16th Sunday in Ordinary

Ikanapulog-unom nga Domingo Sulod sa Tuig

Liyok C

BASAHON 1

Gn. 18:1-10

KINUTLO GIKAN SA BASAHON SA GENESIS 

Ang GINOO mipakita kang Abraham didto sa sagradong mga kahoy ni Mamre.

Naglingkod si Abraham sa pultahan sa iyang tolda sa udtong tutok sa dihang mikalit pagtungha ang tulo ka tawo nga nagbarog didto. Sa pagkakita niya kanila, midagan siya aron pagtagbo sa mga tawo ug mihapa siya sa yuta ug miingon, "Sir, andam ako sa pag-alagad kaninyo, busa hapit intawon kamo sa akong balay. Ako inyong ulipon. Tugoti nga magpakuha akog tubig aron makahimasa kamo ug makapahulay unya kamo dinhi ubos niining kahoy. Magkuha akog pagkaon aron mabaskog kamo ug makapadayon sa inyong panaw. Andam ako pag-alagad kaninyo sanglit mianhi man kamo sa akong balay."

Sila mitubag, "Kon mao kana, buhata ang imong giingon."

Midali si Abraham pagsulod sa tolda ug giingnan niya si Sara, "Pagkuhag usa ka sako sa imong labing maayong harina ug paglutog pan. Dalia kini paghimo." Unya midagan si Abraham ngadto sa kahayopan ug nagpili siyag nating baka nga tambok ug humok pa, ug gihatag niya kini sa iyang ulipon; gidali usab kini paghikay sa ulipon. Unya nagkuha si Abraham ug kisiyo, lab-as nga gatas ug karne ug gidulot niya kini sa mga tawo. Samtang nagkaon sila, nagbarog siya duol kanila ubos sa kahoy.

Unya nangutana sila kaniya, "Hain man ang imong asawa nga si Sara?" "Anaa sa sulod sa tolda," mitubag siya.

Ang usa kanila miingon, "Isaad ko kanimo nga ang imong asawa nga si Sara manganak og lalaki iniglabay sa siyam ka bulan, ug nga mobalik ako inig-abot na nianang panahona."

ANG PULONG SA GINOO.

SALMO RESPONSORYO

Ps. 15:2-3, 3-4, 5

R. Ang maghimo sa katarong magpuyo sa atubangan sa Ginoo.

Siya nga nagalakaw nga walay sala; ug nagabuhat sa matarong nga nagahunahuna sa kamatuoran diha sa iyang kasingkasing, ug wala magasultig dautan sa iyang dila.

R. Ang maghimo sa katarong magpuyo sa atubangan sa Ginoo.

Siya nga wala magdagmal sa iyang isigkatawo, ni magmahay batok sa iyang silingan; Pinaagi kaniya ang dautan gitamay, samtang nagpasidungog siya kanila nga mahadlokon sa Ginoo.

R. Ang maghimo sa katarong magpuyo sa atubangan sa Ginoo.

Siya nga wala magpatanto og hilabihan sa iyang sapi ug wala modawat og suborno batok sa walay sala. Siya nga magabuhat niining mga butanga dili gayod masamok.

R. Ang maghimo sa katarong magpuyo sa atubangan sa Ginoo.

BASAHON II

Col. 1:24-28

KINUTLO GIKAN SA SULAT NI SAN PABLO NGADTO SA TAGA-COLOSAS

Ug karon gikalipay ko ang akong mga pag-antos tungod kaninyo. Kay pinaagi sa akong mga giantos nakatabang ako paghingpit sa wala pa matapos nga mga pag-antos ni Cristo alang sa iyang lawas nga mao ang simbahan. Gihimo ako sa Dios nga sulugoon sa simbahan, ug gitugyan niya kanako kining buhata alang sa inyong kaayohan. Kining buhata mao ang pagsangyaw sa hingpit sa iyang mensahe, nga gihatag niya kaniadto, apan gibutyag niya karon ngadto sa iyang katawhan. Kay ang laraw sa Dios mao nga ibutyag niya ngadto sa iyang katawhan ang iyang bahandianon ug mahimayaong tinago nga iyang giandam alang sa tanang katawhan. Ug ang tinago mao nga si Cristo anaa kaninyo nga nagapasabot nga makaambit kamo sa himaya sa Dios. Busa gisangyaw namo si Cristo ngadto sa tanang mga tawo. Gipa himangnoan ug gitudloan namo ang tanan ginamit ang tanan namong kaalam, aron pagdala sa tagsa-tagsa ngadto sa Dios ingon nga hingkod nga tawo nga nahiusa kang Cristo.

ANG PULONG SA GINOO.

EBANGHELYO

Lk 10:38-42

Kinutlo gikan sa Ebanghelyo sumala ni Lucas 

Ug samtang nanaglakaw sila, misulod siya sa usa ka balangay; ug adunay babaye nga ginganlan og Marta nga miabiabi kaniya.

Ug aduna siyay igsoong babaye nga ginganlan og Maria, nga naglingkod sa tiilan sa Ginoo ug nagapaminaw sa iyang pulong.

Apan si Marta nagkapuliki tungod sa daghang buluhaton. ug midúol siya ug miingon, "Ginoo, dili ka ba manumbaling nga ang akong igsoong babaye gipasagdan akò nga nag inusara sa pag-alagad? Busy sultihi siya nga abagan akò!" Apan mitubag kaniya ang Ginoo sa pag-ingon, "Marta, Marta, nabalaka ug nahasol kaayo ka sa daghang mga butang, apan usà ra gayod ka butang ang gikinahanglan. 

sa pagkatinuod si Maria mipili sa labing maayong bahin ug dili kini makuha gikan kaniya."

Ang Ebanghelyo sa Ginoo.

PASIUNA 

HULYO 17,2022

Maayong buntag /hapon mga igsoon diha ni Kristo.

Ania na kita sa ikanapulo'g Unom nga domingo sa Ordinaryong panahon.

Ang unang pagbasa gikan sa basahon sa Genesis. Kini naghisgot mahitungod sa pagpakita sa Ginoo ngadto kang Abraham didto sa Mamre.

Ang ikaduhang pagbasa gikan sa sulat ni San Pablo ngadto sa Taga Colosas siya nag nagpadayag sa iyang kalipay taliwala sa mga pag antos"

Ug ang ebanghelyo gikan sa ebanghelyo sumala ni San Lucas. Kini nagsaysay sa pagbisita ni Jesus sa balay ni Marta ug Maria.

Palihug manindog ang tanan alang sa pagsugod sa Santos na Eyukaristiya.

PANGALIYA

HULYO 17,2022

PARI: Mga igsoon uban sa dakung pagsalig ato karong ipadangat sa atong Langitnong Amahan ang atong mga pag-ampo ug panginahanglan.Sa matag pangamuyo kita moingon:

GINOO, PANALANGINI ANG IMONG KATAWHAN.

1. Alang sa mga pangulo sa Simbahang Katoliko, ang Santo Papa, mga Obispo ug mga pari, himoon unta silang maayong sumbanan sa pagpamati sa Pulong sa Dios, sama kang Maria diha sa Ebanghelyo, aron sa ilang pagsangyaw niini makita ug madungog sa mga tawo ang mensahe ni Kristo. Mag-ampo kita.

2. Alang sa mga nagdumala sa atong gobiyerno hatagan sila sa Dios, sa kaalam nga ilang gikinahanglan aron sa kanunay ilang matuman ang ilang mga katungdanan. Mag-ampo kita.

3. Alang sa tanang mga tawo nga nag antus sa kalisod sa kinabuhi, mga tigulang,mga masakaiton ug mga himalatyon, hupayon ug lig-onon unta sila sa Ginoo, aron taliwala sa ilang mga pag antus, padayon silang magsimba ug magdayeg sa Ginoo. Mag-ampo kita.

4. Alang nila ni nga nagpasalamat sa Dios, panalipdan ug bendisyonan unta sila sa Dios sa kanunay. Mag-ampo kita.

5. Alang sa mga kalag nila ni ug ang mga kalag sa tanang nangamatay, gantihan na unta sa kinabuhing tunhay. Mag-ampo kita.

PARI: Ginoong among Dios, nagsangpit kami kanimo sa kanunay tungod kay daku ang among pagsalig ug pagtuo kanimo. Nanghinaot kami nga imo untang hatagan og katumanan ang among mga pangamuyo,pinaagi ni Kristo among Ginoo. Amen.