KSP DEC.03, 2022

IKADUHANG DOMINGGO SA ADBIYENTO

III. KASAULOGAN SA KATILINGBANONG PAGHINULSOL ATOL SA ADBIYENTO

(Kining maong rito gamiton alang sa Ikaduhang Semana sa Adbiyento. Alang sa ikatulo ug ikaupat nga semana sa adbiyento mahimong gamiton ang porma 1 pahina 7.)

A. PANAHON SA ADBIYENTO

I. RITO SA PAGSUGOD

Pangulo: Mga igsoon ko diha kang Kristo, maayong __________ kanatong tanan.

Ania na usab kita karon aron sa pagsaulog niining balaang takna nga atong gigahin alang sa atong Ginoo ug alang sa usa'g usa.

Angayan lamang nga atong andamon ang atong kaugalingon alang sa mas makahuluganon ug madasigon nga pagsaulog niining hiniusang pag- ampo sa katilingban.

Sa ngalan sa atong halangdong Arsobispo sa Davao, Romulo G. Valles DD, inubanan sa pagtudlo sa atong Kura Paroko, nga si Reverendo Padre Johnny A. Autida DCD ako, inyong Pangulo sa Liturhiya (PSL) gipadala ug gitahasan sa pagdumala niining senemanang pag-ampo.

(Magpaila ang PSL sa iyang pangalan kon ugaling magsaulog sa laing katilingban apan kon anaa mismo sa katilingban, dili na kinahanglan nga magpaila pa.)

(Timbayaon ang mga bisita kon aduna. Kon wala, ang pangulo mopadayon)

1. Pagtimbaya

Pangulo: Manindog kita. Hiniusa kitang nagkatigom karon sa ngalan sa Amahan, sa Anak ug sa Espiritu Santo.

Tanan: Amen.

2. Pasiunang Awit

Pangulo : Atong awiton ang pasiunang awit.

3. Pasiunang Pag-ampo

Pangulo: Mga igsoon, ang Adbiyento usa ka panahon sa pagpangandam sa higayon nga kita magsaulog sa misteryo sa pag-abot sa atong Ginoo ingon nga tawo, ang sinugdanan sa atong kaluwasan. Ang Adbiyento usab magtandog kanato sa pagpaabot uban ang bag-ong paglaum sa ikaduhang pagbalik ni Kristo sa diha nga ang plano sa kaluwasan sa Ginoo magdala ngadto sa katumanan. Gipahinumduman usab ang matag usa sa pagpaabot sa atong Ginoo sa takna sa atong kamatayon.

Atong sigurohon nga makaplagan kita niya nga nangandam sa iyang pag-abot ingon nga ang Balaang Kasulatan nag-ingon: "Bulahan kadtong mga sulugoon nga makaplagan sa ilang agalon nga nagtukaw ug nag-andam" (Lukas 12: 37). Kining tulumanon sa paghinulsol nagkahulugan sa atong pagpangandam sa hunahuna ug kasing- kasing sa pag-abot ni Kristo, nga sa dili madugay atong saulogon sa Santos nga Misa ang Pasko sa Pagkatawo sa atong Ginoo.

-0-

Mao na kini ang panahon nga angay kitang magmata. Kay mas duol na karon ang atong kaluwasan kay sa pagsugod ta sa pagtoo. Hapit nga matapos ang kagabhion ug duol na ang kabuntagon. Busa isalikway ta ang mga buhat nga iya sa kangitngit ug isul-ob ta ang armadura ingon nga mga sundalo nga iya sa kahayag. Magbinuotan kita sa atong pagkinabuhi ingon nga mga tawo nga anaa sa kahayag - dili sa hilabihang paghudyaka ug paghubog-hubog, ni sa pakighilawas o sa kalaw-ayan, ni sa pagpakig- away o sa pagkamasinahon.

Hinonoa, isul-ob ang Ginoong Jesukristo ingon nga armadura ug ayaw kamo padaug sa inyong lawasnong kaibog. (Roma 13: 11-14)

Mga igsoon, nagpaabot kita sa pagsaulog sa misteryo ni Kristo diha sa pangilin sa Pasko sa Pagkatawo. Mag-ampo kita nga sa higayon nga siya moabot, makaplagan kita niya nga nagmata ug andam sa pagdawat kaniya.

Pangulo:

Ginoo among Dios, magbubuhat sa kalangitan, nagalaum kami sa pagpaabot sa among Manluluwas. Itugot nga imo kaming pasayloon sa among sala.

Kini among gipangayo pinaagi ni Kristo among Ginoo.

-0-

O way-katapusang Anak sa Dios, magbubuhat sa tawhanong pamilya ug among Manluluwas, moabut ka sa dili madugay dinhi kanamo ingon nga anak sa putling Birhen ug luwasa ang kalibutan.

Ipakita kanamo ang imong mahigugmaong presensiya kinsa ikaw milingkawas kanamo gikan sa sala ug nahimong sama kanato sa tanang butang hawang sa sala, kay ikaw buhi ug hari hangtud sa kahangturan.

Tanan: Amen.

II. KASAULOGAN SA PULONG SA DIOS

(Ang PSL o pangulo moadto sa atubangan sa altar ug moyukbo [bow] niini. Hagkan niya ang leksyonaryo, dayon kuhaon ug ibayaw atubangan sa katawhan ug kuhaon kini sa unang magbabasa diha sa atubangan. Pagkahuman, mobalik ang PSL sa iyang lingkoranan samtang ang unang magbabasa moadto sa Ambo. Sa dili pa ang pagbasa, dapiton sa pangulo ang katawhan sa pag-ingon:)

Pangulo:  Mga kaigsoonan, paminawon nato karon ang Pulong sa Dios nga nagpadayag sa gugma sa Amahan nganhi kanato. Sa atong pagpaminaw, atong sination kining maong gugma nga maoy nagpalawom sa atong paglaum ug pagtoo sa Ginoo.

Palihug manglingkod.

a. BASAHON I

Isaias 11:1-10

Kinutlo gikan sa basahon ni Propeta Isaias.

Niadtong adlawa may motoruk nga saha sa gamut ni Jese, ug may bulak nga mogula gikan sa iyang gamut. Ug mopahulay dinha kaniya ang espiritu sa Ginoo: Ang espiritu sa kinaadman ug salabutan; Ang espiritu sa tambag ug kalig-on. Ang espiritu sa kahibalo ug kahadlok sa Ginoo ug ang iyang kalipay mao unya ang kahadlok sa Ginoo. Dili siya mohukum sumala sa panagway, ni mobadlong sumala sa sugilanon: hinonoa mohukum siya sa mga kabus diha sa katarungan. Ug mobadlong diha sa kaangayan alang sa mga maaghup sa yuta; ug mohampak sa yuta ginamit ang bara sa iyang baba, ug pinaagi sa gininhawa sa iyang mga ngabil laglagon niya ang dautan. Ug ang katarungan maoy mabakus sa iyang mga hawak, ug ang pagtuo bakus sa iyang mga bat-ang. Mopuyo ang lobo uban sa nating karnero, ug ang leopardo modulog sa nating kanding; ang nating baka, ug ang batan-ong leyon mag-ipon pagpuyo,ug may dyutay'ng bata nga magtoltol kanila. Ang nating baka ug ang Oso magduol pagpanibsib, magduol pagpahulay ang ilang mga itoy, ug ang leyon daw torong baka mokaog dagami. Ug magdula ang batang masoso ibabaw sa lungag sa sawa; ug diha sa lungib sa biting tapayan mopasulod sa iyang kamut ang batang pagalutason. Dili sila modagmal ug dili mopatay didto sa tibuok nakong bukid nga santos, kay magsugwak ang yuta sa kahibalo sa Ginoo, ingog mga tubig nga sa dagat. Niadtong adlawa ang gamut ni Jese, nga nagbarug nga tilimad-on sa kanasuran, pangitaon sa mga nasud kay ang iyang lubnganan mamahimayaon.

Ang Pulong sa Ginoo.

b. SALMO RESPONSORYO

Salmo 72:1-2.7-8.12-13.17

Tubag (R)-Ang katarong molambo sa iyang panahon, ug ang hingpit nga kalinaw hangtod sa kahangturan.

O Dios, togahi sa Imong panghukom ang Hari, ug sa Imong katarong ang Anak sa Hari; Mandoan niya sa katarongan ang Imong katawhan ug sa panghukom ang Imong mga nag-antos nga ginsakpan. (R)

Ang katarong molambo sa iyang panahon, ug ang halawom nga kalinaw, hangtud nga mawala nay buwan. Maghari unta Siya gikan sa dagat ngadto sa kadagatan, ug gikan sa Suba ngadto sa kinatumyan sa kayutaan. (R)

Luwason Niya ang kabus sa iyang pagsangpit, ug ang gisakit diha nga wala gayoy motabang kaniya. Kaloy-an Niya ang ubos ug ang kabus; luwason Niya ang kinabuhi sa mga kabus. (R)

C. BASAHON II

Roma 15:4-9

Kinutlo gikan sa sulat ni San Pablo ngadto sa taga Roma.

Ang tanang nahisulat sa Kasulatan gisulat aron pagtudlo kanato ug sa ingon makabaton kitag paglaom pinaagi sa pailob ug sa kadasig nga gihatag kanato sa Kasulatan. Hinaut unta nga ang Dios nga tinubdan sa pailob ug kadasig maghiusa sa inyong mga hunahuna pinaagi sa pagsunod sa panig-ingan ni Kristo Jesus, aron maghiusa kamong tanang sa pagdayeg sa Dios ug Amahan sa atong Ginoong Jesukristo.

Busa, alang sa himaya sa Dios, dawata ang inyong isigkamagtutuo ingon nga gidawat kamo ni Kristo. Kay si Kristo nahimong sulugoon sa mga Judio aron pagpakita nga kasaligan ang Dios sa pagtuman sa Iyang mga saad ngadto sa mga patriarka, ug aron daygon sa mga dili Judio ang Dios tungod sa Iyang kaluoy.

Sumala sa giingon sa Kasulatan. "Busa pasalamatan ko Ikaw taliwala sa mga dili Judio. Awiton ko ang mga pagdayeg alang sa Imong ngalan."

Ang Pulong sa Ginoo.

4. Pagpasidungog sa Ebanghelyo

(Ang pangulo mobow sa may altar agig pagtahod ug moadto sa may ambo alang sa pagbasa sa Ebanghelyo ug dapiton ang katawhan sa pagtindog pinaagi sa pag-ingon:)

Pangulo : Manindog kita ug atong pasidunggan ang diha sa atong pag-awit sa aleluya. Ginoo

d. EBANGHELYO

Mt. 3:1-12

Ang Santos nga Ebanghelyo sumala ni San Mateo.

Niadtong panahona mitungha si Juan nga Magbubunyag ug nagwali didto sa dapit nga awaaw sa Judea. Miingon siya, "Biyai ninyo ang inyong mga sala kay duol na ang Gingharian sa Langit!" Si Juan mao ang gihisgotan ni Propeta Isaias sa iyang pag-ingon: "Didto sa awaaw may nagasinggit: "Andama ninyo ang dalan sa Ginoo. Pagbuhat kamog tul-id nga dalan nga Iyang agian!" Ang sapot ni Juan hinimo gikan sa balhibo sa kamelyo; nagbakos siyag panit, ug ang iyang kalan-on dulon ug dugos. Nangadto kaniya ang mga tawo gikan sa Jerusalem ug sa tibuok lalawigan sa Judea, ug gikan sa kayutaan nga kasikbit sa suba sa Jordan. Gisugid nila ang ilang mga sala ug gibunyagan sila niya didto sa suba sa Jordan.

Sa pagkakita ni Juan nga may daghang Pariseo ug Saduseo nga nanuol kaniya aron pagpabunyag, miingon siya kanila: "Kamong mga bitin-kinsay nagsulti kaninyo nga makalikay kamo sa kasuko sa Dios nga hapit na moabot? Buhata ninyo ang mga butang nga magpaila nga namiya kamo sa inyong mga sala. Ug ayaw kamo paghunahuna nga dili kamo kasilotan pinaagi sa pag-ingon: Si Abraham among amahan. "Sultihan ko kamo nga ang Dios makahimo niining mga batoha nga mga kaliwat ni Abraham!. Andam na ang wasay aron iputol sa mga kahoy diha sa mga gamot; ang tanang kahoy nga dili mamungag maayong bunga pagaputlon ug isugnod sa kalayo. Nagabunyag ako kaninyo pinaagi sa tubig aron pagpakita nga naghinulsol kamo sa inyong mga sala; apan ang moanhi sunod kanako magabunyag kaninyo pinaagi sa Espiritu Santo ug sa kalayo. Siya mas gamhanan pa kay kanako, ug dili ako angay bisan gani sa pagbitbit sa iyang sapatos. Nagkupot siya sa nigo nga igpapalid aron paglain sa tanang mga lugas: iyang tiguman ang trigo didto sa iyang kamalig, apan ang uhot iyang sunugon sa kalayo nga dili mapalong!"

Ang Ebanghelyo sa Ginoo.

Pangulo : Manglingkod kita ug paminawon ang Komentaryo nga makatabang kanato sa pagsabot sa pulong sa Dios nga atong nadungog.

6. Komentaryo

Tema: Tawag sa Pagbag-o.

Niining ikaduhang Dominggo sa Adbiyento, kita gitawag sa pagbag-o. Ang atong unang pagbasa gikan libro ni Propeta Isaias sa nagsaysay kung unsa ka maayo ang Ginoo sa tanan Niyang mga binuhat ug sa tinguha niini nga matagamtaman sa tawo ang hingpit nga kalinaw, kahiusa, kaangayan ug gugma.

Sa atong ikaduhang pagbasa naghisgot kung unsa ang angayan nga buhaton aron kita makaangkon sa kinabuhi nga dayon. Kita gihagit sa paghimo sa mga maayong mga butang dili lamang alang sa atong mga kaugalingong kabulahanan kondili alang usab sa uban. Ang Ginoo maoy labing malipay kung kita makahimo sa mga butang nga makalipay ug maghatag og kaayo sa uban. Mao nga karon na ang hustong higayon sa paghimo niini. Panahon na sa pagbag-o sa atong tagsa tagsa ka kaugalingon.

Tataw kaayo kini sa atong Ebanghelyo karon. Si San Juan nga Magbubunyag gipadala sa kalibutan aron sa pagsangyaw aron ang mga tawo magbag-o ug mahimong andam sa pag-abot sa atong manunubos. Si San Juan nagbunyag pinaagi sa tubig apan si Jesus nagbunyag pinaagi sa Balaang Espiritu Santo aron kita nga iyang mga hinigugma mahimong andam modawat kaniya ug mobiya sa atong mga hiwi nga mga binuhatan.

Mga igsoon ko diha kang Kristo, aron mahimo kitang angayan ug andam sa atong pagpaabot sa atong Ginoo, kita gitawag sa pagbag-o. Atong bag- ohon ang atong kaugalingon pinaagi sa pagbiya sa atong mga dautan nga mga binuhatan nga maoy makapadaut sa atong maayong relasyon sa atong mga isig ka tawo ug ilabi na gayud sa atong relasyon sa Dios. Atong mapadayag ang atong paghigugma sa Dios pinaagi sa atong paghigugma sa atong isigkaingon. Ug kini makita sa atong mga maayong buhat ug pagserbisyo nga wala nagapaabot og balus. Ato kanunay'ng hatagan og pagtamod ang kabililhon sa Pulong sa Dios sa atong tagsa tagsa ka mga kinabuhi pinaagi sa pagpuyo niini aron sa hinay-hinay mabag-o ang atong kinabuhi ug mahimong andam sa pag- abot sa Ginoo.

Giya alang sa pamalandong:

1. Andam na ba kita sa pag-abot sa Ginoo? 

2. Unsa man ang angayan natong bag-ohon sa atong kaugalingon aron mahimo kitang andam?

(Pagkahuman, maggahin og hamubong kahilom alang sa pagpamalandong sa mensahe nga gipadayag. Human sa hamubong kahilom, mopadayon ang PSL sa pag-ingon:)

III. PAGSUSI SA KONSENSIYA

Pangulo: Palihug mangluhod. Ato karong susihon ang atong konsensiya diha sa mga mosunod nga pangutana pinaagi sa pagtubag sa kinaugalingon ug sa kahilom.

Unsa man ang akong batasan o kinaiya ngadto sa sakramento sa Pagkumpisal? Kinasingkasing ba gayud nga malingkawas ako gikan sa sala; pagbalik ngadto sa Dios, pagbag-o sa kinabuhi ug pagsulod ngadto sa lawom nga pakiglambigit sa Ginoo?

O Ako bang gilantaw kini ingon nga usa ka alantuson nga mahimong akong sagubangon ingon nga talagsaon lamang kini? (Hilom sa makadiyot)

Nahikalimtan ba nako pagsugilon o hinay-hinay nga paglimud ang bisan unsang mabug-at nga mga sala sa miaging mga pagkumpisal? (Hilom sa makadiyot)

Nabuhat ko ba ang pagkumpisal nga gihatag kanako? Nahimo ko ba ang pakig-uli sa bisan unsang kadaut ngadto sa uban? Naningkamot ba ako sa pagbansay-bansay sa dakung tinguha sa pag-agak sa usa ka maayong kinabuhi subay sa Maayong Balita? (Hilom sa makadiyot)

(Human niining tanang mga pangutana, maggahin gihapon og pipila ka gutlo alang sa pamalandong)

IV. RITO SA PAKIG-ULI

1. Katilingbanong Pagpangayo og Pasaylo

Pangulo : Palihug tindog. Mga igsoon, palandungon nato unsa ka daku ang gugma sa Dios alang kanatong tanan. Ato karon basolan ang atong mga sala ug pangayoon ta ang iyang pasaylo. 

Tanan : Nagakompisal ako sa Dios nga makagagahum sa tanan, ug kaninyo mga igsoon, kay nakalapas ako ug daku uyamot, sa hunahuna, sa pulong ug sa buhat, ug sa wala pagbuhat sa angayang buhaton. Kay akong sala, akong sala, akong dakung sala. Busa nangamuyo ako kang Santa Maria, kanunay Birhen, sa tanang mga anghel ug mga santos, ug kaninyo mga igsoon, aron inyo akong iampo sa Ginoo nga atong Dios.

Pangulo: O Dios nga among Amahan, kinasingkasing namong giangkon ang among mga sala. Apan sa makadaghan kami napakyas. Nakasala kami sa hunahuna, sa pulong, sa buhat, ug labi na gayud sa wala pagbuhat sa gikinahanglang buhaton. Gikan sa kahiladman sa among kasingkasing, nangayo kami karon og pasaylo ngadto sa tanan namong nasad-an, ngadto sa tanang nakasala gumikan sa among pagpakasala, ug ngadto sa tanan nga wala namo katabangi. Apan labaw sa tanan, nangayo kami'g pasaylo Kanimo, O Dios. Pasayloa kami ug luwasa kami pinaagi ni Kristo, among Ginoo.

Tanan: Amen.

2. Pangaliya Alang sa Tanan

Pangulo: Maghalad kita karon og mga pag-ampo ngadto sa makagagahum nga Dios nga sa kanunay kita andam sa paghiabot sa atong Manlu- luwas nga si Jesukristo sa atong kinabuhi. Sa matag pag-ampo, kita moingon: AMAHAN, PAMATIA KAMI.

1. Nga ang Espiritu sa kahibalo maggiya unta sa Sim- bahan, ilabina kang francisco, atong Santo Papa, mga obispo ug kaparian, nga magmasinugtanon ug mag- matinud-anon kanunay diha sa ilang makanunayong pagpangandam sa pagpaabot sa Manluluwas. Mag-ampo kita sa Ginoo.

2. Nga ang Espiritu sa kaalam, magdasig unta sa tanang mga lideres sa atong nasud uban ang pagpangandoy sa kalinaw ug hustisya alang sa tanang katawhan. Mag-ampo kita sa Ginoo.

3. Nga ang Espiritu sa gugma maggiya unta sa tanang mga katawhan sa pag-alagad nga matinud-anon sa atong mga kaigsoonan nga nanginahanglan ilabina niadtong nag-antus sa kawad-on ug mga kasakitan. Mag-ampo kita sa Ginoo.

4. Nga ang Espiritu sa gahum maglig-on unta kanatong tanan sa pagpanalipod sa katungud sa atong mga kaig- soonan kinsa gihikawan sa pag-angkon sa hustisya ug kalingkawasan. Mag-ampo kita sa Ginoo.

5. Nga ang Espiritu sa kinaadman maghatag unta kanato og hingpit nga pagsabut sa atong pagtoo ug sa kina- singkasing, atong ilhon ang Ginoo diha sa pagbuhat og maayo ug pagkinabuhi subay sa Iyang kabubut-on aron atong maangkon ang kinabuhi nga dayon. Mag-ampo kita sa Ginoo.

6. Nga ang Espiritu...(idugang dinhi ang panginahanglan sa katilingban). Mag-ampo kita.

7. Nga ang atong kaugalingon nga katuyuan, i-ampo nato sa hilom.

Pangulo : Amahan, amo nang nahalad ang among mga pag-ampo, uban sa tumang kaaghop ug pagtoo nga pinaagi Kanimo, kami maandam sa pagsugat sa pag-abot sa among Manluluwas nga si Jesukristo among Ginoo. Amen.

(Pagkahuman sa Pangaliya Alang sa Tanan, ang PSL mobalik sa iyang lingkoranan dala ang leksyonaryo nga anaa sa Ambo ug ibutang kinig balik sa may altar)

IV. PAGTIGOM SA GASA ALANG SA PAGHIGUGMA

1. Pagtigom sa mga Gasa

Pangulo : Manglingkod ang tanan.

Niining higayona human nato mapadayag ang atong pagtoo sa Ginoo, ato na usab ipadayag ang atong buhat sa gugma alang sa Simbahan ug panginahanglan sa atong katilingban pinaagi sa atong kinasingkasing nga paghalad sa mga gasa.

(Ipahigayon dinhi ang awit sa pagtigom sa mga gasa ug dawaton kini sa PSL.)

2. Amahan Namo.

Pangulo : Magpasalamat kita sa Dios pinaagi sa iyang bugtong Anak, si Jesukristo, tungod sa gasa sa pasaylo nga atong nadawat. Isip mga anak sa Dios, maghiusa kita pag-ampo sa Amahan Namo.

Tanan

Amahan namo (awiton)

Pangulo:

Ang labing daku nga timaan nga kita gipasaylo na sa Dios, mao ang atong pagpasaylo usab sa atong isigkatawo. Kining duha dili gayud mahimong bulagon. Busa, ipaila nato ang atong matuod nga pag-inigsoonay.

(Magpakita sa pag-ingisoonay ang matag usa. Mahimong maglamanohay ug mahimong awiton usab ang "Oh! I Love With The Love of the Lord".)

VI. RITO SA PAGTAPOS

1. Katapusang Pag-ampo

Pangulo : Ginoo among Dios, sa unang adlaw sa kabuhatan, gibuhat mo ang kahayag nga misabwag sa tibuok kangitngitan. Itugot, O Kristo, ang kahayag sa mga kahayag, nga sinalipdan sa kahangturan, mag-iwag sa katapusan ngadto sa imong katawhan ug maglingkawas kanila gikan sa kangitngitan sa sala.

Pun-a ang among kinabuhi sa mga maayong buhat ingon sa paghimamat sa imong Anak aron mahinangpon kami motugyan kaniya. Kini among gipangayo pinaagi ni Kristo among Ginoo.

-0-

Makagagahum ug way - katapusang Dios, gipadala mo ang imong bugtong Anak sa pakig- uli sa kalibutan diha kanimo. Isaa gikan sa among kasingkasing ang mangitngit nga kabudlay sa sala aron makasaulog kami sa banagbanag nga pagkatawo ni Kristo uban sa angayang kalipay. Kini among gipangayo pinaagi ni Kristo among Ginoo.

Tanan

Amen.

3. Panalangin ug Panamilit

Pangulo

Ug manalangin kanato ang mahigugmaon ug mapasayloong Dios, sa ngalan sa Amahan, ug sa Anak ug sa Espiritu Santo.

Tanan: Amen.

4. Pahibalo

(Basahon sa Pangulo ang mga pahibalo nga inandam sa daan.)

Pangulo :

Palihug manglingkod alang sa mga pahibalo.

5. Katapusang Awit

Pangulo: Manindog kita alang sa katapusang awit.