Kasaulogan sa Pulong

IKA-NAPULO'G UNOM NGA DOMINGGO

PASIUNANG PAG-AMPO:

Amahan, itugot nga ang imong gasa sa kinabuhi magpadayon sa paglambo dinhi kanamo, kuhaa kami gikan sa kamatayon ngadto sa pagtoo, paglaum ug paghigugma.

Himoa kaming buhi ni Kristo Jesus nga magbinantayong nagaampo ug magtinud-anon sa iyang pagtulun-an hangtud ipadayag ang imong himaya dinhi kanamo.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. UNANG BASAHON

Genesis 18:1-10

Ang pagbasa gikuha gikan sa basahon sa Genesis.

Ang Ginoo mipakita kang Abraham didto sa sagradong mga kahoy ni Mamre. Naglingkod si Abraham sa pultahan sa iyang tolda sa udtong tutok sa dihang mikalit pagtungha ang tulo ka tawo nga nagbarog didto. Sa pagkakita niya kanila, midagan siya aron pagtagbo sa mga tawo ug mihapa siya sa yuta ug miingon, "Sir, andam ako sa pag-alagad kaninyo, busa hapit intawon kamo sa akong balay. Ako inyong ulipon. Tugoti nga magpakuha ako'g tubig aron makahimasa kamo ug makapahulay unya kamo dinhi ubos niining kahoy. Magkuha ako'g pagkaon aron mabaskog kamo ug makapadayon sa inyong panaw. Andam ako pag alagad kaninyo sanglit mianhi man kamo sa akong balay." Sila mitubag, "Kun mao kana, buhata ang imong giingon."

Midali si Abraham pagsulod sa tolda ug giingnan niya si Sara, "Pagkuha'g usa ka sako sa imong labing maayong harina ug pagluto'g pan. Dali-a kini paghimo." Unya midagan si Abraham ngadto sa kahayopan ug nagpili siya'g nating baka mga tambok ug humok pa, ug gihatag niya kini sa ulipon; gidali usab kini paghikay sa ulipon. Unya nakuha si Abraham og kisiyo, lab-as nga gatas ug karne ug gidulot niya kini sa mga tawo. Samtang nagkaon sila, nagbarog siya duol kanila ubos sa kahoy.

Unya nangutana sila kaniya, "Hain man ang imong asawa nga si Sara?" "Anaa sa sulod sa tolda," mitubag siya. Ang usa kanila miingon, "Isaad ko kanimo nga ang imong asawa nga si Sara manganak og lalaki iniglabay sa siyam ka bulan, ug nga mobalik ako inig-abot na nianang panahona." Si Sara diay namati didto sa pultahan sa tolda luyo kang Abraham.

Mga igsoon, ang Pulong sa Ginoo.

b. SALMO RESPONSORYO 

Salmo 15:2-3,3-4,5

Tubag (R)-Ang maghimo sa katarong magpuyo atubangan sa Ginoo.

Siya nga nagalakaw nga walay sala ug nagabuhat sa matarong, nga nagahunahuna sa kamatuoran diha sa iyang kasingkasing ug wala magasulti'g dautan sa iyang dila. (R)

Siya nga wala magdamal sa iyang isigkatawo ni magmahay batok sa iyang silingan pinaagi kaniya ang dautan gitamay, samtang nagapasidungog siya kanila nga mahadlokon sa Ginoo. (R)

Siya nga wala magpatanto og hilabihan sa iyang salapi ug wala modawat og suborno batok sa walay sala. Siya nga magabuhat niining mga butanga dili gayud masamok. (R)

c. IKADUHANG BASAHON

Colosas 1:24-28

Ang pagbasa gikuha gikan sa sulat ni San Pablo ngadto sa taga-Colosas.

Karon gikalipay ko ang akong mga pag-antus tungod kaninyo. Kay pinaagi sa akong mga giantos nakatabang ako paghingpit sa wala pa matapos nga mga pag-antus ni Kristo alang sa iyang lawas nga mao ang iglesia. 

Gihimo ako sa Dios nga sulugoon sa iglesia, ug gitugyan niya kanako kining buhata alang sa inyong kaayohan. Kining buhata mao ang pagsangyaw sa hingpit sa lyang mensahe, nga gitago niya kaniadto, apan gibutyag niya karon ngadto sa iyang katawhan.

Kay ang laraw sa Dios mao nga ibutyag niya karon ngadto sa iyang katawhan ang iyang bahandianon ug mahimayaong tinago nga iyang giandam alang sa tanang katawhan. Ug ang tinago mao nga si Kristo anaa kaninyo, nga nagpasabot nga makaambit kamo sa himaya sa Dios.

Busa gisangyaw namo si Kristo ngadto sa tanang mga tawo. Gipahimangnoan ug gitudloan namo ang tanan ginamit ang tanan namong kaalam, aron pagdala sa tagsatagsa ngadto sa Dios ingon nga hingkod nga tawo nga nahiusa kang Kristo.

Mga igsoon, ang Pulong sa Ginoo.

d. EBANGHELYO

Lucas 10:38-42

Ang pagsangyaw sa Maayong Balita sumala ni San Lucas.

Samtang nagpadayon pagpanaw si Jesus ug ang iyang mga tinun-an, nahi-abot sila sa usa ka balangay diin may usa ka babaye nga gihinganla'g Marta nga miabiabi kaniya didto sa iyang balay. May igsoon siyang babaye nga ginganlag Maria, nga naglingkod sa tiilan sa Ginoo ug namati sa iyang gitudlo. Si Marta nagkapuliki sa daghan niyang buluhaton, busa miduol siya ug miingon, "Ginoo, dili ka ba manumbaling nga gipasagdan man lamang ako sa akong igsoon sa tanang buluhaton sa balay? Agdaha siya pag-ari aron pagtabang kanako?"

Ang Ginoo mitubag kaniya, "Ay, kanimo, Marta! Naguol ug nahingawa ka sa daghang mga butang, nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya."

Mga igsoon, ang Maayong Balita sa atong Ginoo.

e. KOMENTARYO

Tema: Paminaw sa mga Pulong sa Magtutudlo

Kinsa man ang akong silingan? Anaa na kita karon sa modernong kapanahunan diin ang tanang matang sa reyalidad nagadepende lamang sa tawhanong kamatuoran. Kini nga reyalidad nagdala kanato og pagduhaduha sa kamatuoran nga gidala ni Jesukristo. Nakalimot kita sa atong misyon dinhi sa kalibutan. Usahay nakalimot na kita kung kinsa ang atong silingan. Mao kini ang rason ngano nga anaa pa kita sa lisod nga sitwasyon ug wala nato nasinati ang tinuod nga kalinaw. Kini nga sayop nga panglantaw nga nakahatag og suliran sa atong pagkatawo. Usa sa mga rason nga naglisod kita nga maminaw sa atong mga silingan. 

Ang atong mga pagbasa karon naghisgot sa tinuod nga pag-alagad sa Dios ug diha sa pag-alagad nato, sa atong silingan pinaagi sa pagpaminaw sa mga pulong sa magtutudlo. Sa atong pagpaminaw sa mga pulong sa Dios nagdala kanato og dakung kalipay o tinuod nga kalipay. Sa atong unang pagbasa, ang mag-asawa nga si Abraham ug Sara nalipay kaayo kay ang Dios nagsaad kanila og anak. Ang Dios wala magpasagad kanila kay naminaw gayud sila sa Dios. Sa lain bahin, ang atong Ebanghelyo naghisgot nga kita moalagad sa atong mga silingan aron masinati nato ang espiritwal nga katagbawan. Gitubag ni Jesus ang batid sa balaod pinaagi sa usa ka sambingay diin gipakita niya nga labaw ang balaod sa gugma kay sa balaod ni Moises. Kini nga reyalidad nagdala kanato sa reyalidad sa kristohanong bokasyon nga dili usa ka kinaugalingong relasyon tali sa tawo ug sa Dios lamang. Usa kini ka personal nga pagtubag sa tawo pinaagi sa pag-alagad kanato sa atong silingan. Maila nato ang Dios pinaagi sa atong isigkatawo. Ang Dios uban kanato pinaagi sa presensiya sa uban.

Ang atong mga pagbasa usab nagtudlo kanato sa pagpamalandong nga kita mahigugma sa atong isigkatawo aron kita makaila sa Gingharian sa Dios. Ang gugma sa Dios maoy sumada sa tanang mga sugo sa Dios. Kini nga balaod magdala kanato sa kalinaw nga walay katapusan. Sa pag-ila ug pagsinati sa presensiya sa Dios diha sa atong mga igsoon nagdala kanato sa reyalidad nga wala nay rason nga mabalaka kita sa umaabot kay ang Dios ang nagagiya kanato. Apan, unsa man ang atong buhaton aron mahigugma kanato ang atong isigkatawo? Maminaw kita sa mga pulong sa Dios kay 'Sa sinugdan diha na ang pulong, ug ang pulong anaa uban sa Dios, ug ang Dios ang pulong' (Juan 1:1). Sa ikaduha nga bahin sa atong Ebanghelyo nagtudlo kanato nga kita mahinungdanon sa pagpaminaw sa mga pulong sa magtutudlo aron makaalagad kita sa atong isigkatawo. Adunay implikasyon ang atong mga pagbasa kini mao ang pagpakiglambingit ngadto sa uban diha sa tagsatagsa ka katilingban. Dinhi sa katilingban atong masinati ang hulagway sa Dios sama sa usa ka Samaritanhon nga nakig ambit sa iyang isigkahigala.

Ang atong Salmo Responsoryo nagaingon "Ang maghimo sa katarong magpuyo sa atubangan sa Ginoo". Magbuhat kita og matarong sa atong mga silingan ug maghunahuna sa kamatuoran aron makaadto kita sa Gingharian sa Dios.

Giya alang sa Pamalandong:

1. Diha sa atong panaw sa pagtuo makanunayon ba kitang naminaw sa pulong nga naghatag sa kinabuhing dayon? 

2. Mituo ba kita nga ang gingharian sa Dios nagsugod na dinhi sa atong kinabuhing maalagaron?

f. PANGALIYA

Pangulo: Mga igsoon, uban sa dakung pagsalig atong ihalad karon ang atong mga pag-ampo ug mga panginahanglan. Sa matag pangamuyo kita motubag: GINOO, DUNGGA ANG AMONG MGA PAG-AMPO.

1. Alang sa tibuok Simbahan ilabina sa nagdumala niini ang Santo Papa, mga Obispo ug kaparian nga mahimo silang lig-on nga sumbanan sa tanang katawhan sa paghatag og dakung bili sa espirituhanon nga butang kay sa kalibutanon. Mag ampo kita.

2. Alang sa lideres sa tanang kanasuran nga ilang mabati ang tawag sa Dios sa pag-alagad sa Iyang katawhan, ug paghatag og dakung bili sa mga nag-unang panginahanglan. Mag-ampo kita.

3. Alang sa atong mga kaigsoonan nga nag antus sa kalisud sa kinabuhi nga dili sila kawad-an sa paglaum ug hingpit nga pagtoo sa Dios nga maoy labing nag-atiman ug nag-amuma kanila. Mag-ampo kita.

4. Alang sa mga pangulo sa matag (Kristohanong katilingban, nga bisan sa kakusog sa mga kalibutanong haylo magmatinud-anon sila sa ilang pag-alagad ug paghatag og mga maayong panig-ingan. Mag-ampo kita.

5. Alang sa atong mga kaigsoonan nga nag una na kanato ning kinabuhia ilabina ang sakop sa atong katilingban, nga makasulod na sila sa gingharian nga gitagana kanila sa atong maloloy-on nga Amahan. Mag ampo kita. gu qaldo apm

6. Alang sa atong kaugalingon nga katuyuan, ato kining ihalad diha sa kahilum.

Pangulo: Ginoo among Dios, sa kanunay namati kami sa Imong tawag sa pagsalig sa Imong gugma ug kalooy kay dili gayud Nimo ihikaw kanamo ang among mga gikinahanglan kon nahiuyon kini sa Imong kabubut-on. Kini among gipangayo pinaagi ni Kristo among Ginoo ug Manunubos hangtud sa kahangturan. Amen.