SOLEMNIDAD SA LAWAS UG DUGO NI KRISTO

Corpus Et Sanguinis Christi

BASAHON I

Gn. 14:18-20

KINUTLO GIKAN SA BASAHON SA GENESIS

Si Melquisedec nga hari sa Salem ug pari usab sa Labing Halangdong Dios nagdalag pan ug bino, ug gipanalanginan niya si Abram sa pag-ingon: "Panalanginan unta si Abram sa Labing Halangdong Dios nga maoy nagbuhat sa langit ug sa yuta. Dalaygon ang Labing Halangdong Dios nga naghatag kanimog kadaugan batok sa imong kaaway."

ANG PULONG SA GINOO.

SALMO REPONSORYO

Ps. 110:1, 2, 3, 4

R. Ikaw pari sa kahangturan sa laray ni Melquisedec.

Ang Ginoo nag-ingon sa akong Ginoo, "Lingkod sa akong tuo hangtod himoon ko ang imong mga kaaway nga tumbanan sa imong mga tiil." 

R. Ikaw pari sa kahangturan sa laray ni Melquisedec.

Ang setro sa imong gahom

ibakyaw sa Ginoo gikan sa Sion:

"Paghari diha sa taliwala sa imong

mga kaaway." 

R. Ikaw pari sa kahangturan sa laray ni Melquisedec.

"Imo ang harianong gahom

sa adlaw sa imong pagkatawo diha sa balaan nga kasanag; Sa wala pa ang kabugason sama sa yamog, gianak ko ikaw."

R. Ikaw pari sa kahangturan sa laray ni Melquisedec.

Ang Ginoo nanumpa ug dili siya magbasol: "Ikaw pari sa kahangturan, sa laray ni Melquisedec."

R. Ikaw pari sa kahangturan sa laray ni Melquisedec.

BASAHON II

1 Cor. 11:23-26

KINUTLO GIKAN SA UNANG SULAT NI SAN PABLO NGADTO SA TAGA-CORINTO

Kay nadawat ko gikan sa Ginoo ang pagtulon-an nga akong gitudlo kaninyo: nga ang Ginoong Jesus, sa gabii nga siya gibudhian, mikuha sa pan. Unya nagpa salamat siya sa Dios, ug gipikaspikas niya ang pan ug miingon, "Mao kini ang akong lawas nga gitugyan alang kaninyo. Buhata kini aron paghandum kanako." Human sa panihapon gikuha niya ang kopa ug miingon, "Mao kini ang kopa sa bag-ong kasabotan nga gitiman-an sa akong dugo. Matag inom ninyo niini, buhata sa paghandum kanako." Kay sa matag kaon ninyo niining pan ug sa matag inom ninyo niining kopa, gisangyaw ninyo ang iyang kamatayon hangtod sa pagbalik niya.

ANG PULONG SA GINOO.

PASIUNA

HUNYO 19,2022

Maayong buntag / hapon mga igsoon diha ni Kristo.

Ang tibuok simbahang Katoliko nagsaulog sa Solemnidad sa Lawas ug Dugo ni Kristo, nga nailhan usab nga Corpus Christi.

Ang unang pagbasa gikan sa Basahon sa Genesis. Kini nag hisgot sa panagtagbo ni Melquisedec ug Abram.

Ang ikaduhang pagbasa gikan sa Unang sulat ni San Pablo ngadto sa taga -Corinto. Siya nagpahinumdum kanato sa katapusang panihapon ni Cristo ug sa iyang mga tinun-an.

Ang ebanghelyo gikan sa Ebanghelyo sumala ni San Lucas. Kini naglarawan sa pagpakaon ni Cristo sa lima ka libohang lalaki.

Palihug manindog alang sa pagsugod sa Santos nga Eyukaristiya.

PANGALIYA 

Hunyo 19,2022

PARI: Ang Lawas ug Dugo sa atong Ginoong Jesukristo usa ka bililhong gasa sa Dios alang kanato, tungod niini mangaliyupo kita karon ngadto sa langitnong Amahan. Alang sa atong mga panginahanglan sa matag pangamuyo kita moingon.

DIOS SA GUGMA, DUNGGA KAMI.

1. Amahan sa gugma hatagig igong kusog ug kadasig ang Santo Papa, mga Obispo ug mga kaparian aron malipayon silang mag alagad kanimo ug makanunayong magsangyaw sa Maayong Balita sa kaluwasan. Mag-ampo kita.

2. Amahan nga maluluy-on itugot nga ang among mga pangulo sa nasud makabaton ug mga maayong desisyon nga haum sa imong kabubut-on alang sa kalambuan sa tanan. Mag-ampo kita. 

3. Amahan sa kinabuhi, lig-ona ug hatagig kadasig ang among mga igsoon nga nag-antus sa kapit-os sa kinabuhi, mga masakiton, ug mga tigulang aron dili sila kawad- an sa paglaum ug kanunay'ng masaligon kanunay kanimo. Mag-ampo kita.

4. Amahan sa grasya, panalangini ug panalipdi ang tanan nga nagadayeg ug nagapasalamat kanimo, hilabina nila______ ug himoa silang panalangin alang sa uban. Mag-ampo kita.

5. Amahan nga mapasayloon, dawata diha sa imong gingharian ang among mga igsoon nga nangamatay hilabina sila__________________ug hatagi sila sa kinabuhing dayon. Mag ampo kita. 

PARI: Langitnong Amahan, dungga ang pangamuyo sa imong katawhan. Kini among gipangayo pinaagi ni Kristo among Ginoo.