KASAULOGAN SA PULONG

IKA-KAWHAA'G TULO NGA DOMINGGO

a. UNANG BASAHON

Kinaadman 9:13-18

Ang pagbasa gikuha gikan sa basahon sa Kinaadman.

Kinsay makakat-on sa kabubut-on sa Dios? Ang tawhanong pangatarungan dili igo alang niining mga buhata ug ang among mga pilosopiya malagmit magpahisalaag kanamo, kay ang among mga lawas nga mamatay nagyudyod sa among mga kalag. Ang lawas hinimo gikan sa yuta ug dili molungtad, usa sa mabug-at nga palas-anon sa hunahuna. Ang tanan nga among nahimo mao ang mga panaghap mahitungod sa mga butang dinhi sa yuta; kinahanglan maningkamot kami sa pagtoon mahitungod sa mga butang nga suod kanamo.

Busa kinsa may makalaum sa pagsabot sa mga butang langitnon? Walay bisan kinsa nga nakahibalo sa imong kabubut-on gawas kun imo una siyang gihatagan sa Kaalam ug imong gipadad-an sa imong balaan nga espiritu. Niining paagiha ang mga tawo sa yuta nahimutang sa matarung nga dalan, ug nakakaon unsa ang makapahimuot kanimo, ug nga ampingan sila pinaagi sa Kaalam.

Mga igsoon, ang Pulong sa Ginoo.

b. SALMO RESPONSORYO

Salmo 90:3-4,5-6,12-13,14-17

Tubag (R)-Sa tanang panahon, O Ginoo, ikaw ang among dalangpanan.

Gipabalik mo ang tawo ngadto sa abog, nagaingon ka, "Balik, O mga anak sa mga tawo" kay ang usa ka libo ka tuig diha sa imong atubangan ingon og kagahapon lamang, karon nga kadto milabay na. O ingon og usa ka pagbantay sa gabil. (R)

Gitapos mo sila diha sa ilang paghikatulog; sa sunod nga buntag sama sila sa mabalhinong balili, nga sa kaadlawon mogitib pag-usab, apan sa pagka-gabil malaya ug malarag. (R)

Tudlol kami sa matarong nga pag-isip sa among mga adlaw, aron makakab-ot kami og kinaadman sa kasingkasing. Balik na, O Ginoo, kanus-a pa? Kaloy-i ang imong mga sulugoon. (R)

Sa pagkabuntag puri-a kami sa imong kalooy aron mosinggit kami sa kasadya ug kalipay sa tanan namong mga adlaw. Ang mahigugmaong pag-amuma sa Ginoo nga atong Dios maato unta; magpalampos sa buhat sa atong mga kamot alang kanato. (R)

c. IKADUHANG BASAHON

Filemon 9-10,12-17

Ang pagbasa gikuha gikan sa sulat ni San Pablo ngadto kang Filemon.

Tungod sa gugma napugos ako paghangyo kanimo. Gihimo ko kini bisan kun ako, si Pablo, ang embahador ni Kristo Jesus, gibilanggo karon tungod kaniya. Naghangyo ako kanimo alang kang Onesimo nga akong anak diha kang Kristo. Nahimo akong amahan niya sa pagtoo samtang gibilanggo ako.

Karon papaulion ko siya kanimo ug dawata siya sama ra nga akoy gidawat nimo. Buot unta ako nga magpabilin siya dinhi aron makatabang siya kanako puli kanimo samtang gibilanggo pa ako tungod sa ebanghelyo. Apan dili ko ikaw pugson sa pagtabang kanako. Busa dili ako magbuhat og bisan unsa nga dili nimo uyohan.

Tingali si Onesimo nahimulag kanimo sa makadiyot aron mahibalik siya kanimo ug dili na gayud mobulag hangtud sa hangtud. Dili na siya karon ulipon lamang kondili minahal nang igsoon diha kang Kristo. Gimahal ko siya ug labi pa siyang mahalon mo ingon nga ulipon ug igsoon diha sa Ginoo.

Kun gilla mo ako nga imong katabang, dawata siya sama ra nga akoy gidawat nimo.

Mga igsoon, ang Pulong sa Ginoo.

d. EBANGHELYO

Lucas 14:25-33

Ang pagsangyaw sa Maayong Balita sumala ni San Lucas.

Dihay dakong panon sa mga tawo nga mikuyog kang Jesus, ug milingi siya ug miingon kanila, "Kinsa kadtong moari kanako nga dili magdumot sa iyang amahan ug inahan, sa iyang asawa ug mga anak ug mga igsoon, ingon man sa iyang kaugalingon, dili mahimong akong tinun-an. Ug kinsa kadtong dili mopas-an sa iyang krus ug mosunod kanako, dili mahimo nga akong tinun-an. Kun usa kaninyo naglaraw pagtukod og tore, tun-an una niya kini ug iyang banabanaon pila ang magasto, aron pagsuta kun may igo ba siyang salapi nga ikahuman niini. Kay kun dili niya kini buhaton, dili mahuman ang tore tapos niya ikapahimutang ang pundasyon; ug ang tanan nga makakita sa gisangputan mobiaybiay unya kaniya. Ug moingon sila, Kining tawhana nagpatugatuga'g tukod og tore, apan dili diay makapahuman niini!' Kun ang usa ka hari nga may napulo ka libo ka sundalo makiggubat batok sa laing hari nga may kawhaan ka libo ka sundalo, iya unang tun-an ug hukman kun makasukol ba siya sa maong hari. Kun dili siya makasukol, mapugos siya sa pagpadala'g mensahero sa pagtagbo sa maong hari samtang atua pa siya sa layo aron makigsabotsabot alang sa kahusay. Sa samang pagkaagi, walay bisan kinsa kaninyo nga mahimong akong tinun-an gawas kun iyang biyaan ang tanan niyang katigayonan.

Mga igsoon, ang Maayong Balita sa atong Ginoo.

e. KOMENTARYO

Tema: Sunod kang Kristo, Ikaw Mamahimong Maayong Disipulo

Kon kita nahigugma sa usa ka tawo, kinahanglan kini og pagsakripisyo. Kon gusto nato Siya nga sundon kinahanglan natong isalikway ang mga butang nga makababag sa pagsunod Kaniya. Atong maangkon ang Iyang gusto alang kanato kon kita mohatag og dakung bili sa Iyang mga gusto.

Mao kini ang hagit sa atong Ginoong Jesus sa atong Ebanghelyo karon. Kon kita mga maayong disipulo Niya, kinahanglan makat-onan nato ang pagsakripisyo sa mga butang nga makababag sa pagsunod Kaniya. Ihatag nato ang atong tibuok kusog, kasingkasing ug hunahuna sa Ginoo lamang. Sa Iyang gisulti nga: "Kinsa kadtong moari Kanako nga dili magdumot sa iyang amahan ug inahan, sa iyang asawa ug mga anak ug mga igsoon...dili mahimo Nakong tinun-an". Wala kini nagpasabot nga isalikway nato sila. Nagpasabot kini nga labaw sa tanan higugmaon nato ang Ginoo. Kon kini atong buhaton, mosunod gayud ang dakung paghigugma sa atong mga kaigsoonan. Atong masinati ang uban nga nagserbisyo sa simbahan, sama sa mga pari, madre o mga lideres sa kapilya, daku gayud ang ilang pagsakripisyo. Ilang gihatag ang tibuok oras sa pagserbisyo ug gamay na lang ang oras nga ilang gigahin alang sa ilang kaugalingon, sa ilang pamilya ug uban pa. Sa pagsunod kang Kristo makasinati sila sa tanang pagsulay sa kinabuhi aron sa pagpakita sa ilang paghigugma sa Ginoo.

Kon atong nasayran ang kinabuhi sa atong mga Santos, ilang gisakripisyo ang ilang kaugalingong kalipay sama sa ilang pamilya, bahandi ug uban pa aron maangkon ang labaw nga kalipay diha sa pagsunod kang Kristo. Ug diha ilang nasinati ang matuod nga kalipay sa ilang kinabuhi. Kay ang Ginoo wala magpasagad kanila. Pananglitan si San Francisco sa Assisi, iyang gitalikdan ang tanan, alang kang Kristo. Si Santa Teresa usab miingon, "Kang Kristo, Igo na". Ang pagsunod kang Kristo maoy naghatag og dakung kalipay kanila.

Mao kini ang hagit kanato, unsa ba gayud ang atong gihatagan og dakung gimbug-aton sa atong kinabuhi? Kita ba naghatag usab og oras alang sa atong Ginoo o ato ra nga gisayangan kini alang sa mga butang nga dili gayud naghatag og tinuod nga kalipay kanato. Mahimo ba nato isakripisyo ang atong mga bisyo, mga butang na makababag sa atong paghigugma sa Ginoo ug sa atong isigkatawo. Mga igsoon, isip mga Kristiyano atong ipakita diha sa pulong ug buhat diha sa pagsunod kang Kristo ug kita mahimong maayong disipulo.

Giya alang sa Pamalandong:

1. Nagmatinud-anon ba ako akong pagkasumusunod ni Kristo, diha sa akong kinabuhing maampoon?

2. Nagmakugihon ba ako sa akong pagtabang sa akong mga kaigsoonan nga nagkalisodlisod?

f. PANGALIYA

Pangulo: Amahan nga maloloy-on nasayud ka sa among mga gikinahanglan, apan bisan niini, mangahas kami karon sa paghalad Kanimo sa among mga pag-ampo. Sa matag pangamuyo kita motubag: GINOO SA KALOOY, DUNGGA KAMI.

1. Alang sa mga lideres sa Simbahan, nga mahiusa ang ilang kasingkasing ug hunahuna sa paghatag og dakung bili sa mga mensahe ni Kristo aron kongkreto ug malungtaron nilang ipaambit ang mga pagtulon-an nga angay masayran sa tanang katawhan. Mag-ampo kita.

2. Alang sa tanan nga gitawag nga magdumala sa tanang kanasuran, nga mag-alagad sila subay sa gugma ug kamabination sa Dios aron ilang matubag ang mga panginahanglan sa atong mga kaigsoonan. Mag-ampo kita.

3. Alang sa atong mga igsoon nga buot mosulod sa bokasyon sa pagkapari ug relihiyosong lalaki ug babaye nga ilang makit-an ang kabililhon sa krus ni Kristo nga ilang pagapas-anon ug ilang matagamtaman ang kalipay luyo sa mga pagsulay ug kasakitan. Mag-ampo kita.

4. Alang sa mga nag-antus sa nagkadaiyang balatian, mga anaa sa balay tambalanan, nga ilang mabatunan ang hingpit nga pagtoo ug pagsalig sa Dios ug ilang maangkon ang hingpit nga kahupayan. Mag-ampo kita.

5. Alang kanatong tanan nga hatagan nato og dakung gimbug-aton ang makanunayong pagpakighiusa kang Kristo diha sa pag apil nato sa bangkite sa Iyang gugma sa Santos nga Yukaristiya. Mag-ampo kita.

6. Alang sa atong kaugalingon nga katuyuan, ato kining ihalad sa Dios diha sa kahilum.

Pangulo: Mahigugmaong Amahan, Ikaw ang among kinabuhi ug padulngan. Pun-a kami sa Imong grasya nga maoy makapalahutay kanamo sa pagpadayon sa panaw sa kinabuhi matag adlaw. Kini among gipangayo pinaagi ni Kristo among Ginoo. Amen.