KASAULOGAN SA PULONG

IKA-KATLOA'G USA NGA DOMINGGO

a. UNANG BASAHON 

Kinaadman 11:22-12:1

Ang pagbasa gikuha gikan sa basahon sa Kinaadman.

Sa imong atubangan ang tibook kalibutan daw usa lamang ka lugas nga balas, may gibug-aton nga lugos gani makapalihok sa mga timbangan, usa ka tulo sa yamog diha sa yuta sa kabuntagon.

May igo ikaw nga gahum sa pagbuhat bisan unsa, apan maloloy-on ka sa tagsa-tagsa; wala nimo tagda ang among mga sala ug gihatagan mo kami og panahon sa paghinulsol. Gihigugma mo ang tanan nga ania; wala ikaw magtamay sa bisan unsa nga imong gibuhat. Kun wala pa nimo kini higugmaa, una sa tanan, wala unta kini nimo himoa. Unsaon man paglungtad sa bisan unsa, kun dili ikaw magbuot niini? Unsaon pagpadayon niini kun wala pa nimo kini buhata? Nagtugot ikaw niining tanan nga maania kini, O Ginoo, tungod kay kini imoha man, ug gihigugma nimo ang tanang mga buhi. Ang imong espiritu nga dili mamatay anaa sa tagsatagsa kanila.

Mga igsoon, ang Pulong sa Ginoo.

b. SALMO RESPONSORYO

Salmo 145:1-2,8-9,10-11,13-14

Tubag (R)-Dayegon ko ang imong ngalan sa kahangturan, akong Hari ug akong Dios.

Bayawon ko ikaw, akong Dios ug akong Hari. Dayegon ko ang imong ngalan hangtud sa kahangturan. Matag adlaw dayegon ko ikaw, ug himayaon ko ang imong ngalan hangtud sa kahangturan. (R)

Ang Ginoo mahigugmaon ug maloloy-on dugay nga masuko ug dako'g kalooy. Ang Ginoo maayo alang sa tanan ug maloloy-on alang sa tanan niyang mga binuhat. (R)

Papasalamata kanimo ang tanan mong mga buhat, O Ginoo, ug padayega kanimo ang tanan nga nagatoo kanimo. Pasultiha sila bahin sa himaya sa imong gingharian ug pasuginla sila sa imong kagahuman. (R)

Ang Ginoo matinumanon diha sa tanan niyang mga pulong ug balaan diha sa tanan niyang mga buhat. Ang Ginoo nagapatindog sa tanan nga nangapukan ug nagabangon kanila nga nangapilay. (R)

c. IKADUHANG BASAHON

2 Tesalonica 1:11; 2:2

Ang pagbasa gikuha gikan sa ikaduhang sulat ni San Pablo ngadto sa taga-Tesalonica.

Mao kini hinungdan nga kanunay kaming nag-ampo alang kaninyo. Nangamuyo kami sa atong Dios aron himoon kamo niyang takos sa iyang pagtawag kaninyo. Hinaut unta nga pinaagi sa iyang gahum tagbawon niya ang tanang maayo nga inyong gipangandoy ug hingpiton niya ang inyong buhat sa pagtoo. Niining paagiha ang ngalan sa atong Ginoong Jesus mapasidunggan tungod kaninyo ug kamo tungod kaniya, pinaagi sa grasya sa atong Dios ug sa Ginoong Jesukristo.

Mahitungod sa pag-anhi sa atong Ginoong Jesukristo ug sa iyang pagtigom kanato aron pagpakig-uban kaniya, nagahangyo ako kaninyo mga igsoon: ayaw kamo katingla dayon ug kabalaka sa taho nga ang Adlaw sa Ginoo miabot na. Ayaw kini'g tuohi bisa'g gipasikad pa kini sa tagna o sa wali o sa sulat nga kuno gikan kanamo.

Mga igsoon, ang Pulong sa Ginoo.

d. EBANGHELYO

Lucas 19:1-10

Ang pagsangyaw sa Maayong Balita sumala ni San Lucas.

Si Jesus mipadayon ngadto sa Jerico ug samtang miagi siya, may usa ka dato nga gihinganla'g Saqueo, nga pangulo sa mga kobrador sa buhis, nga naninguha pagtan-aw kun kinsa siya. Apan mubo si Saqueo ug wala siya makakita kang Jesus tungod sa panon sa mga tawo. Busa midagan siya una sa panon ug misaka sa kahoy nga sikomoro, aron makakita siya kang Jesus nga moagi niadtong dalana. Sa pag-abot na ni Jesus niadtong dapita, mihangad siya sa kahoy ug miingon kang Saqueo, "Kanaog dayon, Saqueo, kay adto ako moabot sa imong balay karong adlawa." 

Mikanaog si Saqueo pagdali ug sa dakong kahinangop midawat kang Jesus. Ang tanan nga nakakita niini nagbagulbol, "Kining tawhana namisita sa balay sa usa ka makasasala!"

Mitindog si Saqueo ug miingon sa Ginoo, "Sir, paminaw! Ihatag ko ang katunga sa akong katigayonan ngadto sa mga kabus, ug kun ako nakalimbong kang bisan kinsa, ulian ko siya'g upat ka pilo." Si Jesus miingon kaniya, "Karong adlawa miabot ang kaluwasan niining balaya, kay kining tawhana kaliwat usab ni Abraham. Kay mianhi ang Anak sa Tawo aron sa pagpangita ug pagluwas sa nawala."

Mga igsoon, ang Maayong Balita sa atong Ginoo.

e. KOMENTARYO

Tema: Gugma ug Pagtoo

Karong Dominggoha mao ang Ikakatloa'g Usa nga Dominggo sa Ordinaryong Panahon. Ang atong mga pagbasa karon naghulagway sa pagkamahigugmaon sa Ginoo sa tanan Niyang kabuhatan sa kalibutan ilabina na gayud ngadto sa mga katawhan nga Iyang tinubos.

Ang Unang Pagbasa nagsaysay kini sa pagkamahigugmaon sa Ginoo ngadto sa tawo, nga bisan sa pagkamahuyang sa tawo nagpabilin ang gugma nga inubanan sa dakung kalooy. Tungod sa dakung gugma ug kalooy sa Ginoo wala Niya tagda ang mga sala nga nabuhat sa tawo, hinoon gihatagan Niya og panahon sa paghinulsol.

Diha sa atong Ikaduhang Pagbasa karon, si San Pablo nangamuyo nga himoon untang takus sa Ginoo ang mga katawhan sa Tesalonica aron mahingpit ang gipangandoy nga buhat sa pagtuo. Dinhi sa maong sulat, nagpakita lamang nga wala pasagdi sa Ginoo ang mga katawhan nga Iyang binuhat, nga tungod niini gipadala Niya si San Pablo ngadto kanila aron madasig sila sa pagbuhat og maayo ug aron mahinumdom sila nga ang Ginoo nahigugma pag-ayo kanila.

Mga igsoon, diha sa atong Ebanghelyo karon gihulagway ang pinakadako nga panghitabo sa grasya sa kaluwasan nga nadawat sa tawo. Ngano man? Tungod kay si Saqueo wala magdumili sa gitanyag nga kaluwasan. Nga bisan pa sa iyang dili pagkaangayan, nahimo siyang takus tungod sa gugma sa Ginoo.

Alang sa mga Hudeyo nga kultura kung usa ka sa pangulo sa kobrador og buhis giisip nga usa ka kadautan o makasasala (hinumduman nato nga niining panahona ang Israel ubos sa mando sa mga Romanhon). Kasagaran sa kobrador sa buhis dagko og singil. Dinhi usab mahitabo ang "corruption". Mao nga giisip siya nga walay labot sa katilingban. Ug dinhi nagduda ang mga tawo nga ang iyang pagka-adunahan bunga sa dili makiangayong pagpangubra og buhis.

Karon, unsa man ang hagit niining atong mga pagbasa ilabina diha sa atong Ebanghelyo? Atong hinumduman nga nahagit si Saqueo sa presensya ni Kristo. Mao nga sa iyang pagkamubo nga tawo nisaka siya sa kahoy aron lamang makita niya ang Ginoong Jesukristo. Nangangha siya tungod kay wala niya palandunga nga siya diay ang tuyo sa Ginoo. Ang tuyo sa Ginoo mao ang kabag-ohan ni Saqueo diha sa iyang pagkinabuhi. Kini nagpadayag lamang sa pagka-mahigugmaon sa Ginoo. Ug sa dakung gugma ug kalooy sa Ginoo ngadto kang Saqueo Iyang gihaw-as siya gikan sa sala.

Kini maoy usa sa mga katuyuan sa atong pamalandong karon, nga atong matngunan nga ang Ginoo walay gipili. Ma-adunahan o makabus ka man gitawag kita diha sa pagpangalagad sa Simbahan. Ang pagtawag ni Kristo sa mga adunahan mao ang imbitasyon sa pagkakabus sa kaugalingon aron matuman ang pagpakaylap sa Gingharian sa Dios.

Kita usab gihagit sa pagpalig-on sa atong pagtoo pinaagi diha sa atong mga maayong buhat. Isalikway nato ang atong pagpakasala ug mga hiwi nga binuhatan ug bag-ohon nato ang atong kaugalingon sama sa gibuhat ni Saqueo. Hinaut pa unta!

Giya alang sa Pamalandong:

1. Sa akong pagkabinunyagan mapasalamaton ba ako sa gasa sa pagtuo nga ako nahisakop sa pamilya sa Dios nga mahigugmaon, nga mao ang Simbahan?

2. Andam ba ako sa kanunay sa pagbag-o sa akong kinabuhi subay sa kabubut-on sa Dios?

f. PANGALIYA

Pangulo: Uban sa dakung pagsalig, mag-ampo kita sa atong Langitnong Amahan sa atong mga panginahanglan atol niining balaan nga kasaulogan. Sa matag pangamuyo kita motubag: GINOO, DUNGGA KAMI.

1. Nga ang kinatibuk-ang Simbahan uban sa mga nagdumala niini, nga sa kanunay giyahan ang mga makaluwasang gimbuhaton ug mga paningkamot sa pagsaksi sa gugma ug kalooy. Mag-ampo kita.

2. Nga ang mga lideres sa tanang kanasuran ilabina dinhi sa atong nasud, lamdagan kanunay Balaang Espiritu Santo sa aron ang ilang pagpangalagad sa tanang katawhan adunay kaangayan ug hustisya. Mag-ampo kita.

3. Nga ang mga pangulo sa mga GKK makadawat kanunay sa panalangin sa Dios aron malig-on sila sa ilang kaakuhan sa pagpakaylap sa Iyang mensahe sa gugma ug kalooy. Mag-ampo kita.

4. Nga ang mga nag-antus sa kawad-on sa kinabuhi makabati sa presensya sa Dios pinaagi sa mga tawo nga manggihatagon kanila. Mag-ampo kita.

5. Nga ang mga sakop sa atong katilingban nga nangamatay makasulod na sa Gingharian nga giandam alang kanila isip ganti sa ilang mga maayong binuhatan. Mag-ampo kita.

Pangulo: Mahigugmaon nga Dios, dili hitupngan ang Imong kalooy ug kamabination sa Imong katawhan. Malaumon kami nga Imong tubagon ang among mga pag-ampo pinaagi ni Kristo among Ginoo. Amen.