KASAULOGAN SA PULONG

IKA-KATLOA'G DUHA NGA DOMINGGO

A. UNANG BASAHON

2 Macabeo 7:1-2,9-14

Ang pagbasa gikuha gikan sa ikaduhang basahon sa mga Macabeo.

Sa laing higayon may usa ka inahan nga Judio ug ang iyang pito ka anak nga lalaki nga gidakop. Gipabunalan sila sa hari aron pagpugos kanila sa pagkaon og baboy. Unya usa sa mga batan-ong lalaki miingon, "Unsa may imong gilaoman nga makuha pinaagi sa pagbuhat niini? Palabihon namo ang pagpakamatay kay sa pagbiya sa mga batasan sa among katigulangan."

Apan uban sa iyang himalatyon nga ginhawa misinggit siya ngadto sa hari, "Ikaw matadero! Mahimong imo kaming patyon, apan ang Hari sa tanang kalibutan magbanhaw kanamo ug maghatag kanamo sa kinabuhi nga walay katapusan tungod kay nagsugot kami sa iyang mga balaod." 

Ang ikatulo nga igsoon mao na usab ang gikalingawan sa mga sundalo. Diha nga gisugo siya pagpadiwalwal sa iyang dila, mihimo dayon siya niini. Unya maisogon niyang gituy-od ang iyang mga kamot ug sa maisog nga mga pulong miingon siya, "Ang Dios naghatag niini kanako. Apan ang iyang mga balaod labaw ka hinungdanon kanako kay sa akong mga kamot, ug nahibalo ako nga ang Dios maghatag niini kanako pag-usab." Ang Hari ug sila nga uban kaniya natingala sa iyang kaisog ug sa iyang kamahinangpon sa pag-antus.

Human siya mamatay, ang mga sundalo misakit sa ikaupat nga igsoon sa samang mapintas nga paagi, apan ang iyang katapusang mga pulong mao, "Malipayon ako nga magpakamatay sa imong mga kamot, tungod kay gipasaligan kami nga ang Dios magbanhaw kanamo. Apan walay pagkabanhaw alang kanimo, Antioco."

Mga igsoon, ang Pulong sa Ginoo.

B. SALMO RESPONSORYO

Salmo 17:1,5-6,8,15

Tubag (R)-Ginoo, inigpakita sa imong himaya, mahingpit ang akong kalipay.

Pamatia, O Ginoo, ang usa ka matarong nga hangyo; patalinghugi ang akong pangaliya; dungga ang akong mga pangamuyo gikan sa mga ngabil nga way limbong. (R)

Malig-on ang akong mga lakang diha sa imong mga dalan, ang akong mga tiil wala masayop. Motawag ako kanimo, kay tubagon mo man ako, O Dios; ipaabong ang imong dunggan kanako; patalinghugi ang akong pulong. (R)

Ampingi ako ingo'g kalimutaw sa imong mata; tago-i ako diha sa landong sa imong mga pako. Apan ako diha sa katarong mosud-ong sa imong nawong; sa pagmata ko magkalipay ako diha sa imong atubangan. (R)

C. IKADUHANG BASAHON

2 Tesalonica 2:16-3:5

Ang pagbasa gikuha gikan sa ikaduhang sulat ni San Pablo ngadto sa taga-Tesalonica.

Hinaut unta nga ang atong Ginoong Jesukristo ug ang Dios nga atong Amahan nga nahigugma kanato ug nagdasig kanato'g walay katapusang kadasig ug maayong paglaum pinaagi sa iyang grasya, magdasig ug maglig-on kaninyo sa pagbuhat ug pagsulti sa tanan nga maayo.

Sa katapusan, mga igsoon, i-ampo kami aron ang mensahe sa Ginoo magpadayon pagkaylap sa madali ug magmadaugon, ingon sa nahitabo diha kaninyo. Pag ampo usab kamo nga ang Dios magluwas kanamo gikan sa bangis ug dautang mga tawo, kay dili man ang tanan may pagtoo.

Apan kasaligan ang Ginoo; lig-onon kamo niya ug panalipdan sa dautan. Ug tungod sa Ginoo misalig kami kaninyo, ug naniguro kami nga nagbuhat kamo ug magpadayon pagbuhat sa among gisugo kaninyo. Hinaut unta nga ang Ginoo magtultol sa inyong kasingkasing ngadto sa gugma sa Dios ug ngadto sa usab sa pagkama inantuson nga gihatag ni Kristo.

Mga igsoon, ang Pulong sa Ginoo.

D. EBANGHELYO

Lucas 20:27-38 o 20:27, 34-38

Ang pagsangyaw sa Maayong Balita sumala ni San Lucas.

May mga Saduseo nga miduol kang Jesus, (Kini sila mao ang nag-ingon nga ang mga patay dili mabanhaw.) Nangutana sila kaniya, "Magtutudlo, nagsulat si Moises niining balaod alang kanato; `Kun ang usa ka tawo mamatay ug may asawa nga nahibilin apan walay anak, ang igsoon niadtong tawhana kinahanglan mangasawa sa biyuda aron manganak sila alang sa namatay.'

May pito ka magsoong lalaki, ang kamagulangan naminyo ug namatay nga walay anak. Unya ang ikaduhang igsoon nangasawa sa biyuda, ingon man ang ikatulo, hangtud nga ang pito ka magsoon nakapangasawa sa babaye-ug nangamatay silang tanan nga walay anak. Sa katapusan ang babaye maoy namatay. Karon, sa adlaw nga banhawon na ang mga patay, kang kinsa man siyang asawa nga silang tanan nakapangasawa man kaniya?"

Si Jesus mitubag kanila, "Ang mga lalaki ug babaye niining panahona nagminyoay, apan ang mga lalaki ug babaye nga angay banhawon ug magkinabuhi sa umaabot nga panahon dili na magminyoay. Sama sila sa mga anghel ug dili na mamatay. Mga anak sila sa Dios kay gibanhaw man sila. Ug gitin-aw gayud ni Moises ang pagmatuod nga banhawon ang mga patay. Sa bahin nga nagsaysay mahitungod sa sampinit nga nagdilaab, naghisgot siya mahitungod sa Ginoo nga mao ang Dios ni Abraham, Dios ni Isaac, ug Dios ni Jacob.' Kini nagpasabot nga siya mao ang Dios sa mga buhi ug dili sa mga patay kay alang kaniya ang tanan buhi."

Mga igsoon, ang Maayong Balita sa atong Ginoo.

E. KOMENTARYO

Tema: Iya ang Gahum ug Himaya, Hangtod sa Kahangturan.

Bag-o lang nato nga gisaulog ang Adlaw sa mga Santos ug ang Adlaw sa mga Minatay o kalag kalag niadtong Nobyembre 1 ug Nobyembre 2. Apan karong Dominggoha ang atong Liturhiya, labi na diha sa atong mga pagbasa nagpadayag gihapon kanato sa pagpamalandong sa Pulong sa Dios mahitungod sa kamatayon, usa ka kamatuoran sa pagkinabuhi nato niining kalibutan. Apan kon atong pamalandongan pag-ayo, atong makita nga maggiya kini kanato kung giunsa nato pagpuyo ang atong kinabuhi samtang ania pa kita niining kalibutana. Diha sa mga pagbasa nagpadayag kini kanato sa mensahe sa paghatag og dakong bili sa kinabuhi pinasubay sa birtud sa pagkamatoohon ug pagkamalaumon. 

Sa atong unang pagbasa, atong nadungog ang estorya sa pito ka managsoon uban sa ilang inahan nga milahutay gayud gikan sa mga pag antus ug mga pagpasakit nga ilang nahiaguman gikan sa pagpanamastamas sa uban tungod ug alang sa ilang madasigon ug lig-on nga pagpadayag sa ilang pagtoo subay sa pagtulon-an sa ilang mga katigulangan. Milahutay sila tungod sa hugot nga pagtoo nga ang tanang butang nga anaa kanato hinulaman lamang kini gikan sa Dios Amahan. Nagpasabot nga Iya gayud kining tanan ug nga kung kini kuhaon kanato tungod ug alang sa Iyang kahimayaan, nan angay lamang nga andam kita sa pagtugyan bisan pa man mosangko kini sa atong kamatayon. Gipadayag usab sa atong unang pagbasa ang kamahinungdanon sa pagtoo nga ang kamatayon pultahan lamang sa kamatuoran sa pagkabanhaw diin masinati ang tiunay ug hingpit nga kalipay uban sa mga santos ug mga anghel sa langit diha sa panaghiusa na nato sa atong Dios Amahan. Ang Dios Amahan nga maoy hinungdan niining tanan natong pagpaningkamot dinhi sa kalibutan diha sa atong pagpabiling lig-on sa pagtoo ug madasigon nga magpadayag niini sa mga higayon nga kini sulayan sa mga nagkalainlaing kasinatian. Kini nindot nga gipadayag diha sa atong salmo karon; "Ginoo, inigpakita sa Imong himaya, mahingpit ang akong kalipay." Nagpahinumdom lamang kini kanato nga ang kinabuhi natong kalibutanon magdala kanato sa hingpit nga paglaum sa pagkakita sa Dios diha sa Iyang himaya. Uban ni San Pablo diha sa atong Ikaduhang Pagbasa, kita manghinaut nga ang Dios maghatag kanato og malahutayon nga kadasig sa pagtoo ug paglaum pinaagi sa Iyang grasya aron nga makabaton kita og kadasig sa atong mga kasingkasing ug kalig-on sa pagbuhat sa tanang butang nga maayo diha sa pulong ug sa buhat. Giyahan unta kita sa Dios nga magpabilin kita diha sa Iyang gugma ug kamalahutayon diha kang Kristo aron nga maangkon nato ang kinabuhing walay katapusan uban sa Dios Amahan.

Ang atong Ebanghelyo karon naghatag kanato sa mensahe sa kaanindot sa himaya sa kinabuhing walay katapusan uban sa Dios Amahan. Gipakita kini ni Jesus kanato pinaagi sa mga punto nga Iyang gisaysay isip tubag niadtong mga Saduseo nga mituki Kaniya diha sa mga kasingkasing nga wala nagtoo sa kamatuoran sa pagkabanhaw o kinabuhing walay katapusan. Una, human niining kinabuhing kalibutanon, kung ato kining gipuy-an diha sa matarung ug puno sa kalig-on sa pagtoo, makabaton kita og kinabuhi sama sa mga anghel sa langit diin kini puno sa kaanindot ug tiunay nga kalipay. Diin dili na nato masinati pa ang mga kaguol ug lawasnon nga mga kasakit, pag-antus, kagutom o kauhaw. Ikaduha, didto wala na ang mga nagkalainlaing problema sa kaminyoon. Ang kaminyoon kalibutanon tungod sa pagtubag sa tawo sa tawag sa atong Ginoo nga ang tawo mamahimong kabulig Niya sa paghatag og kinabuhi ug sa pagpadayon sa Iyang kaliwatan. Kaliwatan nga tungod sa sala mosinati gayud og kasakitan ug kamatayon. Apan sa kinabuhing dayon uban sa Dios Amahan wala nay kasakitan ug kamatayon. Kitang tanan moambit sa tiunay nga kalipay diha sa pagkahingpit na nga mga anak sa Dios. Mamahimo na kitang usa ka pamilya uban sa atong Ginoo diha sa Iyang pagka-Amahan.

Hinaut nga kining atong pagpamalandong sa atong mga pagbasa karon maghatag kini kanato sa kadasig sa pagpadayon sa pagpuyo sa kinabuhi sa tinud-anay nga pagsunod sa nagmadaugon natong Dios nga mao si Jesukristo. Ug kita moingon "Gibuntog sa atong Manluluwas nga si Jesukristo ang gahum sa kamatayon ug pinaagi sa Maayong Balita gipadayag Niya kanato ang kinabuhing walay katapusan. Iya gayud ang gahum ug himaya, hangtod sa kahangturan." Amen.

Giya alang sa Pamalandong:

1. Mituo ba ako nga ang Maayong Balita mao ang kinabuhing walay katapusan? 

2. Naningkamot ba ako sa inadlaw-adlaw sa pagsunod sa kabubut-on sa Dios aron maangkon nako ang hingpit nga kalipay?

F. PANGALIYA

Pangulo: Niining balaan nga kasaulogan, atong ihalad sa Makagagahum nga Dios ang atong mga tinguha ug panginahanglan. Sa matag pangamuyo kita motubag: DUNGGA ANG AMONG PAG-AMPO O DIOS.

1. Nga ang mga nangulo sa Simbahan mabati ug makita ang ilang matinud-anong pag alagad isip buhing timaan sa kalooy sa Dios sa Iyang katawhan. Mag-ampo kita.

2. Nga ang mga nagdumala sa tanang nasud uban sa pagsalig sa gahum sa Dios, maghupot og kaligdong sa pagpakigbatok sa mga kalibutanong haylo. Mag-ampo kita.

3. Nga ang mga nag-antus sa nagkalainlaing balatian sa lawas makabaton og igong kusog inubanan sa dakung pagtoo nga ang presensya sa Dios kanunay magauban kanila. Mag-ampo kita.

4. Nga ang tanang kabatan-onan madasig sa pagpangalagad ug lig-on silang mobarog sa kamatuoran uban sa dakung paglaum nga ang Dios kanunay nag-atiman kanila. Mag-ampo kita.

5. Nga ang atong mga minahal sa kinabuhi nga mipanaw na ning kalibutana magpuyo sa kinabuhing walay pagkatapus. Mag ampo kita.

Pangulo: Ginoo among Dios Ikaw ang tinubdan sa tanang kaayohan ug gugma. Itugot nga amo nang maangkon ang grasya nga Imong gitagana kanamo pinaagi ni Kristo among Ginoo. Amen.