KASAULOGAN SA PULONG

IKA-KATLOA'G TULO NGA DOMINGGO

a. UNANG BASAHON

Malaquias 3:19-20

Ang pagbasa gikuha gikan sa basahon ni Propeta Malaquias.

Nag-ingon ang Ginoo nga Labing Gamhanan, "Ang adlaw moabot nga ang tanang mapahitas-on ug dautan sunogon sama sa dagami. Niadtong adlawa mangasunog sila ug walay mahibilin kanila. Apan alang kaninyo nga nagsunod kanako, ang akong gahum sa pagluwas mosubang sama sa adlaw ug mag-ayo sa mga balatian sama sa bidlisiw sa adlaw."

Mga igsoon, ang Pulong sa Ginoo.

b. SALMO RESPONSORYO

Salmo 98:5-6,7-8,9

Tubag (R)-Ania ang Ginoo aron maghari sa yuta uban sa katarong.

Awiti'g pagdayeg ang Ginoo dinuyogan sa alpa, dinuyogan sa alpa ug sa mananoy nga awit. Inubanan sa mga trompeta ug sa tingog sa budyong pag-awit nga masadya atubangan sa Hari, ang Ginoo. (R)

Palanoga ang kadagatan ug ang nagapuno niini, ang kalibutan ug sila nga nagapuyo niini; pamakpak kasapaan, pasinggita nga masadya ang kabukiran. (R)

Atubangan sa Ginoo, kay nagaabot siya aron paghari sa yuta. Magmando siya sa kalibtuan uban sa katarong ug sa katawhan uban sa iyang kaangayan. (R)

c. IKADUHANG BASAHON

2 Tesalonica 3:7-12

Ang pagbasa gikuha gikan sa ikaduhang sulat ni San Pablo ngadto sa taga-Tesalonica.

Kay nahibaloan ninyo nga angay kamong manig-ingon kanamo. Wala kami magtinapolan sa diha pa kami kaninyo. Wala kami magpadulot og pagkaon nga wala namo bayri; hinunoa, nagbuhat ug nagbudlay kami sa adlaw ug gabii aron dili makahasol kang bisan kinsa kaninyo. Gihimo namo kini dili tungod kay wala kami katungod pagpangayo'g suhol, kon dili aron mahimo kami nga inyong sumbanan. Samtang diha pa kami uban kaninyo, giingnan namo, kamo, "Ayaw pakan-a ang dili motrabaho."

Gisulti namo kini kay nakabalita man kami nga may pipila kaninyo nga nagtinapolan ug walay laing gihimo gawas sa pagpanghilabot sa buhat sa uban.

Busa, sa ngalan sa Ginoong Jesukristo, nagsugo kami ug nagpasidaan niining mga tawhana nga kinahanglan nga magpuyo sila malinawon ug magtrabaho alang sa ilang kaugalingong panginabuhi.

Mga igsoon, ang Pulong sa Ginoo.

d. EBANGHELYO

Lucas 21:5-19

Ang pagsangyaw sa Maayong Balita sumala ni San Lucas.

Dihay pipila kanila nga naghisgot bahin sa Templo kon unsa kini katahom tan-awon nga gidayandayanan sa maanindot nga mga bato, ug sa mga gasa nga gihalad ngadto sa Dios. Unya miingon si Jesus, "Kining tanan nakita ninyo-apan moabot ang panahon nga walay bisan usa ka bato nga magpabilin sa nahimutangan niini; ang tanan tumpagon gayud."

"Magtutudlo," nangutana sila, "Kanus-a ba kini mahitabo? Ug unsa man ang ilhanan nga magpaila nga moabot na ang panahon nga kini matuman?" Si Jesus miingon, "Pagbantay kamo ug ayaw kamo palimbong; kay daghan ang moanhi sa akong ngalan nga mag-ingon, Ako mao ang Kristo!' ug moingon usab, `Miabot na ang panahon!' Apan ayaw sila tuohi. Ayaw kamo kahadlok kun makadungog kamo'g mga gubat ug mga kagubot; kay kining mga butanga kinahanglan nga mahitabo gayud pag-una, apan wala kini magpasabot nga duol na ang katapusan." Mipadayon siya pag-ingon, " Ang usa ka nasud makiggubat sa laing nasud, ug ang usa ka gingharian mosulong sa laing gingharian. Mahitabo unya ang makalilisang nga mga linog, gutom, ug kamatay sa tanang dapit, ingon man ang makahahadlok nga mga butang ug mga dagkong ilhanan gikan sa langit. Apan sa dili pa mahitabo kining mga butanga, dakpon kamo ug lutoson; taralon kamo ngadto sa mga sinagoga ug bilanggoan, ug dad-on kamo atubangan sa mga hari ug sa mga punoan tungod kanako. Mao unya kini ang higayon nga makasangyaw kamo sa Maayong Balita.

Sa dili pa kini mahitabo, usaha ang inyong hunahuna nga dili kamo mabalaka kun unsaon ninyo pagpanalipod sa inyong kaugalingon; kay hatagan kamo'g igsusulti ug kaalam nga walay usa sa inyong mga kaaway nga makatubang o makapanghimakak. Budhian kamo bisan gani sa inyong mga ginikanan ug mga igsoon, ingon man sa inyong mga paryenti ug mga higala; ug patyon nila ang pipila kaninyo. Magdumot kaninyo ang tanan tungod kanako, apan walay bisan usa ka buhok sa inyong mga ulo nga mawala. Pabilin kamo nga malig-on kay niining paagiha maluwas kamo."

Mga igsoon, ang Maayong Balita sa atong Ginoo.

e. KOMENTARYO

Tema: Pagmabinantayon

Adunay pipila ka mga tawo nga mopaila sa ilang kaugalingon nga sila sinugo sa Dios ug managna nga hapit na matapos ang kalibutan. Dunay mga higayon diin daghang tawo ang mibati og kalisang tungod sa makahahadlok nga mga panagna sa mga propetang tigpaka aron-ingnon. Mga igsoon ko diha kang Kristo ania na kita karon sa Ikakatloa'g Tulo nga Dominggo sa tuig sulod sa Ordinaryong panahon. Sa dili madugay mosulod na usab kita sa Adbiyento ug magsugod na usab kita sa bag-ong tuig sa liturhiya sa atong Simbahan.

Kun atong mabantayan diha sa atong mga pagbasa, naghisgot na kini mahitungod sa mga katapusang butang, o mga posibleng panghitabo nga moabot sa katapusang panahon.

Si propeta Malacai diha sa atong Unang Pagbasa nagkanayon nga moabot ang adlaw nga hilabihan kainit diin ang tanang nagbuhat ug dautan lumpagon. Apan ang mga matarong makaangkon ug kaayohan.

Sa atong panahon usab karon sa kasamtangan, adunay higayon nga ang mga tawo namalit og kandila nga perdon ug pabendisyonan nila kini sa pari kay kuno matud pa moabot ang tumang kangitngit timailhan nga matapos na ang kalibutan.

Dunay nag-ingon nga matapos ang kalibutan niadtong tuig dos mil (2000). Ug dihay usa ka salida nga gipagula sa sinehan nga ang titulo "2012." Ug sumala sa maong salida, matapos ang kalibutan sa tuig dos mil dose.

Apan pipila na ba kahigayon nga adunay sama niini nga mga panghulga? Ug unsa may nahitabo?

Diha sa Ikaduhang sulat ni San Pablo ngadto sa mga taga Tesalonica, daw sa ingon niini usab ang nahitabo. Ang mga tawo tungod sa pagtoo nga mobalik na ang Mesiyas ug moabot na ang adlaw sa paghukom, nagtinapulan na lamang sila. Wala na sila ganahi maningkamot sa pagtrabaho tungod kay nagpaabot na lamang sila sa katapusang adlaw sa pagbalik sa Mesiyas.

Apan gipahimangnoan sila ni San Pablo, nga kun kinsa kadtong magtinapulan ug dili molihok, dili angay nga pakaonon. Buot nga ipaabot ni San Pablo ngadto sa mga taga Tesalonica nga ang ilang pagpaabot sa adlaw sa paghukom dili angay nga makababag kanila sa pagtuman nila sa ilang inadlaw-adlaw nga gimbuhaton o katungdanan. Nagtuo sila nga diha dayon mobalik na si Jesus, apan nasayop sila tungod kay walay si bisan kinsa nga nasayud kanus-a moabot ang adlaw sa paghukom gawas sa Amahan nga anaa sa langit.

Diha sa Ebanghelyo ni San Lukas nga atong nadungog dili pa lamang dugay, gihisgutan sa pagsangyaw ni Jesus ang mahitungod sa mga katapusang butang. Alang kang San Lukas, mini ang pagtoo nga hapit na ang katapusan sa panahon, hinonoa, iyang gihatagan og katin-awan ang pagkalangan sa pagbalik ni Jesus.

Sa makausa pa angay natong matngonan, wala gayoy si bisan kinsa nga nasayud kung nga kanus-a mobalik si Jesus sa adlaw sa paghukom. Apan sigurado kita sa atong pagtoo nga moabot gayud kini. Kanus-a ug asa? Dili na kana mahinungdanon.

Ang importante nga sa kanunay atong andamon ang atong kaugalingon sa tanang higayon. Matag karon ug unya atong susihon ang atong tagsatagsa kung hain naman kita sa atong pagpakigsuod sa Dios ug sa atong isigkaingon.

Matag karon ug unya atong lantawon ang atong mga binuhatan. Susihon nato kung ang atong pagkinabuhi nagsubay ba diha sa kabubut-on sa atong Amahan.

Dili kita magpadala sa mga pagpanghadlok sa uban. Huptan nato ang atong pagtoo ug isalig sa Dios ang tanan. Ug ugaling moabot man ang mga pagpanglutos, nan isipon nato nga kini usa nga halangdon nga kahigayonan nga gihatag sa Dios kanato aron kita mabalaan.

Apan kon mabinantayon kita, makaingon kita nga kining mga panagna nga mga pagpanglutos ug katalagman, nagsugod na sa pagpanghitabo. Mga kagubot, giyera, bagyo, linog, lunop, ug uban pang mga kalamidad.

Apan imbes nga mahadlok kita, mag-ampo hinoon kita sa Dios nga lig-onon ang atong pagtoo aron makasagubang kita sa bisan unsa nga mosulay kanato.

Magmabinantayon kita diha sa atong pagpuyo sa kabubut-on sa Dios diha sa atong mga pulong ug buhat. Hinaut pa unta!

Giya alang sa Pamalandong:

1. Ang paglaum sa kahimayaan nga padulngan Sa sa tanang binunyagan maoy atong gihuptan sa atong mapadayonong panaw sa pagtuo. Milambo ba ako niining kamatuoran?

2. Nagmabinantayon ba ako sa matag takna diha sa pagtuman sa kabubut-on sa Dios?

f. PANGALIYA

Pangulo: Mag-ampo kita sa atong Langitnong Amahan alang sa atong mga panginahanglan ug mga grasya nga mahinungdanon sa atong pagpakabuhi. Sa matag pangamuyo kita motubag: GINOO, DUNGGA ANG AMONG PAG-AMPO.

1. Nga ang Simbahan ug mga nagdumala niini magkahiusa ug magmatinud-anon sa ilang pagsaksi sa buhing presensya sa Dios. Mag-ampo kita.

2. Nga ang mga nangulo sa tanang kanasuran maghupot og igong kaligdong sa pagtoo aron aduna silay kaisog sa pagpakigbatok sa mga kalibutanong haylo. Mag-ampo kita.

3. Nga ang mga nag-antus sa nagkalainlaing balatian sa lawas makabaton og kusog inubanan sa dakung pagtoo nga ang presensya sa Dios kanunay magauban kanila ug maghatag kanila og kahupayan. Mag-ampo kita.

4. Nga ang mga pangulo sa matag pamilya magmasaligon sa gugma ug panalangin sa Dios. Mag-ampo kita.

5. Nga ang atong minahal sa kinabuhi nga mipanaw na ning kalibutana magpuyo na sa bag-ong kinabuhi agi og ganti sa Dios sa ilang pagpakighiusa Kaniya diha sa makanunayong pagsunod sa Iyang kabubut-on sa buhi pa sila. Mag-ampo kita.

6. Nga ang mga personal nato nga katuyuan, ato kining ihalad sa Dios diha sa kahilum.

Pangulo: O Ginoo sa kagahuman, taliwala sa among mga kakulangan, gipangayo namo nga Imong dunggon ang among mga pag-ampo nga among gihalad karon. Malaumon kami nga bisan dili kami angayan, masaligon kami nga dili Nimo kami pasagdan. Kini among gipangayo pinaagi ni Kristo Imong Bugtong Anak ug among Ginoo hangtud sa kahangturan. Amen.