SOLEMNIDAD SA SANTISIMA TRINIDAD

GKK GASA SA DIOS SA DAVAO 

NANAG-UBAN SA PANAW SA DIWA SA PAGKAPINAYALAN 50 ANYOS NA SA MISYON!

JUNE 10, 2022 BIYERNES

PASIUNA:

MGA KAIGSUONAN KO DIHA NI CRISTO, MAAYONG ADLAW KANINYONG TANAN!

NIINING KASAULOGAN SA PULONG, ATONG PAMALANDONGAN ANG MGA PAGBASA SA UMAABOT NGA PANGILIN SA SANTISIMA TRINIDAD - TULO KA PERSONA SA USA LAMANG SA DIOS - ANG DIOS AMAHAN, MAGBUBUHAT, KINSA, TUNGOD SA IYANG DAKONG GUGMA ALANG KANATO, NAGPADALA SA ATONG GINOONG JESUCRISTO, ANG DIOS ANAK, NGA MANUNUBOS, KINSA MISAAD SA DIOS ESPIRITU SANTO, NGA MAOY NAGSANTOS KANATO UG NAGPATUNHAY SA PRESENSIYA SA GINOO SA SIMBAHAN.

GIPADAYAG KANATO SA ATONG GINOONG JESUCRISTO ANG HULAGWAY SA DI MAKITA UG WALAY KINUTOBANG DIOS UG ANG KINAUYOKANG KINABUHI SA SANTISIMA TRINIDAD NGA MAO ANG GUGMA UG KAAMBITAN - USA KA HAGIT ALANG KANATO ISIP KATILINGBAN-NGA MAHISAMA UNTA KITA MAHIGUGMAON UG NAHIUSANG DIOS.

KARONG UMAABOT NGA DOMINGO, ANG TIBUOK ARCHDIOCESE SA DAVAO MAGSAULOG SA IKA-50 NA NGA TUIG SA MISYON SA GAGMAY'NG KRISTOHANONG KATILINGBAN. INUBANAN SA TEMA:

GKK GASA SA DIOS SA DAVAO NANAG-UBAN SA PANAW SA DIWA SA PAGKAPINAYALAN 50 ANYOS NA SA MISYON!

ISIP GKK, KITA MAGDAYEG UG MAGPASALAMAT SA DIOS AMAHAN, ANAK UG ESPIRITU SANTO SA IYANG PAGMUGNA KANATO ISIP KATILINGBAN UG SA IYANG PAGPADAGAYDAY SA NAGKADAIYANG GASA NGA ATONG GIPANAG-AMBITAN SA ATONG MISYON ISIP SIMBAHAN.

UBAN SA DAKONG PAGMAYA, ATONG DAYGON ANG SANTISIMA TRINIDAD. MANINDOG ANG TANAN.

Santisima Trinidad

[Dominggo human sa Pentekostes]

a. UNANG BASAHON

Buhat 2:42-47

Kinutlo gikan sa basahon sa Buhat sa mga Apostoles.

Gigamit sa kaigsoonan ang ilang panahon sa pagpamati sa mga pagtudlo sa mga apostoles, sa inigsoon nga pagpakig-uban kanila, ug sa pagpakig-ambitay sa pagpangaon ug sa mga pag-ampo.

Daghang mga milagro ug mga buhat nga katingalahan nahimo pinaagi sa mga apostoles ug tungod niini ang tanan giabot og katingala ug kahadlok. Ang tanang mga magtotoo nagpadayon sa inigsoon nga panag-uban ug ang kabtangan sa matag usa kanila gipanag-iya nilang tanan. Ug gipamaligya nila ang ilang mga katigayonan ug ang halin ilang giapod-apod ngadto sa tanan sumala sa gikinahanglan sa usag-usa. Nagpadayon sila pagtigom kada adlaw didto sa Templo, ug naghiusa sila pagpangaon uban sa masaya ug mapaubsanong kasingkasing didto sa ilang mga puloy anan. Ginadayeg nila ang Dios ug gikahimut-an sila sa katawhan. Ug sa matag adlaw gidugangan sa Ginoo ang ilang pundok og mga tawo nga ginaluwas.

Ang Pulong sa Ginoo.

b. SALMO RESPONSORYO  

Salmo 8:4-5,6-7,8-9

(R)- O Ginoo, among Dios, pagkakatingalahan sa imong ngalan sa tibuok kalibutan!

Sa pagtan-aw ko sa imong kalangitan, ang buhat sa imong mga tudlo, ang bulan ug ang kabitoonan nga imong gipahiluna, unsa ba ang tawo nga nanumbaling ka man kaniya, o ang anak sa tawo nga nagtagad ka man kaniya? (R)

Imo siyang gibuhat nga ubos lamang og diyutay sa mga anghel. Ug imo siyang gipurongpurongan sa himaya ug kadungganan, gihatag mo kaniya ang pagmando sa mga buhat sa imong mga kamot, gibutang mo ang tanan ubos sa iyang tiilan. (R)

Ang tanang mga karnero ug kabakahan. Oo, bisan ang mga mananap sa kaumahan, ang mga langgam sa kahanginan, ang mga isda sa kadagatan, ug ang tanang nga nagalangoy sa katubigan. (R)

c. IKADUHANG BASAHON

Roma 5:1-5

Ang pagbasa gikuha gikan sa sulat ni San Pablo ngadto sa mga taga-Roma.

Sanglit gihimo na man kitang matarong sa Dios pinaagi sa pagtoo, may panagdait na kita ug ang Dios pinaagi sa atong Ginoong Jesukristo. Pinaagi sa pagtoo gidala kita niya ngadto sa grasya sa Dios diin nagkinabuhi kita karon, ug nagmalipayon diha sa paglaum nga makaambit gayud kita sa himaya sa Dios. Nagmalipayon usab kita diha sa atong mga pag-antus, kay nasayud man kita nga ang mga pag-antus maghimo kanatong mapailubon. Ang pagpailob makapahimuot sa Dios ug ang iyang kahimuot naghatag kanato'g paglaum. Kining paglaoma dili gayud mapakyas kay gibubo man sa Dios ang iyang gugma sulod sa atong mga kasingkasing pinaagi sa Espiritu Santo nga gasa sa Dios kanato.

Mga igsoon, ang Pulong sa Ginoo.

d. EBANGHELYO

Juan 16:12-15

Ang pagsangyaw sa Maayong Balita sumala ni San Juan.

Si Jesus miingon sa iyang mga tinun-an, "Daghan pa unta kaayo ako'g isulti kaninyo, apan karon dili pa kamo makatugkad niini. Apan inig-abot sa Espiritu sa kamatuoran, tultolan kamo niya sa tibook kamatuoran. Dili siya magsulti sa iyang kaugalingong pagbuot, kondili sultihan kamo niya sa iyang nadungog ingon man sa mga butang umaabot. Himayaon ako, niya, kay ang ania kanako maoy iyang isulti kaninyo. Ang tanan nga iya sa Amahan ak-oa; busa giingon ko nga dawaton sa Espiritu ang ihatag ko kaninyo ug isugilon niya kini kaninyo.

Mga igsoon, ang Maayong Balita sa atong Ginoo.

KOMENTARYO

Tema: Ang Kahiusahan sa Santisima Trinidad

Atong makit-an diha sa atong mga pagbasa karong Dominggoha ang kinaiyahan sa Santisima Trinidad ang kinauyokan sa atong pagtuong - Kristohanon. Ang libro sa mga Panultihon sa nagpadayag sa relasyon sa Dios Amahan ug sa Dios Anak sa pagmugna sa mga binuhat. Pinaagi sa Pulong sa Ginoo, nga ania na sa wala pa lamang nahimo ang tanan, namugna ang kalibutan sa sinugdanan, ug kining Pulong natuman diha sa Iyang kinatibuk-an pinaagi sa pagpakatawo ni Kristo. Sa Ikaduhang Pagbasa, si San Pablo miingon sa mga taga-Roma nga tungod sa ilang paglaum sa Ginoong Jesus sila nakadawat og kaluwasan gikan sa Ginoo ug tungod niini natawo pag-usab diha sa grasya sa Ginoo. Kining maong paglaum mitubo pinaagi sa pangama sa Espiritu Santo. Ug diha sa Ebanghelyo si San Juan miingon nga pinaagi sa Espiritu Santo sila, ang mga apostoles, makadawat sa tibuok kamatuoran nga nagagikan sa Amahan pinaagi ni Kristo. Dinhi makit-an ang relasyon sa Santisima Trinidad nga ingon nga ang Anak naghimaya sa Amahan ang Espiritu usab naghimaya sa Anak.

Kining mga pagbasa nagpadayag sa makaluwas nga buhat sa Ginoo. Kining mga buhat nagpadayag lamang nga ang paghigugma sa Ginoo sa Iyang mga binuhat, ilabina sa Iyang mga katawhan dili gayud matugkad. Sa sinugdanan, ang Dios Amahan nagsaad sa Iyang katawhan og kaluwasan. Kini ang gihuptan nga paglaum sa Iyang katawhan sa mga nilabay nga mga katuigan, hangtud nga kining maong saad natuman diha kang Jesukristo, ang Pulong sa Dios nga nahimong Tawo. Sa Iyang pagpakasakit, pagkamatay ug pagkabanhaw, gipadayag sa Dios ang Iyang way sukod nga paghigugma sa Iyang mga katawhan. Sa wala pa si Jesukristo misaka sa langit uban sa Amahan, Iya nang gisaad ang pagpadala sa Espiritu Santo gikan sa Amahan diha sa Iyang mga disipulo aron makadawat sila sa tibuok kamatuoran ug magdasig kanila sa ilang pagsangyaw sa Maayong Balita nga mao si Kristo ngadto sa tibuok kalibutan.

Isip Iyang mga katawhan, kita usab nakadawat sa Iyang paghigugma ug kaluwasan. Pinaagi sa bunyag, gidawat nato ang grasya sa gugma ug kaluwasan sa Santisima Trinidad, ug kita nahimong mga anak sa Dios. Gitipon kita pinaagi sa Espiritu Santo isip usa ka lawas ni Kristo. Kita nahimong Kristiyano dili lang tungod sa tubig apan diha sa atong paghimamat sa buhing Dios. Kini nagpasabot nga ang mahigugmaong pagpadayag sa kaluwasan sa Ginoo usa ka personal nga pagpakiglambigit sa Dios sa Iyang katawhan. Siya ang unang mihimamat kanato.

Kita tuod daghan apan nagkahiusa isip usa ka katilingban. Kining panaghiusa mao ang timaan sa kahiusahan sa Santisima Trinidad. Kita nagatuo sa misteryo sa tulo ka persona, ang Amahan, Anak, ug ang Espiritu Santo, sa usa ka Balaan nga Dios nga nahiusa diha sa gugma. Ingon nga ang Amahan, ang Anak ug ang Espiritu Santo usa ra, nan kitang tanan gihagit sa pagpuyo nga puno sa pagtambayayongay ug pagpakiglambigitay aron atong mahuptan ang tiunay nga kahiusahan diha sa atong tagsatagsa ka katilingban.

Giya alang sa Pamalandong:

1. Ato bang nasinati ang mahigugmaon ug buhing presensya sa Dios sa atong tagsatagsa ka kinabuhi? Sa unsa mang pamaagi?

2. Unsa man ang atong tubag sa grasya nga atong nadawat gikan sa Ginoo, ug unsa man ang konkretong mga butang nga atong nabuhat aron atong masinati ang kahiusahan diha sa atong katilingban?

PANGALIYA SA KATILINGBAN JUNE 10, 2022 BIYERNES

PANGULO: MGA IGSUON, GIKAHIMUT-AN SA KATAWHAN ANG KINABUHI SA SIMBAHAN SA PANAHON SA MGA APOSTOLES UG SA MGA DISIPULO SA ATONG GINOONG JESUCRISTO TUNGOD KAY, SA ILANG PANAHON, GIPUY-AN NILA ANG KINABUHI SA SANTISIMA TRINIDAD, NGA MAO ANG GUGMA UG KAAMBITAN. MANGAMUYO KITA SA DIOS NGA MOLAHUTAY KITA SA PAGKINABUHI SA SAMA'NG HAGIT UG NGA SA ATONG PANAHON, DUGANGAN SA GINOO ANG DAKONG PUNDOK SA MGA GILUWAS NIYA NGA MGA ANAK PINAAGI SA ATONG GINOONG JESUCRISTO, DIHA SA KAAMBITAN SA ESPIRITU SANTO. SA MATAG PAG-AMPO KITA MOINGON: DIOS SA GUGMA UG KAAMBITAN, DUNGGA ANG AMONG PAG-AMPO.

ALANG SA TIBUOK SIMBAHAN ILABINA SA ATONG SANTO PAPA FRANCISCO, NGA LIG-ONON KITA KANUNAY SA DIOS SA PAGHARONG SA MGA HAYLO SA DAUTAN UG DIHA SA PAGBAROG SA KAMATUORAN SA PAGTUO TALIWALA SA NAGKALAINLAING HAGIT SA KALIBUTAN. MAG-AMPO KITA.

ALANG SA MGA NAMUNOAN SA GOBIYERNO, NGA MAGMAABLIHON SILA SA PULONG SA GINOO NGA MAOY MATUOD NGA GIYA ALANG SA PAGPATUNHAY SA KATARONG, KAANGAYAN, KALINAW UG KAGAWASAN. MAG-AMPO KITA.

ALANG SA MGA NAG-ANTUS SA LAWAS UG KALAG, ILABINA ANG MGA KABUS NATONG KAIGSUONAN, NGA PINAAGI KANATO, MAKASINATI SILA SA MAKAALIM NGA GUGMA SA DIOS DIHA SA PAGHIUSA NILA SA ILANG PAG ANTUS KANG CRISTO UG NGA MAKAKAPLAG SILA SA KAHUPAYAN NGA MAOY TIMAILHAN SA PRESENSIYA SA ESPIRITU SANTO. MAG-AMPO KITA.

ALANG KANATONG TANAN UG SA TIBUOK SIMBAHAN SA DAVAO, NGA NAGASAULOG SA IKA-50 NA NGA TUIG DIHA SA MISYON SA GKK, MAKAKAT ON UNTA KITA SA MAKANUNAYON NGA PAGDAYEG UG PAGPASALAMAT SA DIOS KINSA NAGAHATAG KANATO SA MGA GRASYA NGA ATONG GIKINAHANGLAN UG NAG-AGAK KANATO SA PAGKINABUHI SA DIOSNONG GUGMA UG KAAMBITAN. MAG-AMPO KITA.

ALANG SA MGA MAGTUTUONG NAHIKATULOG NA SA KAPAHULAYAN SA DIOS ILABINA KANILA NGA KANIADTONG MGA PANGULO UG MIYEMBRO SA ATONG GKK, MAKAANGKON NA SA GANTI NGA GISAAD ALANG KANILA NGA NAGMASINUGTANON SA DIOSNONG KABUBUT-ON. MAG-AMPO KITA.

PANGULO: MAKAGAGAHUM UG MAHIGUGMAONG DIOS, DUNGGA ANG AMONG MGA PANGAMUYO UG DASIGA KAMI SA AMONG PANAW PAINGON NGANHA KANIMO. MAKITA UNTA NAMO KANUNAY ANG IMONG KAMOT NGA NAGAGIYA SA KANAMO SULOD SA AMONG KASAYSAYAN. DUGANGI ANG AMONG PAGTUO DIHA SA AMONG PAG-ILA KANIMO ARON MAS MAHIGUGMA PA KAMI KANIMO. PINAAGI NI CRISTO UBAN SA ESPIRITU SANTO, DIOS, HANGTOD SA KAHANGTURAN. AMEN.