KASAULOGAN SA PULONG

IKA-KATLOA'G-UPAT NGA DOMINGGO

[Solemnidad ni Kristo, Hari sa kalibutan]

a. UNANG BASAHON

2 Samuel 5:1-3

Ang pagbasa gikuha gikan sa ikaduhang basahon ni Samuel.

Unya miadto kang David didto sa Hebron ang tanang banay sa Israel ug giingnan nila siya, "Kami imong mga kadugo. Sa nangaging mga panahon nga si Saulo maoy among hari, ikaw ang nangulo kanamo ug giingnan ka sa Ginoo, `Ikaw ang pangulo sa akong katawhan, ang mga Israelita, ug ikaw ang maghari kanila."

Busa ang mga pangulo sa Israel miadto kang David didto sa Hebron, ug nakigsabot siya kanila atubangan sa Ginoo, ug gidihogan nila si David ingon nga hari sa Israel.

Mga igsoon, ang Pulong sa Ginoo.

b. SALMO RESPONSORYO

Salmo 122:1-2,3-4,4-5

Tubag (R)-Nalipay ako nga giingnan ako nila; mangadto na kita sa balay sa Ginoo.

Nalipay ako kay glingnan ako nila, "Mangadto na kita sa balay sa Ginoo." Ug karon nagabarog na kami sulod sa imong mga ganghaan, O Jerusalem. (R)

Jerusalem, nga gitukod ingo'g usa ka siyudad nga gipundok sa kahiusa. Ngadto kaniya nanungas ang mga tribo, ang mga tribo sa Ginoo. (R)

Sumala sa kasugoan alang sa Israel, aron pagpasalamat sa ngalan sa Ginoo. Diha kaniya gipabarog ang mga lingkoranan sa hukmanan, ang mga lingkoranan alang sa balay ni David. (R)

c. IKADUHANG BASAHON

Colosas 1:12-20

Ang pagbasa gikuha gikan sa sulat ni San Pablo ngadto sa mga taga-Colosas.

Pasalamati ninyo ang Amahan nga naghimo kaninyong takos sa pag-ambit sa gitagana sa Dios alang sa iyang katawhan didto sa gingharian sa kahayag. Kay giluwas kita niya gikan sa gahum sa langitngit ug gidala ngadto sa gingharian sa iyang hinigugmang Anak nga maoy nagluwas kanato ug nagpasaylo sa atong mga sala.

Si Kristo mao ang makita nga larawan sa dili makita nga Dios. Siya ang panganay'ng Anak ug labaw siya sa tanang binuhat. Kay pinaagi kaniya gibuhat sa Dios ang tanan nga atua sa langit ug ania sa yuta, makita ug dili makita mga gahum nga espirituhanon, mga punoan, mga hari, ug ang tanan nga nagmando. Gibuhat sa Dios ang tanan pinaagi kaniya ug alang kaniya. Diha na siya sa wala pa buhata ang tanang butang, ug diha kaniya ang tanan nahimutang sa ilang hustong dapit. Siya ang ulo sa Iglesia nga mao ang iyang lawas; siya ang naghatag og kinabuhi sa lawas; siya ang unang glbanhaw sa mga patay aron siya ang mag-una sa tanan. Kay pagbuot sa Dios nga ang Anak maghupot sa bug-os nga kinaiya sa Dios.

Busa pinaagi sa Anak gipasig-uli sa Dios ngadto sa iyang kaugalingon ang tanang butang sa langit ug sa yuta. Nakigdait ang Dios pinaagi sa kamatayon sa iyang Anak didto sa krus.

Mga igsoon, ang Pulong sa Ginoo.

d. EBANGHELYO

Lucas 23:35-43

Ang pagsangyaw sa Maayong Balita sumala ni San Lucas.

Nagtindog didto ang mga tawo nga nagtan-aw, samtang nagbugalbugal kaniya ang mga kadagkoan sa mga Judio, nga nag-ingon, "Giluwas niya ang uban, paluwasa siya sa iyang kaugalingon kun siya mao ang Mesiyas nga pinili sa Dios!"

Gibugalbugalan usab siya sa mga sundalo; miduol sila ug gitunolan siya'g bino, ug miingon, "Kun ikaw ang hari sa mga Judio luwasa ang imong kaugalingon!"

Sa ibabaw sa krus gisulat nila kining mosunod: "Kini siya mao ang Hari sa mga Judio."

Unya, usa sa mga kriminal nga nagbitay didto mibugalbugal kaniya, "Dili ba ikaw mao ang Mesiyas? Luwasa ang imong kaugalingon ug kami!" Apan gibadlong siya sa iyang kauban nga nag-ingon, "Wala ka ba mahadlok sa Dios? Kita ania dinhi gisilotan sa mao rang silot. Apan ang silot natong duha angay kanato, kay gisilotan man kita sibo sa atong nabuhat, apan siya walay sala." Ug miingon siya kang Jesus, "Jesus, hinumdumi intawon ako kun maghari ka na!

Miingon si Jesus kaniya, "Sultihan ko ikaw, karong adlawa adto ka sa Paraiso uban kanako."

Mga igsoon, ang Maayong Balita sa atong Ginoo.

e. KOMENTARYO

Tema: Mapaubsanong Hari, Kabag-ohan Maghari!

Karong Dominggoha, atong gisaulog ang Solemnidad sa Kristong Hari. Kini mao ang pagtapos sa Ordinaryo nga Panahon ug pagsugat na usab sa panahon sa Adbiyento diha sa atong liturhiyanhong kalendaryo sa simbahan. Kini mao ang katapusan nga adlaw sa kalendaryo, busa nagpamatuod usab nga luyo sa tanang selebrasyon sa simbahan, si Jesus gihapon ang maghari niini.

Kasagaran, kon kita maghunahuna sa usa ka hulagway sa Hari, mosantop dayon sa atong hunahuna nga siya adunay gingharian, nagpuyo sa palasyo, naglingkod sa trono, adunay makasusulaw nga korona, ug gipanalipdan kanunay sa iyang ginsakopan batok sa mga kaaway. Apan ang pagkahari sa atong Dios, lahi sa mga hari nga gipakita niining kalibutana. Si Jesus usa ka Hari nga ang trono mao ang krus, nagpurongpurong og koronang tunukon, naghari pinaagi sa pagpangalagad, ug ang iyang gahum mao ang iyang makaluluwas nga gugma batok sa sala ug kamatayon.

Karon makapangutana kita, nasayud ba kita kanunay sa makaayo nga gahom sa Gugma ni Kristo? Bisan ang mga propeta kaniadto wala mihunong sa pagpadayag niini sa mga katawhan. Pagpadayag sa kaligdong ug kalooy sa Dios sa mga mobalik Kaniya nga adunay pagsalig ug pagtahod. Sama sa mapaubsanong kawatan sa atong Ebanghelyo karon. Siya miila gayud kang Jesus isip Hari. Siya miangkon sa iyang sala ug sa maong pag-angkon sa sala, nakabati og kaulaw kay tungod, si Jesus gilansang sa krus uban nila apan limpyo ug walay dautan nga nabuhat. Siya nagmapaubsanon ug pinaagi sa iyang pagtoo, nakabungat og mga pulong nga nakapahimo niyang balaan. Sa maong mubo nga higayon, ang himalatyon nga kawatan nakaamgo pinaagi sa iyang hingpit nga pagpaubos ug pagtoo, sa taliabot nga paghari ni Jesus. Usa ka kasinatian nga labaw pa sa mga gibati sa mga higala ug suod nga mga disipulo ni Jesus niadtong taknaa. Kadaghanan kanila nabalaka kay ang ilang paglaum napukan ug hinayhinay nga natumpag sa dihang ila Siyang nakita nga gilansang sa Krus. Apan ang maong kawatan mitan-aw labaw pa sa kun unsay nahitabo kang Jesus niadtong higayona. Siya mitan-aw dili pinaagi sa iyang mata kun dili pinaagi sa iyang kasingkasing. Busa, sa katapusan nga higayon nga nasinati sa kawatan si Jesus, iyang gitugot nga Siya maghari sa iyang kasingkasing. Ug diha-diha, iyang naamgohan ang kadaugan sa kaluwasan.

Mamahimo unta kining hagit alang kanato, nga kanunay kitang magmapaubsanon aron sama sa nagmahinulsulon nga kawatan, makaamgo usab kita sa kahimayaan sa Dios.

Giya alang sa Pamalandong:

1. Sa akong pagpangalagad sa akong pamilya ug katilingban naghari ba sa akong kasingkasing ang pagkamapaubsanon?

2. Gidawat ba nako sa tibuok nakong pagkatawo nga si Kristo akong Hari diha sa Iyang pagpakamatay sa KRUS?

f. PANGALIYA

Pangulo: Niining pagsaulog nato sa kapistahan ni Kristo isip usa ka Hari, ato karong ipadangat ngadto sa atong Langitnong Amahan ang tanan natong mga pag- ampo. Sa matag pangamuyo kita motubag: 

MALOLOY-ON NGA DIOS DUNGGA KAMI.

1. Nga ang Simbahan makabaton sa matuod nga diwa sa pagkahari ni Kristo nga andam moalagad ug mohalad sa Iyang kaugalingon alang sa kabulahanan sa tanan. Mag-ampo kita.

2. Nga ang mga lideres sa atong panggamhanan magmatinud-anon sa ilang pagka-hari nga mogahin og panahon sa pagpakabana sa panginahanglan sa tanang katawhan ilabina sa mga kabus ug timawa. Mag- ampo kita.

3. Nga ang mga nagmasakiton ug nag-antus sa nagkadaiyang kalisud sa kinabuhi makasinati sa pag-amuma sa Dios pinaagi sa atong mga kaigsoonan nga migahin sa ilang talento, panahon ug bahandi sa pagtabang kanila. Mag-ampo kita.

4. Nga ang mga pangulo sa matag GKK maghupot sa gugma ug kalooy diha sa pagkahari ni Kristo. Mag-ampo kita.

5. Nga ang matag usa kanato nga nakadungog sa mensahe ni Kristo karon, magmakanunayon diha sa pagsaksi sa kamatuoran, gugma ug pagkamaalagaron. Mag-ampo kita.

6. Nga ang atong mga kaigsoonang nangamatay makadayon na sa Gingharian sa Langit. Mag-ampo kita.

Pangulo: Makagagahum nga Dios, dungga ang mga pag-ampo sa Imong katawhan ug tabangi kami nga among mahuptan ang panig-ingnan sa Imong Anak si Jesukristo ang Hari kanunay sa among kinabuhi hangtud sa kahangturan. Amen.