo.

Pari: Dios sa gugma, pamati-a ang imong katawhan. Itugot nga sa among pagtukaw sa pagpaabot sa pag-anhi sa imong Anak, makaplagan unta niya ang among kasingkasing nga puno sa gugma ug kalipay. Kini among gipangayo pinaagi ni Cristo among Ginoo. Amen.