34th Sunday

Ikakatloag-upat nga Domingo Sulod sa Tuig

CRISTO, ANG HARI

PASIUNA

Nobyembre 20, 2022

Maayong buntag/hapon mga igsoon diha ni Kristo!

Ania na kita sa Ikakatloan ug Upat nga Domingo sa Ordinaryong Panahon. Niining Domingoha gisaulog sa Simbahan ang Solemnidad ni Kristo, ang Hari sa tibuok kalibutan ug tapuson usab nato karon ang Ordinaryong Panahon sa Lituryanhong Kalendaryo.

Ang unang pagbasa gikan sa Ikaduhang Basahon ni Propeta Samuel, kini mao ang pagdihog kang David isip hari sa mga Israelita

Ang ikaduhang pagbasa gikan sa Sulat ni San Pablo ngadto sa mga taga-Colosas. Kini nagsaysay mahitungod sa pagkalabaw pa sa Ginoo sa tanang mga binuhat nga makita ug dili makita.

Ang ebanghelyo gikan sa Santos nga Ebanghelyo sumala ni San Lucas. Si Jesus miingon, "Amen, sultihan ko ikaw, karong adlawa mahiuban ka kanako didto sa Paraiso.

Uban sa kalipay ug pagmaya, manindog kita alang sa pagsugod sa Santos nga Eyukaristiya

BASAHON I

2 Sm. 5:1-3

KINUTLO GIKAN SA IKADUHANG BASAHON NI SAMUEL

Unya miadto kang David didto sa Hebron ang tanang banay sa Israel ug giingnan nila siya, "Kami imong mga kadugo. Sa nangaging mga panahon nga si Saul maoy among hari, ikaw ang nangulo kanamo ug giingnan ka sa GINOO, 'Ikaw ang pangulo sa akong katawhan, ang mga Israelita, ug ikaw ang maghari kanila."" Busa ang mga pangulo sa Israel miadto kang David didto sa Hebron, ug nakigsabot siya kanila atubangan sa GINOO, ug gidihogan nila si David ingon nga hari sa Israel.

ANG PULONG SA GINO0.

SALMO RESPONSORYO

Ps. 122:1-2, 3-4, 4-5

R. Nalipay ako nga giingnan ako nila; mangadto na kita sa balay sa Ginoo.

Nalipay ako kay giingnan ako nila, "Mangadto na kita sa balay sa Ginoo." Ug karon nagabarog na kami sulod sa imong mga ganghaan, O Jerusalem.

R. Nalipay ako nga giingnan ako nila; mangadto na kita sa balay sa Ginoo.

Jerusalem, nga gitukod ingog usa ka siyudad nga gipundok sa kahiusa. Ngadto kaniya nanungas ang mga tribo, ang mga tribo sa Ginoo.

R. Nalipay ako nga giingnan ako nila; mangadto na kita sa balay sa Ginoo. 

Sumala sa kasugoan alang sa Israel, aron pagpasalamant sa ngalan sa Ginoo.

Diha kaniya gipabarog ang mga lingkoranan sa hukmanan, ang mga lingkoranan alang sa balay ni David.

R. Nalipay ako nga giingnan ako nila; mangadto na kita sa balay sa Ginoo.

BASAHON II

Col. 1:12-20

KINUTLO GIKAN SA SULAT NI SAN PABLO NGADTO SA TAGA-COLOSAS

Pasalamati ninyo ang Amahan nga naghimo kaninyong takus sa pag-ambit sa gitagana sa Dios alang sa iyang katawhan didto sa gingharian sa kahayag. Kay giluwas kita niya gikan sa gahom sa kangitngit ug gidala ngadto sa gingharian sa iyang hinigugmang Anak nga maoy nagluwas kanato ug nagpasaylo sa atong mga sala.

Si Cristo mao ang makita nga larawan sa dili makita nga Dios. Siya ang Panganayng Anak ug labaw siya sa tanang binuhat. Kay pinaagi kaniya gibuhat sa Dios ang tanan nga atua sa langit ug ania sa yuta, makita ug dili makita-mga gahom nga espirituhanon, mga punoan, mga hari, ug ang tanan nga nagmando. Gibuhat sa Dios ang tanan pinaagi kaniya ug alang kaniya. Diha na siya sa wala pa buhata ang tanang butang, ug diha kaniya ang tanan nahimutang sa ilang hustong dapit. Siya ang ulo sa simbahan nga mao ang iyang lawas. Siya ang naghatag og kinabuhi sa lawas; siya ang unang gibanhaw sa mga patay aron siya ang mag-una sa tanan. Kay pagbuot sa Dios nga ang Anak maghupot sa bug- os nga kinaiya sa Dios. Busa pinaagi sa Anak gipasig-uli sa Dios ngadto sa iyang kaugalingon ang tanang butang sa langit ug sa yuta. Nakigdait ang Dios pinaagi sa kamatayon sa iyang Anak didto sa krus.

ANG PULONG SA GINOO.

EBANGHELYO

Lk. 23:35-43

Kinutlo gikan sa Ebanghelyo sumala ni Lucas

Ug nagtindog didto ang katawhan samtang nagatan-aw; apan nagbiaybiay ang kadagkoan nga nagaingon, "Giluwas niya ang uban, paluwasa siya sa iyang kaugalingon, kon kini siya mao ang Cristo sa Dios, ang Pinili."

Ug nagpunay og bugalbugal usab kaniya ang mga sundalo ug miduol nga mihalad kaniya ug suka ug miingon kaniya, "Ikaw ang hari sa mga Judio, luwasa ang imong kaugalingon."

Ug didto usab adunay nahisulat ibabaw kaniya, "KINI MAO ANG HARI SA MGA JUDIO."

Ug usa sa mga gibitay nga kriminal nagpunay og pasipala kaniya nga nagaingon, "Dili ba ikaw ang Cristo Luwasa ang imong kaugalingon ug kami."

Apan mitubag ang lain, nga nagbadlong kaniya ug miingon, "Wala ka ba mahadlok sa Dios kay ikaw usab ania sa maong silot? Ug kita angay lamang, kay nadawat nato ang tukma sa atong mga binuhatan; apan kining tawhana walay daotan nga gihimo."

Ug mipadayon siya og ingon, "Jesus, hinumdomi akò kon moabot ka na sa imong gingharian."

Ug miingon siya kaniya, "Amen, sultihan ko ikaw, karong adlawa mahiuban ka kanako didto sa Paraiso."

Ang Ebanghelyo sa Ginoo.

PANGALIYA SA KATILINGBAN 

NOVEMBER 20, 2022

PARI: Niining pagsaulog nato sa kapistahan ni Kristo isip usa ka hari, ato karong ipadangat ngadto sa atong Langitnong Amahan ang tanan natong mga pag-ampo Sa matag pangamuyo,kita moingon:

MALULUY-ON NGA DIOS,DUNGGA KAMI.

1. Nga ang simbahan makabaton sa matuod nga diwa sa pagkahari ni Kristo nga andam moalagad ug mohalad sa iyang kaugalingon alang sa kabulahanan sa tanan. Mag-ampo kita.

2. Nga ang mga lideres sa atong panggamhanan magmatinud-anon sa ilang pagkahari nga mogahin ug panahon sa pagpakabana sa panginahanglan sa tanang katawhan ilabina sa mga kabus ug timawa. Mag-ampo kita.

3. Nga ang mga namasakiton ug nag-antus sa nagkadaiyang kalsod sa kinabuhi, makasinati sa pag-amoma sa Dios pinaagi sa atong mga kaigsuonan nga migahin sa ilang talent, panahon ug bahandi sa pagtabang kanila. Mag-ampo kita. 

4. Nga ang mga pangulo sa matag Gagmayng Kristohanong Katilingban maghupot sa gugma ug kaluoy diha sa gugma ug kaluoy diha sa pagkahari ni Kristo.Mag-ampo kita.

5. Nga panalanginan unta sa Ginoo sila si _______________ kinsa nagpasalamat sa Dios, ila untang maangkon ang ilang mga pangandoy sa kinabuhi. Mag-ampo kita.

6. Nga ang atong mga kaigsuonang nangamatay ilabina nila ____________ makadayon na sa gingharian sa langit. Mag-ampo kita.

PARI: Makagagahum nga Dios, dungga ang mga pag-ampo sa imong katawhan ug tabangi kami nga among mahuptan sa kanunay ang panig-ingnan sa imong Anak si Hesukristo ang hari sa among kinabuhi hangtod sa kahangturan, Amen.

PAHIBALO
Nobyembre 20, 2022
 
 
1. Ang DXGN 89.9 Spirit FM Davao nagpahigayon ug usa ka Raffle Bonanza kini mao ang "GASA KANG SANTA MARIA". Ang mga ticket mamahimong mapalit sa opisina sa atong parokya sa kantidad nga 100 pesos. Ang raffle draw ipahigayon karong Desyembre 12, 2022. Dagkong premyo ang naghulat alang sa mga mananaog.
 
2. Ang St. Francis Xavier College Seminary (XACOSE), nag organisa ug usa ka Fundraising Concert karong umaabot nga Desyembre 1, 2022, huwebes sa ala 7:00 sa gabii diha sa Holy Cross of Davao College Gym, Sta. Ana Avenue, Davao City. Featuring The Reo Brothers Band. Ang ticket mamahimo nang mapalit diha sa opisina sa atong simbahan sa kantidad nga 500 pesos matag usa.
 

Daghang Salamat.