LAWAS UG DUGO NI KRISTO (Corpus Christi)

LAWAS UG DUGO NI KRISTO

(Corpus Christi) 

a. UNANG BASAHON

Genesis 14:18-20

Ang pagbasa gikuha gikan sa basahon sa Genesis.

Si Melquisedec nga hari sa Salem ug pari usab sa Labing Halangdong Dios nagdala'g pan ug bino, ug gipanalanginan niya si Abram sa pag-ingon:

"Panalanginan unta si Abram sa Labing Halangdong Dios nga maoy nagbuhat sa langit ug sa yuta. Dalaygon ang Labing Halangdong Dios nga naghatag kanimo'g kadaugan batok sa imong kaaway."

Ug gihatagan siya ni Abram sa ikapulo nga bahin sa tanang nga iyang nailog.

Mga igsoon, ang Pulong sa Ginoo.

b. SALMO RESPONSORYO

Salmo 110:1,2,3,4

Tubag (R) - Ikaw pari sa kahangturan sa laray ni Melquisedec.

Ang Ginoo nag-ingon sa akong Ginoo, "Lingkod sa akong tuo hangtud himoon ko ang imong mga kaaway nga tumbanan sa imong mga tiil. (R)

Ang setro sa imong gahum ibakyaw sa Ginoo gikan sa Sion; "Paghari diha sa taliwala sa imong mga kaaway." (R)

Imo ang harianong gahum sa adlaw sa imong pagkatawo lub diha sa balaan nga kasanag, sa wala pa ang kabugason sama sa yamog, gianak ko ikaw. (R)

Ang Ginoo nanumpa ug dili siya magbasol; ikaw pari sa kahangturan sa laray ni Melquisedec. (R)

c. IKADUHANG BASAHON

1 Corinto 11:23-26

Ang pagbasa gikuha sa unang sulat ni San Pablo ngadto sa taga-Corinto.

Nadawat ko gikan sa Ginoo ang pagtulon-an nga akong gitudlo kaninyo: nga ang Ginoong Jesus, sa gabii nga siya gibudhian, mikuha sa pan. Unya nagpasalamat siya sa Dios, ug gipikaspikas niya ang pan ug miingon, "Mao kini ang akong lawas nga gitugyan alang kaninyo. Buhata kini aron paghandum kanako." Human sa panihapon gikuha niya ang kupa ug miingon, "Mao kini ang kupa sa bag-ong kasabutan nga gitiman-an sa akong dugo. Matag-inom ninyo niini, buhata sa paghandum kanako." Kay sa matag kaon ninyo niining pan ug sa matag inom ninyo niining kupa, gisangyaw ninyo ang iyang kamatayon hangtud sa pagbalik niya.

Mga igsoon, ang Pulong sa Ginoo.

d. EBANGHELYO

Lucas 9:11-17

Ang pagsangyaw sa Maayong Balita sumala ni San Lucas.

Si Jesus misulti sa katawhan mahitungod sa Gingharian sa Dios ug iyang giaayo ang mga masakiton.

Sa nagkasalop na ang adlaw, nanuol kang Jesus ang napulo'g-duha ka tinun-an ug miingon, "Paadtoa ang mga tawo sa kasikbit nga mga balangay ug kaumahan aron mangita'g pagkaon ug abotanan kay hilit kining dapita."

Apan miingon si Jesus kanila, "Kamo ang maghatag kanila'g pagkaon." Sila nanubag, "Lima ra ka pan ug duha ka isda ang ania kanamo. Buot ka ba nga manlakaw kami ug mamalit og pagkaon alang niining mga tawhana?" Didto may mga lima ka libo ka mga tawo niadtong tungora.

Unya miingon si Jesus sa iyang mga tinun-an, "Palingkora ang mga tawo ug papundoka sa tinag singkwenta.

Gituman kini sa mga tinun-an ug gipalingkod silang tanan. Mikuha si Jesus sa lima ka pan ug sa duha ka isda, ug miyahat siya sa langit ug nagpasalamat sa Dios. Unya gipikaspikas niya ang pan ug gihatag niya kini sa mga tinun-an aron ilang idulot sa mga tawo. Nangaon ug nangabusog silang tanan; ug human niini nakahipos ang mga tinun-an og napulo'g-duha ka bukag nga salin sa mga tawo.

Mga igsoon, ang Maayong Balita sa atong Ginoo.

KOMENTARYO

Tema: Pagkulang sa Katilingban, Higayon sa Pagkabulahan

Niining Solemnidad sa Lawas ug Dugo ni Kristo, kita gihagit sa pagpamalandong niining tulo ka mga punto.

Una, ngano nga duna may kasinatian sa kanunay nga pagkulang? Kulang sa kuwarta, sa panahon, sa katakus. Kanus-a pa man diay kita makompleto ug matagbaw? Matud pa ni Papa Francisco: Ang gugma dili matapos ug makompleto. Kanunay kini nga nangandoy ug naningkamot nga makab-ot ang katagbawan uban sa iyang pinangga. Sa pagpikas sa duha ka pan ug lima ka isda gipasabot ni Jesus nga kita kanunay makulangan hangtud mapuno kita sa gugma sa Dios. Dili kita matagbaw hangtud ang Dios maoy magpakaon kanato. Mangandoy unta kita sa Iyang katagbawan nga maoy makapuno kanato.

Ikaduha, duna bay importansiya ang kinabuhing katilingbanon? Kinahanglan ba kitang mopaambit sa uban bisan kita naglisud usab ug angay unta nga maoy hatagan? Si Papa Francisco nagkanayon: ang kinabuhing katilingbanon adunay dakung kasingkasing. Andam kini nga mopaambit bisan sa dyutay nga anaa Kaniya. Sama sa gihimo ni Kristo, Siya nagpasalamat bisan sa diyutay nga anaa Kaniya. Sama nga gipanalanginan ni Melchizedek si Abraham, kita usab unta kanunay manalangin bisan sa gamay nga ania kanato kay kini padaghanon sa Dios kung kita mag-inambitay uban sa dakung kasingkasing.

Ikatulo, unsa may makuha nato kung kita mopuyo sa tinuoray isip miyembro sa lawas ni Kristo? Duna ba kini mahatag kanako kung ako makiglambigit? Pulong ni Papa Francisco: pagkabulahan sa tawo nga nagdala sa kaluoy ug puangod sa Ginoo ngadto sa uban. Daku nga kalipay nga dili kabayran og kuwarta ang mahatag niadtong magmatinud-anon isip sakop sa lawas ni Kristo. Niining paagiha atong gisangyaw ang kamatayon ug pagkabanhaw sa atong Ginoo. Kini nga pagsangyaw dili lamang sa pulong kon dili sa buhat. Duna gayo'y kasinatian sa pagkulang sa kinabuhing katilingbanon aron atong masinati nga kita gitawag sa pagkabulahan.

Giya alang sa Pamalandong:

1. Taliwala sa akong panginahanglan, unsa man ang mahimo nakong ikapaambit sa uban? 

2. Sa unsang paagiha ako mamahimong panalangin ngadto sa akong isigkatawo?

PANGALIYA

Pangulo: Mga igsoon, niining pagsaulog nato sa Solemnidad sa Lawas ug Dugo ni Kristo kita gidasig sa pagpakighiusa Kaniya diha sa atong matag adlaw nga pagkinabuhi. Sa matag pag ampo kita motubag: DIOS SA GUGMA DUNGGA KAMI.

1. Amahan sa gugma Imong gitugyan ang Imong Anak alang sa kabulahanan sa Imong Simbahan. Hatagi og igong kusog ug kadasig ang mga nag-alagad sa Imong banay. Mag-ampo kita.

2. Amahan nga maloloy-on, itugot nga ang among mga pangulo sa nasud makabaton og mga maayong desisyon nga haum sa Imong kabubut-on alang sa kalamboan sa tanan. Mag-ampo kita.

3. Amahan nga tinubdan sa kinabuhi, lig-ona ug hatagig kadasig ang among mga igsoon nga ang-antus sa kapit-os sa kinabuhi nga dili sila kawad-an og paglaum sa pagpadayon sa pagpakabuhi. Mag-ampo kita.

4. Amahan nga tinubdan sa grasya, himoa kaming angayan sa matag dawat namo sa Lawas ug Dugo ni Kristo nga bisan pa sa among pagkamasalaypon gihatagan Mo kami og higayon nga mahiduol Kanimo. Mag-ampo kita.

5. Amahan nga malumo og kasingkasing lamdagi ang tanang katawhan sa kabililhon sa Lawas ug Dugo ni Kristo diha sa kinasingkasing nga pagdawat Kaniya sa Santos nga Yukaristiya. Mag-ampo kita.

6. Amahan diha sa kahilum among ihalad ang among kaugalingong katuyuan.

Pargulo: Amahan nga walay kinutuban, dungga ang pangamuyo sa Imong katawhan nga nangandoy nga mahiusa kanunay sa Imong bililhong Anak nga namatay alang sa among kaluwasan. Kini among gipangayo pinaagi ni Kristo among Ginoo ug Manunubos. Amen.