Kasaulogan sa Pulong

UNANG DOMINGGO SA ADBIYENTO

a. BASAHON I

Isaias 2:1-5

Kinutlo gikan sa basahon ni Propeta Isaias.

Mao kini ang nakita ni Isaias, anak ni Amos, bahin sa Juda ug Jerusalem.

Sa kaulahiang mga adlaw, ang bukid sa balay sa Ginoo mahimo nga kinatumyan sa kabukiran, ug mabayaw labaw sa kabungturan. Maganayan ngadto niini ang tanang mga nasud, ug mangadto ang daghang kalungsuran ug moingon: "Dali, manungas kita ngadto sa balay sa Dios ni Jacob; aron magtudlo siya kanato sa iyang mga dalan, ug manglakaw kita diha sa iyang mga agianan." Kay gikan sa Sion mogula ang balaod, ug ang pulong sa Ginoo gikan sa Jerusalem. Ug magahukum siya sa mga nasud, ug magpahamtang sa iyang kabubut-on sa daghang mga lungsod. Ilang tunawon ang ilang mga hinagiban ngadto sa pagkapunta sa daro, ug ang ilang mga bangkaw ngadto sa pagkagalab. Walay mobakyaw nga nasud batok nasud sa hinagiban, ni magbansay pa sila alang sa gubat. O balay ni Jacob, umari kamo, manglakat kita diha sa kahayag sa Ginoo.

Ang pulong sa Ginoo.

b. SALMO RESPONSORYO

Salmo 122:1-2.3-4.4-5.6-7.8-9

Tubag (R) Nalipay ako nga giingnan ako nila; Mangadto na kita sa balay sa Ginoo.

Nalipay ako kay giingnan ako nila, "Mangadto na kita sa balay sa Ginoo." Ug karon nagabarog na kami sa tugkaran sa imong mga ganghaan, O Jerusalem. (R)

Jerusalem, nga gitukod ingog usa ka siyudad, nga gipundok sa kahiusa. Ngadto kaniya nanungas ang mga tribo, ang mga tribo sa Ginoo. (R)

Sumala sa kasuguan alang sa Israel, aron pagpasalamat sa ngalan sa Ginoo. Diha kaniya gipabarog ang mga lingkoranan sa hukmanan, ang mga lingkoranan alang sa balay ni David. (R)

Pag-ampo kamo alang sa kalinaw sa Jerusalem. Molampus unta sila nga nahigugma kanimo. Maghari unta ang kalinaw sulod sa imong mga paril ang kauswagan diha sa imong kabalayan. (R)

Tungod sa akong mga kadugo ug mga higala moingon ako "Ang kalinaw maanaa kaninyo". Tungod sa balay sa Ginoo, atong Dios. mag-ampo ako alang sa imong kaayohan. (R)

c. BASAHON II

Roma 13:11-14

Kinutlo gikan sa sulat ni San Pablo ngadto sa taga Roma.

Nasayod kamo unsa nang panahona karon. Mao na kini ang oras nga angay kamong magmata. Kay mas duol na karon ang atong kaluwasan kay sa pagsugod ta sa pagtuo. Hapit na matapos ang kagabhion ug duol na ang kabuntagon. Busa isalikway ta ang mga buhat nga iya sa kangitngit ug isul-ob ta ang armadura sa pagkasundalo nga iya sa kahayag. Magbinuotan kita sa atong pagkinabuhi ingon nga mga tawo nga anaa sa kahayag dili sa hilabihang paghudyaka ug paghubog-hubog, ni sa pakighilawas o sa kalaw-ayan, ni sa pagpakig-away o sa pagkamasinahon. Hinonoa, isul-ob ang Ginoong Jesukristo ug ayaw kamo padaog sa inyong lawasnong kaibog.

Ang Pulong sa Ginoo.

d. EBANGHELYO

Mt. 24:37-44

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Ang pag-abot sa Anak sa Tawo mahisama sa nahitabo sa panahon ni Noe. Ingon sa mga adlaw sa wala pa ang Lunop, ang mga tawo nagpadayon pagpangaon ug pagpanginom, ug ang mga lalaki ug ang mga babaye nagminyoay, hangtod gayod sa adlaw nga misulod si Noe sa arka; apan wala sila masayod sa nahitabo hangtod nga ang Lunop miabot ug mibanlas kanilang tanan. Ingon unya niini ang mahitabo inig-abot sa Anak sa Tawo. Niadtong panahona may duha ka tawo nga magtrabaho didto sa uma: ang usa kuhaon, ug ang usa ibilin. May duha ka babaye nga maggaling og pagkaon: ang usa kuhaon, ug ang usa ibilin. Busa pagbantay kamo, kay wala kamo masayod kon unsang adlawa moanhi ang Ginoo. Hinumdomi kini! Kon ang agalon sa panimalay nasayod pa sa takna nga iabot sa kawatan, magatukaw gayod siya ug dili motugot nga ang kawatan molungkab sa balay. Busa kamo usab kinahanglan mag-andam kanunay, kay ang Anak sa Tawo moabot sa takna nga wala kamo magpaabot Kaniya."

Ang Ebanghelyo sa Ginoo.

e. KOMENTARYO

Tema: Hunong! Tan-aw! Paminaw!

Karong adlawa atong gisaulog ang unang Dominggo sa Adbiyento. Apan unsa man ang kahulogan sa pulong adbiyento? Kini gikan sa Latin nga pinulongan "adventus" nga ang buot ipasabot "pagpaabot". Kita nagpaabot sa pagkatawo sa atong Ginoong Jesukristo. Apan ang pangutana, andam na ba kita sa iyang pag-abot? Unsa man ang atong gibuhat agi og pagpangandam alang sa iyang pag-abot?

Adunay tulo ka mga punto nga makatabang kanato diha sa atong pagpangandam niining panahon sa Adbiyento.

Una, kini mao ang paghunong! Ang panahon sa Adbiyento usa sa pinakanindot nga panahon sa pagbalik-lantaw sa atong kaugalingon kung kumusta na ang atong relasyon sa Ginoo. Mohunong kita ug nindot nga atong pamalandongan kung ang kinabuhi nga atong gipuy-an nahisubay ba sa kabubut- on sa Ginoo. Ang atong Santos nga Ebanghelyo nagpahinumdom kanato sa pag-andam sa atong kaugalingon tungod kay ang takna sa pag-abot sa Dios dili gayod nato mahibaloan. Busa, kinahanglan nga mohunong na kita sa atong mga walay pulos nga bisyo nga wala nahisukad sa kabubut-on sa Dios. Si San Pablo nagpahimangno kanato sa atong ikaduhang pagbasa pinaagi sa pag-ingon, "Busa isalikway nato ang mga buhat nga iya sa kangitngit ug isul-ob nato ang panalipod nga iya sa kahayag." (Roma 13:12) Aron maandam kita sa pag-abot sa kahayag nga mao si Kristo, atong hinulsolan ang atong mga kasaypanan ug mohunong na kita sa pagpakasala.

Ikaduha, kini mao ang pagtan-aw! Diha sa atong paghunong, atong tan-awon ang atong kinabuhi. Asa man kita karon ug asa kita paingon? Sa laing bahin, ang paghunong sa pagbuhat og dautan dili igo aron mahingpit ang atong pagpaabot sa Ginoo. Isip mga binunyagan, kita adunay tulubagon sa matag usa; dili lamang sa miyembro sa atong simbahan apan lakip na usab kadtong mga igsoon nato sa laing relihiyon. Kita gitawag sa pagtan-aw sa mga panginahanglan sa atong isigkatawo ilabi na sa atong mga igsoong nag-antus sa kawad-on sa kinabuhi ug ingon man usab niadtong mga biktima sa nagkalain-laing matang sa inhustisya ug kalamidad. Hinaut unta nga diha sa atong pagtan-aw sa nagkalisod nato nga mga kaigsoonan, kita madasig sa pagtahan sa atong kaugalingon sa pagpangalagad sa Dios pinaagi sa pagtubag sa ilang panginahanglan sa atong simple ug yano nga pamaagi.

Ikatulo, kini mao ang pagpaminaw! Ang pagpaminaw dili sayon, labi na niining panahon nato karon. Lisod ang pagpaminaw sa uban, pagpaminaw sa atong kaugalingon ug labaw sa tanan ang pagpaminaw sa Pulong sa Dios. Kung atong balikan ang kasinatian sa mga Israelita, sila nagdumili sa pagpaminaw sa mga Propeta nga gipadala sa Dios kanila. Mao usab kini ang nahitabo kang Jesus, daghan usab ang wala naminaw kaniya. Busa aron kita mahimong andam sa pag-abot sa atong Ginoo, gikinahanglan gayod ang makanunayon nga pagpaminaw kaniya tungod kay Siya mismo mao ang Pulong. Si Bishop Julius Tonel, D.D. nagkanayon: "Ang sukaranan sa sala anaa sa pagdumili sa pagpaminaw sa Pulong sa Ginoo..."

Ang hagit kanatong tanan karon, aron mamahimong malipayon, mabungahon ug makahuluganon ang atong pagpaabot sa atong Manunubos, kinahanglan nato nga mohunong sa pagpakasala, motan-aw sa atong kaugalingon ug maminaw sa Pulong sa Dios.

Giya alang sa pamalandong:

1. Andam ba kita sa paghunong sa pagpakasala? 

2. Gitan-aw ba nato ang atong kaugalingon, asa kita karon ug asa kita paingon? 

2. Sa atong kasaulogan karon, naminaw ba kita sa Pulong sa Dios? Unsa man ang atong nadungog?

PANGALIYA

Pangulo: Si Kristo mianhi aron sa pagluwas kanato ug misaad nga Siya mobalik. Mag-ampo kita nga sa kanunay mahinangpon kita nga moabi-abi kaniya. Sa matag pag-ampo, moingon kita: GINOO, DUNGGA ANG AMONG PAG- AMPO.

a. Nga ang pagsaulog nato sa Adbiyento moabli sa atong mga kasingkasing ngadto sa gugma sa Ginoo. Mag-ampo kita sa Ginoo.

b. Nga ang kahayag ni Kristo modan-ag sa kangitngit sa sala. Mag-ampo kita sa Ginoo.

c. Nga kining "Advent Wreath" magpahinumdum kanato sa sa kanunay sa pagpangandam sa pagbalik ni Jesukristo. Mag-ampo kita sa Ginoo.

d. Nga sulod niining panahon sa Pasko, mapuno unta kita sa kalinaw ug kalipay diha sa atong pagpaningkamut sa pagsunod sa pagtulun-an ni Kristo. Mag-ampo kita sa Ginoo.

RITO SA PAGPANALANGIN

1. Pag-ampo sa Pagpanalangin

Pangulo: Ginoong Dios, ang Imong Simbahan malipayon nga naghulat sa pag-abut sa Manunubos nga midan-ag sa among mga kasingkasing ug sa miwagtang sa kangitngitan sa kasal-anan. 

Ibubo kanamo ang imong mga panalangin samtang kami mosindi sa mga kandila niining "wreath". Hinaut nga ang ilang mga siga mopadayag sa kahayag ni Kristo ang Ginoo hangtud sa kahangturan.

Tanan: Amen.

(Ipahigayon ang pagpangsindi sa mga kandila ngadto sa advent wreath. Mouna ang pangulo kandila sa pagsindi dayon mosunod ang katilingban.)