Ikanapulo'g walo nga Domingo

IKA-NAPULO'G WALO NGA DOMINGGO

PASIUNANNG PAG-AMPO:

O Dios, dili masukod ang mga gasa nga imong gihatag kanamo ilabi na ang gasa sa kinabuhi nga nagadagayday sa imong pagkamaayo.

Giyahi kami, nga Imong katawhan, nga nagapanaw sa kalinaw ug himoa nga magmalig-on kami sa imong gugma.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan. Amen

a. UNANG BASAHON 

Ecclesiastes 1:2,2:21-23

Ang pagbasa gikuha gikan sa basahon sa Ecclesiastes.

Kini ang gisulti sa anak ni David, ang maalam ug hari sa Jerusalem. Kawang ug walay kapuslanan ang tanan, miingon siya. Maghago ka uban sa tanan mong kaalam, kahibalo ug katakos, apan sa katapusan lain ang magpahimulos niini. Busa wala kiniy kapuslanan ug dili makatarunganon! Maghago ka ug mag-antus sa tibook mong kinabuhi, apan unsa may nakuha mo niini? Wala!

Ang tanan mong kinabuhi makahatag lamang kanimo'g labad sa ulo ug kagul-anan. Dili gani makapahulay ang imong hunahuna bisan sa gabii. Wala gayod kapuslanan!

Mga igsoon, ang Pulong sa Ginoo.

Salmo 95:1-2,6-7,8-9

b. SALMO RESPONSORYO

Tubag (R)-Kun karon makadungog kamo sa iyang tingog, ayaw patig-aha ang inyong mga kasingkasing.

Umari kamo, awitan ta nga malipayon ang Ginoo; ilhon ta ang Bato sa atong kaluwasan. Yukboan ta siya uban sa pasalamat; awitan ta siya nga malipayon og mga salmo. (R)

Umari kamo, moduko kita aron pagsimba; mangluhod kita atubangan sa Ginoo nga nagbuhat kanato. Kay siya man ang atong Dios, ug kita ang katawhan nga iyang gidumala, ang panin nga iyang gitultolan. (R)

O, nga mamati unta kamo sa iyang tingog; "Ayaw patig-aha ang inyong mga kasingkasing sama didto sa Meriba, sama sa adlaw ni Massah didto sa kamingawan. Diin ang inyong mga katigulangan misulay kanako; ila ako nga gisulayan bisan nakakita na sila sa akong mga buhat!" (R)

c. IKADUHANG BASAHON

Colosas 3:1-5,9-11

Ang pagbasa gikuha gikan sa sulat ni San Pablo ngadto sa taga Colosas.

Sanglit gibanhaw na man kamo uban ni Kristo, tinguhaa ang mga butang nga atua sa langit diin naglingkod si Kristo sa iyang trono sa tuo sa Dios. Hunahunaa ang mga butang langitnon, dili ang yutan-on. Kay namatay na kamo, ug ang inyong kinabuhi natago uban si Kristo diha sa Dios. Ang matuod ninyong kinabuhi mao si Kristo ug inigpakita niya, makita usab kamo uban kaniya ug moambit sa himaya niya.

Busa patya ang mga kaibog nga kalibutanon nga anaa kaninyo, sama sa pagpakighilawas, kalaw-ayan, kaulag, dautang kailibgon ug kahakog kay ang kahakog usa ka paagi sa pagsimba sa diosdios. Ayaw kamo pamakak kay gihubo na ninyo ang inyong daang pagkatawo uban sa iyang kinaiya, ug gisul-ob na ninyo ang bag-ong pagkatawo. Mao kini ang bag-ong tawo nga gibag-o kanunay sa Dios nga iyang magbubuhat, sumala sa iyang kaugalingong dagway, aron masayud kamo sa hingpit mahitungod sa Dios. Tungod niini, wala nay Judio ug dili Judio, mga tinuli ug dili tinuli, mga luog, mga langyaw, mga ulipon o dili ulipon, kay si Kristo mao ang tanan ug anaa sa tanan!

Mga igsoon, ang Pulong sa Ginoo.

d. EBANGHELYO

Lucas 12:13-21

Ang pagsangyaw sa Maayong Balita sumala ni San Lucas.

Unya may usa ka tawo didto sa pundok nga miingon kaniya, "Magtutudlo, sultihi ang akong igsoon nga bahinan unta ako niya sa katigayonan nga gibilin kanamo sa among amahan." Si Jesus mitubag kaniya. "Ondo kinsa may naghatag kanako'g katungod sa paghusay o pagbahin sa katigayonan tali kaninyong duha?" Ug mipadayon siya pagsulti kanilang tanan, "Pagbantay kamo ug likayi ninyo ang bisan unsang kahakog, kay ang tinuod nga kinabuhi sa tawo wala diha sa mga butang nga iyang gihuptan, bisan unsa pa siya kadato."

Unya misugilon si Jesus kanila niining sambingaya: "Dihay usa ka dato nga may yuta nga maayo'g abot. Namalandong siya, "Wala na akoy kabutangan sa tanan kong abot. Unsa may angay kong buhaton? Ah, kini mao ang akong buluhaton, miingon siya sa iyang kaugalingon; `gub-on ko ang akong kamalig ug magtukod ako ug labi pang dako, diin akong tigumon unya ang abot ug ang uban kong mga kabtangan. Unya moingon ako sa akong kaugalingon; Pagkapalaran nimo, Ondo! Anaa na kanimo ang tanang mga butang nga imong gikinahanglan alang sa daghang katuigan. Pagpahayahay na lang, kaon, inom, ug paglipay!'

Apan ang Dios miingon kaniya, 'Oy, buang! Niini gayong gabhiona Ikaw mamatay; unya kinsa may makapanag-iya nlanang tanang butang nga imong gitigom alang sa imong kaugalingon?" Ug mitapos si Jesus pag-ingon, "Mao kini ang mahitabo kanila nga magtigom ug mga bahandi alang sa ilang kaugalingon apan dili dato sa atubangan sa Dios."

Mga Igsoon, ang Maayong Balita sa atong Ginoo.

e. KOMENTARYO

Tema: Ang Tinuod nga Kinabuhi, Anaa kang Kristo!

Niining ikanapulo'g walo nga Dominggo sa Ordinaryong Panahon, ang atong mga pagbasa naghisgot mahitungod sa mga bahandi. Pinaagi niining mga basahon kita gipahinuklugan nga kining mga butang yutan-on walay bili kon dili kini nakaugat ngadto sa Ginoo. Uban niini, kita gipahinumduman diha sa Ebanghelyo, nga ang atong pagkakristiyano makompleto lamang diha ni Kristo.

Diha sa unang pagbasa nato karon, kita gidala sa Magsasangyaw sa iyang pamalandong mahitungod sa pagkawalay kapuslanan sa tanan. Ang tanan natong paningkamot, walay kapuslanan kay kini susama lamang sa paggukodgukod sa hangin. Wala kini kalampusan. Kay diha sa kamatayon ang tanan ibabaw niining yuta walay kapadulngan kon dili sa abog lamang. Madatu o pobre nga tawo o hayop man, ang tanan walay kalainan, kay kon mamatay usa lamang ang kapaingnan. Walay lain kon dili sa yuta nga giyatak-yatakan. Diha sa kamatayon ang tanan mahanaw lamang. Diha sa pultahan sa kamatayon ang tanan atong mabiyaan, kalampusan o mga kabtangan man dili nato mabalon ni makuptan. Busa, unsay pulos niining tanan?

Diha sa Ebanghelyo, gitubag kini ni Kristo diha sa Iyang pagsaysay sa usa ka sambingay. Mahitungod kini sa usa ka datung buangbuang. Tungod sa pagkadaghan sa iyang mga kabtangan, gipadako niya ang iyang sudlanan. Apan wala niya hikaplagi ang iyang kinabuhi, wala na kahayagi. Dinhi si Jesus nagsulti batok sa kahakog sa mga bahandi. Siya miingon, "Pagbantay kamo og likayi ninyo ang bisan unsang kahakog, kay ang tinuod nga kinabuhi sa tawo wala diha sa mga butang nga iyang gihuptan, bisan unsa pa siya kadato." Kini gipangusgan ni San Pablo diha sa iyang mensahe nga gisaysay sa atong ikaduhang pagbasa, "Pangita kamo unsa ang labaw sa tanan... dili ngadto sa mga butang niining kalibutan"

Ang pagbaton og mga bahandi dili usa ka dautan tungod kay kadtong naningkamot angayan man suholan, apan ang pagkasilaw o pagkabugkos nato niining mga kabtangan maoy dili angayan. Kon kita mamahimong adunahan, kita gi-awhag diha sa atong Ebanghelyo ug sa atong Simbahan sa pagpaambit sa atong mga katigayonan ilabina ngadto sa mga nanginahanglan. Kay ang paghatag kanila sa ilang panginahanglan, usa ka butang nga angayan. Apan, ang paghikaw kanila sa mga butang nga ilahang gikinahanglan bisan pa aduna kitay daghan, usa ka pagpangawat sa mata sa atong Amahan. Tungod kay, diha sa sinugdanan ang kinaiyahan ug ang tibuok kalibutan panag-iya sa tanan. Busa, kon kita mamahimong palaran, ang atong hunahuna dili unta mahisama sa datu nga buangbuang magpahayahay, kaon, inom, ug maglipaylipay na lang. Kon dili, maninguha kita sa pagpaambit niining mga katigayonan ngadto sa uban. "Susama niini ang mahitabo kanila nga nagtigom og mga bahandi alang sa ilang kaugalingon lamang".

Niining kalibutan o sa atong katilingban kita gipahinumduman diha sa kalisod o kapit-os nga mga kasinatian, dili unta kita mawad-an og kadasig sa pagpadayon ug pakig-uban sa atong mga kahigalaan ug modangop na lamang sa mga kalibutanon o tawhanong kabtangan apan mohangad unta kita sa kahitas-an ug mangaliyupo sa pangaliya ug panabang sa atong mahigugmaong Amahan. Kay bisan diha sa atong mga kalisdanan Iya kitang gipahinumduman ug gigiyahan aron kita makaamgo nga ang tanan walay kapuslanan kon kini wala mahisukad sa kabubut-on ug kaayo sa makagagahum nga Amahan.

Giya alang sa Pamalandong:

1. Ang atong pagtuo maoy bahandi sa pagkab ot sa kinabuhing dayon. Naningkamot ba kita nga kini molambo diha sa pagpaminaw sa pulong sa Dios sa matag adlaw?

2. Malipayon ba akong nagpuyo sa kayano sa kinabuhi inubanan ang pagkamatinabangon sa akong isigkatawo?

f. PANGALIYA

Pangulo: Mag-ampo kita sa atong Makagagahum nga Dios, ang tuburan sa tanang grasya ug panalangin. Sa matag pangamuyo kita motubag: GINOO, DUNGGA KAMI.

1. Alang sa nagdumala sa Simbahan ilabina ang Santo Papa, mga Obispo ug kaparian nga sila mapuno sa kalipay ug kadasig sa ilang pagpaambit sa espirituhanon bahandi sa tanang katawhan. Mag-ampo kita.

2. Alang sa mga lideres sa tibuok nasud nga naningkamot nga mahatagan og kasulbaran ang mga nag-unang suliran sa katawhan makasinati kanunay sa presensya ni Kristo aron molahutay sila sa ilang gitinguha nga kalamboan alang sa tanan. Mag-ampo kita.

3. Alang sa atong mga kaigsoonan nga nagpuyo sa kaharuhay, nga makakat-on sila sa pagpaambit sa ilang bahandi ngadto sa uban sa mga nanginahanglan. Mag-ampo kita.

4. Alang sa matag pamilya nga ilang kahatagan og dakung bili ang kaanindot sa kinaiyahan nga gimugna sa Dios alang sa kabulahanan sa tanan ilabina sa gasa sa kinabuhi. Mag-ampo kita.

5. Alang kanatong tanan, nga makakat-on kita sa pag-atiman ug pag-amping sa mga butang nga gipiyal sa Dios kanato. Mag ampo kita.

6. Alang sa kaugalingon natong katuyuan, ato kining ihalad sa Dios diha sa kahilum.

Pangulo: Ginoo sa kagahuman, tuguti nga amo nang madawat ang grasya nga Imong gitagana alang kanamo subay sa Imong maayong kabubut-on pinaagi ni Kristo Imong Bugtong Anak ug among Manluluwas. Amen.