KSP OCT. 19, 2022

IKA-KATLOAN NGA DOMINGGO

A. UNANG BASAHON

Sirac 35:12-14,16-18

Ang pagbasa gikuha gikan sa basahon ni Sirac.

Ayaw pagsulay sa pagsuborno kaniya o sa pagsalig sa mga halad nga imong nakuha sa paagi nga dili maayo. Dili siya modawat niini. Ang Ginoo maklangayon ug dill siya magpakita og pinalabl. Wala siya magbaton ug daang panghukom batok sa kabus; kun may usa ka tawo nga mag-ampo nga siya gilupigan, ang Ginoo mamati kaniya. Kun ang mga ilo ug mga biyuda mag-ampo, sila iyang tagdon.

Alagari nga mahinangpon ang Ginoo ug dawaton ka niya; ang imong mga pag-ampo moabot hangtud sa kapanganoran. Ang pag-ampo sa usa ka tawo nga mapaubsanon mosaylo sa mga panganod ug magpadayon pagsaka hangtud moabot sa Ginoo nga Labing Halangdon, diin magpabilin kini hangtud lyang tubagon pinaagi sa paghimo nga ang hustisya matuman ug nga ang sad-an silotan. Ug ang Ginoo mobuhat sa walay langan. Dili siya makapailob sa daotan nga mga tawo. Manimalos siya pinaagi sa pagdugmok sa walay tinuohan. Puohon niya sa hingpit ang mga walay kalooy ug ang mga mapahitas-on ug laglagon niya ang gahum sa mga dautan.

Mga igsoon, ang Pulong sa Ginoo.

B. SALMO RESPONSORYO

Salmo 34:2-3,17-18,19,23

Tubag (R)-Ang Ginoo nagpatalinghog sa singgit sa kabus.

Dayegon ko ang Ginoo sa tanang panahon, ang iyang kadayganan maania kanunay sa akong baba. Maghimaya ang akong kalag diha sa Ginoo; makabati kanako ang mapaubsanon ug malipay. (R)

Ang Ginoo nakigharong sa mga nagbuhat og dautan aron mapapas ang ilang handumanan dinhi sa yuta. Sa pagtuwaw sa matarong nagapatalinghog kanila ang Ginoo ug sa tanan nilang mga kalisdanan giluwas niya sila. (R)

Ang Ginoo haduol sa mahinulsolon og kasingkasing; ug luwason niya ang mga naguol. Luwason sa Ginoo ang kinabuhi sa iyang mga sulugoon; walay makasala kanila nga modangop kaniya. (R)

C. IKADUHANG BASAHON

2 Timoteo 4:6-8,16-18

Ang pagbasa gikuha gikan sa ikaduhang sulat ni San Pablo ngadto kang Timoteo.

Bahin kanako, miabot na ang takna nga iula ang akong dugo; panahon na nga mobiya ako niining kinabuhia. Gihimo ko kutob sa akong maabot ang pagpakiglumba, ug natapos ko gayud kini; glampingan ko ang akong pagtoo. Ug karon gitagana alang kanako ang ganti sa kadaogan, ang purongpurong sa pagkamatarong nga niadto unyang adlawa Iganti kanako sa Ginoo, ang matarong nga Maghuhukom - ug dili kanako lamang kondili sa tanan gayud nga nagpaabot sa iyang pagpadayag.

Sa una kong pag-atubang sa hukmanan, wala gayoy mibulig kanako; gitalikdan ako sa tanan. Hinaut unta nga dili sila pakasad-on sa Dios niini. Apan ang Ginoo miunong kanako ug mihatag kanako'g kusog aron ikasangyaw ko ang tibook mensahe ngadto sa mga dili Judio, ug giluwas ako gikan sa baba sa liyon. Ug luwason ako sa Ginoo gikan sa tanang kadautan ug dad-on ngadto sa iyang langitnong Gingharian. Kaniya ang himaya hangtud sa kahangturan. Amen.

Mga igsoon, ang Pulong sa Ginoo.

D. EBANGHELYO

Lucas 18:9-14

Ang pagsangyaw sa Maayong Balita sumala ni San Lucas.

Gisugilon usab ni Jesus kining sambingaya ngadto sa mga naniguro nga sila maayong tawo ug nagtamay sa uban. "May duha ka tawo nga nangadto sa Templo aron pag-ampo; ang usa Pariseo ug ang usa kobrador sa buhis. Ang Pariseo naglain pagtindog ug nag-ampo, 'Nagpasalamat ako kanimo, O Dios, nga ako dili hakog, dill tikasan ug dili himabayi sama sa uban; nagpasalamat ako kanimo nga dili ako sama nianang kobrador sa buhis. Nagpuasa ako'g duha ka adlaw matag semana, ug naghatag ako kanimo'g ikapulo sa tanan kong abot." Apan ang kobrador sa buhis nagtindog sa layo ug dili gani moyahat ngadto sa langit; nagpamukpok siya sa iyang dughan ug nag-ingon, 'O Dios, malooy ka kanako nga usa ka makasasala!

Unya miingon si Jesus, "Sultihan ko kamo nga ang kobrador sa buhis, ug dili ang Pariseo, mao ang gikahimut an sa Dios sa iyang pagpauli sa ila. Kay ang tanan nga magpataas sa lyang kaugalingon ipaubos, ug ang tanan nga magpaubos sa iyang kaugalingon ipataas."

Mga igsoon, ang Maayong Balita sa atong Ginoo.

E. KOMENTARYO

Tema: Ang Mapaubsanong Makasasala

Ang pasumbingay sa atong Ebanghelyo karong adlawa nagpaklaro nga ang pagbuhat sa usa ka tawo sa mga maayong butang dili garantiya nga makadawat siya sa grasya o pabor gikan sa Ginoo. Kon sa atong pag-ampo atong ipasigarbo sa Ginoo ang kanunay nato nga pagsimba ug pagsunod sa mga balaod sa simbahan, nan wala kitay kalainan sa pareseo nga naghunahuna nga labaw siya kaysa uban kay nabuhat man niya ang mga maayong butang. Mga igsoon, dili sayop ang pagbuhat sa mga maayong butang ug pagsunod sa kabubut-on sa atong Langinong Amahan. Daku kaayo kini og ikatabang nga dunggon sa Ginoo ang atong mga pag-ampo. Apan dili kini makapahimuot sa Ginoo ni ika-garantiya nga Iyang dunggon ang atong mga pag-ampo kung ato kining gamiton aron sa pagpanghimaraot ug pagdaut sa uban nga wala nagbuhat sa atong mga maayo nga gipangbuhat. Ug labaw sa tanan kon ato kining gamiton aron pugson nato ang Ginoo nga dunggon Niya ang atong mga pag-ampo.

Kasagaran sa panahon nga ang pareseo nag ampo ug nagpasalamat sa Ginoo, apan ang tinuod mao nga nagpasigarbo sila sa mga butang nga ilang nahimo: ang pagsunod sa balaod ug pagkamatinud anon sa kabubut-on sa Ginoo. Bisan tuod nagtuman sila sa nahisulat sa balaod, apan nagkulang sila sa kinasingkasing nga pagtuman niini. Daku kaayo sila og kalainan sa tawo nga tigkolekta og buhis, ang tawo nga giila sa katilingban nga makasasala tungod sa iyang trabaho, mapaubsanong nangayo og pasaylo sa Ginoo. Matinud-anon siyang nasayod nga ang tawo nagkinahanglan gayud sa panabang sa Ginoo. Mao kini siya ang nakaangkon sa grasya ug panabang sa Ginoo, dili ang mapasigarbuhong pareseo. Sama sa giingon ni Jesus sa Iyang mga apostoles, "Ang si kinsa nga magpataas sa iyang kaugalingon ipaubos, ug ang magpaubos sa iyang kaugalingon ipataas."

Kinahanglan gayud natong hinumduman nga kitang tanan managsama lamang sa mata sa Ginoo. Walay bisan isa nga magpasigarbo sa iyang nabuhat nga mga maayong butang aron sa panghimaraot sa uban. Ang pagsunod sa balaod ug kabubut-on sa Ginoo nagpunting sa kinahiladman sa tawo, dili kung unsa siya kamaayo kaysa ubang tawo.

Isip matouhong katawhan nga kanunay nangayo sa panabang sa atong Langitnong Amahan, angay natong pamalandungan kun giunsa nato pagpahiluna ang atong kaugalingon sa atubangan sa Ginoo diha sa atong pag-ampo. Ato bang gipasigarbo sa Ginoo ang atong nabuhat nga mga maayong butang aron dunggon Niya ang atong mga pag-ampo? Unsay atong katuyuan sa atong pagsunod sa Iyang mga balaod ug kabubut on: tungod ba kay aduna kitay gusto nga makuha o madawat gikan Kaniya, o tungod ba kay nahigugma kita Kaniya? Ang mga mapaubsanon nga kasingkasing mao ang makapalipay ug makapahimuot sa Ginoo, ug dili ang garboso. Sama sa pagsaysay ni Santiago, "Ang Ginoo dili magtagad sa mga mapahitas-on, apan naghatag Siya og grasya sa mga mapaubsanon" (Jas. 4:6). Ug sama usab sa gisaysay ni Maria, "Ang Ginoo naglaglag sa garbusong mga Hari gikan sa ilang mga trono, ug Iyang gibayaw ang mga mapaubsanon" (Lk 1:51-52).

Sa katapusan, angay natong susihon ang atong tagsatagsa ka kaugalingon kung ang atong pagkamaampoon nakapahiduol ba kanato sa Ginoo? O nakapahilayo ba hinoon kini?

Giya alang sa Pamalandong:

1. Sa akong pagkamakasasala masaligon ba ako sa makanunayong pagpasaylo sa mahigugmaong Amahan kanako?

2. Mapaubsanon ba akong midawat sa akong mga kasaypanan ug andam moduol Kaniya diha sa Sakramento sa Pakig-uli?

F. PANGALIYA

Pangulo: Mag-ampo kita sa atong Langitnong Amahan kinsa kanunay nga naminaw sa atong mga panginahanglan. Sa matag pangamuyo kita motubag: O DIOS, DUNGGA KAMI.

1. Alang sa kinatibuk-ang Simbahan nga kini molambo ug magpadayon nga maglawig nga puno sa gugma pagkamasaligon sa Dios ang tinubdan sa tanang grasya ug kalig-on. Mag-ampo kita.

2. Alang sa mga nangulo sa tanang kanasuran nga sama sa paghigugma sa Dios sa Iyang katawhan, mabati sa mga katawhan ilabina kadtong nanginahanglan. Mag ampo kita.

3. Alang sa mga adunahan nga makabaton sila sa hiyas sa pagkamaloloy-on ug pagkamabination ilabina sa mga kabus. Mag-ampo kita.

4. Alang sa mga nangulo sa matag GKK nga mamahimo silang buhing panig-ingnan sa pagpadayag sa hulagway sa Dios nga maloloy-on. Mag-ampo kita.

5. Alang kanatong tanan nga makaamgo kita sa mga mensahe sa Dios aron mamahimo kitang abli sa mapadayonong kausaban ug kabag-ohan sa inadlaw-adlaw natong pagkinabuhi. Mag-ampo kita.

6. Alang sa kaugalingon natong katuyuan, ato kining ipadayag diha sa kahilum.

Pangulo: Ginoo among Dios, nasayud kami manga Ikaw ang tinubdan sa tanang kaayohan ug grasya. Itugot nga amo nang madawat ang among gihalad nga mga pag-ampo karon pinaagi ni Kristo Imong Anak ug among Manluluwas. Amen.