Kasaulogan Sa Pulong

IKA-NAPULO'G LIMA NGA DOMINGGO

PAG-AMPO SA KATILINGBAN

Mag-ampo kita;

Amahan, itugot nga ang kahayag sa kamatuoran maggiya kanamo ngadto sa imong gingharian pinaagi sa kalibutan nga napuno sa kahayag nga sukwahi sa imong kaugalingon.

Himoa nga imong gugma kanamo mahimo untang mahisama sa imong pagtawag.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. UNANG BASAHON

Deuteronomio 30:10-14

Ang pagbasa glkuha gikan sa basahon sa Deuteronomio.

Si Moises miingon sa katawhan, "Kun patalinghogan ninyo siya ug tumanon ninyo ang mga sugo nga nahisulat niining basahona, ug kun mobalik kamo sa Ginoo nga inyong Dios sa kinasingkasing gayud, dili lisod ang gihatag ko kaninyong sugo karong adlawa; wala kini didto sa langit, ni atua sa layo. Dili kamo makaingon, "Kinsa may mokuha niini alang kanato aron kita makadungog ug makatuman niini?"

Mga igsoon, ang Pulong sa Ginoo.

b. SALMO RESPONSORYO

Salmo 69:14,17,30-31,33-34,36-37

Tubag (R)-Dangop sa Ginoo sa inyong kinahanglan, ug mabuhi kamo.

O Ginoo, nangamuyo ako kanimo sa panahon sa imong kaayo, O Dios. Sa imong dakong kalooy tubaga ako sa imong walay hunong nga panabang. Tubaga ako, O Ginoo kay walay kinutoban ang imong kaayo: sa imong kalooy lingi-a ako. (R)

Naguol ako ug ania sa kasakit; O Dios, sa imong makaluwasnong hinabang panalipdi ako. Dayegon ko ang ngalan sa Dios diha sa awit, ug himayaon ko siya uban sa pasalamat. (R)

Naguol ako ug ania sa kasakit; O Dios, sa imong makaluwasnong hinabang panalipdi ako. Dayegon ko ang ngalan sa Dios diha sa awit, ug himayaon ko siya uban sa pasalamat. (R)

"Tan-awa, kamong mga mapaubsanon, ug pagsadya; kamo nga nangita sa Dios, maglipay unta ang inyong mga kasingkasing. Kay ang Ginoo nagapatalinghog sa kabus, ug ang iyaha nga gigapos dili niya tamayon." (R)

Kay ang Dios magluwas sa Sion ug magtukod pag-usab sa mga siyudad sa Juda. Ang mga anak sa iyang mga sulugoon maoy makapanunod niini, ug sila nga nahigugma sa imong ngalan magpuyo niini. (R)

c. IKADUHANG BASAHON

Colosas 1:15-20

Ang pagbasa gikuha gikan sa sulat ni San Pablo ngadto sa taga-Colosas.

Si Kristo mao ang makita nga larawan sa dili makita nga Dios. Siya ang panganay'ng Anak ug labaw siya sa tanang binuhat. Kay pinaagi kaniya gibuhat sa Dios ang tanan nga atua sa langit ug ania sa yuta, makita ug dili makita - mga gahum nga espirituhanon, mga punoan, mga hari, ug ang tanan nga nagmando. Gibuhat sa Dios ang tanan pinaagi kaniya ug alang kaniya. Diha na siya sa wala pa buhata ang tanang butang, ug diha kaniya ang tanan nahimutang sa ilang hustong dapit. Siya ang ulo sa iglesia nga mao ang iyang lawas. Siya ang naghatag og kinabuhi sa lawas; siya ang unang gibanhaw sa mga patay aron siya ang mag-una sa tanan. Kay pagbuot sa Dios nga ang Anak maghupot sa bug-os nga kinaiya sa Dios. Busa pinaagi sa Anak gipasig uli sa Dios ngadto sa iyang kaugalingon ang tanang butang sa langit ug sa yuta. Nakigdait ang Dios pinaagi sa kamatayon sa iyang Anak didto sa krus.

Mga igsoon, ang Pulong sa Ginoo.

d. EBANGHELYO

Lucas 10:25-37

Ang pagsangyaw sa Maayong Balita sumala ni San Lucas.

Unya miduol ang usa ka magtutudlo sa Balaod ug misulay pagbitik kang Jesus. Nangutana siya, "Magtutudlo, unsay kinahanglan kong buhaton aron ako makadawat sa kinabuhing dayon?" Si Jesus mitubag kaniya, "Unsa may giingon sa Kasulatan? Ug giunsa man nimo kini pagsabot?"

Ang magtutudlo sa Balaod mitubag, " Higugmaa ang Ginoo nga imong Dios sa tibook mong kasingkasing, ug sa tibook mong kusog, ug sa tibook mong hunahuna,' ug Higugmaa ang imong isigkatawo sama sa paghigugma mo sa imong kaugalingon.

Mitubag si Jesus, "Husto ang imong tubag; buhata kana ug makadawat ka sa kinabuhi." Apan ang magtutudlo sa Balaod buot ilhon nga husto siya, ug mao nga nangutana siya kang Jesus, "Kinsa ba diay ang akong isigkatawo?"

Si Jesus mitubag, "May usa ka tawo nga milugsong gikan sa Jerusalem ngadto sa Jerico, ug gibanhigan siya sa mga tulisan. Gihuboan nila siya, gibun-og, ug gibiyaan nga himatyon. Ug nahitabo nga may ka pari nga miagi niadtong dalana; sa pagkakita niya sa tawo, milabay lamang siya agi sa pikas daplin. Unya nahiagi usab ang usa ka Levita, ug miduol siya ug mitan-aw sa tawo, ug unya misaylo lamang agi sa pikas daplin. Apan may usa ka Samaryanhon nga nagpanaw niadtong dalana nahiagi sa gitulisan, ug sa pagkakita niya sa tawo, nalooy siya. Miduol siya kaniya, ug gibuboan niya'g lana ug bino ang iyang mga samad ug gibugkosan; unya gipasakay niya ang tawo sa iyang hayop ug gihatod ngadto sa usa ka abotanan, ug didto iyang gialimahan siya. Sa pagkaugma mihatag siya'g kwarta ngadto sa tig-atiman sa abotanan ug mitugon, Alimahi siya ug inigbalik ko dinhi bayran ko ikaw sa imong magasto. Ug si Jesus mitapos pag-ingon, "Karon kinsa man niining tulo sa imong hunahuna ang nagpakita nga isigkatawo sa gitulisan?" Ang magtutudlo sa Balaod mitubag, "Kadtong nalooy kaniya." Si Jesus miingon, "Busa lakaw ug buhata ang sama sa iyang gibuhat."

Mga igsoon, ang Maayong Balita sa atong Ginoo.

e. KOMENTARYO

Tema: Ang Matuod nga Paghigugma!

Usa ka higayon samtang ang usa ka datu nga babaye nag-ampo nakadungog siya og usa ka tingog nga nag-ingon, "Himo-i ako og balay." Sa pagtoo nga ang Dios nakig-estorya kaniya, nagdesisyon siya sa pagtukod og usa ka kapilya. Nahuman ang kapilya, nakadungog na pud siya og tingog sa iyang pag-ampo nga nag-ingon, "Buhati ako og balay." Sa paghunahuna nga ang kapilya gamay lang kaayo ug dili igo sa Ginoo, iya kining gipaguba ug nagtukod og usa ka Simbahan. Ug nahuman kini. Nadunggan na pud niya ang usa ka tingog nga nag-ingon, "Buhati ako og balay." Bisan pa man naglibog siya, iya napud nga gipaguba ang Simbahan ug nagpatukod og Katedral. Apan mao ra gihapong tingog ang iyang nadunggan nga nag-ingon, "Buhati ako og balay." Ug tungod niini gi-estoryahan niya ang Ginoo sa makusog, "Ginoo, gihimoan na kita og kapilya, Simbahan, ug Katedral, apan wala niini ang nakapahimuot Kanimo. Unsa man ang imong gusto, Basilika? Apan may tingog nga mihunghong kaniya ug miingon, "Tan-aw sa imong bintana" ug ang babaye nagdali pagtan-aw sa bintana. Nakita niya ang usa ka pamilya nga natulog sa kilid sa kalsada. Ug ang tingog nagpadayon sa pag-ingon, "Wala ako nanginahanglan og Basilika". Ang pagtukod og balay sa imong isigkatawo nga walay panimalay, mao usab ang pagtukod og balay alang kanako.

Mga igsoon, ang estorya nga atong nadunggan karon mao ang mensahe nga buot ipaabot kanato sa atong Ebanghelyo karong Dominggoha. Kinsa man ang imong silingan? Ang katapusang pangutana ni Jesus sa iyang sambingay. Nadungog nato ang Pari ug ang Levita sa maong Ebanghelyo, nga naglaum kita nga motabang sa maong tawo,. apan mitipas hinoon ug milabay sa laing dalan. Apan ang usa ka Samaritanhon nga wala maghunahuna nga motabang, siya pa hinoon ang mibati sa tumang kaluoy, mibugkos sa samad samtang gibuboan kini og lana ug bino, nagpasakay kaniya sa iyang mananap ug nagdala kaniya sa balay tambalanan, ug nag-atiman kaniya sa wala pa siya mohawa ug nagbilin og duha ka denaryo aron pag-atiman og bayad sa iyang gitabangan. Ang usa ka tawo nga naghatag sa iyang kaugalingon sa pagpaubos bisan pa man dili maayo ang tan-aw sa mga tawo kaniya. Adunay duha ka punto ang akong gustong ipaabot kaninyo. Una, nga dili garantiya nga tungod kay kita usa ka kristiyano moingon na kita nga mas mahigugmaon kita kaysa sa mga Muslim o uban pa. Dili pasabut nga kay kita nagsunod sa dalan ni Kristo mas daghan atong nabuhat nga maayo, dili pud pasabot nga kay kita nangalagad sa Dios diha sa iyang Simbahan, mas buotan pa kita ug mahigugmaon kay sa uban. Kinahanglan natong pamalandungan ang atong tagsatagsa ka kaugalingon sa tinuoray, nga dili pasabut nga nagdala kita sa ngalan nga Kristiyano mas maayo na kita sa uban. Hinuon mao kini ang atong angayan nga buhaton apan basin baya kini sa ngalan lang taman. Ikaduha, ang batasan sa pagkamahigugmaon usa ka gasa nga atong ipasigarbo ug ipadayon. Batasan nga gipangandoy kanato sa Dios, sa paghigugma ngadto sa mga tawo, nga bisan pa man wala nato mailhi. Sa paghatag og panahon sa mga tawo, nga dili makabalos kanato og butang apan sila gikahimut-an sa Dios. Ang paghigugma ngadto sa mga dinaug-daug, sa mga sinalikway, sa mga gihikawan sa paghigugma sa ilang mga ginikanan, sa mga nawad-an sa paglaum, ug sa mga tawo nga ubos sa kahimtang sa kinabuhi.

Karon mga igsoon, asa man kita niining mga tawhana, sama ba kita sa mga pari ug Levita o sama kita sa Samaritanhon? Unsa man ang atong angayang buhaton aron kita usab kahimut-an sa Dios? Sa katapusan pasalamatan kita sa Dios tungod kay kita nahigugma man sa atong mga igsoon. Ang hagit sa maong Ebanghelyo kanato mao kini, Lakaw ug buhata sama sa giingon." Sundon nato ang batasan sa usa ka Samaritanhon nga dili gani hanas sa balaod kaysa sa mga pari ug levita apan mao pa hinuon ang nagtuman sa mensahe sa Dios. Basin baya og sama kita niining pari ug Levita niining maong sambingaya, o dili ba kaha mas maayo pa mahigugma ang mga uyamut ug wala mahuman sa pag-eskwela kaysa kanato nga mga professional. Basin baya mas kugihan pa motabang ang mga kabus kaysa sa mga adunahan. Ang Dios nag-awhag kanatong tanan, sama sa mensahe ni Papa Francisco, "Gugma ug Kalooy nga angayan natong ipaabot ngadto sa atong isigkatawo, ang pagtuman sa kabubut-on sa Dios, pinaagi sa pagsunod sa lakang sa Iyang Anak, ang atong Ginoong Jesukristo".

Giya alang sa Pamalandong:

1. Maunongon ba kita sa mga nagkalisudlisod diha sa atong GKK?

2. Ang atong paghigugma sa Dios, ato bang napadayag sa matuod diha sa atong paghigugma sa atong isigkatawo?

f. PANGALIYA

Pangulo: Ihalad nato ang atong mga pag-ampo sa atong Langitnong Amahan kinsa kanunay nagpakabana sa mga panginahanglan sa Iyang katawhan. Sa matag pag-ampo kita moingon: GINOO, DUNGGA KAMI.

1. Nga ang mga ministro sa atong Simbahan, magmatinud-anon nga mosangyaw sa Pulong sa Dios, mopuyo sa ilang gisangyaw ug mopaambit niini nga malipayon ngadto sa tanang katawhan. Mag-ampo kita.

2. Nga ang mga nangulo sa nasud mamahimong mga Maayong Samariyanhon ilabina ngadto sa tanang nag-antus sa kawad-on, mga gihikawan sa tawhanong katungod ug nag-antus sa kagutom ug walay pinuy-anan. Mag-ampo kita.

3. Nga ang mga lideres sa matag katilingban nga mitahan sa ilang kaugalingon alang sa pagpangalagad, gantihan na sa Dios ang ilang nabuhat ug magmalahutayon sila bisan sa mga pagsulay nga ilang mahimamat. Mag-ampo kita.

4. Nga ang atong mga kaigsoonan nga mitahan sa ilang kaugalingon alang sa pag-atiman sa mga masakiton, sa kanunay makabaton sila og kalig-on ug kadasig nga magmakanunayon sila sa ilang gimbuhaton. Mag-ampo kita.

5. Nga ang matag usa kanato makagahin og panahon sa pagpakabana sa mga panginahanglan sa atong mga kaigsoonan materyal man o espirituwal. Mag-ampo kita.

Pangulo: Dios nga maloloy-on, amo nang gipadayag Kanimo ang tanan namong mga panginahanglan. Itugot nga uban sa Imong walay puas nga kalooy ug gugma amo nang matagamtaman ang among gitinguha pinaagi ni Kristo uban sa Espiritu Santo, Dios nga usa hangtud sa kahangturan. Amen.