Mga pagbasa karong Domingo August 21, 2022

IKA-KAWHAA'G USA NGA DOMINGGO

PASIUNANG PAG-AMPO

O Dios, ang tanang kamatuoran naggikan kanimo. Hiusaha ang among mga kasingkasing aron sa matag dungog namo sa imong Pulong magmaya ang among kinabuhi.

Luyo sa nagkadaiyang mga pagpanlimbasog sa kalibutan, tabangi kami nga madala unta namo ang kalinaw sa imong gingharian nga ang kalibutan mismo wala makahatag niini.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. UNANG BASAHON

Isaias 66:18-21

Ang pagbasa gikuha gikan sa basahon ni Propeta Isaias.

Nasayud ako sa ilang binuhatan ug hunahuna, ug moabot ako aron pagtigom sa tanang kanasoran ug katawhan; manganhi unya sila ug makakita sila sa akong gahum, ug magbutang ako'g ilhanan diha kanila. "Ipadala ko ngadto sa ubang kanasuran ang pipila sa nahisalin kanila: ngadto sa Espana, sa Libya, sa Lydia, ug ngadto sa Tubal ug sa Grecia ug sa mga pulo nga atua sa layo nga wala makadungog sa akong ngalan ug makakita sa akong gahum; imantala nila ang akong gahum ngadto sa kanasuran.

Ug dad-on nila gikan sa tanang kanasuran ang tanan ninyong kaigsoonan aron ihalad ngadto sa Ginoo; magsakay sila og mga kabayo, mga karwahe, mga karomata, mga asno ug mga kamelyo ug mangadto sila sa balaan kong bukid, ang Jerusalem, nag-ingon ang Ginoo.

Ihalad kamo nila ngari kanako ingon nga maghalad ang mga Israelita didto sa Templo sa Ginoo sa ilang halad nga pagkaon sinulod sa limpiyong sudlanan. Himoon kong mga pari ug mga Levita ang uban kanila. 

Mga igsoon, ang Pulong sa Ginoo.

b. SALMO RESPONSORYO

Salmo 117:1,2

Tubag (R)-Panglakaw kamo sa tibook kalibutan, ug isangyaw ang Maayong Balita.

Dayega ang Ginoo, kamong tanang mga nasud; himayaa siya kamong tanang katawhan. (R)

Kay makanunayon ang iyang kalooy alang kanato ug ang kamatinud-anon sa Ginoo nagalungtad sa kahangturan. (R)

c. IKADUHANG BASAHON

Hebreo 12:5-7,11-13

Ang pagbasa gikuha gikan sa sulat ngadto sa mga Hebreo.

Nalimot ba kamo sa makapadasig nga mga pulong nga gisulti sa Dios kaninyo ingon nga iyang mga anak? "Anak, ayaw isipa nga diyotay ra'g bili ang pagkastigo sa Ginoo kanimo, ug ayaw kaluya kun badlongon ka niya. Kay kastigohon sa Dios ang tanan nga iyang gihigugma, ug latoson ang tanan nga iyang gisagop ingon nga anak." Antosa ang pagkastigo kaninyo ingon nga kini gikan sa inyong amahan, kay nagpaila kini nga giisip kamo sa Dios nga iyang mga anak. May anak ba gud nga dili kastigohon sa iyang amahan? Kun kastigohon kita, makasubo kini kanato Inay nga makalipay. Apan sa kaulahian kadtong nakadawat sa maong pagpanton makaani sa kinabuhing matarong ug ganting malinawon.

Busa ituboy ang nahuyhoy ninyong mga kamot ug lig ona ang naluya ninyong mga tuhod. Subaya ninyo ang tul-id nga mga dalan aron dili mainutil ang piang ninyong tiil kondili mamaayo hinoon.

Mga igsoon, ang Pulong sa Ginoo.

d. EBANGHELYO

Lucas 13:22-30

Ang pagsangyaw sa Maayong Balita sumala ni San Lucas.

Human niini, miadto si Jesus sa kalungsoran ug kabalangayan ug nanudlo samtang nagpaingon siya sa Jerusalem. Unya may usa ka tawo nga nangutana kaniya, "Sir, diyotay ra bay maluwas?" Si Jesus mitubag, "paningkamot kamo pagsulod sa sigpit nga pultahan, kay daghan ang mosulay apan dili makasulod. Mobangon ang pangulo sa panimalay ug sirhan niya ang pultahan. Unya inigtindog ninyo didto sa gawas ug magsugod kamo pagtuktok sa pultahan nga magaingon, Sir, ablihi intawon ang pultahan!' Motubag siya kaninyo, `Wala ako mahibalo kun taga diin kamo!' Unya motubag usab kamo, Mikaon ug miinom kami uban kanimo, ug nanudlo ikaw sa among lungsod!' Apan motubag siya pag-usab, `Wala ako mahibalo kun taga diin kamo. Pahilayo kamo kanako kamong mga dautan!' Hilabihan unya ang inyong pagdangoyngoy ug pagkagot sa inyong ngipon inigkakita ninyo kang Abraham, kang Isaac, ug kang Jacob, ug sa tanang mga propeta didto sa Gingharian sa Dios; samtang adto ra kamo sa gawas! Daghang mga tawo nga mangabot gikan sa sidlakan ug kasadpan, ug gikan sa amihanan ug habagatan, nga motambong sa kan-anan didto sa Gingharian sa Dios. Ug unya kadtong naulahi karon mahiuna, ug daghan usab nga karon nahiuna, maulahi."

Mga igsoon, ang Maayong Balita sa atong Ginoo.

KOMENTARYO

Tema: "Ang Sigpit nga Pultahan"

Usa ka dakong hagit ang atong nadungog gikan kang Jesus diha sa Ebanghelyo diin Siya nagkanayon: "Paningkamot kamo pagsulod sa sigpit nga pultahan kay daghan ang mosulay apan dili makasulod." Kini Iyang gipunting alang kanatong tanan nga nangandoy pagsulod sa sigpit nga pultahan paingon sa gingharian sa Dios uban sa Amahan.

Kon atong pamalandongan ang maong sambingay, makahunahuna kita sa Adlaw sa Paghukom diin kitang tanan hukman sa tanan natong binuhatan. Ang nagbuhat sa kabubut-on sa Dios makasulod niining pultahan ug makaambit sa himaya didto sa langit apan ang nagbuhat og dautan dili ilhon sa Amahan nga Iyang mga anak ug dili makasulod sa Iyang gingharian. Kon pangutan-on nato ang atong kaugalingon karon, andam na ba kita sa Adlaw sa Paghukom? Dili kaha kita isalikway sa Amahan kon moabot na kining taknaa? O nagpatuyang lang ba hinoon kita diha sa pagpakasala? Mao kini ang mga pangutana nga angay natong pamalandongan sa atong kaugalingon.

Sayod kita nga dili lalim ang maong hagit sa atong Ebanghelyo tungod sa atong mga kahuyang ug mga kakulangan isip tawo. Ug labot pa niini, adunay mga tentasyon sa atong palibot nga mobira kanato gikan sa dalan padulong sa sigpit nga pultahan. Usahay mawala kita sa atong giagian tungod niining mga tentasyon sa palibot kay nagpadala lamang kita sa atong tawhanong kailibgon. Gipalabi nato ang kalipay nga kalibutanon kay mabati nato ang kalami niini ilabina sa mga panahon sa kakapoy, kaguol, kabudlay ug kahaw-ang sa kinabuhi, apan wala kita masayod nga kining tanan lumalabay lamang.

Mao nga gipahinumduman kita ni Jesus diha sa pagbalik sa Dios Amahan pinaagi sa paghinulsol sa atong mga sala diha sa Sakaramento sa Pakig uli o Kompisal. Dili nato ikaulaw ang atong mga sala tungod kay ang Amahan kanunay naghulat sa atong pagbalik Kaniya sama sa amahan nga naghulat sa pagbalik sa iyang anak nga nawala. Ayaw itugot nga maulahi na ang tanan ug dili na hinoon kita makabalik Kaniya hangtud sa pag abot sa Adlaw sa Paghukom. Hinumdomi nga wala kita mahibalo kon kanus-a mobalik si Jesus aron paghukom kanato. Mao nga kinahanglan andam kita kanunay sa Iyang ikaduhang pagbalik aron dili kita mahisama sa mga tawo nga gisalikway diha sa Ebanghelyo. Maningkamot kita sa pagkab-ot sa atong kaluwasan sama sa giingon ni San Pablo diha sa iyang sulat ngadto sa taga Filipos "Padayon kamo sa pagpaningkamot uban sa kahadlok ug pagtahud aron sa paghingpit sa inyong kaluwasan." (Filipos 2:12)

Mao nga samtang anaa pay panahon, maghinulsol kita sa atong mga sala ug bag-ohon nato ang atong dautang binuhatan aron maandam kita diha sa pagsulod sa sigpit nga pultahan.

Luyo niining tanan mangaliyupo kita sa Amahan nga hatagan kita Niya og grasya kanunay aron makatuman kita sa Iyang kabubut-on. Ug dili usab nato hikalimtan ang pagpangayo og tabang sa atong Mahal nga Inahan, si Birhen Maria, nga iya kitang i-ampo kanunay aron mahilayo kita sa dautan.

Giya alang sa Pamalandong:

1. Sa atong mga kahuyang ang Ginoo kanunay nagdapit kanato sa pagbalik ngadto Kaniya. Ato ba nga gipaminaw Siya diha sa atong pagdawat sa Sakramento sa Pakig-uli?

2. Kita gihigugma sa Dios bisan atong sa pagkamakasasala, andam ba usab kita nga mopasaylo sa atong mga kaaway?

PANGALIYA

Pangulo: Mag-ampo kita sa atong Mahigugmaong Amahan nga kining mga pag-ampo ug mga panginahanglan nga atong gihalad karon Iyang dunggon. Sa matag pangamuyo kita motubag: DUNGGA ANG IMONG KATAWHAN O DIOS.

1. Alang sa tibuok Simbahan ilabina sa Santo Papa, mga Obispo ug kaparian nga dili sila mohunong sa pagsangyaw sa Ebanghelyo ngadto sa tanang katawhan. Mag-ampo kita.

2. Alang sa mga pangulo sa nasud nga sama ni Kristo makabaton sila sa hiyas sa pagkamaalagaron ug pagkamatinud anon aron ilang matubag ang mga panginahanglan sa tanang katawhan. Mag-ampo kita.

3. Alang sa tanang Kristohanong katilingban magkahiusa ang mga sakop ug mahimong abli alang sa mga espirituhanong panginahanglan sa tanan. Mag-ampo kita.

4. Alang sa atong mga kaigsoonan nga nag antus sa tumang kawad-on sa kinabuhi ug nahiagum sa bug-at nga mga pagsulay mabatunan nila ang usa ka kasingkasing nga abli sa pag-ila sa makanunayong grasya sa mga instrumento nga gipadala sa Dios kanila. Mag-ampo kita.

5. Alang kanatong tanan, magpadayon unta kitang mosubay sa dalan nga gipasubay kanato ni Kristo diin siya maoy atong lig on nga gabayan. Mag-ampo kita.

6. Alang sa atong kaugalingon nga katuyuan, ato kining ihalad sa Dios diha sa kahilum.

Pangulo: Ginoo among Dios, himoa nga makasinati kami kanunay sa Imong makanunayon nga pag-amuma pinaagi sa mga grasya nga among madawat nga maoy maghatag og kalig-on sa mapadayonon nga panaw pahiduol Kanimo. Kini among gipangayo pinaagi ni Kristo Imong Bugtong Anak uban sa Espiritu Santo Dios nga usa hangtud sa kahangturan. Amen.

MAAYONG ADLAW KANINYONG TANAN!